Lucas 5

Iniope pa Simón Pedro ti i'wi'in puwa si'yus

(Mt 4.18-22; Mc 1.16-20)

1Ti Jesús yi' kiuts'i siujlieja tewuk iliyi jle' iyo'ate Genesaret, ti 'loj papo i'nio' ti nojwisi ti iyo ka ink'iuyi puwa Sinia' jlamtis. 2Jesús i'wine puwa kasejkanayis times ti yi' kiujts'i ja i'niat. Siojopo jiwos wotas je isijmank'iji'n pakayi ti ilijisi'n puwa jika'nijia tio'. 3Ijwienjli'ne siojopa ti tisiojmajia'm pa Jesús, ti Simón Pedro jika kasejkana. Ijliuyet'iyijpe japo ka intonis i'niata'm, sekyi'i ti yiyet'ijyimpe, iyoyeyi ka 'neyasajne'n papo i'nio'. 4Itime ti siupa iyo ti taka'neyasa'n, ijliuyet'iyijpe ja Simón ti iyo'ate:

—Joyija'm ni siunie yi'i siunie tojwi jana kasejkana. Sek jane'yi ka atatayijamna'a 'niwa aka 'nijia tio', woye'ni.

5Simón iyo'ne 'ate ti isiujlie:

—Inka'neyasajnawo, atejwaja'm ki ajnaj ti awokietaj'ni, lajk'iyi pa ka i'wina. 'Esijyi ti a'am ti jijliuyijk'i'm, jatietajam'ne 'niwa ika'nijia tio'.

6Ijiatjliyi, its'iuyisie sekyi'i ti itietayisiaja'm, yaka jla'm iwo ti i'winat'iyispe puwa si'yus, ti ijiat ti 'lojwe,#Jn 21.3-6 paj ti je 'esieyi ti ijliena ka inkisatk'i puwa 'naja tio' kajeyepa ti 'loj puwa si'yus. 7Jikiot'ipa yejat'iyi'nijpe papo jla'yis, ti yiyisi siojopa jikiecha kasejkana, ka inoyisieje. Yiyisi ti ijiosat'iyisiampe puwak kasejkanayis ti times, tipoyijk'i, ijlienat'i'nijpe ka jlam sek ijno'wik'isia'm kajeyepa kiojyitits'i. 8Simón Pedro ti i'wi'in ti kia'iyo, t'akosjlete'l itiyet'iyijimpe kiajwe pa Jesús, sekyi'i iyo'ne 'ate:

—¡K'iuk'i'm, 'Yaka'niona, sitioniti'n ti ya'am ti je ts'es!

9Tepa jawo ka kiak je iwone pi ji'lij ja Pedro, siu'neje japo ijia, ti jnots'ijnits'i ti i'winayis ti je kiak iyo puwa ka in'yakanis, kajeyepa ti 'lojwe puwa si'yus. 10Kia'iyojliyi siojopo iniuyeje'ni ja Simón, pa Santiago jla'yi ja Juan, Zebedeo jilis, wuj ti yisi'liet pakat'iyijpe pi iyo ti i'wi'in. 'Yina Jesús iyone'ate ja Simón ti ijliuye'ni:

—'Otale t'onit. 'Nakayi ja ke niwakaye si'yus ti ja'yaka'n, ja napokaye'ne napo i'nio' ti ja'yaka'n.

11Yamat'iyisijpe jikiusi puwa jika kasejkanayis, jlam sek iliyet'iyisijpe jiwekie'e, siu'neje puwa yiji, yamisk'i'ne pa Jesús.#Mt 4.18-22; Mc 1.16-20

Jesús ijwiejiet pa i'nio' inwatis jitio' yi'i

(Mt 3.1-4; Mc 1.40-45)

12Po' japa jloma Jesús yit'iyipe japa isi' ijioyi, 'nesat'ipi siupa i'nio' inwatis jitio' yi'i. I'win jiwek pa Jesús, sekyi'i t'akosat'iyijpe kiajwe ti iyo'ate ti inip'elisine:

—'Yaka'niona, ka woyi, jikajli ka anetiajnat siuniwa ijio'ni ijyik'i.

13Jesús isiets'e'ne, sekyi'i iyo'ne 'ate:

—¡Awoyi, i'nes!

Je yiji puwa ka jlomasa' ti 'esie pi i'nio', ti netianat'ipi puwa inwatis jitio'. 14Jesús ijliuye'ne ti iyone 'ate:

—'Yejne'n, ká ajwejlamna'a pa ka ne'yi. Ja'wenajliyi jla'am siunie jawo ti ja ak, ti jajoyi ni pa'yijis jika anechiyas. Sek jane'yi ka anijwelajamna'a ti i'nes. Jatonieyinie'e siupa k'iejliyeyi ti ja ekiajle pet pi Sinia', ti jawo 'wajieta' ape'e pet ni jiwo ti i'nes, iyo ni Moisés jika'neyasajnaye.#Lev 14.1-32 Ja 'nakayeyijna'a ti ja wikie'eyeyi napo i'nio' ti ja'najane pa jawone ti jijwajyi siukiwa ijio'ni ajak'i.

15Ijiatat'iyijpe ti tonitie pa Jesús, itijwaja'ni japa ajnat. Je pini' papo i'nio' ijioyi'ni kank'iuyi ti yamtiyi puwa Sinia' jlamtis, siu'neje ka injwajiete siupa jiliaye iyo. 16Jesús yam'ne ti ijioyi siupa ajnat laj i'nioye'e, ti iyo t'ajlayeja'.

Jesús ijwiejiet pa i'nio' je t'onk'i

(Mt 9.1-8; Mc 2.1-12)

17Siojopa jloma ti Jesús taka'neyasa'n, sekyiyet'i'yijpe pet siupapo ijia Fariséojos, siu'neje papo taka'neyasane pa Moisés jika'neyasajnaye, yik'iji'n paka'a, itijw puwa isi'il tajlits'i yiji jlaja Galilea, siu'neje puwa ajnatis Judea, jla'yi jlaja Jerusalén. 'Yina 'yakaj pa Sinia' jijweye ti yijap pa Jesús ti ijwiejiete'n papo i'nio' je isis. 18Sekyi'i ti 'nesat'i'nijpe papok i'nio' ti nojwits'i pak i'nio' je t'onk'i ti iniayisi'i ape'e pa jlo'wet, ti iyoyistaja ka ijnoyisi kiajwe japa 'wuk, ka inenis jitieyi'i pa Jesús. 19'Yina ti laj ji'niayijayi ti je i'yakanisia'm papo i'nio' ti 'loj, sekyi'i iyoyet'iyisijpe ka ijnoyisi ape'e japa 'wuk. 'Yajlinitiet'iyipi pa 'nak k'ieyi, sekt'ipa itiajlatat'iyits'ipe pak i'nio' ti je t'onk'i, ti iniayisi ape'e pa jlo'wet. Tenajat'ipi ajnat'e jikiowe'e papo i'nio', ti tena jitieyi'i pa Jesús. 20Ti Jesús i'wi'in ti jitienkiujnieye po' pa i'nio', 'yina iyone'ne 'ate siupa i'nio' je 'es:

—Isiecha ti jle'ne, siuniwa akeyis netia'n.

21Siupapo Fariséojos, siu'neje papo taka'neyasane siupa Moisés jika'neyasajnaye, jitienkiujnieye iyonisi'ne 'ate ti ipi'yayisie, “¿Tent'ipa siupa iniwone ti jla'am? 'Yina siukiwa jlamtis iyoyi, ket'ijwel ka je inta'yi ilia'm pa Sinia'. Ijwienjlijie'e jla'am pa Sinia' ti 'yijene ti initiajnat pa jike' ti iyoyi ni i'nio'.”

22Jesús 'yijene pi iyone siupa iyo pa jitienkiujnieye jak je iyoyi'ni ti iyone'ate ti i'yasaja'm:

—¿Yot'iyi'ni ti kiak jiwonayi ni astankiujnieye? 23¿Ten siupa je istieyiji ka iyo'ateye, “Siuniwa akeyis netia'n”, ni'ne ka iyo'ateye, “Neppijia'm, askiujni'n”? 24'Yejne'n, jlajma 'winki'nase'm 'nakayeyijna'a ka 'najanayi paka awonayi pet ti siunie I'nio' Jlas jijweye po' ape'e siu'nie ajnat, ka inetiajnat ni jike' ni i'nio'.

Pakayi'ne ti iyone'ne 'ate siupa i'nio' je t'onk'i:

—Am ti ajloye'a'm ti awo'ate, neppijia'm. Kim kiajwe ni ajotik. Maj ka api.

25Ijiatjliyi, je yiji puwa ka jlomasa' pa i'nio ti 'esie, iniyet'ipi pijia'm ti yi' kiowe'e papo i'nio'. Isimat'ipi kiajwe pa jlotik ti yamat'ipi, ti yapi 'wete. Jla'am iyunitjli pa Sinia' ti ya'am. 26'Yina wikie'eyi siupapo sekyi'i jlam jnots'inijits'i'ni. Iyoyet'iyispe 'ate ti iyunitis pa Sinia', kajeyepa ti jnots'ijnits'i:

—'Nakap'ane ti sitiete i'wi'in siuniwa ti kassesi'liet.

Ti Jesús tanayi pa Leví

(Mt 9.9-13; Mc 2.13-17)

27Jlampa itimayi, Jesús 'yina ti yamat'ijyi i'win'ne ja siojo i'nio' jle' iyo'ate Leví, yijin'nits'e yi'i japa ji'wet jla'am ti isi'm ilia'm puwa inkat'ijnieyejes ti t'ajlataja papo, ti anechiyasas Roma jlele jika jlojniet. Jesús tani'ne ti iyone'ate:

—Na'm ijyik'i.

28Leví ipi'ya wek takasit'ne, sekyi'i iliyeyi wek seka'a pa jikijmaye, yamat'ik'ipe pa Jesús.

29Japak jloma ti ilisane japa jiliakijnieye ti wuj, ja Leví ti isijwane pa Jesús. Je jlase' siupapo isi'm ilia'm niwa inkat'ijnieyejes, siu'neje papo ijia i'nio t'ipi ti isijwanisi ti ti'yekiunieje'n. 30Jlam'ne pet siupapo Fariséojos, siu'neje papo taka'neyasane siupa Moisés jika'neyasajnaye, ti jla'yis jla'am, iyonat'iyisijpe 'ate japo t'eyasajnas pa Jesús, ti iliakiyis:

—¿Yot'iyi'ni ti jikijwanayi ti ji'yekiuniejyi'n, siu'neje ti ji'yayets'i i'niate, siunapo isi'm ilia'm niwa inkat'ijnieyejes, siu'neje napo inke' jiliajnis? ¡Ijiate ti je 'esi ni jiwoyeyi!#Lc 15.1-2

31Jesús isiujlie papo ti iyo'ate:

—Siunapo yi' ape'e niwa jlo'witis, napok 'yu'we ti isitia'n ni inkakiewo wuj. Jlampet siunapo isis, ti lajk'ipa ka inlate, napok je isitia'n, kajeyepa. 32Je napok ka iniame siunapo isis, jla'm ijiate siunapo inke' jiliajnis napok aname, ja'nakayeyi ti jawo jlosikis ink'iejyisa'.

“¿Yot'iyi'ni pet napo 'eyasajnas ti je ininel'lianiti'n?”

(Mt 9.14-17; Mc 2.18-22)

33Tiwonajat'iyijpe 'ate pa Jesús:

—Siojopo Juan inajiejnawo t'eyasajnas, siu'neje japo jla'yis pet japo Fariséojos, ininel'lianiti'n jla'am, je ijwienjli ka kia'iwo jla'yi ti iyoyis t'ajlayejesa'. Jlampet siunapo 'eyasajnas je kia'iyo, 'wenajliyi ti ti'yekiujni'n jla'yi ti i'yak'i i'niati.

34Jesús isiujlie papo ti iyo'ate:

—¿Tepi iyo siunapo ti ijioyi ni i'nio' ti k'iejli tijwa'yi? ¿'Est'iyiji ka ajloye ka ininel'lianiti'n, siuti je yamjli'ijyi naka siunie tijwa'yi? ¡Jeyi kat'aja! 35Ijiatjliyijna'a jla'am ka inetiejenie'e janak jloma ka talaja kiojyi, naka ni ijioyisi ti tijwa'yi, jiwekie'ejana'a ka 'esieyiji ka ininel'lianit.

36Jesús iyoyet'ijyi 'ate, ti i'yejnap jiwekie'e, siunie ti iyo'ate:

—Je ti'wena wek paka ji'wuye ka ink'ieye, ka imp'one pi jikiecha siupi ji'yusie. Kajeyepa ka kiak inwone, janlaki wekie'e siupa ji'wu' siupi ink'ie', kiak janwo'ojyi siupa ji'yusie, jano'we ti jank'ise'n, 'yaka je to'm ilia'm. 37Ka kia'iwo ka ti'wena ka tisiayek'iji'n puwa jijwa'al siuniwa 'nejes ka ji'yusisa' siunie at'es ti ink'ie'. Kajeyepa siuti tosiyetaje, sekyi'i ti yikisatajamk'i niwa jijwa'al sekyi'i ti tisaye'ni ni at'es, 'yina ikajyinna'a ni at'es, kia'iyojliyi puwa jijwa'al. 38Siunie at'es ti ink'ie' tisiayejak'iji'n pet siuniwa 'nejes ti ink'iejyis. 39Siunie itime ti i'yaje ni at'es ti pajts'e, je 'esiji ka in'yaje ni at'es ti ink'ie', kajeyepa iyo'ate, “Jlam 'es siunie pajts'e inkaje.”

Currently Selected:

Lucas 5: CRT97

Highlight

Copy