Pinongoorapan 13

Pinili' om sinuu' si Barnabas om si Saulus

1Tinu-tinu poo'abar nu Kinoringan om moomontuduk so puimpugan nu lobuw poimaid so Antiukia, ono yo si Barnabas, si Simiun, iri ingoranan-a so si Itom, si Lukius kiat so Kirini, si Monain una'-una' ni Raja Irudis kiat koworos, om si Saulus. 2Laid nosiro mongusaa' nu Kinoringan om mupuasa, tongaro yo nosiro nu Atod nu Kinoringan nu, “Pilio muyu yo si Barnabas om si Saulus mugogoma'on nu nipogama' Ku so nosiro,” koo.

3Noopod nosiro mupuasa om mongusaa', topopo yo nosiro ulu nu duo koyuwan oono, om suuo yo popanou.

Dii so puru Siprus

4Miano yo sono si Barnabas om si Saulus so Soloukia musuat nu ponuu'an nu Atod nu Kinoringan so nosiro ri, om kiat dii sumokoyo yo nosiro nu kapal mian so puru Siprus. 5Nokologa' nosiro so bandar Solamis, nopaabar sono nosiro nu tinongaran nu Kinoringan so ongo waloi sosombooyangan nu lobuw Yaudi ri. Maid-waid-a si Yuanis Markus so nosiro monabang.

6Linumongkop nosiro mompanou so puru oono sampai so Papos. Nokosambat sono nosiro dii nu lobuw Yaudi, ingoranan so si Bar-Yisus. Iyo yo po nga bolian om monokod nu iyo yo su poo'abar nu Kinoringan. 7Bolian iiri kiuna'-una' nu sobana ko oilo, ingoranan so si Sirgius Paulus, gobonor so puru oono. Soginaa yo ni Sirgius Paulus si Barnabas om si Saulus, so' mokirorongou nu totongaron nu Kinoringan. 8Nga pinogos nosiro ni Ilimas iri bolian-i (si Ilimas-o po ngaran ni Bar-Yisus so tangar nu Yunani). Dai moingin si Ilimas ong poimaid una'-una' niyo iiri so si Yisus. 9Nga si Saulus (ngaran koduo si Paulus) kinuasa nu Atod nu Kinoringan, minomontong nu bolian iiri, 10om mutongaro yo nu, “Oo su anak nu Wowaidon nu Moinat! Ikau-o su alod-alod nu onu yo po owarong. Oilo ko sobana mongaakal. Ikau-o su monobon nu pontudukan nu Tuhan iri koponapul nu lobuw. 11Ingati yo kosiono! Insaadan ko nu Kinoringan. Obolou ko sono om dai kosiou nu runat kotinu-tinuan,” koo.

Iya ya iiri, noirosaan ni Ilimas nu kuwai tinumombol so mato niyo ri om nobolou-o sono iyo. Mongkam-kongkam-a iyo mompanou modium nu lobuw pokitonudan. 12Nosiou-o po iri nu gobonor-i, nopoimaid sono iyo, so' sobana ko noiranan nu pontudukan suat so Tuhan Yisus.

Dii so Antiukia so wonuo nu Pisidia

13Lumoyago yo si Paulus om kouna'an niyo ri kiat so Papos, mian so Porga, ido bandar so wonuo Pampilia. Nokologa' yo po nosiro dii, mogolo yo sono si Yuanis Markus, om mululio yo so Yirusalim. 14Kiat so Porga linumombus nosiro so Antiukia so wonuo nu Pisidia. Runat Pongintoronan-i, miano yo nosiro so waloi sosombooyangan nu lobuw Yaudi. 15Noopod mongobasa' nu Buuk nu Kinoringan inalap so Ukum ni Musa, om nisurat nu poo'abar gulu ri, monuuo yo wowaidon so waloi sosombooyangan iiri nu lobuw mutangar so si Paulus om kouna'an niyo ri nu, “Tongaro muyu ya ong kuwai kodau muyu poinsanang nu inawo mai,” koo. 16Mundiio yo sono si Paulus om poukokopo yo niyo lobuw-i, om tumimpuuno yo montuduk nu,

“Oo su kosusulodan ku bansa Israil, om okon ko bansa Israil iri poimaid nu Kinoringan, rongowo muyu yo tangar ku tu. 17Pinili' yo nu Kinoringan bansa Israil, odu aki toko ri, om inurug nu bansa maayo nu laid nosiro so Masir soko porantau. Maid nu kuasa Niyo maayo, tinundan Niyo nosiro lumabus kiat so Masir.#Kin 1:7; 12:51 18Pudi pona oraai kogoyaan nosiro solaid opat nopulu toun so padang pantai, kakal-a inipatan nosiro nu Kinoringan.#Pong 14:34; Pom 1:31 19Turu bansa so wonuo nu Kanaan pinatoi Niyo, om tinayad-tayad Niyo tana' iiri so bansa Israil nu niposongapan so nosiro.#Pom 7:1; Yus 14:1 20Kiawi' oono nourug solaid opat naatus limo nopulu toun.#Hak 2:16; 1 Som 3:20

Nopupus iri, minomili' Kinoringan kiat so nosiro nu moongobisara' musingkologa' ni Samuil iri poo'abar nu Kinoringan. 21Minindamo sono nosiro nu raja, om pinili' yo nu Kinoringan si Saul anak ni Kis, kiat so suku-sakat ni Binyamin, sumiliw nu raja nosiro solaid opat nopulu toun.#1 Som 8:5; 10:21 22Nologa' pinoingkoyodan nu Kinoringan so si Saul, pinosulang sono Niyo si Daud sumiliw nu raja wagu nosiro. Soko itu yo tangar nu Kinoringan suat so si Daud nu, ‘Osiou Ku si Daud, anak ni Yisai, koinsanang nu inawo Ku. Onu-onu koinginan Ku, waidon niyo,’ koo.#1 Som 13:14; 16:12; Lgu 89:20 23Kiat so solusuk ni Raja Daud, siniliw Niyo si Yisus nu Moonapul nu bansa Israil musuat nu nijanji Niyo ri. 24Dai po nokotimpuun si Yisus nu gogoma'on nisuu' nu Kinoringan so Iyo ri, notangar-o laid ni Yuanis so lobuw Israil nu subai rumorogo nosiro momaal nu koraayan om diu'on.#Mrk 1:4; Luk 3:3 25Uyud-uyud pongoowi'an nu gogoma'on niyo, pinusou-pusowan ni Yuanis mongoduat ongo lobuw-i nu, ‘Isai aku ka itu no, ponokodan muyu? Aku yo po okon-a ko iri lobuw imat-imatan muyu ri. Ondomo muyu yo, oopod aku nu gogoma'on ku tu, om lumoga' nai' Iyo. Insan mongoluus nu kasut Niyo nga dai su otoop,’ koo.#Mat 3:11; Mrk 1:7; Luk 3:16; Yns 1:20,27

26Oo su kosusulodan ku solusuk ni Abraham, om kiawi' kosusulodan okon ko Yaudi, iri ototog poimaid so Kinoringan! Nokotaak-o nu Kinoringan so toko abar nu gama' Niyo monapul nu lobuw. 27Nga lobuw minolak so Yirusalim-i om wowaidon nosiro dai nokoilo nu si Yisus-o su Moonapul iiri. Dai nosiro koorati nu pontudukan nu poo'abar nu Kinoringan silaid-i, iri bobosa'on runat-runat so waloi sosombooyangan koduung Runat Pongintoronan. Nga pagka inukum nosiro si Yisus nu potoyon, tinuman sono nosiro totongaron nu poo'abar oono. 28Dai pona nokooyang nosiro nu kosola'an Niyo, nu mupatut pongukuman so Iyo nu potoyon, nga sinosogan-a nosiro si Pilatus nu potoyon-a Iyo.#Mat 27:22-23; Mrk 15:13-14; Luk 23:21-23; Yns 19:15 29Nopupus-o po nosiro mongowaal nu kiawi' nokosurat so Buuk nu Kinoringan suat so Iyo, niuntiba yo sono nu kouna'an Niyo bangkai Niyo ri kiat so salib om nilobong.#Mat 27:57-61; Mrk 15:42-47; Luk 23:50-56; Yns 19:38-42 30Nga linuli'an Iyo nu Kinoringan. 31Kotinu-tinuan kiat nu kinoluli'an Niyo ri, obulit Iyo mintolang mokisiou so lobuw minaid so Iyo kiat so wonuo nu Galilia mian so Yirusalim, om nosiro yo su pointolang suat so Iyo nu kosiono so bansa Israil.#P'rapan 1:3 32Indadi kosiono tu potuturan kai si Barnabas nu Abar Owarong oono so kou, nu onu yo po nijanji nu Kinoringan so odu aki toko ri, 33tinuman-o sono Niyo so toko nu pinongoluli'an Niyo so si Yisus. Nokosurat so buuk Lagu nu,

‘Ikau-o su Anak Ku.

Runat tu pokoilo Aku nu,

Aku yo su Amo Mu,’

koo ri.#Lgu 2:7 34Pinowiau-o Iyo koimbagu nu Kinoringan, om dai yo sono matoi. Suat nu ono, minutangar-a Kinoringan nu,

‘Mongoborakat Aku so Ikau

nu ongo wowarong om otatap

nu otuman

soko janji Ku so si Daud,’

koo ri.#Yis 55:3 35Kuwai ya tangar wokon nu,

‘Dai Mu ya posimaidan

Uripon Mu ototog so Ikau-o

rumagas so lobong,’

koo ri.#Lgu 16:10

36Noopod-o po ni Raja Daud momaal nipogama' nu Kinoringan so iyo ri, minatoi-o sono iyo, om nilobong so pinolobongan nu odu aki niyo ri, om rinumagas-a bangkai niyo ri. 37Nga bang si Yisus, iri linuli'an nu Kinoringan, dai ya rinumagas.

38-39Oo su kosusulodan ku, mongaabar aku so kou nu noidu' yo nu Kinoringan koraayan toko nu kinopotoyan ni Yisus. Soko ono po, subai oilaan toko nu bang ontob-a nu mongowaid nu kiawi' Ukum ni Musa, dai toko ya kolabus kiat so koraayan, nga isai yo po poimaid so si Yisus, kolabus kiat so koraayan. 40Ono yo ko', orotio muyu yo bana, adang-o ourug so kou iri tinangar nu poo'abar nu Kinoringan gulu ri, nu,

41‘Oo su lobuw mubaag

nu totongaron nu Kinoringan,

orotio muyu yo bana!

Laid nu miau kou po,

mugogoma'on Aku.

Nga, pudi pona kuwai lobuw

oorati so kou

suat so gogoma'on Ku,

dai kou po poimaid.

Oiranan kou nga dai poimaid,

indadi matoi kou,’

koo,” koo si Paulus.#Ab 1:5

42Lumabus si Paulus om ni Barnabas kiat so waloi sosombooyangan-i, minutangar sono lobuw-i nu popululi' so nosiro nu Runat Pongintoronan koimbagu, sumundur montuduk so nosiro. 43Nokolabus-o po lobuw-i kiat so waloi sosombooyangan-i, tundano yo sono si Paulus om si Barnabas nu lobuw Yaudi om okon ko Yaudi iri minasuw nu ugama Yaudi ri. Biati yo nosiro ongo lobuw iiri nu subai ototog mongowaid nu koinginan nu Kinoringan.

44Nologa' Runat Pongintoronan koimbagu ri, ogon-ogon ong naawi' lobuw so bandar iiri minian mongkinongou nu tinongaran nu Kinoringan. 45Nga, nosiou-o po nu lobuw Yaudi lobuw suang iiri, sobana ko nororaayan nosiro. Rinagam nosiro si Paulus om sinumagka' nu kiawi' tinangar niyo ri. 46Nga sumundur nai' opogi si Paulus om si Barnabas mutangar nu, “Patut nai' kou po gulu potuturanan nu tinongaran nu Kinoringan. Nga pagka tinulak muyu tinongaran oono, kou yo kondiri minonantu nu dai kou otoop kotorima' nu kowiawan musingkolaid. Om kosiono niogol mai kou om mian kai so lobuw okon ko Yaudi. 47Waalon mai soko itu so' itu yo su pinonuu'an nu Kinoringan so kai nu,

‘Tinantu Ku yo kou

ourug nu mongonawau

nu lobuw okon ko Yaudi,

su' koowit kou nu kowiawan

so kiawi' lobuw so wonuo tu,’

koo ri,” koo nosiro.#Yis 42:6; 49:6

48Norongou-o po nu lobuw okon ko Yaudi ri tinangar ni Paulus, sobana ko nosudu'an nosiro, om minongorayou nu Kinoringan. Om kiawi' lobuw, iri notantu yo nu Kinoringan nu miau musingkolaid-i nga poimaid-o sono.

49Nokolongkop-o sono tinongaran nu Kinoringan so wonuo iiri. 50Nga kokusoyan om kowoinoyan kipangkat, iri poimaid so Kinoringan so bandar iiri, sinuu' nu lobuw Yaudi mongoraai-raai nu kolobuwan poimaid so si Yisus, popualod so nosiro so si Paulus om si Barnabas, om polaiw so nosiro kiat dii. 51Puyaso yo sono ni Paulus om ni Barnabas koris so rompam nosiro ri, so tiningkuangon nu lobuw iiri pongilaan nu pokoraai so lobuw polaiw so nosiro ri, om lumombuso yo so Ikunium.#Mat 10:14; Mrk 6:11; Luk 9:5; 10:11 52Lobuw poimaid so Antiukia ri sobana ko nosudu'an, om kinuasa nu Atod nu Kinoringan.

Currently Selected:

Pinongoorapan 13: TomPWPgLgPn

Highlight

Copy