Lukas 16
16
Ti Pahalimbawa sa Maradaya pag Katiwala
1Sinabi maan ni Hisus sa kay manga tuludluan, “May usa ka tawu mayaman, inintirga niya kay kayamanan sa usa ka katiwala. Pagka dugay nagras-ug sa kay amu ti sumbung maparasipalahun kunu pag katiwala. 2Tinawag niya amu kay katiwala bag-u kay pinaingana, ‘Hintay inda duy kang nabaritaan tungkul sa kanmu? Tultula mayad-mayad kanta kayamanan naan yi duy, dahil udyi kawu mahimu mag-alaga.’
3“Nag-isip ti katiwala sa kay sadili bilug magkun, ‘Hintay nguna kang buwatun, dahil bul-un yi niku amu taynguna sa kangku ginan kang katungkulan. Aku unman may kaya magkali manga kanal. Magkay-a waydi aku maghagad maghagad. 4Alam yi niku kang buwatun hampay tanggapun aku manga tawu sa kanda manga balay nu udyi aku katiwala.’ 5Nakan tinawag niya tigus-a tigus-a ti manga may utang sa kay amu. Pinaingana niya kay un-an magkun, ‘Kabitay kay kadaka kanmu utang sa kang amu?’ 6Magkun siya, ‘Usa ka gatus banga langis duy.’ Sinabi katiwala sa kanya, ‘Inda ti risibu nimu utang, dali pagtukaw kawu, isurat nimu limampulu ka banga.’ 7Sinabi maan katiwala sa kay ikadwa magkun, ‘Kanmu, kabitay waydi duy kay kadaka pag utang?’ Magkun siya, ‘Usa ka gatus pasung tirigu.’ Sinabi katiwala magkun, ‘Inda ti risibu nimu utang, isurat nimu walumpulu ka pasung.’
8“Nagdayaw kay amu sa tunda pag katiwala maradaya, dahil madunung siya magparaan. Dahil ti manga tawu taga kalibutan masyadu gid madunung magparaan sa kanda magpasundu sa kanda manga kaparihu, subra man sida madunung sa manga tawu nakaintindi tungkul sa Diyus.” 9Magkun si Hisus, “Pagsabihun gid niku sa kanyu, gamitun niyu kanyu kayamanan sitay sa babaw daga hampay kamu may kakilala mayad. Nu tabu yi kanyu kayamanan, tanggapun di nida kamu sa ulian unman may katapusan.
10“Ti tawu nu unman mapinasipalahun sa diit pag bagay, lalu yi sa daka pag bagay balaw ngap pumasipala. Ti tawu nu maradaya sa diit pag bagay, dumaya diman siya una sa daka pag bagay. 11Nakan nu kamu mapinasipalahun sa kayamanan sitay sa babaw daga, hintay ti pumaintirga sa kanyu tutuu pag kayamanan? 12Nu kamu mapinasipalahun sa tawu kasiyunan, hintay waya ti mamarti sa kanyu?
13“Unman may panawuhun makasirbi sa duwa ka amu, dahil kagalitan niya ti usa ag mahalun kay usa. Masurundun siya sa kay usa ag pabaya-baya siya sa kay usa. Dayu madungan masirbihan niyu ti Diyus hanggan kayamanan.”
Kay manga Binagaw ni Hisus
14Inda pag manga adal tanan-tanan nadnugan manga Parisiyu manga maraibgun sa kuwarta. Nakan linibak nida si Hisus. 15Dapat sinabi ni Hisus sa kanda magkun, “Kamu magpabalhinguun lang sa atubangan manga tawu, dapat alam di gid Diyus kanyu manga tagipusuun. Dahil ti pagpahalagahan manga tawu, pagbugyahan sa kay magbantay Diyus.
16“Ti Kasuguan ni Muysis hanggan ti Kasuratan manga purupita tugka lang sa kan Huwan Manugtulbaw. Siyun ginan pag-itudlu yi ti Mayad pag Barita tungkul sa kay paghari Diyus. Magpilit ti kada tawu hampay makapasakup siya sa kay paghari Diyus. 17Dapat balaw kay ibug sabihun udyi may pulus ti Kasuguan, dahil ti Kasuguan marig-un man sa inda pag langit ag daga, dayu maduraan kabuluhan una di usa ka kudlit Kasuguan.
18“Ti kada lalaki nu tumayak sa kay asawa bag-u umasawa sa iba, siya magpanguragin. Ag ti mangasawa sa babayi tinayakan lalaki, siya diman magpanguragin waydi.”
Ti Mayaman ag si Lasaru
19Sinabi ni Hisus magkun, “May usa ngani ka tawu mayaman, kay rutay parihu sa rutay manga hari kay pagkarinu, masyadu gid marinu. Subra gid sa kanya kay karan-unun sirang-sirang. 20May usa waydi ka tawu kay ngaran si Lasaru, pasay garisgarisun kay bilug, ipagpauli siya sirang-sirang ati sa puun sabian balay mayaman. 21Magkaibug mangaun siya tunda pag manga inuyang ginan sa nagkan-an mayaman. Siyun diman ti manga idu sa kay arani maghimud sa kay manga garis.
22“Pagka dugay namatay yi ngani ti may kakurian pag tawu si Lasaru bag-u siya dinara manga anghil tag sa kan Abraham arani. 23Hanggan ti mayaman namatay waydi, nag-agwanta gid siya ati sa rugar manga namatay.#16:23 rugar manga namatay: sa Giriyigu, Hadis. Bag-u nagbantay siya, nakitan niya ati sa arayu si Abraham hanggan si Lasaru sa kan Abraham arani. 24Nagtawag siya magkun, ‘Amang Abraham, kaawai yi aku, sugua nimu si Lasaru hampay itulsuk kay suru ituturu sa danum isubu sa kang dila agud rumamig, dahil aku magkakuri sitay sa karaw-an apuy.’
25“Dapat magkun si Abraham, ‘Anak, isipa dapu nimu. Kawu nu sa babaw waya daga, kanmu nakitan kanmu hinanap pag manga kaayadan. Si Lasaru nu sa babaw waya daga nalakawan yi niya ti kakurian. Dapat taynguna pinakan-an siya kaayadan sitay, kawu maan ti sa makuri. 26May yangpas paman daka sa kanta tab-anan ginan sa kanmi tag sa kanyu. Nakan una may magkaibug mana dumipay dayu mahimu, una sitay ginan asan tabug, una asan ginan sitay tabug.’
27“Magkun maan ti mayaman, ‘Magsuyu maan aku sa kanmu, Amang, sugua nimu si Lasaru tag sa balay niku ama. 28Dahil may lima waya aku ka patar-ari lalaki. Pasandami niya sida tungkul sa kanmi kahamtangan atay, barang sida sitay tabug waydi sa rugar kakurian.’ 29Dapat magkun si Abraham, ‘Sa kanda diman ti Kasuratan ni Muysis hanggan manga purupita. Paniwalaan nida tunda.’ 30Magkun ti mayaman, ‘Balaw Amang Abraham, dapat umampu gid sida sa kanda manga kasalanan sa Diyus nu may mabuhi maan ginan sa kamatayan bag-u umati sa kanda.’ 31Magkun si Abraham sa kanya, ‘Nu unman nida paniwalaan ti Kasuratan ni Muysis hanggan manga purupita, dayu diman sida maniwala una may mabuhi uman ginan sa kamatayan.’ ”
Currently Selected:
Lukas 16: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
