ಲೂಕ 19
19
ಯೇಸು ಅಜು಼ ಜಕ್ಕಾಯ
1ಯೇಸು ಯೆರಿಕೋ ವಾಟೆಕರಿ ಒಳೆಜಾ಼ತೊಥೊ. 2ಹಿಜ್ಜಾ಼ ಶುಂಕ ಮಾಂಗವಾಳನೊ ಮೋಟೊ ಹುಯಿರ‍್ಹೊಥೋತೆ ಜಕ್ಕಾಯ ಕರಿ ಏಕ್‍ಜ಼ಣೊ ಥೊ. ಯೋ ಧನ್‌-ದೌಲತ್‌ವಾಳೊ ಹುಯಿರ‍್ಹೋಥೊ. 3ಯೋ ಯೇಸುನ ದೇಕ್ಣು ಕರಿ ಆಖ್ಹ್‌ಕರ‍್ಯೊ, ಕತೋಬಿ ಯೋ ಕುಳ್ಳೊ ಹುಯಿರ‍್ಹೊಥೋತೆ ಅಜು಼ ಅದ್ಮಿನಿ ಭೀಡ್‌ಥೀತೆ ಇನಖ್ಹಾಜೆ, ಯೇಸುನ ದೇಖಾನ ಕೋ ಹುಯೂನಿ. 4ಇನಖ್ಹಾಜೆ ಯೋ ಯೇಸುನ ದೇಕ್ಣು ಕರಿ, ಅದ್ಮಿನಿ ಭೀಡ್‌ಣ ಖ್ಹಾಮ್ಣೆ ನಾಶಿ ಜೈ಼ನ್, ಏಕ್ ವಡ್‌ನ ಝಾ಼ಡ್‌ಪರ್‌ ಚ಼ಢಿಗಯೊ. ಶನಕತೊ, ಯೇಸು ಯೋಸ್‌ ವಾಟೆಕರಿ ಆವಾಳೊ ಥೊ. 5ತದೆ ಯೇಸು ಹಿಜ್ಗಾ಼ ಆಯಿನ್, ಉಪ್ಪರ್ ದೇಖಿನ್, “ಜಕ್ಕಾಯ, ಫಟ್‌ ಕರಿ ಉತ್ರಿನ್ ಆವ್, ಶನಕತೊ ಆಜ಼್ ಮೇ ತಾರ ಘರ್‌ಮ ರ‍್ಹವಾನ ಆಯೊ” ಕರಿ ಇನ ಬೋಲ್ಯೊ.
6ತದೆ ಜಕ್ಕಾಯ ಒಗ್ಗಿಸ್‌ಮ ಉತ್ರಿ ಐನ್, ಖ್ಹುಶಿಥಿ ಯೇಸುನ ಸ್ವಾಗತ್ ಕರ‍್ಯೊ. 7ಅನ ದೇಖಿನ್ ಅದ್ಮಿಖ್ಹಾರು, “ಯೇಸು ಪಾಪಿನ ಘರ್‌ಮ ಮೆಹಮಾನ್ ಹುಯಿನ್ ವಳ್ಯೊಜಾ಼ಸ್‌” ಕರಿ ಭಣ್‌ಕ್ಯು.
8ಕತೋಬಿ ಜಕ್ಕಾಯಾನೆ ಭೀರಿನ್‌, ಪ್ರಭುನ, “ಗುರು ಹಂದೇಕ್‌! ಮಾರಿ ಆಸ್ತಿಮ ಆಧು ಗೋರ್‌-ಗರೀಬ್ ದೆವುಸ್‌ ಅಜು಼ ಮೇ ಕಿನಾತೋಬಿ ಠಗೈರಾಖ್ಯೊ ಉಶೇತೊ, ಇನ ಏಕ್‌ನ ಚಾರ್ ದೆವುಸ್‌” ಕರಿ ಬೋಲ್ಯೊ.
9ಅನ ಖ್ಹಮ್‌ಜಿನ್‌, ಯೇಸುನೆ ಇನ, “ಆಜ಼್ ಆ ಘರ್‌ನ ರಕ್ಷಣೆ ಐರ‍್ಹೀಸ್, ಶನಕತೊ ಆಬಿ ಅಬ್ರಹಾಮ್‌ನೊ ಪಿಳ್ಗಿವಾಳೊ ಹುಯಿರ‍್ಹೋಸ್‌ನಿ. 10ಶನಕತೊ ಅದ್ಮಿನೊ ಛಿಯ್ಯೊ, ಗುಮೈಗೂತೆ ಇನ ಢೂಂಡಿನ್ ಬಚಾ಼ಡನಖ್ಹಾಜೆ ಐರ‍್ಹೋಸ್ತೆ” ಕರಿ ಬೋಲ್ಯೊ.
ಖ್ಹೊನ್ನಾನು ಬಿಲ್ಲಾವ್‍ನಿ ಬಾರೇಮಾನು ಮತ್ಲಬ್‌ನಿ ಖೇಣಿ
(ಮತ್ತಾಯ 25:14-30)
11ಇವ್ಣೆ ಆ ವಾತೆಖ್ಹಾರಿ ಖ್ಹಮ್‌ಜು಼ಕರಾನಿ ವಖ್ಹತ್‌ಮ, ಯೇಸು ಯೋ ಯೆರೂಸಲೇಮ್‌ನ ಖನ್ನೆಸ್‌ ಪೋಚಿಗಯೊಥೋತೆ ಇನಖ್ಹಾಜೆ, ಅಜು಼ ಅದ್ಮಿಖ್ಹಾರು ದೇವ್ನಿ ರಾಜ್ಯ ಒಗ್ಗಿಸ್‌ಮ ದೆಖಾವ್‌ಶೆ ಕರಿ ಸೋಚ್ಯೂತೆ ಇನಖ್ಹಾಜೆ, ಯೇಸುನೆ ಬಿಜ್ಜೇಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ. 12ಯೋ ಶಾತ್‌ಕತೊ, “ಏಕ್ ಮೋಟ ಘರ್‌ನು ಶೌಕರ್‌ ಅದ್ಮಿಥು, ಯೋ ರಾಜ಼್‌ಭಾರ್‌ಲೀನ್, ಪಾಛು಼ಫರಿ ಇನ ಘರೆ ಆವ್ಣುಕರಿ ಖ್ಹೂಜ಼್ ಕರೀನ್, ದೂರ್‌ಲ್ಯೊ ದೇಖ್ಹ್‌ನ ನಿಕ್‌ಳ್ಯೊ. 13ಯೋ ಜಾ಼ವನ ಆಗಾಡಿ, ಇನ ಸೇವಕರ್‌ಮ ದಖ್ಹ್‌ ಜ಼ಣಾನ ಬುಲೈನ್, ಹರ್‌ ಏಕ್‌ನ ಖ್ಹೊನ್ನಾನು ಬಿಲ್ಲು ದೀನ್, “ಮೇ ಆವಾತೋಡಿ ಅನೇಥಿ ಧಂದೊ ಕರೊ” ಕರಿ ಇವ್ಣುನ ಬೋಲ್ಯೊ. 14ಕತೋಬಿ ಇನು ಶೊಂತ್‌ ಖ್ಹಯೇರ‍್ನು ಅದ್ಮಿ ಇನಾಪರ್‌ ದಾವೊ ಕರೀನ್, ಇನ ಪೀಠೆ ಖಬರ್ ದ್ಯವಾಳಾನ ಮೋಕ್ಲಿನ್, “ಆ ಹಮಾರಪರ್‌ ರಾಜ಼್‌ಭಾರ್‌ ಚ಼ಲಾವಾನು ಹಮೂನ ಅಛ್ಛು಼ ಲಾಗಕೊಯ್ನಿ” ಕರಿ ಇನ ಬೋಲ್ಯು.
15ತೋಬಿ ಯೋ ಅದ್ಮಿ ರಾಜ್ಯನಿ ಅದಿಕಾರಿಹುಯಿನ್ ಫಾಛೊ಼ಫರಿ ಆಯೊ. ತದೆ ಇನೆ, “ಮೇ ಖ್ಹೊನ್ನಾನು ಬಿಲ್ಲು ದಿದೊಥೋತೆ ಸೇವಕರ್‌ನ ಮಾರ ಖ್ಹಾಮೆ ಬುಲಾವೊ. ಇವ್ಣೆ ಕೆತ್ರು ಕಮೈರಾಖ್ಯುಸ್‌ ಕರಿ ಮನ ಮಾಲುಮ್‌ ಪಡ್ಣು” ಕರಿ ಹುಕುಮ್‌ದಿದೊ.
16ಪಹಿಲೊ ಸೇವಕ್‌ನೆ ಇನಖ್ಹಾಮ್ಣೆ ಆಯಿನ್, “ಪ್ರಭು ತುನೆ ದಿದೋತೆ ಏಕ್ ಖ್ಹೊನ್ನಾನು ಬಿಲ್ಲಾಥಿ, ಮೇ ದಖ್ಹ್‌ ಖ್ಹೊನ್ನಾನು ಬಿಲ್ಲಾ ಕಮೈರಾಖ್ಯೋಸ್” ಕರಿ ಬೋಲ್ಯೊ. 17ಯೋ ಇನ, “ಶಬಾಶ್! ತೂ ಅಛ್ಛೊ಼ ಸೇವಕ್! ತೂ ಥೋಡಾಮ ನಿಯಥ್ಥಿ ರ‍್ಹಯೋತೆ ಇನಖ್ಹಾಜೆ, ಮೇ ತುನ ದಖ್ಹ್‌ ಖ್ಹಯೇರ್‌ಪರ್‌ ಅದಿಕಾರಿಕರಿನ್ ಮ್ಹೇಲುಕರೂಸ್‌” ಕರಿ ಬೋಲ್ಯೊ. 18ಬಿಜ್ಜೇಕ್‌ ಜ಼ಣೊ ಆಯಿನ್, “ಗುರು ತುನೆ ದಿದೋತೆ ಏಕ್ ಬಿಲ್ಲಾಥಿ, ಮೇ ಪಾಚ಼್ ಖ್ಹೊನ್ನಾನು ಬಿಲ್ಲಾ ಕಮೈ ಕರಿರಾಖ್ಯೋಸ್” ಕರಿ ಬೋಲ್ಯೊ. 19ತದೆ ರಾಜಾ಼ನೆ ಅನ, “ತೂಬಿ ಪಾಚ಼್ ಖ್ಹಯೇರ್‌ಪರ್‌ ಅದಿಕಾರಿಹುಯಿನ್ ರ‍್ಹೇ” ಕರಿ ಬೋಲ್ಯೊ.
20ಅನ ಬಾದ್‌ಮ ಬಿಜ್ಜೇಕ್‌ ಜ಼ಣು ಐನ್, “ಪ್ರಭು, ಅಲಾ ತುನೆ ದಿದೋತೆ ಖ್ಹೊನ್ನಾನು ಬಿಲ್ಲು. ಅನ ಏಕ್ ಚೌ಼ಕಾಮ ಲಪೇಟಿನ್ ಮ್ಹೇಲಿರಾಖ್ಯೊಥೊ. 21ತೂ ತಾರು ಕಾಹೆತೆ ರಾಛ಼ನ ಫಳ್ಳಿ ಜಾ಼ವಾಳೊ, ತುನೆ ಛಿಡ್‌ಕ್ಯೊಕೊಂತೆ ಇನ ವ್ಹಾಡವಾಳೊ ಕಠಣ್ ಅದ್ಮಿಕರಿ ಬೋಲಿನ್, ತಾರೇಥಿ ಡರಿನ್, ಆ ಬಿಲ್ಲಾನ ಚೌ಼ಕಾಮ ಭಾಂದೀನ್‌, ಲಪಾಡಿರಾಖ್ಯೊಥೊ” ಕರಿ ಬೋಲ್ಯೊ. 22ಅನ ಖ್ಹಮ್‌ಜಿನ್‌ ಯೋ ರಾಜ಼ ಇನ, “ತೂ ಖರಾಬ್ ಸೇವಕ್! ತಾರಿ ವಾತೆಥೀಸ್‌ ತುನ ತೀರ್ಪ್‌ ಕರುಸ್. ಮೇ ಮಾರು ಕಾಹೆತೆ ರಾಛಾ಼ನ ಪಳ್ಳಿನ್‌ ಜಾ಼ವಾಳೊ, ಮೇ ಪಿಕಾಯೊಕೊಂತೆ ಇನ ವ್ಹಾಡವಾಳೊ ಕಠಣ್ ಅದ್ಮಿಕರಿ ತುನ ಮಾಲುಮ್‌ನಿ. 23ಇಮ್‍ಕತೊ, ತೂ ಮಾರು ಖ್ಹೊನ್ನಾನು ಬಿಲ್ಲಾನ ಬಡ್ಡಿಪರ್ ಶನ ಕೋ ದಿದೋನಿ?” ಕರಿ ಬೋಲ್ಯೊ.
24ತದೆ ಖನ್ನೆ ಭಿಯ್ಯುಥೂತೆ ಇವ್ಣುನ ಇನೆ, “ಅನಕಂಥು, ಯೋ ಖ್ಹೊನ್ನಾನು ಬಿಲ್ಲಾನ ಲೀನ್‌, ದಖ್ಹ್‌ ಖ್ಹೊನ್ನಾನು ಬಿಲ್ಲಾ ಛಾ಼ತೆ, ಇನ ದೆವೊ” ಕರಿ ಬೋಲ್ಯೊ 25ಕತೋಬಿ ಇವ್ಣೆ ಇನ, “ಪ್ರಭು, ಇನಾಕನ ಅಗಾಡಿಸ್ ದಖ್ಹ್‌ ಖ್ಹೊನ್ನಾನ ಬಿಲ್ಲಾ ಛಾ಼ನಿ” ಕರಿ ಬೋಲ್ಯು. 26ತದೆ ರಾಜಾ಼ನೆ ಇವ್ಣುನ ಬೋಲ್ಯೋಕಿ, “ಮೇ ಬೋಲುಸ್ಕಿ, ಕಿನಾಕಿನ ಛಾ಼ಕಿ ಇವ್ಣುನ ಬಿಜೂ಼ಬಿ ದೇವಾವ್‌ಶೆ, ಕತೋಬಿ ಕಿನಾಕನ ಕೊಯ್ನಿಕಿ ಇವ್ಣಕಂಥು, ಛಾ಼ತೆಬಿ ಕಾಡಿಲಿಶೆ” 27ಅಜು಼ ಮೇ ಇವ್ಣಾಪರ್ ರಾಜಾ಼ ನಾ ಹುಯಿರ‍್ಹೇಣು ಕರಿ ಬೋಲ್ಯುಥೂತೆ ಯೋ ಮಾರ ದುಶ್‌ಮನ್ನ ಖ್ಹಾರು, ಹಮ್ಕೆ ಹಜ಼್ಜಾ ಲೈನ್‌, ಮಾರ ಖ್ಹಾಮ್ಣೆಸ್ ಇವ್ಣುನ ಮಾರಿ ನಾಕ್ಣು!” ಕರಿ ಬೋಲ್ಯೊ.
ಯೇಸು ರಾಜಾ಼ನಿಘೋಣಿ ಯೆರೂಸಲೇಮ್ಮ ಗಯೋತೆ
(ಮತ್ತಾಯ 21:1-11; ಮಾರ್ಕ 11:1-11; ಯೋಹಾನ 12:12-19)
28ಆ ಖ್ಹಾರು ಬೋಲಾನ ಬಾದ್‌ಮ, ಯೇಸು ಇವ್ಣೇಥಿ ಖ್ಹಾಮ್ಣೆ-ಖ್ಹಾಮ್ಣೆ ಚಾ಼ಲಿನ್, ಯೆರೂಸಲೇಮ್‌ ಭಣಿಗಯೊ. 29ಅನ ಬಾದ್‌ಮ ಯೇಸು, ಆಲಿವ್ ತೇಲ್‌ನುಝಾ಼ಡ್ನ ಪಹಾಡ್‌ಕನ, ಥೂತೆ, ಬೆತ್ಫಗೆ ಅಜು಼ ಬೇಥಾನ್ಯ ಕರಿ ಗಾಮ್‌ನ ಖನ್ನೆ ಆವಾದಿನ್, ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, “ತುಮಾರ ಖ್ಹಾಮ್ಣೆ ಛಾ಼ತೆ ಗಾಮ್ಮ ಜಾ಼ವೊ. 30ತುಮೆ ಯೋ ಗಾಮ್‌ನ ಮಹಿ ಜಾ಼ತಸ್‌ನ ಹಿಜ಼್ಜಾ ಭಂದೈರ‍್ಹೀಶೆತೆ, ಏಕ್ ಜಾ಼ನ್ಜ಼ಮಾನ್ ಗಧೇಡಾನ ಚೆಲ್ಕಾನ ದೇಕ್‌ಶು, ಹಂಕೆತೋಡಿ ಇನಾಪರ್‌ ಕೋಣ್‌ಬಿ ಕೋ ಬೆಠೂನಿ. ಇನ ಛೋ಼ಡಿನ್, ಹಜ್ಜಾ಼ ಧರಿಲೀನ್ ಆವೊ, 31ಕೋಣ್‌ತೋಬಿ ತುಮೂನ, ‘ಅನ ಶನ ಛೋ಼ಡುಕರಾಸ್ತೆ?’ ಕರಿ ಫುಛಾ಼ಯುತೊ, ಪ್ರಭುನ ಆ ಹೋಣುಕಸ್‌ ಕರಿ ಬೋಲೊ” ಕರಿ ಬೋಲಿನ್ ಮೋಕ್‌ಲ್ಯೊ.
32ಇವ್ಣೆ ಜೈ಼ನ್, ಯೇಸುನೆ ಬೋಲ್ಯೊಥೋತೆ ಇಮ್ಮಸ್ ಥೂತೆ ದೇಖ್ಯು. 33ಇವ್ಣೆ ಯೋ ಗಧೇಡಾನ ಚೆಲ್ಕಾನ ಛೋ಼ಡುಕರಾನಿ ವಖ್ಹತ್‌ಮ, ಇನ ಯಜಮಾನ್ನೆ, “ಇನ ಶನ ಛೋ಼ಡುಕರಾಸ್ತೆ?” ಕರಿ ಬೋಲ್ಯು.
34ತದೆ ಇವ್ಣೆ, “ಆ ಪ್ರಭುನ ಹೋಣುಕಸ್‌” ಕರಿ ಜವಾಬ್‌ ದಿದು. 35ಯೋ ಗಧೇಡಾನ ಯೇಸುಕನ ಲೈನ್‌, ಇವ್ಣ ಲುಂಗ್ಡಾವ್‍ನ, ಯೋ ಗಧೇಡಾನಚೆಲ್ಕನ ಉಪ್ಪರ್ ನಾಖಿನ್, ಯೇಸುನ ಇನಾಪರ್‌ ಬೆಖ್ಹಾಡ್ಯು. 36ಯೇಸು ಜಾ಼ತೊರ‍್ಹವಾನಿ ವಖ್ಹತ್‌ಮ, ಇವ್ಣೆ ಇವ್ಣ ಲುಂಗ್ಡಾವ್‍ನ ವಾಟ್‌ಪರ್ ಬಿಛಾ಼ಯು.
37ಯೇಸು ಯೆರೂಸಲೇಮ್‌ನ ಖನ್ನೆ, ಆಲಿವ್ ಪಹಾಡ್‌ನು ಉತರ್‌ತಿ ಝ಼ಗೋಕನ ಆವಾದಿನ್, ಇನ ಶಿಷ್ಯರ್‌ನಿ ಮೋಟಿ ಝೂ಼ಂಡ್‌ ಖ್ಹುಶಿ ಕರ್ತುಹುಯಿನ್, ಇವ್ಣೆ ದೇಖ್ಯೂತೆ ಖ್ಹಾರಿಸ್ ಮಹಾನ್ ಕಾಮ್ನಖ್ಹಾಜೆ ಜೋ಼ರ್ ಅವಾಜ಼್‌ಥಿ ದೇವ್ನಿ ಸ್ತುತಿ ಕರ‍್ಯು. 38“ಪ್ರಭುನ ನಾಮ್‌ಪರ್‌ ಆವಾಳ ರಾಜಾ಼ನ ಆಶೀರ್ವಾದ್‌ ಹುವಾದೆ ಪರ್‌ಲೋಕ್‌ಮ ಸಮಾಧಾನ್‍, ಉಪ್ಪರ್‌ಲ್ಯ ಲೋಕ್ಮ ಮಹಿಮೆ ಹುವಾದೆ!” ಕರಿ ಘಣಿಮೋಟಿ ಅವಾಜ಼್ ದೇವ್ನ ಸ್ತುತಿ ಕರಲಗ್ಯು. 39ಅದ್ಮಿನಿ ಝೂ಼ಂಡ್‌ಮ ಥೂತೆ ಥೋಡು ಫರಿಸಾಯರ್‌ವಾಳು ಯೇಸುನ, “ಗುರು, ತಾರ ಶಿಷ್ಯರ್‌ನ ಖ್ಹೊಪ್‌ ರ‍್ಹವೊ ಕರಿ ಗುರ್‌ಕಾವ್” ಕರಿ ಬೋಲ್ಯು,
40ತದೆ ಯೇಸುನೆ, “ಮೇ ತುಮೂನ ಬೋಲುಸ್ಕಿ, ಅವ್ಣೆ ಖ್ಹೊಪೊ ಹುಯಿಗಯೂತೊ, ಆ ಬಂಡಾಸ್ ಇವ್ಣು ಇವ್ಣೆ ಚಿಕರ್‌ಶೆ” ಕರಿ ಜವಾಬ್‌ ದಿದೊ.
ಯೇಸು ಯೆರೂಸಲೇಮ್‌ನಖ್ಹಾಜೆ ರೋಯೊತೆ
41ಯೇಸು ಯೆರೂಸಲೇಮ್‌ ಖ್ಹಯೇರ‍್ನ ಖನ್ನೆ ಆಯಿನ್, ಇನ ದೇಖಿನ್, ಇನಿ ಬಾರೇಮ ರೋವ್‌ತೊಹುಯಿನ್‌, 42ಅಜು಼ ಬೋಲ್ಯೋಕಿ, “ಶಾಂತಿಥಿ ರ‍್ಹವಾನ ಶಾತ್‌ ಹೋಣು ಕರಿ ಬೋಲಾನು, ತೂ ಹಜ್ಜಾ಼ಸ್ ಮಾಲುಮ್‌ ಕರಿಲಿದಿಹೋತ್‌ತೊ ಕೆತ್ರೆಸ್ಕಿ ಅಛ್ಛು಼ ಥೂ! ಕತೋಬಿ ಹಮ್ಕೆ ತುನ, ಯೋ ದೇಖಾನ ಕೊ ಉಶೇನಿ, 43ಏಕ್ ವಖ್ಹತ್ ಆವ್‌ಶೆ, ತದೆ ತಾರು ದುಶ್‌ಮನ್‌ ಖ್ಹಾರು, ತಾರ ಅಶ್‌ಪೀಶ್‌ ಭೀತ್ ಭಾಂದಿನ್, ತುನ ಖ್ಹಾರಿಸ್ ಬಾಜು಼ಥು ಕಬ್‍ಜಾ಼ ಕರೀನ್, 44ಇವ್ಣೆ ತುನ ಅಜು಼ ತಾರಿ ಭೀತ್‌ನ ಮಹಿ ಛಾ಼ತೆ ಖ್ಹಾರ ಅದ್ಮಿನ ಬರ್ಬಾತ್ ಕರ್ಶೆ, ಏಕ್-ಬಂಡಾಪರ್ ಬಿಜ್ಜೇಕ್‌ ಬಂಡೊ ಭೀರೆವ್ಣುನಾತೆ ಇಮ್‌ ಇವ್ಣೆ ಕರ್ಶೆ, ಶನಕತೊ, ದೇವ್ನೆ ತುನ ಬಚಾ಼ಡ್‌ಣು ಕರಿ ಆಯೋತೆ ವಖ್ಹತ್‌ನ, ತೂ ಪರ್ಖಿ ಕೊಯ್ನಿ!” ಕರಿ ಬೋಲ್ಯೊ.
ಯೇಸು ಮಂದಿರ್‌ಮ ಗಯೋತೆ
(ಮತ್ತಾಯ 21:12-17; ಮಾರ್ಕ 11:15-19; ಯೋಹಾನ 2:13-22)
45ಅನ ಬಾದ್‌ಮ ಯೇಸು ಮಂದಿರ್‌ಮ ಜೈ಼ನ್, ವೇಚ಼ವಾಳನ ಭಾರ್‌ ನಖ್ಹಾಡಲಗ್ಯೊ. 46ಅಜು಼ ಇವ್ಣುನ ಬೋಲ್ಯೊಕಿ, “ದೇವ್ನೆ ಬೋಲ್ಯೊ, ‘ಮಾರಿ ಮಂದಿರ್‌ ಪ್ರಾರ್ಥನೇನು ಘರ್ ಹುಯಿರ‍್ಹಿಶೆ’ ಕರಿ ಲೀಖೈರ‍್ಹೂಸ್‌ನಿ.#19:46 ಯೆಶಾಯ 6.7; ವಿಮೋಚನ ಕಾಂಡ 19.46; ಯೆರೆಮೀಯ 7.11 ಕತೋಬಿ ತುಮೆ ಅನ ಚೋ಼ರ್‌ನಿ ಲಪಾನಿ ಘವಿ ಬಣೈನಾಖ್ಯ.
47ದನ್ರೋಜ಼್ ಯೇಸು ಮಂದಿರ್‌ಮ ವಚನ್ ಬೋಲಿದೆತೋಥೊ. ಕತೋಬಿ ಮಹಾಯಾಜಕ, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣು ಖ್ಹಾರು ಯೇಸುನ ಮರ್‌ನಾಖಿದೇವ್ಣು ಕರಿ ಕೋಶಿಶ್ ಕರ‍್ಯು. 48ಕತೋಬಿ ಇನ ಖೆವಿ ತರಿಕಾಥಿ ಮರ್‌ನಾಖಿ ದಿಯೆಜಾ಼ಯ್ ಕರಿ ಬೋಲಾನು ಇವ್ಣ ಮಾಲುಮ್‌ ಕೋ ಪಡ್ಯುನಿ, ಶನಕತೊ ಅದ್ಮಿಖ್ಹಾರು ಯೇಸುನಿ ವಾತೆನ ಚಿಂತ್‌ಲಗಾಡಿನ್, ಖ್ಹಮ್‌ಜ಼್‌ತೂಥು.
Currently Selected:
ಲೂಕ 19: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
