Gimpuunan 24
24
Asawa para sa kan Isaak
1Gurangun yi gid si Abraham ag pinapaladan siya Panginuun sa tanan pag bagay. 2Sa usa ka sirang, hinampang niya kay manugpamahala#24:2 manugpamahala: ngatay, pinagkagurangun. pag suruguun taga asikasu sa tanan niya kasiyunan. Magkun siya, “Paulian kanmu usa ka kamang sa tab-anan niku balangbang,#24:2 Paulian ... balangbang: Kay ibug sabihun, paulian ati gid sa kay sarupangan tanda sa sumpa. 3ag pagsumpa kawu sa kangku sa ngaran Panginuun, ti Diyus langit ag daga, kuntay balaw kawu manpili arasawan-un niku anak ni Isaak sitay ginan sa Kanaan kaibahan nita mag-ulian. 4Pag-atag kawu sa dinak-anan niku pag rugar, ag ati kawu pagpili babayi maasawa niku anak, ni Isaak, ginan sa kang manga katawuhan.” 5Dapat nagpaingana ti suruguun, “Kabitay duy nu dayu manguyug tunda pag babayi ataytabug? Daran-un yi lang aw lugud niku si Isaak atag?” 6Sinmagut si Abraham, “Danga gid pagdaraha atag si Isaak! 7Dinara aku sitay tag Panginuun, ti Diyus kalangitan, ginan sa magtal-anakan niku ama, sa rugar nu naan aku pag ainanak. Ag nagsumpa siya kay ipakaun inda pag daga Kanaan sa kang manga linahi. Nakan pagginan yi kawu dahil manpadara ti Panginuun kay anghil man-iba sa kanmu hampay makakit kawu ati maasawa niku anak. 8Nu balaw kumuyug sa kanmu ti babayi, unman kawu may saragtun sa inda pag sumpa nimu sa kangku. Dapat danga nimu pag daraha atabug kang anak.” 9Nakan ipinauli suruguun kay kamang sa tab-anan balangbang ni Abraham, kay amu, ag nansumpa kuntay sundun niya kay pag-isugu sa kanya. 10Bag-u nagbuul ti suruguun sampulu ka kamilyu hanggan manga mahalaga pag pamakaun ginan sa kay amu, sa kan Abraham. Linmakaw siya atabug sa Aram Naharaim,#24:10 Naharaim: Usa ka rugar sa Misuputamya. ti pag-ulian ni Nahur pag banwa.
11Igu rinmas-ug ti suruguun sa banwa, pinaluhud niya ti manga kamilyu arani sa may bubun sa may luwas banwa. Malambung yi tunda katpung, udas yi panaas danum manga kababayihan.
12Nandarangin ti suruguun magkun, “Panginuun, Diyus niku amu, ni Abraham, mana mitarus duy kang turunu atay, pakakitan nimu kanmu kaayadan sa kang amu. 13Tumindug duy aku sa may arani bubun habang magtaas ti manga babayi sa inda pag banwa. 14Nu manhagad aku danum sa banga usa ka daraga, bag-u pumasnu siya painmun aku hanggan kang manga kamilyu, mana siya yi pag babayi kanmu pinili maasawa nimu suruguun, ni Isaak. Sa katida pag paraan maalaman niku ipinakakit nimu kanmu kaayadan sa kang amu, sa kan Abraham.”
15Unman waya tapus kay darangin, rinmas-ug si Ribika may pas-an banga. Si Ribika kay anak ni Bitwil, bag-u si Bitwil kay anak ni Nahur ag ni Milka. Si Nahur kay patar-ari ni Abraham. 16Marinu gid pag daraga si Ribika ag tugnaw#24:16 tugnaw: sa Tagalog, birhen. waya. Linmus-ug siya atabug sa bubun ag sinukadan niya danum kay banga. Bag-u tinmukad maan siya hampay muli. 17Nagdaldali ti suruguun sa pagsulang sa kanya ag magkun, “Mahimu aw duy makainum aku sa kanmu banga una diit lang?”
18Sinmagut si Ribika, “Hu duy, pag-inum kawu.” Ginan sa kay labay kay ipinadna kay banga ag hiniyaptan inda habang mag-inum ti suruguun. 19Igu napainman niya ti suruguun, magkun siya, “Mantaas maan duy aku para sa kanmu manga kamilyu tugka sa makainum sida tanan.” 20Daldali niya ibinuhus ti danum sa irinman hayup ag binmalik siya sa bubun hampay mantaas maan. Nantaas siya tugka sa nakainum ti tanan kamilyu. 21Habang magbantay ti suruguun sa kan Ribika, mag-isip siya nu tunda yi ngani ti sagut Panginuun sa kay turunu sa tunda pag rugar.
22Pagka nakainum ti manga kamilyu, binulwat suruguun kay dara aritus gintu para sa irung kay buyat manga unum ka guhit. Binulwat diman niya ti duwa ka ugsung gintu kay buyat manga 120 ka guhit. Ag ipinakaun niya inda sa kan Ribika. 23Bag-u nagpaingana siya sa kan Ribika, “Kantapu kawu pag anak? May rugar aw waya duy asan sa kanyu ti mahimu nimi maturugan kainda pag yabi?” 24Nagsagut si Ribika, “Kan Bitwil aku pag anak, anak lalaki nida ni Nahur ni Milka. 25May maturugan waya duy kawu ati sa kanmi, ag may imaw diman mayamu pag dayami hanggan karan-unun para sa manga kamilyu nimu.” 26Linmuhud ti suruguun ag nagsamba sa Panginuun. 27Magkun siya, “Dayawun ti Panginuun, ti Diyus niku amu, ni Abraham. Ipinakakit gid niya kay kaayadan sa kang amu. Aku ngap mismu kay giniyahan atabug sa manga katawuhan niku amu.”
28Palagiw nuli si Ribika sa balay niya ina ag itinultul niya sa kanda ti tanan nangyari. 29-30Kay patar-ari si Laban ati diman magpatingi sa kay pag-itultul tungkul sa sinabi tawu sa kanya. Nakitan ni Laban ti aritus hanggan ti ugsung masulungan sa kan Ribika. Nakan nalagiw siya atabug sa bubun ag inatag ti pagkumnun ni Ribika pag tawu. Ati diman ti tawu matindugan sa may arani bubun, sa arani manga kamilyu. 31Magkun si Laban sa kanya, “Kawu maaw pag tawu ti pinapaladan Panginuun. Hayga duy matindugan kawu siyun sa luwas? Abala yi atag kita sa balay, dahil inalistu yi niku ti sulud-sulud para sa kanyu hanggan ti rugar para sa kanmu manga kamilyu.”
32Kinmuyug ngani ti suruguun sa kan Laban. Igu rinmas-ug sida sa balay, ipinadna ni Laban ti manga makargahan sa manga kamilyu bag-u susun niya pinakan-an dayami hanggan karan-unun ti kamilyu. Dinarahan diman niya danum ti suruguun hanggan kay manga kaibahan, hampay makaugas sida kanda manga lulud. 33Pagka napakan-an yi sida karan-unun, magkun ti suruguun, “Balaw aku mangaun sa udwaya niku masabi kang turunu ataytabug.” Sinmagut si Laban, “Hu, tultulan sa kanmi.”
34Magkun siya, “Suruguun aku ni Abraham. 35Pinapaladan Panginuun kang amu ag mayaman yi gid siya taynguna. Pinakan-an siya Panginuun mayamu karanidu, kambing, baka, kamilyu, asnu, pilak, gintu hanggan manga suruguun lalaki ag babayi. 36Una gurangun yi kay asawa si Sara, nagkaanak waya siya. Ag kanda anak lalaki imaw ti manmana tanan kasiyunan niya. 37Pinasumpa aku niku amu hampay tupadun niku kay sugu. Magkun siya, ‘Danga kawu magpili arasawan-un niku anak sitay ginan sa manga taga Kanaan ti pag-ulian nita pag daga taynguna. 38Pag-atag kawu sa ulian niku ama, ati kawu pagpili maasawa niku anak, ginan sa kang manga katawuhan.’ 39Dapat nagpaingana aku, ‘Kabitay duy nu balaw kumuyug sa kangku ti babayi?’ 40Nagsagut siya, ‘Ti Panginuun kang pagsundun pumadara anghil hampay giyahan kawu agud matupad kanmu turunu ati. Kumakit kawu maasawa niku anak ginan sa kang manga katawuhan, sa magtal-anakan niku ama. 41Nu atabug kawu sa kang manga katawuhan, unman yi kawu may saragtun sa sumpa nimu sa kangku nu balaw nida ipakuyug ti babayi sa kanmu.’
42“Nakan pagras-ug niku kis-ab sa bubun, nandrangin aku. Magkun aku, ‘Panginuun, Diyus niku amu, ni Abraham, mana mitarus duy kang gayak ataytag. 43Taynguna duy, matindugan aku atay sa may bubun. Nu may rumas-ug duy daraga manaas danum, manhagad aku danum kadiit sa kay banga. 44Nu pumasnu duy siya painmun aku hanggan kang manga kamilyu, mana siya yi ngani duy pag babayi ti pinili nimu maasawa anak niku amu.’
45“Udwaya ngani aku magkatapus sa kang darangin, rinmas-ug si Ribika may pas-an banga. Linmus-ug siya atabug sa bubun ag nantaas. Magkun aku sa kanya, ‘Mahimu aw aku makainum?’ 46Susun niya ipinadna kay pas-an banga ag magkun, ‘Hu, pag-inum kawu, ag painmun diman niku kanmu manga kamilyu.’ Nakan inminum ngani aku ag pinainman diman niya kang manga kamilyu. 47Bag-u nagpaingana aku sa kanya nu kantapu siya pag anak. Nagsagut siya, ‘Kan Bitwil, kay anak lalaki nida ni Nahur ni Milka.’ Ag pinaulian niku aritus kay irung ag pinasulungan manga ugsung kay manga takyay. 48Susun nagluhud aku nagsamba sa Panginuun. Nagdayaw aku sa Panginuun, ti Diyus niku amu, ni Abraham. Siya ti naggiya sa kangku sa hustu pag rugar, nu naan pag nakitan niku ti anak katawuhan niku amu hampay maasawa niya anak.
49“Taynguna, gustu niku maalaman nu pasnuan niyu aku maasawa ni Isaak si Ribika bilang pagpakakit kanyu kaayadan sa kang amu. Sabiha yi niyu taynguna hampay maalaman diman niku nu hintay kang buwatun.” 50Nagsagut si Laban hanggan si Bitwil, “Dahil inda ti kagustuhan Panginuun, unman yi kami may masabi. 51Indaay si Ribika, tabana nimu siya sa kanmu pag-uli hampay maasawa nimu anak amu, angay sa sinabi Panginuun.” 52Igu nasaydan tunda suruguun, linmuhud siya ag nagsamba sa Panginuun. 53Susun niya binulwat kay dara manga pamarinu buwat sa gintu ag pilak, hanggan ti manga rutay, bag-u ipinakaun sa kan Ribika. Pinakan-an diman niya mahalaga pag pamakaun kay patar-ari lalaki hanggan kay ina ni Ribika. 54Siyun ginan, kinmaun ti suruguun hanggan kay manga kaibahan. Ati sida pag naturug sa tunda pag yabi.
Igu nipulaw sida sa surip, magkun ti suruguun, “Muli yi aku sa kang amu.” 55Dapat magkun kay patar-ari hanggan kay ina ni Ribika, “Pagsitay lang dap si Ribika sa kanmi una lang sampulu ka sirang, siyun ginan mahimu yi kamu guminan.” 56Dapat magkun ti suruguun, “Danga waydi aku pagpadugaya sitay. Giniyahan aku Panginuun sa kang turunu atay, nakan paulia yi niyu aku sa kang amu.” 57Sinmagut sida, “Tawagun dap nimi si Ribika ag paingan-un nu hintay kay pasya.” 58Nakan tinawag ngani nida si Ribika ag pinaingana, “Magkaibug aw kawu kumuyug sa kanya taynguna?”
Nagsagut si Ribika, “Hu, kumuyug aku.” 59Nakan ipinakuyug nida si Ribika hanggan ti taga alaga niya sa suruguun ni Abraham hanggan kay manga kaibahan. 60Pinapaladan nida si Ribika sa kay pagginan. Magkun sida,
“Patar-ari, mana kawu ti ina mayamu gid pag linahi.
Mana taluhun manga linahi nimu kanda manga kalaban.”
61Pagka alistu yi ti tanan, sinmakay si Ribika hanggan kay manga suruguun babayi sa manga kamilyu, ag dinmasun sida sa suruguun ni Abraham.
62Ati katpung, si Isaak mag-uli sa Nigib bag-u lang nakaaput sa Biir Lahay Ruy. 63Pagka marukirum yi, linmuwas si Isaak ag linmakaw-lakaw sa tanman. May nakitan siya manga kamilyu magras-ug. 64Pagka nakitan ni Ribika si Isaak, dinmugsun siya sa kay kamilyu 65ag nagpaingana sa suruguun ni Abraham, “Si unu pag tawu ti maglakaw tidaay sa may tanman?”
Sinmagut ti suruguun, “Siya kang amu si Isaak.” Nakan tinumungan#24:65 tinumungan: sa Tagalog, belo. ni Ribika kay uyahun.
66Sinabi suruguun sa kan Isaak ti tanan binwat niya. 67Bag-u dinara ni Isaak si Ribika sa turda sa pag-ulian kaybi niya ina ni Sara. Naasawa niya si Ribika ag pagmahalun gid niya inda. Nakan nahimasmasan ti karukuan ni Isaak sa pagkamatay niya ina.
Currently Selected:
Gimpuunan 24: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
