Yohanna 14

Yeso yǝ ɗǝɗa ko a Paapani ra

1“Sǝ taarǝ ra. Sǝ na ɓongtǝra ma Kaa, sǝ ɗǝm na ɓongtǝra ma niina. 2A ɗuur a paane ni, han kaɗaa kǝn dem. me ka sem maaso ra, kama nǝ nkee sǝn. Nǝn koko konǝsǝ werkǝ handa. 3Me nǝ kon konǝsǝ werkǝ handan, pa kǝnǝ kang wonǝsǝ kono, me hannǝsǝ ɓa, saase kǝn sǝ tom kǝnso. 4Han nǝ kosǝ ɓa sǝ maa ɗǝɗan.”

5Pa Toma yaa nkee me, “Ankundi, tǝ maa han kǝ ngaa ko ɓa ra, pa kǝ tǝ tomtomni kǝta maa ɗǝɗau?”

6Yeso yaa kak me, “Niina nǝn ɗǝɗa, niina nǝn ɓongtǝra, niina ɗǝm nǝ huurtu. Yaa ke sem kǝn kiyaa ko a Paapa ni ra ndub ma lau nwaano. 7Me ka sǝ maa nǝn, kama sǝ maa paanen. Pa hana waso, sǝ maasǝn, sǝ ɗǝm wǝrsǝn.”

8Pa Filibus yaa nkee me, “Ankundi, ǝtǝ weɗɗa paapan maɗ peɗɗen.”

9Pa Yeso yǝ nkeesǝ me, “Filibus, nǝ kaɗɗan dem ma saase, pa nding waso sǝ maanǝ rau? Nsaad yaa yǝ wǝrnǝsǝ ya, yǝ wǝr Paanen. Pa tomtom ni sǝ nkeesǝ me, ‘Tǝ weɗɗa paapau’? 10Nwa sǝ na ɓongtǝra me nǝ ɗaan a Paapa ni, Paapa ɗǝm yǝ ɗaan a naa ni rau? Mara nǝn nkeesǝsǝ ra, sem me ǝn u ngwerane wa nǝn nkeesǝ wa ra, ǝn Paapa yǝsǝ ɗaan a kuɗa naa ya yǝn tomsǝ tinima ima wa. 11Sǝ na ɓongtǝra ma niina, me nǝ nkeesǝ me nǝ ɗaan a Paapa ni wa, Paapa ɗǝm yǝ ɗaan a nani, ko hana sǝ na ɓongtǝra ma niina me a tinimsa u nhiinyanhiinya nǝ tomsǝ wa. 12Ɓongtǝra nǝn nkeesǝ, nsaad yaa yǝ nasǝ ɓongtǝra ma niina ya, kiyǝ tom tinima nǝn tomsǝ ma. Kiyǝ nkaa hana yǝ tom tinimsa u faɗsǝ u nwa wa, me nǝ ko a Paapa ni. 13Nsaad mbu sǝ kǝnasǝ ma ɗǝnda na ɓa, kǝnǝ tomo, me aa too Paapa ma lau Auwe wa. 14Mbu nsaad sǝ kǝnasǝ ma ɗǝnda naa ɓa, kǝnǝ tomo.

Yeso yǝ nkee wo Wis Ɗekɗek wa

15“Me sǝn yau ma niinan, sǝkǝ ɓǝɗ mbu nǝ nkeesǝ ɓa. 16Niina kǝn kǝnǝ kǝna Paapa, kiyǝsǝ na Ankwasira ya, yǝ kaɗ ke ma saase pakarese ya. 17Ən sase Wis ɓongtǝra wa. Put ntaadi wa ɓǝ nkaa ɓaa konda, me ɓǝ wǝrsǝ ra, ɗǝm ɓǝ maasǝ ra. Pa waaso sǝ maasǝn, me yǝn kaɗ ma saase, kiyǝ ɗǝm kaɗ a kuɗa saa. 18Nǝsǝ lee nga em wiina sem ra ɓa ra, kǝnǝ wo a saa ni. 19Pee ngeek put ntaadiwa ɓǝ ɓaarǝ ɓǝnǝ wǝr ra, pa waaso kǝsǝ wǝrǝ. Me niina nǝma huurtu, saase kǝn sǝkǝ tom ma huurtu. 20A kaa sǝsa sǝkǝ ma me nǝ ɗaan a Paapa ni, saase kǝn sǝ ɗaan a nani, niina kǝn nǝ ɗaan a saani. 21Hana Yamni yaa yǝ maasǝ mbu nǝ nkeesǝ ɓa ya, ɗǝm yǝn ɓǝɗ ya, ǝn sase yǝn yaunǝsǝ ya. Yaa yǝn yaunǝsǝ ya ɗǝm, Paane kiya yauwa, niina kǝn kǝnaa yauwa, ɗǝm nǝ weɗɗa nkweerane a saani.”

22Pa Yahuda, sem Yahuda Iskariyoti ra, yaa nkee me, “Ankundi, tomtomni ngǝn yausǝ me ngǝ weɗɗa ee nwaango a taani, sem a put ntaadi wa rau?”

23Yeso yaa kak me, “Hana yamni yaa yǝn yaunǝsǝ ya, kiyǝ ɓǝɗ mbu nǝ fǝɗkǝsǝ ɓa. Paane ɗǝm kiya yau wa, kǝtǝ wo a sani tǝ kaɗ ke ma sase. 24Hana yamni yaa yǝ yaunǝsǝ ra ya, yǝn ɓǝɗɗaa mbu nǝ fǝɗkǝsǝ ɓa ra. Matamse sǝn kurasǝ ra, sem nwaano ra, ǝn u Paapa wa, yaa yǝ timinǝsǝ ya.

25Nsaad mbu ɓa nǝ nkeesǝ si ndǝ ke ma saase. 26Pa Ankwasira ya, Wis Ɗekɗek u Paapa kiyaa tung ma ɗǝnda naa wa, ǝn sase kiyǝsǝn fǝɗkǝ mbusa nsaad ya, ɗǝm yǝ sǝ ɗim nsaad mbu nǝ nkeesǝ ɓa. 27Nǝ leesǝ ma hurhurto. Hurhurto nwaano nwa, nǝ nasǝn. Nǝ nasǝ sem nga put ntaadi wa ɓǝn nasǝsǝ wa ra. Sǝ lee kuɗasa a taarǝ ra, ɗǝm sǝ kura kokto ra.

28Sǝ kuran nǝ nkeesǝ me, kǝna faɗ wa, ɗǝm nǝ ɓaarǝ nǝ kang a saani. Me ka sǝn yaunǝ, kama kǝsǝ hur kuɗa me nǝ ko a Paapa ni, me Paapa yǝ faɗ nǝn. 29Nǝ nkeesǝ mbu ɓa si tom sundu ra, pa me mbusǝsǝ tomon, sǝ na ɓongtǝra. 30Nǝ ɓaarǝ nǝsǝ kan mara kwang ɗǝm ra, me an kuɓsutu put ntaadi wa ya, yǝn wowo. Yǝ sem ma kwangto a ɗuura na ra, 31pa pamman me ɓet a put ntaadi wa ɓa, ɓǝ maa me nǝn yau Paapa, ɗǝm ǝn tom mbu Paapa yǝ nkeenǝsǝ me nǝ tom ɓa.

Sǝ ndǝ nii, ndǝ lee ham ɓa.”

Currently Selected:

Yohanna 14: LLA

Highlight

Copy