Luk 5

Jésu té anjama ga tumu

(Matié 4:18–22; Mark 1:16–20)

1Wolé go pena Jésu ’eré kebu tagu do Jénésarét, kalang ga yaué combu boi gusugé kala ’yé gusi ca jo kual go Kumu koi. 2Ddi sol kuburo sua kebu gung, ga ’uré gesin tol pelé lau dogé. 3Jésu nai duro kuburo go Simon koi, ddi oli ca kondia siang nai duro kurai ni lam, dda gung kibi waldong henyé. Jésu jom duro kuburo dugo, ddi osum gelé kalang ga yaué combu.

4Kiddin ga ddi ba yé kual ka na, ddi yei Simon wa: Ji jebu kuburo a kiddin ga ddigé lam, kardené keng dang kamdin begageng lau dogeng, ga ’urgeng. 5Simon jogu yei wa: Bagulong ni ’uré danga soindo ték, ni ’ima gusa pena ’eno, ama ca yo goin na, ’enung da bé lau dugo.

6Ké bé lau dugo, ké ’yom gusa combu bera lau dogé osum sagedong. 7Ké légé kamdigé ga duro kuburo go ddang kobegé, kandia ’erang jégenégé, ké ’yé, ké wondé kuburo lé ca’, ké ji ’yoab ca disé to kang. 8Kiddin ga Simon Piér ba sol henga lé na, ddi sai poi gomdi tumu Jésu, ddi yei wa: Bagulong, ji si gusin waldong cegad a gusung, cawa ’enunga kema go isini. 9Simon kang kamdi lé sol kagelokemo dang muro ca gusa ga combu ga ké ba ’yomi. 10Simon kamdi, Jak kang Jâ, Sébedé karndi, ké kau sol kagelokemo dang muro main kain bu’. Ama Jésu yei Simon wa: Ji lo muro ’eno, ama cakcak kua ji tumu na, ji da ’yom kalang. 11Ké jebu kuburo gogé kebu gung, ké ddé henga mam, ké kobu Jésu.

Jésu bi kema go kaja labia

(Matié 8:1–4; Mark 1:40–45)

12Kiddin ga Jésu wo duro gulong go gumu go pena na, kema go kaja ba selinyei kulad wo kené. Kiddin ga ddi ba sol Jésu na, ddi aserong tumoi, ddi kembé cindi dugo, ddi oli wa: Bagulong, ji nia dar na, ji bbal ca beleng carara. 13Jésu tar kobi cili, ddi yé wa: ’Enung dar, ji bel carara, kobipadda kaja ddé kema lé. 14Jésu siang dono, ddo ji yoi kema pena ’eno, ama ji ’era geli go tibé Kumu gusin, kardené ji wala tibé go Mois ba si, ca gelé kalang mam ca jia wai labia. 15Ama nô do gié go Jésu koi lé aju tumu tumu. Kalang ga yaué combu yau ca jo kual goi bua, ca kondia bigé labia a duro hoamya dogé bu’. 16Ama Jésu ’yé duro gada kaindi ca olé.

Jésu bu kema go hoamya do sayé labia

(Matié 9:1–8; Mark 2:1–12)

17Wolé go pena kiddin ga Jésu wa gelé na, ga Parisié dang ga gelé so go Kumu koi jom gusi ’yoab. Ké saga a duro gulong mam go Galali dang Judé dang Jorsalem bu’. Dono do Bagulong toi wo gusu Jésu ca bogé kalang ga hoamya labia. 18Kalang ai kema goang hoamya do sayé ca gasulong, ké ’yé, ké dar kiddin ga andang kulu ca debei tumu Jésu. 19Ama ca kalang ga yaué combu na, ké wa kiddin ga debei tumoi ’eno. Ké nai ca kulu, ké gebu kulu cai, ké gesinyi dang gasulong gai lé duro kalang ga yaué combu tumu Jésu. 20Kiddin ga Jésu ba sol bo cindi gogé na, ddi yei go hoamya lé wa: Bajandung, ké burogu isinwa doin. 21Ga gelé so go Kumu koi kang ga Parisié osum ’eremé wa: Kema go yo kual tebenang Kumu kain la wang ga? Na wanga bbalé ca burogé isinwa ga? Na Kumu mera ’eno ga? 22Jésu sol ’eremé gogé, ddi yégé wa: Keng ’erem main kainya cawa ga? 23Na gonia hembal ca yo wa: Ké burogu isinwa doin laba, sa ’era tai ga? 24Ama ’enung dar ca keng sela ca Kema Kurondi danga dono duro delinya ca burogé isinwa. Ddi yei go hoamya do sayé lé wa: ’Enung yeinya ji, sa aia gasulong gain, ’era tain. 25Kobipadda kema lé sai dang tumu kalang mam, ddi ai gasulong gai ga ddi ba woi cainé, ddi ’yé taiang debainyé go Kumu. 26Ké mam sol kagelokemo, ké debain Kumu, ké lé muro, ké yé wa: Na solgeng henga ga walia labegé.

Jésu té Lébi

(Matié 9:9–13; Mark 2:13–17)

27Kardené na, Jésu andang dong, ddi sol kema go ’yo hogé dang jomé duro kulu goi go ’yo hogé, gusondi Lébi. Jésu yei wa: Ji kubang. 28Lébi sai dang, ddi ddé henga mam, ddi kobi.

29Kardené Lébi lei do go soré go gumu tai. Ga ’yo hogé combu dang kalang ga ddang jom kebu do dang nagé. 30Ga Parisié dang ga gelé so go Kumu koi kederégé homdégé, ké ’enger anjama ga Jésu kai wa: Keng di, keng si dang kalang ga ’yo hogé dang ga isindong kainya cawa ga? 31Jésu jogu yégé wa: Kalang gang labia na, ké go daré go lo kema ’eno, na ga hoamya daré kema go lo kema. 32’Enung ’erga ca togé kalang ga geddang ’eno, ama na ca toga kalang ga isindong ca ké bega kebegé.

Ké ’enger Jésu ca asiam

(Matié 9:14–17; Mark 2:18–22)

33Kalang ga pena yé Jésu wa: Anjama ga Jâ kai la asiam waindo waindo bua, ké olang bu’, anjama ga Parisié kagé kau la main kain bu’, ama anjama gain wa do bua, wa so bu’. 34Jésu jogu yégé wa: Keng ’erema ca naré kalang ga keng ba tegagé ca soré go ’yo do goi dang tamburwa kudura wo kené ga? Na main kain ’eno. 35Ama tabena do ka ai tamburwa kudura a duroigé cong na, na kiddin ga ka la asiam dé. 36Jésu yégé kual go kera lé bu’. Kema sagu badigé ga herua ca cogenang badigé ga malgi ’eno, ddi nia lé main kain na, ddi toinya badigé gai ga herua, ga malgi go ’yomé gusu ga herua ’eno. 37Kema bé sur kangndo ga herua duro ideli do malgi ’eno, cawa sur kangndo da andié ideli, sur kangndo kang ideli da tunyong ca’. 38Ama na main kain ’eno, na gad ké bé sur kangndo ga herua duro ideli do herua. 39Ama kema nia si sur kangndo ga malgi na, ddi dar ga herua ’eno, cawa ddi yé wa: Ga malgi ddia ga herua.

Currently Selected:

Luk 5: TNG1978

Highlight

Copy