ಮಾರ್ಕ 6
6
ನಜ಼ರೇತ್‌ನು ಅದ್ಮಿ ಯೇಸುನ ಝಿಟ್ಕಾರ‍್ಯುತೆ
(ಮತ್ತಾಯ 13:53-58; ಲೂಕ 4:16-30)
1ಯೇಸು ಹಿಜ್ಜಾ಼ಥೊ ನಿಕ್ಳಿನ್ ಇನ ಗಾಮೆ ಗಯೊ, ಇನ ಶಿಷ್ಯರ್‌ಬಿ ಇನ ಪೀಠೆ ಗಯ. 2ಸಬ್ಬತ್‌ ದನ್ ಆವಾದಿನ್ ಯೇಸು ಸಬೆ ಭರಾವಾನು ಮಂದಿರ್‌ಮ ಜೈ಼ನ್, ದೇವ್ನಿ ವಚನ್ ಬೋಲಿ ದೆವಾನಿಕ್‌ಳ್ಯೊ. ಹಿಜ್ಜಾ಼ ಘಣು ಅದ್ಮಿಥು; ಇವ್ಣೆ ಇನಿ ವಾತೆ ಖ್ಹಮ್‌ಜಿನ್‌ ಘಣು ಆಶ್ಚರ್ಯಹುಯಿನ್, “ಆ ಖ್ಹಾರಿ ವಾತೆ ಅನ ಕಿಜ್ಜಾ಼ಥಿ ಮಳಿ? ಅನ ಅಮ್ನಿ ಗ್ಯಾನ್ ಕಿಜ್ಜಾ಼ಥಿ ಮಳಿ? ಅನ ಅದ್ಭುತ್‌ಖ್ಹಾರು ಕರಾನ ಶಕತ್ ಕಿಜ್ಜಾ಼ಥಿ ಆಯಿ?” 3ಆ ಅದ್ಮಿತೊ ಖೋಡ್‌ಶಾನು ಖ್ಹಾಮನ್‌ ಕರಾವಾಳೊನಿ, ಆ ಮರಿಯನೊ ಛಿಯ್ಯೋನಿ, ಯಾಕೋಬ್, ಯೋಸೆ, ಯೂದ ಅಜು಼ ಸೀಮೋನ್ನೊ ಮೋಟೊ ಭೈನಿ? ಅಜು಼ ಅನಿ ಭೇನೆಬಿ ಹಾ಼ಸ್‌ ರ‍್ಹೇಸ್‌ನಿ?” ಕರಿ ಬೋಲಿನ್ ಯೇಸುನ ಝಿಟ್ಕಾರ‍್ಯು.
4ತದೆ ಯೇಸುನೆ ಇವ್ಣುನ, “ಪ್ರವಾದಿಯೇನ ಬಿಜ಼ ಖ್ಹಾರ ಗಾಮ್ಮ ಮರ್ಯಾದಿ ದೇಸ್, ಕತೋಬಿ ಇನು ಶೊಂತ್‌ ಗಾಮ್ಮ, ಶೊಂತ್‌ ಅದ್ಮಿಮ ಅಜು಼ ಶೊಂತ್‌ ಘರ್‌ಮ ಇನ ಮರ್ಯಾದಿ ಕೋ ದೇಯ್ನಿ” ಕರಿ ಬೋಲ್ಯೊ.
5ಯೇಸುನೆ ಹಿಜ್ಜಾ಼ ರೋಗ್‍ವಾಳ ಥೋಡ ಅದ್ಮಿಪರ್ ಹಾತ್‌ ಮ್ಹೇಲಿನ್ ಅಛ್ಛು಼ ಕರಾನು ಕಾಹೆತೆ ಬಿಜು಼ ಶನೂಬಿ ಅದ್ಭುತ್‌ಕಾಮ್ನ ಕರಾನ ಕೋ ಹುಯೂನಿ. 6ಹಿಜ಼್ಜಾನ ಅದ್ಮಿಮ ವಿಶ್ವಾಸ್‌ಕೊಂತೆ ದೇಖಿನ್, ಯೇಸುನೆ ಘಣು ಆಶ್ಚರ್ಯಖಾದೊ.
ಯೇಸುನೆ ಭಾರ ಜ಼ಣ ಶಿಷ್ಯರ್‌ನ ಮೋಕ್‌ಲ್ಯೊತೆ
(ಮತ್ತಾಯ 10:5-15; ಲೂಕ 9:1-6)
ಬಾದ್‌ಮ ಯೇಸು ಅಶ್‌ಪೀಶ್‌ನ ಗಾಮೆ ಜೈ಼ನ್, ದೇವ್ನಿ ವಚನ್ ಬೋಲಿದೆವಾನಿಕ್‍ಳ್ಯೊ. 7ಅಜು಼ ಭಾರ ಜ಼ಣ ಶಿಷ್ಯರ್‌ನ ಏಕ್‌ದಮ್ ಬುಲೈನ್, ಇವ್ಣುನ ಭೂತ್‌ಖ್ಹಾರು ಕಾಡಾನ ಅದಿಕಾರ್ ದಿದೊ, ಬೆಬ್ಬೆ ಜ಼ಣ ಕರಿನ್ ಮೋಕ್‌ಲ್ಯೊ. 8ಯೇಸುನೆ ಇವ್ಣುನ, “ಲಠ್ಠೊ ಮ್ಹೆಂದಿನ್ ಶಾತ್ಬಿ ನಕೊ ಲೀಜಾ಼ವೊ, ರೋಟೊ ರ‍್ಹವೊ, ಝೋ಼ಳಿ ರ‍್ಹವೊ, ಚ಼ಂಚಿಮ ಪೈಶಾ ರ‍್ಹವೊ ನಕೊ ಲೀಜಾ಼ವೊ. 9ಚಪ್ಲೆ ಘಾಲಿಲೆವೊ, ಅಜು಼ ಪೇರ‍್ಹಿರಾಖ್ಯಸ್ತೆ ಕುಡ್‌ತೂಸ್‌ ಬಶ್‌, ಬಿಜೇಕ್ ಕುಡ್‌ತು ನಕೊ ಲೀಜಾ಼ವೊ” ಕರಿ ಹುಕುಮ್‌ ದಿದೊ. 10ಎತ್ರೇಸ್ ಕಾಹೆತೆ ಯೇಸುನೆ ಇವ್ಣುನ, “ತುಮೂನ ಖೆವ ಘರ್‌ಮ ಬುಲೈಲೇಸ್ಕಿ, ಯೋ ಝ಼ಗೊ ಮ್ಹೇಲಿನ್ ಜಾ಼ವಾಲಗೂಬಿ ಯೋಸ್ ಘರ್‌ಮ ರ‍್ಹವಾಕರೊ. 11ಅಜು಼ ಕೆವ್ಹಾಬಿ ಝ಼ಗೊವಾಳು ತುಮೂನ ನಾ ಬುಲೈಲಿದುತೊ ಅಜು಼ ತುಮಾರಿ ವಾತೆನ ನಾ ಖ್ಹಮ್‌ಜುತೊ, ಯೋ ಝ಼ಗೋಥು ನಿಕ್ಳಿ ಜಾ಼ವೊ ಅಜು಼ ತುಮಾರ ಗೋಡಾನ ಲಾಗ್ಯುತೆ ಧೂಳ್‌ನ ಝ಼ಟ್‌ಕಿ ದೆವೊ#6:11 ಯೋ ಝ಼ಗೊನ ಅದ್ಮಿನ ದೇವ್ನೆ ಧಕೇಲಿದಿದೊ ಕರಿ ಆ ಏಕ್‌ ಖ್ಹಣೇದ್. ಆ ಇವ್ಣುನ ಝೇತಾವನು ಸಾಕ್ಷಿ ಹುಯಿರ‍್ಹಿಶೆ!” ಕರಿ ಬೋಲ್ಯೊ.
12ಬಾದ್‌ಮ ಇವ್ಣೆ ಹಿಜ್ಜಾ಼ಥು ಜೈ಼ನ್, ಅದ್ಮಿಖ್ಹಾರನ, “ಪಾಪ್ ಕರಾನು ಮ್ಹೇಲಿನ್ ದೇವ್ ಭಣಿ ಫರೊ” ಕರಿ ದೇವ್ನಿ ವಾತೆನ ಬೋಲಿವತಾಳ್ಯು. 13ಇವ್ಣೆ ಘಣು ಭೂತ್‌ಖ್ಹಾರು ಕಾಡ್ಯು ಅಜು಼ ರೋಗ್‍ವಾಳ ಘಣ ಅದ್ಮಿನ ತೇಲ್ ಲಗಾಡಿನ್ ಅಛ್ಛು಼ಕರ‍್ಯು.
ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ್ನಿ ಮರಣ್
(ಮತ್ತಾಯ 14:1-12; ಲೂಕ 9:7-9)
14ಅಜು಼ ಹೆರೋದ ರಾಜಾ಼ನೆ ಯೇಸುನಿ ಬಾರೇಮ ಖ್ಹಮ್‌ಜೊ಼, ಶನಕತೊ ಯೇಸುನು ನಾಮ್ ಖ್ಹಾರಿ ಬಾಜು಼ಮ ಫೈಲಿಗಯುಥು. ಥೋಡು ಅದ್ಮಿ ಯೇಸುನಿ ಬಾರೇಮ, “ಬ್ಯಾಪ್ತಿಸ್ಮದ್ಯವಾಳೊ ಯೋಹಾನಸ್‌ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್! ಇನಖ್ಹಾಜೇಸ್ ಮೋಟು ಅದ್ಭುತ್ ಕರಾನು ಶಕತ್ ಯೇಸುಮ ಛಾ಼ತೆ” ಕರಿ ಬೋಲ್ತುಥು.
15ಥೋಡು ಜ಼ಣು, “ಯೋ ಎಲೀಯ” ಕರಿ, ಬಿಜು಼ ಥೋಡು ಜ಼ಣು, “ಘಣ ವರಖ್ಹ್‌ನ ಪೀಠೆ ಥೂತೆ ಪ್ರವಾದೀನಿ ಘೋಣಿ ಆಬಿ ಏಕ್‌ ಪ್ರವಾದಿ ಹುಯಿರ‍್ಹೋಸ್’ ಕರಿ ಬೋಲ್ಯು.
16ಕತೋಬಿ ಹೆರೋದನೆ ಆ ಖ್ಹಾರಿ ವಾತೆನ ಖ್ಹಮ್‌ಜಿನ್‌, “ಮೇ ಮುಡ್‌ಕ್ಯು ಕತ್ರಾಯೊತೆ ಯೋಹಾನಸ್‌ ಆ, ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್!” ಕರಿ ಬೋಲ್ಯೊ. 17ಹೆರೋದನೆ, ಇನೆ ರಾಖಿರಾಖ್ಯೊಥೋತೆ ಹೆರೋದ್ಯನಖ್ಹಾಜೆ ಯೋಹಾನ್ನ ಧರೈನ್, ಇನ ಜೇಲ್‌ಮ ಕೋಂಡಿ ಘಲೈರಾಖ್ಯೊಥೊ. ಯೋ ಹೆರೋದ್ಯ ಹೆರೋದನೊ ಭೈ ಫಿಲಿಪ್ಫನಿ ಬಾವಣ್‍. 18ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ ಹೆರೋದಾನ, “ತೂ ತಾರ ಭೈನಿ ಬಾಯ್ಕೊನ ರಾಖಿರಾಖ್ಯೋತೆ ನಿಯಮ್‌ಕಾಹೆ!” ಕರಿ ಬೋಲ್ತೊರ‍್ಹೇತೋಥೊ.
19ಅನಖ್ಹಾಜೆ ಹೆರೋದ್ಯಬಿ ಯೋಹಾನಪರ್ ದಾವೊ ರಾಖಿನ್, ಇನ ಮರೈನಾಕ್ಣು ಕರಿ ಕೆತ್ರು ಕರಿತೋಬಿ ಇನೊ ಹಾತ್‌ ಕೋ ಹುಯುನಿ. 20ಹೆರೋದನ ಯೋಹಾನಕತೊ ಡರ್‌ ಥೊ ಶನಕತೊ, ಯೋಹಾನ ನೀತಿವಾಳೊಕರೀಬಿ ಅಜು಼ ಪವಿತ್ರ್‌ ಅದ್ಮಿಕರಿ ಇನ ಮಾಲುಮ್ ಥು, ಇನಾಖ್ಹಾಜೆ ಇನ ಜ಼ತನ್‌ಥಿ ರಾಖಿರಾಖ್ಯೋಥೊ. ಅಜು಼ ಯೋಹಾನ ಬೋಲಾತೆ ವಾತ್ನ ಖ್ಹಮ್‌ಜೊತೊ, ಇನ ದಿಲ್ಮ ಕಲಾವ್ಣಿ ಹುಯುತೋಬಿ, ಇನಿ ವಾತೆನ ಖ್ಹುಶಿಥಿ ಖ್ಹಮಜ಼್‌ತೋಥೊ.
21ಹೆರೋದ್ಯನೆ ಸೋಚಿರಾಖಿಥೀತೆ ವಖ್ಹತ್ ಆಯಿ. ಕಿಮ್‌ಕತೊ ಹೆರೋದನೊ ಪೈದಾ ಹುಯೋತೆ ದನ್ ಆಯೊ, ಯೋ ದನ್ಮ ಇನೆ ಖ್ಹಾರ ಅದಿಕಾರ್‌ಮ ರ‍್ಹವಾಳ ಶಾಣಾವ್ನ ಅಜು಼ ಇನು ದಂಡ್‌-ದಳವಾಯಿನ ಚ಼ಲಾವವಾಳ ಮೋಟಾವ್ನ, ಅಜು಼ ಗಲಿಲಾಯ ತಬರ್‌ಖಾನು ಧನ್‌-ದೌಲತ್‌ವಾಳ ಗಲ್‌ಢಾವ್‌ನ ಖ್ಹಾಜೆ ಮಿಝ಼್‌ವಾನ್ ಪಿಕಾಯೊ. 22ತದೆ ಹೆರೋದ್ಯನಿ ಛೋ಼ರಿ ಮಹಿ ಅಯಿನ್ ಖೇಲಿನ್, ಹೆರೋದನಾಬಿ ಇನ ಜೋ಼ಡ್ಮ ಖಾಣನ ಬೆಠುಥೂತೆ ಖ್ಹಾರಾವ್‌ನ ಖ್ಹುಶಿಕರಿ. ತದೆ ರಾಜಾ಼ನೆ ಯೋ ಛೋ಼ಕ್ರಿನ, “ತುನ ಶಾತ್ ಹೋಣು ಬೋಲ್? ತುನ ಶಾತ್ ಹೋಣುಕತೋಬಿ ದೆವುಸ್” ಕರಿ ಬೋಲ್ಯೊ. 23ಇನೆ ಘಣಿ ಶಪತ್ ಲೀನ್, “ತೂ ಶಾತ್ ಬೋಲಿಲಿದಿತೋಬಿ ದೆವುಸ್ ಕರಿ ವಾತ್ ದೆವ್‍ಕರೂಸ್, ಮಾರ ರಾಜ್ಯಮಾಥು ಆಧು ರಾಜ್ಯನ ಮಾಂಗಿಲಿದಿತೋಬಿ ತುನ ದೆವುಸ್” ಕರಿ ಬೋಲ್ಯೊ.
24ತದೆ ಯೋ ಛೋ಼ಕ್ರಿ ಭಾರ್‌ ಇನಿ ಆಯಕನ ಜೈ಼ನ್, “ಮೇ ಶಾತ್ ಮಾಂಗಿಲೆವ್?” ಕರಿ ಪುಛೈ಼.
ತದೆ ಇನಿ ಆಯನೆ, “ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್‌ಕ್ಯು ಮಾಂಗಿಲೆ” ಕರಿ ಬೋಲಿ.
25ಇನಿ ಆಯ ಇಮ್‌ ಬೋಲ್ತಾಸ್‌ನ, ಒಗ್ಗಿಸ್‌ಮ ಯೋ ರಾಜ಼ಕನ ಐನ್, “ಹಮ್ಕೆಸ್‌ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನನು ಮುಡ್‌ಕ್ಯು ಪತ್ತರ್‌ಮ ಮನ ಮಂಗೈನ್ ದೆ! ಯೋಸ್ ಮಾರಿ ಬಿಂತಿ” ಕರಿ ಬೋಲಿ.
26ಅನೇಥಿ ಹೆರೋದ ರಾಜಾ಼ನ ಘಣು ದುಖ್ ಹುಯು, ಕತೋಬಿ ಅಖ್ಖಾನ ಖ್ಹಾಮೆ ಇನೆ ವಾಗ್ದಾನ್‌ ದೀರಾಖ್ಯೊಥೋತೆ ಇನಖ್ಹಾಜೆ, ಹೆರೋದ್ಯನಿ ಛೋ಼ರಿನೆ ಬೋಲಿತೆ ಇನ ಕಾಡಾನ ಕೋ ಹುಯುನಿ. 27ಅನಾಖ್ಹಾಜೆ ರಾಜಾ಼ನೆ ಒಗ್ಗಿಸ್‌ಮ ಕಾವ್ಲಿಕರಾವಾಳ ಶಿಪಾಯಿನ, ಜೇಲ್‌ನ ಜೈ಼ನ್ ಯೋಹಾನನು ಮುಡ್‌ಕ್ಯು ಕತ್ರಿಲೀನ್ ಆವಾನ ಹುಕುಮ್‌ ದೀನ್ ಮೋಕ್‌ಲ್ಯೊ. ತದೆ ಇನೆ ಯೋಹಾನ್ನ ಕೋಂಡಿ ಘಾಲಿರಾಖ್ಯುಥೂತೆ ಹಿಜ್ಜಾ಼ಜೈ಼ನ್, ಇನು ಮುಡ್‌ಕ್ಯು ಕತ್ರೀನ್, 28ಇನ ಪತ್ತರ್‌ಮ ಲೈನ್‌, ಯೋ ಛೋ಼ಕ್ರಿನ ದಿದು. ಇನೆ ಯೋ ಮುಡ್‌ಕ್ಯಾನ ಇನಿ ಆಯನ ದಿದಿ. 29ಯೋಹಾನನು ಶಿಷ್ಯರ್‌ ಅನಿ ಬಾರೇಮ ಖ್ಹಮ್‌ಜಿನ್‌, ಹಿಜ್ಜಾ಼ ಐನ್, ಯೋಹಾನನು ಮುರ್ದು ಪಳ್ಳಿಜೈ಼ನ್‌, ಮಖ್ಹಾಣ್ಯನಿ ಘವಿಮ ಘಾಲ್ಯು.
ಯೇಸುನೆ ಪಾಚ಼್ ಹಜಾ಼ರ್ ಅದ್ಮಿನ ಖಡಾಯೋತೆ
(ಮತ್ತಾಯ 14:13-21; ಲೂಕ 9:10-17; ಯೋಹಾನ 6:1-14)
30ಬಾದ್‌ಮ ಅಪೊಸ್ತಲರ್ ಖ್ಹಾರು ಯೇಸುಕನ ಪಾಛು಼ಫರಿ ಐನ್ ಮಳ್ಯು. ತದೆ ಇವ್ಣೆ ಅದ್ಮಿಮ ಕರ‍್ಯುತೆ ಅಜು಼ ಬೋಲಿದಿದೂತೆ ಖ್ಹಾರಸ್ನ ಯೇಸುನ ಖ್ಹಾಮ್ಣೆ ಬೋಲ್ಯು. 31ತದೆ ಯೇಸುನೆ ಇವ್ಣುನ, “ಖಲಿ ತುಮೆ ಮಾರ ಜೋ಼ಡೆ ಉಜ್ಜಾ಼ಡಿ ಝ಼ಗೋಪರ್‌ ಐನ್, ಅರಾಮ್‌ ಕರಿಲೆವೊ” ಕರಿ ಬೋಲ್ಯೊ. ಶನಕತೊ ಘಣು ಅದ್ಮಿ ಹಿಜ್ಜಾ಼ ಆವಾನು ಜಾ಼ವಾನು ಕರುಕರ್ತುಥೂತೆ ಇನಾಖ್ಹಾಜೆ, ಯೇಸುನಾಬಿ ಇನ ಶಿಷ್ಯರ್‌ನ ಖಾಣು ಖಾವನಿಬಿ ವಖ್ಹತ್ ಕೋ ಥೀನಿ. 32ಇನಾಖ್ಹಾಜೆ ಇವ್ಣೆ ಡೋಣ್‌ಮ ಬೇಶಿನ್ ಉಜ್ಜಾ಼ಡಿ ಝ಼ಗೋಪರ್‌ ಗಯ.
33ಇವ್ಣೆ ವಳ್ಯುಜಾ಼ತುಥೂತೆ ಘಣ ಅದ್ಮಿನೆ ದೇಖಿನ್, ಯೇಸುಬಿ ಇನು ಶಿಷ್ಯರ್‌ ಕರಿ ಖ್ಹಣೇದ್ ಧರ‍್ಯು. ತದೆ ಖ್ಹಾರ ಗಾಮ್‌ಥು ಅದ್ಮಿಖ್ಹಾರು ವಾಟ್‌ಧರಿ ನಾಖ್ಹ್‌ತುಹುಯಿನ್, ಇವ್ಣೆಥಿಬಿ ಅಗಾಡಿ ಯೋ ಝ಼ಗೋಪರ್‌ ಆಯು. 34ಯೇಸು ಹಿಜ್ಜಾ಼ ಐನ್ ಡೋಣ್‌ಪರ್‌ಥೊ ಉತ್ರಿನ್, ಘಣು ಅದ್ಮಿನಿ ಭೀಡ್ ಟಿವವ್‌ಕರ್‌ಥೂತೆ ದೇಖಿನ್, ಇವ್ಣಾಪರ್ ಗೋರ್‌ಖೈನ್, “ಅವ್ಣೆ ಕುರುಬಕೊಂತೆ ಮ್ಹೇಂಢವ್‌ನಿ ಘೊಣಿ ಛಾ಼ನಿ” ಕರಿ ಬೋಲಿನ್, ಇವ್ಣುನ ಘಣಿ ವಚನ್ ಬೋಲಿದಿದೊ. 35ಎತ್ರಾಸ್‌ಮ ಖ್ಹಾಂಜ಼್ ಹುಯಿಗುಥು. ಇನಟೇಕೆ ಯೇಸುನ ಶಿಷ್ಯರ್‌ ಇನಾಕನ ಐನ್, “ಆ ಉಜ್ಜಾ಼ಡಿ ಝ಼ಗೊ ಬಿಜು಼ ಖ್ಹಾಂಜ಼್‌ಬಿ ಹುಯಿಗಯು. 36ಅವ್ಣೆ ಖ್ಹಾರು ಅಶ್‌ಪಿಶ್‌ ಛಾ಼ತೆ ಗಾಮ್ಮ ಅಜು಼ ಖೇತರ್‌ಮ ಜೈ಼ನ್, ಇವ್ಣುನ ಖಾವನ ಶಾತ್ ಹೋಣುಕಿ ಯೋ ಲ್ಯವಾನಟೇಕೆ ಅವ್ಣುನ ಬೋಲಿಮೋಕಲ್‌” ಕರಿ ಬೋಲ್ಯ.
37ಇಮ್‌ ಬೋಲಾಖ್ಹತರ್ ಯೇಸುನೆ ಇವ್ಣುನ, “ತುಮೇಸ್ ಇವ್ಣುನ ಖಾವಾನ ಶಾತ್‌ತೋಬಿ ದೆವೊ” ಕರಿ ಬೋಲ್ಯೊ.
ತದೆ ಇವ್ಣೆ, “ಹಮೆ ಜೈ಼ನ್, ಬೇಖ್ಹೊ ರೂಪಾನ ಕಾಖ್ಹ್‌ನು#6:37 ಏಕ್‌ ರೂಪಾನು ಬಿಲ್ಲು ಕತೊ, ಏಕ್‌ ಅದ್ಮಿನು ಏಕ್‌ ದನ್ನು ಶಂಬ್‌ಳ ಹುಯಿರ‍್ಹುಥು. ರೋಟಾ ಲೀನ್, ಅವ್ಣುನ ಖಾವಾನ ದೇಣೂಕಿ ಶು?” ಕರಿ ಯೇಸುನ ಫುಛಾ಼ಯು.
38ತದೆ ಯೇಸುನೆ ಇವ್ಣುನ, “ತುಮಾರಕನ ಕೆತ್ರ ರೋಟಾ ಛಾ಼? ಕರಿ ಜೈ಼ನ್ ದೇಖೊ” ಕರಿ ಬೋಲ್ಯೊ.
ಇವ್ಣೆ ಜೈ಼ನ್ ಮಾಲುಮ್ ಕರಿಲಿನ್, ಯೇಸುಕನ ಐನ್, “ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾ ಛಾ಼” ಕರಿ ಬೋಲ್ಯು.
39ತದೆ ಯೇಸುನೆ ಇನ ಶಿಷ್ಯರ್‌ನ, “ತಮಾಮ್‌ ಅದ್ಮಿನ ಹರ‍್ಯಾ ಘಾಖ್ಹ್‌ಪರ್‌ ಝೂ಼ಂಡೆ-ಝೂ಼ಂಡೆ ಕರಿ ಬೆಖ್ಹಾಡೊ” ಕರಿ ಬೋಲ್ಯೊ. 40ತದೆ ಅದ್ಮಿಖ್ಹಾರು ಏಕ್‌-ಏಕ್‌ ಝೂ಼ಂಡ್‌ಮ ಖ್ಹೋ-ಖ್ಹೋ, ಅಡೈವಿಖ್ಹ್‌-ಅಡೈವಿಖ್ಹ್‌ ಜ಼ಣು ಶಾಲ್ ಹುಯಿನ್ ಬೇಶಿಗಯು. 41ಬಾದ್‌ಮ ಯೇಸುನೆ ಯೋ ಪಾಚ಼್ ರೋಟ ಬೇ ಮಾಛ಼್‌ಲಾನ ಪಾಡಿಲೀನ್, ಆಕಾಶ್‌ಭಣಿ ದೇಖಿನ್, ದೇವ್ನ ಧನ್ಯವಾದ್ ಕರಿನ್, ರೋಟಾವ್ನ ತೋಡಿನ್ ಅದ್ಮಿನ ವಾಟಪಾಡಿನ್ ದೆವೊ ಕರಿ ಇನ ಶಿಷ್ಯರ್‌ನ ದಿದೊ. ಬಿಜು಼ ಯೋ ಬೇ ಮಾಛ್ಲಾ಼ನಾಬಿ ಅಖ್ಖಾ ಅದ್ಮಿನ ವಾಟಪಡಾಯೊ. 42ಇವ್ಣೆ ಖ್ಹಾರೂಸ್ ಪೇಟ್‌ಭರಿ ಖೈನ್ ಬಶ್‌ಹುಯು. 43ತದೆ ಶಿಷ್ಯರ್‌ನೆ ಉಭ್‌ರ‍್ಯುತೆ ರೋಟಾನ ಅಜು಼ ಮಾಛ಼್‌ಲಾನ ಟುಕ್ಡಾವ್‍ನ ಜ಼ಮಾಕರ್ತಖ್ಹತರ್‌ ಭಾರ ಟೋಕ್ರಾ ಭರಾಯು. 44ಖಾಣು ಖಾದುತೆ ಇನಾಮ ಪರ್ಖ್ಹಾ ಅದ್ಮಿಸ್‌ ಪಾಚ಼್ ಹಜಾ಼ರ್‌ಜ಼ಣು ಥೂ.
ಯೇಸು ದರ‍್ಯಾವ್‌ಪರ್ ಚಾ಼ಲ್ಯೋತೆ
(ಮತ್ತಾಯ 14:22-33; ಯೋಹಾನ 6:15-21)
45ಅನ ಬಾದ್‌ಮ ಯೇಸುನೆ ಇನ ಶಿಷ್ಯರ್‌ನ, “ಮೇ ಆ ಅದ್ಮಿನಿ ಝೂ಼ಂಡ್‌ನ ಘರೆ ಬೋಲಿಮೋಕ್ಲಾನ ಮಹಿ, ತುಮೆ ಡೋಣ್‌ ಚ಼ಢೀನ್‌ ಮಾರೇಥಿ ಅಗಾಡಿ ಪಾರ್ಲಿ ಬಾಜು಼ಮ ಛಾ಼ತೆ ಬೆತ್ಸಾಯಿದ ಖ್ಹಯೇರ‍್ನ ಜಾ಼ವೊ” ಕರಿ ಜು಼ಲುಮ್‌ ಕರ‍್ಯೊ. 46ಅದ್ಮಿನ ಮೋಕ್ಲಿದ್ಯವಾನ ಬಾದ್‌ಮ, ಯೇಸು ಪ್ರಾರ್ಥನೆ ಕರಾನಖ್ಹಾಜೆ ಪಹಡ್‌ಪರ್ ಗಯೊ. 47ದನ್ ಡುಬಾನ ಬಾದ್‌ಮ, ಶಿಷ್ಯರ್‌ ಥಾತೆ ಡೋಣ್‌ ದರ‍್ಯಾವ್‍ನ ಇಚ಼್‌ಮ ಥು, ಕತೋಬಿ ಯೇಸು ಎಕ್ಲೋಸ್ ಕನಾರೆ ಥೊ. 48ಖ್ಹಾಮ್ಣೆನೊ ವಹಿರೊ ಜೋ಼ರೇಖ್ಹು ವಾಗುಕರ್ತೊಥೋತೆ ಇನಾಖ್ಹಾಜೆ, ಶಿಷ್ಯರ್‌ ಖ್ಹಾರು ಡೋಣ್ಣಾ ಖ್ಹಾಮ್ಣೆ ಲೀಜಾ಼ವಾನ ಕೋ ಹುವ್ವಾನಿತೆ ತರಪ್‌ಡುಕರ್ತುಥೂತೆ ಯೇಸುನೆ ದೇಖ್ಯೊ. ತದೆ ಕಮ್‌ಶಿಕಮ್ ವ್ಹಾಣ್‌ಖ್ಹತ್ರೆ ಚಾರ್‌ ಘಂಟಾ ಹುಯಿರ‍್ಹುಥು. ತದೆ ಯೇಸು ದರ‍್ಯಾವ್‌ಪರ್ ಚಾ಼ಲ್ತೊಹುಯಿನ್‌ ಇವ್ಣಭಣಿ ಐನ್, ಇವ್ಣುನ ಮ್ಹೆಂದಿನ್ ಖ್ಹಾಮ್ಣೆ ಜಾ಼ವ್ಣುಕರಿ ಥೊ. 49ಕತೋಬಿ ದರ‍್ಯಾವ್‌ಪರ್ ಚಾ಼ಲ್ತೊವಳ್ಯಾವಾತೆ ಯೇಸುನ ಇವ್ಣೆ ದೇಖಿನ್, ಭೂತ್‌ಕರಿ ಸೋಚಿನ್ ಜೋ಼ರೇಥಿ ಚಿಕ್ರಾಲಗ್ಯು. 50ಶನಕತೊ ಇವ್ಣೆ ಖ್ಹಾರು ಇನ ದೇಖಿನ್ ಘಬ್‌ರೈ ಗಯುಥು.
ತದೆ ಒಗ್ಗಿಸ್‌ಮ ಯೇಸುನೆ ಇವ್ಣ ಜೋ಼ಡೆ ವಾತೆ ಬೋಲಿನ್ ಇವ್ಣುನ, “ಹಿಮ್ಮತ್‌ಥಿರ‍್ಹೆವೊ ಮೇಸ್, ಡರೊನಕೊ!” ಕರಿ ಬೋಲ್ಯೊ. 51ಬಾದ್‌ಮ ಯೇಸು ಡೋಣ್‌ ಚ಼ಢೀನ್‌ ಇವ್ಣಾಕನ ಆಯೊ, ತದೆ ವಹಿರೊ ವಾಗಾನು ಭೀರಿಗಯು. ತದೆ ಶಿಷ್ಯರ್‌ ಖ್ಹಾರು ಘಣು ಆಶ್ಚರ್ಯಖಾದು. 52ಶನಕತೊ ಇವ್ಣೆ ಯೇಸುನೆ ಪಾಚ಼್ ರೋಟಾನ ಪಾಚ಼್ ಹಜಾ಼ರ್ ಅದ್ಮಿನ ಖಡಾಯೋತೆ ಇನಿ ಮತ್ಲಬ್‌ನ ಮಾಲುಮ್ ಕರ‍್ಯುಕೊಯ್ನಿ. ಇವ್ಣೊ ದಿಲ್‌ ಬಂಡೊ ಹುಯಿರ‍್ಹೋಥೊ.
ಗೆನೆಜರೇತ್‌ಮ ಯೇಸುನೆ ರೋಗ್‍ವಾಳಾವ಼್‌ನ ಅಛ್ಛು಼ ಕರ‍್ಯೊತೆ
(ಮತ್ತಾಯ 14:34-36)
53ಇವ್ಣೆ ದರ‍್ಯಾವ್‍ನ ಕಾಡಿನ್ ಗೆನೆಜರೇತ್‍ ತಬರ್‌ಖಾನ ಕನಾರೆ ಪೊಚಿನ್‌ ಡೋಣ್ಣಾ ಭಾಂದ್ಯು. 54ಇವ್ಣೆ ಡೋಣ್‌ಪರ್‌ಥು ಉತರ್‌ತಸ್ನ, ಹಿಜ್ಜಾ಼ನು ಅದ್ಮಿಖ್ಹಾರು ಯೇಸುನಿ ಖ್ಹಣೇದ್ ಧರ‍್ಯು. 55ತದೆ ಯೋ ತಬರ್‌ಖಾನು ಖ್ಹಾರು ಅದ್ಮಿ ನಾಖ್ಹ್‌ದಾಖ್ಹ್ ಕರ್ತುಹುಯಿನ್, ರೋಗ್‌ಮ ಪಡಿರ‍್ಹವಾಳ ಖ್ಹಾರಾವ್‌ನ ಬಿಛಾ಼ವ್ಣಿಮ ನಾಖಿಲಿನ್‌ ಯೇಸು ಕಿಜ್ಜಾ಼-ಕಿಜ್ಜಾ಼ ಛಾ಼ ಕರಿ ಖ್ಹಮ್‌ಜಾ಼ಸ್ಕಿ ಹಿಜ್ಜಾ಼-ಹಿಜ್ಜಾ಼ ಲೀನ್ ಆಯು. 56ಅಜು಼ ಯೇಸು ಖೆವ ಖ್ಹಯೇರ್‌ಮಾಬಿ, ಖೆವ ಗಾಮ್ಮಾಬಿ ನಾತೊ ಖೆವ ಖೇತರ್‌ಮಾಬಿ ಕತೊ ಕಿಜ಼್ಜಾ-ಕಿಜ಼್ಜಾ ಗಯೋಕಿ ಹಿಜ಼್ಜಾವಾಳು ರೋಗ್‌ರ‍್ಹವಾಳನ ಭಾರ್‌ ಬಜಾ಼ರ್‌ನಿ ಝ಼ಗೊ ಮ್ಹೇಲಿನ್ ಯೇಸುನ, “ತಾರು ಲುಂಗ್ಡಾನು ಕೋಣೊತೋಬಿ ಛೀಮಾನ ಮ್ಹೇಲಿದೆ” ಕರಿ ಇನ ಗಿಂಗೈಲಿದು. ಅಜು಼ ಇನ ಕೋಣ್-ಕೋಣ್ ಛೀಮ್ಯೂಕಿ ಇವ್ಣ ಖ್ಹಾರಾನೊ ರೋಗ್‌ ಅಛ್ಛು಼ ಹುಯಿಗಯೊ.
Currently Selected:
ಮಾರ್ಕ 6: NTWVe23
Highlight
Share
Copy
Want to have your highlights saved across all your devices? Sign up or sign in
The New Testament in Waghri Language © The Word for the World International and Waghri Translation Samiti, Karnataka, 2023.
