Gimpuunan 9
9
Ti Kasunduan Diyus sa kan Nuwi
1Pinapaladan Diyus si Nuwi hanggan kay manga anak ag sinabi, “Pagpakayamu kamu hampay umaduk ag mangalat sa buu kalibutan. 2Madala sa kanyu ti tanan hayup: ti maglakaw, ti maglayang, ti magyapang, hanggan ti maglanguy. Kamu ti manpamahala sa kanda tanan. 3Pag-ipakaun niku inda pag manga hayup sa kanyu bilang kanyu karan-unun, parihu diman ipinakaun niku sa kanyu ti manga halaman hampay kanyu makaun. 4Dapat danga niyu pagkan-a ti hayup balaw linmuwas kay dugu sa kay pagkamatay, dahil ti dugu pahalimbawa buhi. 5Ag pihu suktun niku ti una si unu ti manmatay sa kanyu, una ti manga hayup. Suktun gid ngani niku ti una si unu ti manmatay sa kay kaparihu. 6Una si unu ti manmatay sa kay kaparihu kailangan matyun diman siya niya kaparihu. Dahil ti tawu binwat Diyus ga kay histuda. 7Taynguna, pagpakayamu kamu hampay umaduk ag mangalat sa buu kalibutan.”
8Magkun waya ti Diyus sa kan Nuwi hanggan sa kay manga anak, 9-11“Inda kang kasunduan sa kanyu hanggan sa manga lahi niyu, ag sa tanan hayup kanyu nakaibahan sa barku hanggan sa tanan hayup magkabuhi sa kalibutan: Balaw yi niku umanun rurisun sa panab-anan gunaw ti tanan pag magkabuhi. Udyi may gunaw mangyari hampay maruris ti kalibutan.” 12-13Ag magkun waya ti Diyus, “Bilang tanda kasunduan niku sa kanyu hanggan sa tanan hayup, ag sa lahi niyu sa aratubangun, ipauli niku kang balangaw sa manga rurum. 14Nu ipalwas niku ti manga rurum bag-u pumakakit ti balangaw, 15alalahanun niku kang kasunduan sa kanyu hanggan sa tanan hayup, balaw yi gid gunawun uman hampay rumuris sa tanan magkabuhi. 16Nu lumuwang ti balangaw sa manga rurum, alalahanun niku kang unman may katapusan pag kasunduan sa tanan magkabuhi sa kalibutan. 17Ti balangaw ti tanda niku kasunduan sa tanan magkabuhi sa kalibutan.”
Kay manga Anak ni Nuwi
18Inda kay manga anak ni Nuwi, kay manga nakaibahan ati sa barku: si Sim, si Kam ag si Hapit. (Si Kam kay ama ni Kanaan.) 19Sida tulu ti gimpuunan tanan tawu sa kalibutan.
20Si Nuwi usa ka manugtanman ag siya ti un-an nagtanum ubas. 21Pagka sa usa ka sirang, inminum siya irinmun makalangu ag nalangu siya. Naturug siya uba-uba sa sulud niya turda. 22Taynguna, si Kam kay ama ni Kanaan sinmulud sa turda, ag nakitan niya uba kay ama. Nakan linmuwas siya ag sinabihan niya kay duwa ka patar-ari. 23Binmuul rutay sida ni Sim ni Hapit bag-u ipinauli nida sa kanda labay, pagkatapus, pinmausun sida atabug sa sulud turda hampay takipan kanda ama. Balaw sida nag-aliwliw dahil dayu nida makitan kanda ama uba. 24Pagka nahumpawan yi si Nuwi sa kalanguhan, ag naalaman niya nu hintay ti binwat niya kap-usan pag anak, 25magkun siya:
“Saadan kawu Kanaan! Bumaliw pinakaababa kawu pag suruguun nimu manga patar-ari.”
26Ag magkun diman siya,
“Dayawun ti Panginuun, ti Diyus ni Sim.
Mana suruguun wadi ni Sim si Kanaan.
27Mana paluangun Diyus kay saklaw daga ni Hapit,
ag marinu mana ti pakiusahan manga linahi niya hanggan ti manga linahi ni Sim.
Mana suruguun diman ni Hapit si Kanaan.”
28Ginan sa nakalawuy gunaw, nabuhi waya si Nuwi manga 350 ka timpu. 29Namatay siya sa idad 950 ka timpu.
Currently Selected:
Gimpuunan 9: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
