Mateo 9

Jesús ijwiejiet pa i'nio' je t'onk'i

(Mc 2.1-12; Lc 5.17-26)

1Jlampa yama 'niji siupi ti 'nelanjie'e, Jesús tisiojmajiam'ne japa kasejkana, tomat'iyispe i'niat ji'wechaja, 'yina yiyeyi siujlieja ti ijiate ti jika ajnate. 2Jesús titiuniejat'iyipi pa i'nio' je t'onk'i ti tiniayija ape'e pa jlo'wet. 'Yina Jesús ti i'wina ti jitienkiujnieye po' papo ijia siupapo isim kiajwe, sekyi'i iyone'ne 'ate pak i'nio':

—¡Yas, jwajla'a paka woyi! Siukiwa akeyis je titiajlata'm, imp'elisina.

3Yit'iyipe pa siupapo jiwos pak Moisés jika'neyasajnaye, jikiowe iyone 'ate, ti ipi'yayeyis ja Jesús ti kia'iyo, “¡Siu'nie i'nio' wuj ti iliaki pi Sinia'!” 4'Yina Jesús 'yijene pi jitienkiujnieye iyonisi, sekyi'i ti kiakt'ipa iyonayijipi:

—¿Yot'iyi'ni ti je 'es siunie yiji ni asosik? 5¿Tepat'e yi'i siupa ti je istieyiji, nakat'e ti jayo'ate, “Siuniwa akeyis netia'n”, ni'ne ka nakaye ti jayo'ate, “Neppijia'm, askiujni'n”? 6'Yejne'n, ja'winki'nase'm 'nakayeyijna'a ka 'najanayi ti siunie I'nio' Jlas jijweye po' 'ne ajnat'e ka netiajnat niwa jikeyis napo i'nio'.

Sekyi'i ti kiak iyonayi pak i'nio' je t'onk'i 'ate:

—Neppijia'm, kima na ajotik. Maj ka api.

7Sekyi'i pi i'nio' iniyet'ipi pijia'm. Yama ti yapi. 8Jlam jnots'inayijits'i'ni papo i'nio' ti i'winayis. Sekyi'i iyunitis'ne pa Sinia', siunie ti jlam ti iwijna'm pa yi'i pa ka kiak iwoyi ka lesane 'ate iyo niwaka.

Jesús tane pa Mateo

(Mc 2.13-17; Lc 5.27-32)

9Jlampa Jesús sekt'ipa tajla ape'e, sekyi'i ti i'wina ja i'nio' siojo jle' iyo'ate Mateo, ti yijin'ni ts'e yi'i siojo yi'ijin'n ti t'alk'i'n niwa inkat'ijnieyejes, ti ijioyi'ni japa Roma. Jesús iyoni'ne 'ate:

—Na'm ijyik'i.

Mateo ipi'ya wek, takasit'ne 'yina yamak'i.

10Ti ti'yekiunieje'n, ja Jesús siu'neje japo t'eyasajnas, ji'wet'e ja Mateo, 'nesa'ni japok isi'm ilia'm niwa inkat'ijnieyejes, siu'neje japo i'nio' tijwela je 'esijiyi, ti je isis. Japoka'ne ti isijwane. Je japokata, je pini' 'neje siojopo i'nio'. 11Siojopo Fariséojos, ti i'winayis iyoyis'ne 'ate, ti i'yase'n japo t'eyasajnas:

—¿Yot'iyi'ni ni aska anechiyas ti isijwane siunapo isi'm ilia'm niwa inkat'ijnieyejes, siu'neje napo i'nio' je 'esijiyi?#Lc 15.1-2

12Ti Jesús ipi'yayeyi, iyo'ne 'ate:

—Siunapo je isis napok 'yu'we ti isitia'n na inkakiewo. Jlampet siunapo isis, napok je isitia'n pet. 13Maye'ni, ni'neyasanayi siunie iyoyi niwak Sinia' jlamtis t'ipi ti iyo'ate:

“Kap'ijliuskiye, nak awojonk'iye.

Siunie ti jilianajyi'n niwa wakiajas ti jijwejla ka siwunitie, nak je awojonk'iye.”#Os 6.6

'Yina siuti ana'am, je napok ka iniame napo isis, 'wenajliyi jla'am ti aname napok siunapo inkeyis jiliajnis.

“¿Yot'iyi'ni napo 'eyasajnas ti je ininel'lianiti'n pet?”

(Mc 2.18-22; Lc 5.33-39)

14Siupa Juan inajiejnawo siojopo jikawos ijioyisi ja Jesús ti i'yasis'ni ti iyonisi 'ate:

—¿Yot'iyi'ni pet napo 'eyasajnas ti je ininel'lianiti'n? Sa'am siu'neje napo Fariséojos je paj ka iliki pet ti awoki naka.

15Jesús isiujlie ti iyo'ate:

—¿Tepi iyo siunapo i'nio' nojweje siunie k'iejli tijwa'yi? ¿Ti'wenat'e ka ink'ijliaja'n siuti je taljliyi'iji pak k'iejli tijwa'yi? ¡Jeyi kat'aja! Ijiatjliyijna'a ti jatalajasi, jiwekie'ejana'a ka ininel'lianiti'n.

16“Je ti'wena wek paka jiwa siunie ink'ie' ka imp'oneje siunie ji'wu' 'yusie. Kajeyepa siuti tip'onaja ni ink'ie' yapijlia'm, sekyi'i ti ijiatayiji ti its'isk'i kajeyepa ti 'yits'i. 17Siunie at'es kia'iyojliyi, je ti'wena wek ka tisiayek'iji'n niwa jijwa'al siuniwa je isis, 'nejes ti 'yusis, ti ink'ie' ni at'es, kajeyepa ti ijliasata pijia'm. Its'isak'i, sekyi'i ti tisaye'ni ni at'es, 'yakajyina'ni. Nak it'imina ti tisiayek'iji'n niwa jijwa'al ti ink'iejyis ni at'es ti ink'ie' pet, jlampet ti ji'yusie ni at'es tisiayejak'iji'n pet niwa jijwa'al ti ji'yusis. Ja 'nakayeyi ti ja ke inkajyi'n ni at'es ti ink'ie' siu'neje niwa 'nejes ji'yusis ti jijwa'al.”

Jairo jlase', siu'neje japa asejnia siojopa isiets'e pa Jesús ji'wu'

(Mc 5.21-43; Lc 8.40-56)

18Jesús je iliyi ti takamtijnien'ni, ti 'nesa jak i'nio' Judío ti anechiyas. T'akosjlete'l itiyeyijin kiajwe, sekyi'i iyo'ne 'ate:

—Yase' jakia je pajk'iyi ti 'ya'al. 'Yina najna'a ja'yenaja. Akio' enna'a ape'e, ja'wasana.

19Jesús takasitie ti yamk'i, jla'yis japo t'eyasajnas. 20Jakayi'ne ti siujlieja asejnia ti jiwet'ia po', ti ji'woyis je netiank'i, ti ijioyi. Yi'i japa jloma ti 'es, yi'i japa jloma ti ijiatayi ti je 'es ti yapi'li'ni siupa jiwet'ia iyo, ti je netiank'i'ni pi ji'woyis. Paj ti itijwa'm niwa sikioye times tom'niji puwa jika najkapis yiji ti je tijwa'. Tajla 'wechaja ja Jesús ti isiets'e ja ji'wu' jikiusi'l. 21Kajeyepa ti itienkiun'ni ti iyo'ate, “Yamk'emna'a ka itiej ni ji'wu' ka isiets'e, ja ts'esiena'a.”

22Jesús i'yena 'wechaja, sekyi'i i'win'ne jlajak asejnia, sekyi'i ti iyoni'ne 'ate:

—¡Yase', jwajla'a paka wo! Lapakawo ti atankiujnieye it'imina ti i'nes.

'Yina ti kia'iyo ja Jesús, jakayi ti 'esie.

23Jlampa yama'aja ja Jesús ti ijio 'wete jak Judío. Suti yiyeyi ja ji'wet sekyi'i i'win'ne japo i'nio' ti yapisi wojoyeyija'm ti tajwits'iji'n, siu'neje japo ti iyo 'wosola. 24Iyoni'ne 'ate:

—¡Tajlayi, maye'ni! Je 'ya'al jana jlosie, imia'a.

Siojopo i'nio' ti ipi'yayis ti kia'iyo ja Jesús, iliakiyis'ni'ne. 25'Yina ijliuk'i'ne kisie'e japok i'nio, 'yuyi'ne jla'am siojo yi'i jlajak jlosie, isim'ne kio'yi, ti inijiem pijia'm.

26'Naka siu'nie Jesús iyoyi ti ijwiejiet jlajak jlosie, itijwaja'ni jlajak ajnat ti ti'niejenaja pa tiwonaja.

Jesús i'wijnajne'n papo times talojo'

27Jlampa Jesús tajla'aja seka'a, times japo talojo' ijia'an. Tanak'i wita'm ti iyonisi 'ate:

—¡David Jlas, kasp'elisijne'n wata'a!

28Ti Jesús yi 'wuk kiajwe, sekyi'i siojopo talojo' tikiniejayiji siojo yi'i. Sekyi'i i'yasen'ne ti kiak iyone:

—¿Ma je sakakiuye siunie ti akajli ti ja'wijnanajyi'n?

Siojopo talojo' isiujlie ti iyo'ate:

—Saka'niona, je'e.

29Jesús sekyi'i isim'ne ape'e, ti isiejts'ik'i jawa jitiete, ti iyone 'ate:

—'Esiji kanwoyi siunie iyo ni astankiujnieye, ti je sakakiuye.

30'Yina sekyi'i 'esieyiji ti i'yenk'i kisie'e. Jesús ji'lij 'yitiapk'i'ne ti iyone 'ate japoka talojo':

—Ká ajwelajiamna'a paka ne'yi paka i'nioye.

31Je 'esiji jla'am ti iniuyek'i kisie'e, ijwilajamk'i papo i'nio' siojo Jesús iyo, paj ti itijwaja'ni jlajak ajnat.

Jesús ijwiejiet pa i'nio' ti imosik iyojwa'n 'ne'liaja

32Jlampa iniuyek'i kisie'e japoka, po' japo i'nio' namisiji ja Jesús siojo i'nio' ti imosik iyojwa'n 'ne'liaja. 33'Yina Jesús iniujwan'ne kisie'e paka siupi iliaki, sekyi'i ti 'esieyiji ti tamti. Kawojlit'iyipi japo i'nio', sekyi'i iyoyis'ne 'ate:

—¡Lajk'ipa ka kia'iwo ka ti'wena ka nejyi jla'a Israel!

34Jlam'ne pet japo Fariséojos iyoyis'ne 'ate:

—Paka jla'am siupa imose'l jika anechiyas jijweye pa yiyi, it'imina ti 'yakajli ti iniujwa'n kisie'e.#Mt 10.25; 12.24

Jesús wuj ti ip'ilisi'n papo i'nio'

35Jesús iniuk'i'ni jawa isi'il siu'neje jawa ji'wetis jilis japo i'nio', ti taka'neyasa'n yi'i jawa t'ajla'wetis jla'am japo i'nio'. Ti iyo ka'niyeja' ti ijwi'il kiwa Sinia' jlamtis, ti niwaka jika anechijiayas. Ijwiejiete wikie'eyi kiwa jiwet'ia iyo japo i'nio', siu'neje kiwa iliatits'i yijits'i jawa t'ajwes japo i'nio'. 36Ti i'yenaja'n japo i'nio', sekyi'i iyone 'ate:

—Wuj wata'a ti p'ijliusis.

Kajeyepa ti iyoye'ate niwa sontas ti laj jika'nionaja kan'yena, ji'niayi je 'es ka nek'ni, jla'yi ti jikanowe iliajne'n, it'imina ti laj jijweyeja'. 37Sekyi'i ti iyonayi 'ate japo t'eyasajnas:

—Siunie inwomik ti ja tiliena'a isajk'i, 'yina siunapo janla'ne je 'loj. 38Naka'ne ni siunie ti ja 'ajlayi ni jikimet nak inwomik, ka injlo' napo inkijmayewos ka inla'ne.

Currently Selected:

Mateo 9: CRT97

Highlight

Copy