Pinongoorapan 12

Muang-ruang pononsora'an so lobuw poimaid

1Iya ya iiri, tumimpuuno sono si Raja Irudis#12:1: Raja Irudis, ono yo, Irudis Antipas. Siowan Kamus Kitab. mononsara' nu lobuw poimaid so si Yisus. 2Minonuu' iyo popomunggol nu ulu ni Yakubus, iri sulod ni Yuanis. 3Noilaan-o po niyo nu posanang nu inawo nu lobuw Yaudi iri dai po poimaid so si Yisus gogoma'on niyo ri, monuuo po iyo nu lobuw popongaakom so si Pitrus. Pinongookoman so si Pitrus nokoiya nu Runat Maayo ingoranan Rami-Rami nu Baang-Baang D'ado Pongombang. 4Naakom-o po si Pitrus, jiilo yo sono iyo, om inipatan nu opat posukan soujar. Opat koyuwan ido posukan, mususulang mongipat so si Pitrus. Padu ni Irudis, bisora'on-a si Pitrus so tiningkuangon nu lobuw suang, ong kotalib-o Paska ri.#Kin 12:1-27 5Indadi, notaan po sono si Pitrus so jiil, nga kouna'an niyo ri bana-bana ko mogdu'a so Kinoringan suat so iyo.

Pinolabus si Pitrus kiat so jiil

6Awi nu dai po nologa' runat pongobisora'an ni Irudis so si Pitrus so tiningkuangon nu lobuw suang, nokoturuw sono si Pitrus so puola'an nu duo soujar moongipat om kinogosan musompodi longon niyo ri so longon nosiro ri. Soujar wokon-i mibon-ibon-a so pintu nu jiil-i, mongipat. 7Milok po su mundii-dii yo susuu'on nu Kinoringan so obi' ni Pitrus, om tinumogu' onawau so rinuang nu jiil-i. Guyuo yo si Pitrus nu susuu'on-i porios om mutongaro yo nu, “Sikap-o ya tumungag!” koo. Rantai nokokogos so longon ni Pitrus, nga, minuyad-o sono. 8Mutongaro po susuu'on-i nu, “Pusabung-o, pukambot-o, pukasut-o, om waid-o so aku,” koo. Osipo yo iri ni Pitrus, 9om maido yo so susuu'on-i lumabus kiat so jiil, nga dai ya noilaan niyo nu bana-bana ka iri ko' nosorou-sorou-a niyo. 10Nokotalib-o po nosiro so tontong pongipatan togna om koduo ri, nokologa' yo nosiro so pintu bosi, lalan mian so bandar. Sinumukab kondiri pintu iiri, om lumobuso yo nosiro minaid nu ido lalan, om milok po su linumiong-a susuu'on-i.

11Noindanan nai' ni Pitrus nu bana-bana ya nourug iiri. Mutongaro yo sono iyo nu, “Kosiono noilaan ku nai' nu bana-bana ya nu minonuu' Tuhan nu susuu'on Niyo polabus so aku kiat so kopogboya'an ni Raja Irudis, om koinginan nu lobuw Yaudi suat so aku,” koo.

12Nokopomikir-o po si Pitrus sontagal, miano yo iyo so waloi ni Maria, ino ni Yuanis (ngaran koduo niyo si Markus). Osuang lobuw minuimpug dii mogdu'a. 13Koritiko yo niyo pintu ri, om lumogaa yo ido uripon woinoi, ngaran niyo si Ruda, mongilo ong isai mongoritik-i. 14Notondu'an nu woinoi-i bongut iiri, nu bongut ni Pitrus. Pagka osudu'an sobana iyo, dai po sinukab niyo pintu ri, nga linumalom nai' koimbagu potuturan nu dii-dii si Pitrus so dilabus-i. 15Mutongaro yo nosiro so iyo nu, “Mulou ko bo gaam,” koo, nga sumangat nai' woinoi iiri mutangar nu bana ya nu si Pitrus. Mutongaro po nosiro nu, “Iri ya bo ono atod niyo ri,” koo.

16Nga dai mintoron-toron si Pitrus mongoritik nu pintu ri om sinukab-o sono nosiro. Nosiou-o po nosiro si Pitrus, sobana ko noiranan nosiro. 17Nga sogkai yo ni Pitrus palad niyo ri poukokop so nosiro. Tuturani yo sono niyo gama' nu Tuhan polabus so iyo kiat so jiil om mutongaro yo iyo nu, “Tuturani muyu yo itu no so si Yakubus om so inong toko poimaid,” koo. Lumobuso yo sono iyo om miano yo so tontong wokon.

18Susuab-i, sobana ko noogutan ongo soujar-i ong onu nourug so si Pitrus. 19Monuuo yo si Raja Irudis nu lobuw popodium so si Pitrus, nga dai ya nooyangan. Indadi nipoduat sono ni Raja Irudis moongipat-i, om potoyon-o sono nosiro.

Nopupus iri, momponowo yo iyo kiat so Yudia, om molako yo so Kaisaria kotinu-tinuan.

Kinopotoyan ni Raja Irudis

20Sobana ko minungot si Raja Irudis so lobuw nu Tirus om Sidun. Pagka soko iri, linumoga' sono ido puimpugan kiat so nosiro dii si Raja Irudis mokiluluudon. Gulu po, inimuunan nosiro si Blastus, wowaidon so waloi ni Irudis, om ginumapi' sono iyo so nosiro. Miano yo nosiro dii si Raja Irudis mokimuwarong, so' ingkookan-o po nu lobuw suang iiri kiat-a so wonuo pogkuosaan niyo.

21Ido runat nu notantu yo ni Irudis, minupokokaso iyo nu pokakas nu raja, mogomo yo so oogoman nu raja om mutongaro yo so lobuw suang-i. 22Laid niyo mutangar-i, songgonsok-gonsok sono lobuw suang-i nu, “Poomutangar niyo no soko poomutangar nu pinokokinoringan, okon ko soko lobuw,” koo. 23Iya ya iiri, ininsaadan iyo nu susuu'on nu Kinoringan, so' dai mongorumat nu Kinoringan. Minatoi sono iyo, om inokan nu lingguang.

24Rumuang nai' lobuw korongou nu tinongaran nu Kinoringan, om poimaid sono so si Yisus.

25Noopod-o po gogoma'on ni Barnabas om ni Saulus so Yirusalim, mulio yo nosiro so Antiukia om pinowaid-a nosiro si Yuanis, iri ingoranan-a so si Markus.

Currently Selected:

Pinongoorapan 12: TomPWPgLgPn

Highlight

Copy