Yohanna 18

Ɓaa ma Yeso

1Pa Yeso feɗsǝ kǝnara wa, yǝ lee hansǝsa ma emfǝɗkaa ɓisa ɓǝ tall sen kidron wa, a hansǝsa ɓabra kǝra kǝnso, pa ɓǝ kan ɗaan ma emfǝɗkaa ɓisa. 2Pa Yahuda yaa yǝ fangsǝsǝ ya, yǝ maa han sǝsan, me Yeso yǝn pam ma emfǝɗkaa ɓisa kǝnso nfee. 3Pa Yahuda yǝ wo ma kur nsosamse wa ma ɓan war hit Kaa wa ɓa u kuɓsa kwang nek mbusa sa, ma ɓaa Farisiyawa ɓa, ɓǝ timi ɓǝsǝ wa, ɓǝ ko a ɓabra kara, ɓǝ masǝ arkumta ma ma ara a sanyo ma mbu kito ɓa. 4Yeso me yǝ wee maan mbuka tom ma sase ɓa wan, pa yǝ fiɗ yǝɓǝ taa me, “Sǝn kǝr yamniu?”

5Ɓǝ kak me, “Yeso eɗ Nazarat ya.”

Yeso yǝɓǝ kak me, “Ən niina” Yahuda yaa yǝ fangsǝsǝ ya, yǝ kǝɗ kǝnso ke ma ɓosa. 6Fer Yeso yǝ nkee ɓǝsǝ me, “Ən niina wa,” Ɓǝ kwiɗ ma ndiira ɓǝ nwii a putu.

7Pa yǝ ɓaarǝ yǝɓǝ taa ɗǝm me, “Sǝn kǝr yamniu?”

Pa ɓǝ nkee me, “Yeso Eɗ Nazarat ya.”

8Yeso yǝɓǝ kak me, “Yaa nǝ nkeesǝn me, ǝn niina sase. Me ka sǝn kǝraa niina, sǝ lee ɓet ɓa, ɓǝ faɗa.” 9Mbusa tom maaso me a kung mara Yeso yǝ weesǝ nkee ran me, “Yaake hana fin yǝ leetǝ ra a ɓaa ngǝ nanǝsǝ ɓa ni.” 10Bitrus ka usu yǝma kaafai, pa yǝ hik yaa ɗaɗ ngwee a seyaa ya, u hora kuɓ kwang nek mbusa ya wa. Ɗǝnda hoora kara ra, ǝn yarsǝ me Malkus.

11Pa Yeso yaa nkee Bitrus me, “A kang songgom nwaango a hit usu. Sem pam me nǝ wee kongsa u Papa yǝ nanǝsǝ me nǝ wee wa rau?”

Yeso a wii Hanana wa

12Pa kur nsosamse wa ma ɓan war wiina nek mbusa ɓa, u ɓaa Yahudawa ɓa wa, ɓǝ ma Yeso ɓaa kaa. 13A ntiiri ɓǝ kosǝsǝ a Hanana ni, me yǝn rǝf Kayafa ya. Kayafa ǝn sase kuɓ kwang nek mbusa ya a meera sǝra. 14Kayafa ǝn sase yǝ nkeesǝ ɓaa Yahudawa ɓa me, faɗ ɗan ete fin yǝ woɗɗo a ɗuura ɓeta ra.

Bitrus yǝ rǝnǝ me yǝ maa Yeso ra

15Pa Bitrus ma aufǝɗke ke fin, ɓǝn ɓǝɗ Yeso ndiira. Aufǝɗke sisi, kuɓ kwang nek mbusa ya, yǝ maasǝn, pa usu yǝ kan ke ma Yeso a taanda kuɓ kwang nek mbusa siya, 16pa Bitrus usu yǝ tǝng ntaandi a inntii. Pa aufǝɗke u kuɓ kwang nek mbusa ya yǝ maasǝsǝ siya, yǝ kang wo yǝ nkee autoone yǝn tomsǝ tinima a inntii ya, me yǝ lee Bitrus yǝ kana.

17Pa autoone yǝn tomsǝ tinima a inntii siya, yǝ nkee Bitrus me, “Ngǝ sem fin a ɗaaso emfǝɗkaa eɗ siya ɓa rau?”

Yǝ kak me, “Awo nǝ sem ɗaan ɗa.”

18Fer usu a songra, pa hoota ma ɓan wara, ɓǝ puk ara me ɓǝ waa, pa ɓǝ kǝɗkǝɗ kǝnso, Bitrus kǝn yǝ kǝɗ ma ɓosa yǝn waa ara.

Kuɓ kwang nek mbusa ya, yǝ taa Yeso

19Pa kuɓ kwang nek mbusa ya, yǝ taa Yeso mbusa a ɗuura emfǝɗkaa ɓisa ra, ɗǝm ma fǝɗkǝra ira.

20Pa Yeso yaa kak me, “Nǝ nkee mara put ntaadi wa a talten,” ɗǝm nfee, nǝn tom fǝɗkǝra a hit kwau ɓaa Yahudawa ɓa ma hit ɓǝɗ Kaa Urshalima wa, a han nsaad Yahudawa ɓǝn kwausǝ ɓa. Nǝ pǝta nkee mbuka a nhuukǝra ra. 21Pa tomtomni ngǝn taa nǝsǝu? Pam me ngǝ taa ɓaa ɓǝ kura nǝsǝ ɓa, a ɗuura mbu nǝ nkee ɓǝsǝ ɓa, me ɓǝ maa mbu nǝ nkeesǝ ɓan.”

22Pa yǝ nkeesǝ mbusǝsa maaso wa, yaake fin a ɗaaso ɓan wara yǝsǝ kǝɗ ngwang wa, yǝ ɗaktǝ Yeso, yǝ nkee me, “Maso kǝ ngaa kak kuɓ kwang nek mbusa ya marau?” 23Yeso yǝ kak me, “Me nǝ nkee mbuka u sem keke ra wan, ǝnǝ weɗa, pa me mbu nǝ nkeesǝ ɓa yǝ keke, yaa tomtomni ngǝ ɗaktǝnǝ sǝu?” 24Pa Hanana yǝ tung Yeso kaasǝ a Kayafa kuɓ kwang nek mbusa ya wa.

Bitrus yǝ ɓaarǝ yǝ nkee me yǝ maa Yeso ra

25Bitrus yǝsǝ kǝɗ me yǝn waa ara wa, pa ɓaataka ɓaa taa me, “Ngase, ngǝ sem fin a ɗaaso emfǝɗkaa sǝɓa rau?”

Pa yǝ renǝ, yǝ kak me, “Awo, nǝ sem ɗaan da.”

26Pa ate ke a ɗaaso hoota kuɓ kwang nek mbusa ya, yaa sisi yaa haato ma yaa Bitrus yǝ ɗaɗsǝsǝ ngwee siya, yǝ taa Bitrus me, “Nǝ wǝrsǝ ke ma sase a ɓabra kaa ka rau?” 27Bitrus yǝ ɓaarǝ yǝ renǝ ɗǝm, pa nok kǝnso, kokra yǝ paa pomra.

Yeso a wii Bilatus wa

28Pa a ɗenda naakǝn, ɓaa Yahudawa ɓa, ɓǝ fiɗ ma Yeso a taanda a Kayafa ni, ɓaasa ko a wiiyo a ngomna Roma wa ni. Ɓǝ yau ɓǝ kana taanda ngomna sǝra ra, me tom ɓǝ tom ma rumta, u kǝɓǝn nkaa ɓǝ saa kǝu mbukamsa tadko ɓa ra. 29Pa Bilatus yǝ fiɗ yǝɓǝ wo ntaandi, yǝ nkee me, “Sǝ wo ma kaura mbi a ɗuura eɗ ɗa rau?”

30Pa ɓaa kak ɓǝ nkee me, “Me ka eɗ ɗa tǝblǝ mbuka ra, kama taasa wo a ngani ra.”

31Pa Bilatus yǝɓǝ nkee me, “Sosǝ ma sase ma nkweerase kosaa kankiita nga mbu masaka waaso nkeesǝ ɓa.”

Pa ɓaa Yahudawa ɓa, ɓǝ kak me, “Baa natǝ kwangto nǝng kiita toɗ ete wa ra.” 32Mbusa tom maaso, me a kung mara Yeso yǝ nkeesǝ a ɗuura ɗǝɗa kiyaa woɗɗa wa.

33Pa Bilatus yǝ kang a taanda, yǝ yar Yeso yaa taa me, “Ən ngase kuɓ ɓaa Yahudawa ɓa wau?”

34Yeso yaa nkee me, “U nwa ǝn senda ngau, ko ɓaataka nkee ngǝ maaso a ɗuura nau?”

35Bilatus yaa kak me, “Ka nǝ yaa Bayahude yau? Ɓet ɓǝnga ma kuɓsa nek mbusasa, ɓǝ wo ngǝsǝ ɓosa a nani. Ka ngǝ tom mbiu?”

36Yeso yǝ kak me, “Kuɓsutu nwaano sem u put ntaandi wa ra. Me ka kuɓsutu nwaano ǝn u put ntaadi wa ɓa, kama ɓaa ɓǝn tomnǝsǝ tinima ɓa, kǝɓǝ saa ɓaa Yahudawa ɓa me ɓǝ nǝ ma ra. Pa waso kuɓsutu nwaano fiɗ a han ka ɓol.”

37Pa Bilatus yaa nkee me, “Waso ngǝn kuɓu?”

Yeso yaa nkee me, “Ngǝ nkeen keke me nǝ kuɓu. U nwa ǝn siso mbu kwaasǝ ɓaa nhaanǝsǝ wa, ɗǝm ǝn mbu kwaasǝ nǝ kansǝ a put ntaadi wa ɓa, me nǝ nkee ɓongtǝra. Ɗǝm nsaad yaa yǝn yausǝ ɓongtǝra ya, yǝn kura kwar nwaano.”

38Bilatus ya taa me, “Ən mbi ɓongtǝrau?” Ndiira yǝ taasǝ maaso wa, yǝ ɓaarǝ yǝ fiɗ ntaandi a ɓaa Yahudawa ɓa ni, yǝɓǝ nkee me, “Niina nǝ taa eɗ ɗa ma mbu kwalakwala kara. 39Pa ǝn alˈada waaso me nǝsǝ lee ete fin a hit pursuna a fer mbukamsa taɗko wa me tomon. Yaa waso sǝn yau me nǝsǝ lee kuɓ ɓaa Yahudawa ɓa wau?”

40Pa ɓǝ nik kwaro ɓǝ yaulǝ me, “Awo, sem sase ra, ngǝ tǝ hik Barabbas!” Barabbas sisi ǝn wiine ngwiinya.

Currently Selected:

Yohanna 18: LLA

Highlight

Copy