Mateo 4

Jesús imosik ijyijlit

(Mc 1.12-13; Lc 4.1-13)

1Jlampa paja'ni ape'e, Jesús Sinia' jikimet yamayi ti ijioyiji pa ajnat laj i'nioye'e, ti imosik jajnejlit.#Heb 2.18; 4.15

2Cuarenta puwa jlomas, cuarenta 'neje puwa ajnajas ti lajk'iyi paka intojw. Sekyi'i ti iliatayi pi jika nel'lia iyo. 3Imosik ijioyi'ni ti iyo ka ijnejlit ti iyone'ate:

—Siuti ja ijiatayi ka Ina'a jlasa'a'm, jejlite ka amti'yi siojona sisaj ka iniwojwa'n woyeja'.

4'Yina Jesús isiujlie ti iyo'ate:

—'Wanjliyi je awo. Kajeyepa ti Inia' jlamtis yi'i ni ji'wet iyo'ate,

“Je ijwienjli jana woye ka i'manit ni i'nio',

kia'iyo pet wikie'eyi siuniwa jlamtis ni Sinia' ti tal jikiwitk'i,

ti i'mienit ni i'nio'.”#Deut 8.3

5Paj ti imosik yamat'iyi'iji ti ijioyiji japa Jerusalén, siojopa isi' ti Sinia' jika isi' ti 'es. Ijioyet'iyijpe ape'e japa 'najla'wet yi'i siupa toj pijia'm, 6ijliuye'ne ti iyo'ate:

—Siuti ja ijiatayi ka Ina'a jlasa'a'm, sojmakiejen kiu', ká anikiwit. Ina'a jlamtis iyo'ate,

“Sinia' janjlo'wa napo jijliujwajnas poli jlele kan 'ye'na'm.

Ka ayejyina'a niwa jikioye ja'nakayeyijna'a ka je ijnoj'li ape'e japa sisaja',

'yina ja laja awet'iaye.”#Sal 91.11-12

7Jesús isiujlie ti iyo'ate:

—'Wanjliyi je awo. Kajeyepa ti Inia' jlamtis kiak iyo 'niji ti iyo'ate,

“Ke ejejlit ni Aka'niona ti Sinia'.”#Deut 6.16

8Jlampa itimayi'iji, imosik ijioyet'iyijpe ape'e siojopa tikijnaki ti ijiate jla'm ti toj pijia'm. Sekyi'i i'winkinayi wikie'eyi siupuwa ajnatis wus, siu'neje puwa jijweye iyo papo ti iyo anechiyasa'. 9Iyone'ne 'ate:

—Japijlanit'ia 'niwaka ti jawi'na'm, siuti akosjlete'l jateyiji'n isiajwe, jla'yi ti ja siwunit.

10'Yina Jesús isiujlie ti iyo'ate:

—¡Talk'i'm, sitiejiejwa imosik! Siuniwa Inia' jlamtis ti yi'i ni ji'wet ti iyo'ate,

“Wunit ni Aka'niona ti Sinia',

jwankit ka k'iuye.”#Deut 6.13

11Sekyi'i imosik tajla'ne ja Jesús, ti 'nesat'i'nijpe papo injlojwajnas poli jlele ti iniuyeje.

Jesús tajlap Galiléaja, ti 'nelanjie'e iyoyeyi ka inkijme'n

(Mc 1.14-15; Lc 4.14-15)

12Jesús ti t'ijieyeyi pa Juan ti t'otie a'laja'm,#Mt 14.3 sekyi'i teje'ne 'nijiye yi'i jlaja Galilea. 13'Yina je yi' Nazarette, ka sek ne'yiyi. Capernaum jlajaka ti iyo 'weta', ti yi' kiuts'i ja i'niat jlajlik'i, isi'il yiji papo Zabulón siu'neje pa Neftalí jika ajnatis t'ipi. 14Pak siupa jloma ti yiyeyi siupa iyot'iyipi pa Sinia' jijwejlanik jiwo Isaías ti iyo'ate:

15“Ajnat siojopa Zabulón, siu'neje pa Neftalí jika ajnatis,

ji'wechaja pa Jordán, jikiuts'i pa i'niat jlajlik'i yiji japa Galilea,

ji'wet papo i'nio' siupapo je t'ekiyiji ti je isis.

16Siunapo i'nio' napo yiji ni ajnaj i'winisi jana kates ti wuj.

Siunapo i'nio' yiji ni jipe'el jana 'najlati,

siojona jla'al jana kates 'yakajanit'i ape'e.”#Is 9.1-2

17Pak siupa jloma iyoyeyi kawo jika'niyeja', ti iyo'ate:

—¡Woye ajosikis ink'iejyisa', je pa tojwa' ilia'm ni jika anechijiayas ni Inia'!#Mt 3.2

Jesús tane papo ijniujlits'i wotas

(Mc 1.16-20)

18Ti Jesús t'iskiunieje'n jikiusk'i ja i'niat jlajlik'i yiji jlaja Galilea, sek i'wi'ne siojopo ji'niayi ijwienjli. Japoka japo Simón, tiwonajat'ijyi'nijpe'eje 'ate Pedro, siu'neje ja jikilia Andrés. Jlam'ne itietisiajam'ni pa i'niat japa jika 'nijiak jit'io, ti iyo'ni. 19Jesús tane'ni ti iyone 'ate:

—Joniemit. Jayojwa wotasa' ti jawoyeyijin'ni napo i'nio'.

20Jlamsek iliyet'iyisi'ijpe wek puwa jika 'nijia tio' ti yamayisk'i ja Jesús.#Lc 5.10-11

21Jitieyiji ja Jesús, 'yina sek i'winat'iyijpe siojopo kia'iyo ji'niayi ijwienjli, japoka japo Santiago jla'yi ja ji'yini Juan, siojo i'nio' jle' iyo 'ate Zebedeo jilis. Ti je tajlisi puwa jika kasejkanayis, ti jla'yijis pa jinia' ti ilisanisi'ni puwa jika 'nijia tio'. Jesús tanat'iyipi. 22Je iyo ka jwatajayisi'i'ni ti yamat'iyisk'ipe, jlam sek iliyeyisi'i pa jinia', siu'neje puwa jika 'nijia tio'.

'Loj papo Jesús 'yiyasajne'n, jla'yi ti ijwiejiete'n papo je isis

(Lc 6.17-19)

23Jesús itijw puwa isi'il yiji jlaja Galilea, ti 'yiyasajne'n papo i'nio' yi'i puwa 'najla'wetis ti jikimitis. Ijwi'il siupa inka'niye ti 'es, siupa Sinia' jika anechijiayas, jla'yi ti ijwiejiete'n puwa jiliaye papo i'nio', siu'neje puwa t'ajwes t'a'ti. 24Jesús jle' itijwi'ni siujlieja ajnat Siria, ti t'ijieyeje. Tiniamajaja'ni siupapo ti wuj ti inilayiti puwa iyot'iyipi puwa jikie'el ti je ijwienjli, siu'neje papo imose'l iliaki, siu'neje papo jitiej je isis, siu'neje papo je t'ojni'ni, je iyo ka je injwajiete'n.

25Je pini' papo i'nio' yamk'i ja Jesús siupapo tal Galiléaja, siu'neje papo i'nio' tajle siujlieja ajnat jle' iyo'ate Decápolis, siu'neje papo i'nio' tal Jerusalenne, siu'neje papo tal Judéaja, siu'neje papo tal ji'wechaja ja tewuk Jordán.

Currently Selected:

Mateo 4: CRT97

Highlight

Copy