Gié 5

Ananias kang Sapira

1Ama kema go pena go ké ba tei Ananias kang tamdi Sapira, ké kel yagé gogé cong. 2Ama ddi cor laré go pena cong ca gusi, tamdi kau sol bu’, kardené ddi ’yang laré toi do jo ’yé bogé pajerong ga gié. 3Kardené Piér yei wa: Ananias Sidan won ddaindin ca ddoin ji yagé Habé ga Kumu kual go poi kainya cawa ga? Yagé goin go ji ba keli lé, ji cor laré goi kobi pena conga cawa ga? 4Kiddin ga ji ba kel yagé lé cong ’eno dé na, ddia koin, kardené go ji ba keli cong kau, laré la koin ’eno ga? Ji ’erem kual lé duro ddaindin main kainya cawa ga? Ji yéga kalang kual go poi ’eno, ama ji yeia Kumu. 5Kiddin ga Ananias ba jé kual lé main kain na, ddi aserong dugo, ddi ma, kalang ga ba jé kual lé mam na, ké lé muro bbani ’eno. 6Karang ga marné sai dang, ké temdé temaidi dang badigé, kardené ké aii ’yé ’embei.

7Kardené sam na, Ananias tamdi ’yé andong caigé, ama to sela henga ga ba lé tuma ’eno. 8Piér ’engero wa: Mé yang dé, keng kel yagé gogé lé laré goia main kain ga? To yei wa: ’I, na main kain. 9Kardené Piér ya wa: Kengang kuderé dai kebegeng pena ca gesaué Habé ga Bagulong kai kainya cawa ga? Sela, ké ga ba ’embé kuderé caga woi kebu kulu kau, mé kau ka aié main kain bu’. 10Kobipada to aserong tumu paja go gié lé, to ma. Marné lé andong waio dang maré dugo, ké aio ’yang na ’emba dur kudera bu’. 11Kalang ga yaué mam dang ké ga ba jé kual lé na, ké lé muro bbani ’eno.

Ké lé gié go dono go kagelokemo combu

12Pajerong ga gié lé henga ga gelé dang gié go dono go kagelokemo combu duro kalang. Kalang ga bu cindi mam yau to dabang do Salomon toi waindo waindo. 13Kalang pedegé bbani ’eno, ama kalang ga ddang lé muro, ké ’era yanang nagé ’eno. 14Kalang ga yaué combu, bainyong dang kandu bu cindi ca Bagulong, ké bé cainé waindo waindo. 15Ké nyim kalang ga hoamya bégé tibin giyong, ké bégé ca gasulong bua, dang kuioyong bu’, ca kiddin ga Piér na ca halé na, tenddi na hala ca ga pena a duroigé. 16Kalang ga yaué combu sai a duro gulong go gemdong go ba luré Jorsalem, ké nyim kalang ga hoamya dang kalang ga habé ga isini wa gelegé cindegé, ké wai labia mam.

Pajerong ga gié wai gelé go cin

17Kardené gemdong ga tibé Kumu gumu gogé, kang kalang gai, to do poré na kalang ga Sadusié kagé, ké lé pajerong ga gié ddéngi nain. Ké nyan kual ca so tebenang nagé. 18Ké nyim pajerong ga gié, ké bégé duro gerngang do kalang ga combi togé. 19Ama dang soindo kangito go Bagulong koi hangu kulu go gerngang kebi. Ddi andega pajerong ga gié lé dong, ddi yégé wa: 20’Erageng, keng ’eré duro kulu go yaué go Kumu koi, keng dorgé kalang Nô do Ddari do cin ga herua mam. 21Pajerong ga gié jé kual gogé lé, ké andong duro kulu go yaué go Kumu koi dang joguddu coalala, ké osum gelé kalang.

Ama gemdong ga tibé Kumu gumu gogé, dang ké ba jomang nai, ké té gemdong ga Juib kagé ca kandia ’era tegang pajerong ga gié lé a duro gerngang. 22Ama kiddin ga kalang ga magé kiddin ba ’yé duro kulu go gerngang na, ké waiagé kené ’eno. Ké jogu ’yé yogé gemdong ga bedang kual lé. 23Ké yé wa: Ni wai kulu go gerngang kebi dang lebé. Kalang ga magé kulu kebi dang ’erdé, ama kiddin ga ni ba hangu na, ni waia kema pena duroiné ’eno. 24Kiddin ga gumu go magé kulu go yaué go Kumu koi, dang gemdong ga tibé Kumu ba jé kual lé na, ké ’eridé, ké ’enger gusugé, ama ké sela kual lé toi ’eno. 25Kardené kema go pena ’yé gusugé, ddi yégé wa: Sela, kalang ga keng ba bégé duro gerngang lé, ké ’eré wiga duro kulu go yaué go Kumu koi. Ké wa gelé kalang. 26Gumu go magé kulu go yaué go Kumu koi kang kalang gai ’yé golang pajerong ga gié lé, ama ké lagé henga ga isini ’eno, cawa ké la muro ca kalang na da worinyigé dang keddang.

27Kiddin ga ké ba ’ergang nagé na, ké sigé ’eré tumu ga beddang. Gemdong ga tibé Kumu gumu gogé ’engergé. 28Ddi yégé wa: Ni kené yegeng wa: Ddo keng gelé kalang dang kema lé gusondi ’eno. Keng gel kual lé duro gulong go gumu go Jorsalem kain mam, na cawa ga? Keng wa daré ca kema lé kebardia ja caini ga? 29Piér kang pajerong lé jogu yégé wa: Na golgo ni ’yé Kumu kebi ddi go kalang kogé. 30Kumu go moinderana kogé belé Jésu dang cindi a duro ga maré, na ddi go keng ba bbobelé ea sia go adegelé deddi. 31Kumu aii, ddi, si ca kobi go barua ca ddi jima Kelma bua, dang go Minyé bu’, ca dda ga Israél bega kebegé ca ké wa burogé go isinwa dogé bu’. 32Nia kalang ga yo hendé do henga lé kua togé, dang Habé ga Kumu kai ga ddi ba bigé ké ga jo kibi bu’.

33Kiddin ga kalang ga bedang ba jé kual lé kain na, ddaindigé solgé, ké dar ca ka deddé pajerong ga gié lé. 34Ama Parisié go pena go ké ba tei Gamaliél, ddia go gelé so go Kumu koi, kalang mam bi hormo, ddi sai ’eré dang tumu kalang ga bedang. Ddi yégé kandia gula pajerong ga gié lé dong sam dé. 35Kardené ddi yégé wa: Keng ga Israél, ga lageng angal dang henga ga keng wa daré ca lo dang kalang lé kua. 36Cawa tumu na, Teudas sai dang, ddi belé gusi main ddia kema go gumu kain, kalang go koboi bal main aru poddin kain, ama ké deddi. Kalang mam ga ba koboi na, ké ddasindé ddein ddein, kema pena ja ’eno. 37Kardené Judas go Galali sai dang a duro wolé go pasé kalang gusondigé, kalang combu ’yé toi, ama ké deddi, kalang ga koboi mam, ké ddasindé bu’. 38Cakcak kua na, ’enung wa yogeng: Ga lo kalang lé kua henga pena ’eno. Ga ddagé ’era, cawa gié gogé lé dang kual gogé lé kua nia saga a gusu kalang na, da tunyong kalin. 39Ama nia saga a gusu Kumu cindi na, keng bbal ca toinyei ’eno. Ga lageng angal, ddo keng worinyé kembul danga Kumu ’eno. Gemdong ga bedang mam ’yé Gamaliél kual goi. 40Ké jogu té pajerong ga gié gusugé, ké tégé dang belau, ké sigé kandia yo kual dang Jésu gusondi com ’eno, kardené ké ddégé ’yé. 41Pajerong ga gié andong dong a tumu ga bedang lé. Gusugé mowegé cawa Kumu na solgé ca ka bbal ca wo gelé go cin ca Jésu gusondi. 42Duro kulu go yaué go Kumu koi dang tagé gulong na, ké wada ’eno, ké wa gelé dang doré Nô do Ddari do Jésu toi waindo waindo kondia Krist.

Currently Selected:

Gié 5: TNG1978

Highlight

Copy