Pinongoorapan 8

1Nokotaayun-a si Saulus nu pinatoi si Stipanus.

Sinonsara' ni Paulus lobuw poimaid

dii so Yirusalim

Runat-a iiri, tumimpuuno osonsara' ongo lobuw poimaid dii so Yirusalim. Indadi, minias sono nosiro kiawi' mulaiw, wokon so pilolongkap nu Yudia om wokon so Samaria. Iri po pinongoorapan ni Yisus su dai minulaiw. 2Nilobong-o sono si Stipanus nu tinu-tinu lobuw moongusaa' nu Kinoringan, om sobana ko tinumangi' nosiro oupusan.

3Nga si Saulus sumundur nai' mononsara' nu puimpugan nu lobuw poimaid iiri. Mian iyo so kowoloyan polabus nu lobuw poimaid, dai tuna woinoi kusoi, om jiilon sono niyo.#P'rapan 22:4-5; 26:9-11

Nopotuturan si Pilipus nu Abar Owarong dii so Samaria

4Iri yo po lobuw poimaid noias-ias-i, potuturan sono nu Abar Owarong suat so si Yisus so siombo-ombo ya. 5Si Pilipus nga minian sono so ido bandar maayo so Samaria, om nopaabar so lobuw dii nu si Yisus-o su Raja Nijanji nu Kinoringan. 6Nokorongou-o po lobuw suang iiri nu niabar niyo ri, om nosiou nosiro koiran-iran winaal niyo, nopoimaid sono nosiro kiawi' nu tuturan iiri. 7Osuang lobuw sinorungan nu moinat sinusuban ni Pilipus, om mulaiwo sono komoinatan-i maid nu monsok-gonsok. Om osuang po lobuw kimai om lobuw kolimpo nopoli'an. 8Nadi, sobana ko osudu'an lobuw so bandar iiri.

9Ido koyuwan minolak so bandar iiri, ngaran niyo si Simun. Olaid-o iyo poiran-iran nu lobuw Samaria momakai nu olimu niyo ri. Mutangar iyo nu d'ado ido koinong so iyo. 10Kiawi' lobuw so bandar iiri, maayo oworos, mongowaid so si Simun om mutangar nu, “Lobuw iitu no kikuasa nu Kinoringan nu obantug ingoranan nu, ‘Kuasa Maayo’,” koo nosiro. 11Mongowaid nosiro so iyo, so' olaid-o iyo poiran-iran so nosiro momakai nu olimu niyo ri. 12Nga nokologa' yo po si Pilipus dii, paabar nu Abar Owarong, nu mogkuasa Kinoringan soko raja om suat so si Yisus, nopoimaid sono nosiro nu iri. Minokidiu' sono nosiro woinoi kusoi, pointolang nu poimaid nosiro so si Yisus. 13Si Simun nga nopoimaid-a. Nodiu' yo po iyo, maid-waid sono iyo so si Pilipus, om oiranan nu ponondu'an om koiran-iran winaal ni Pilipus.

14Norongou-o po nu pinongoorapan ni Yisus so Yirusalim-i, nu nopoimaid lobuw dii so wonuo nu Samaria nu totongaron nu Kinoringan, opiti yo sono nosiro si Pitrus om si Yuanis dii. 15Nokologa' nosiro dii, mogdu'aa yo nosiro nu lobuw poimaid-i, tayon ong loga'on nu Atod nu Kinoringan, 16so' d'ado po ido koyuwan dii linoga' nu Atod nu Kinoringan, ontob nai' nu diniu' nosiro mongorait so si Yisus. 17Topopi yo sono ni Pitrus om ni Yuanis palad nosiro ri so ulu nu lobuw poimaid-i, om linoga' yo sono nosiro nu Atod nu Kinoringan.

18Nosiou-o po ni Simun nu linoga' lobuw-i nu Atod nu Kinoringan nu notopop nu pinongoorapan ni Yisus ulu nosiro ri, mokipoponaak sono iyo nu siin so nosiro, 19om mutongaro yo nu, “Taaki yo kuasa oono so aku su' isai-isai ya topopan ku nu palad ku tu, loga'on lobuw oono nu Atod nu Kinoringan,” koo.

20Nga sumombuto yo si Pitrus nu, “Ikau om siin mu no kopurundun-a nisubo so noraka! Sobana ko nosala' pongiro-kiro mu no so' ponontaman mu nu owoli nu siin kuasa nu Kinoringan-o. 21Dai ko otoop maid-waid so gogoma'on mai, so' inawo mu no dai obana so tiningkuangon nu Kinoringan. 22Rorogo yo kiat so pikiran mu oraai oono, om pokiampun-o so Kinoringan, 23so' oilaan ku inawo mu no noponu' nu koraayan, soko ompodu,” koo si Pitrus.

24Mutongaro yo si Simun nu, “Pogdu'a kou yo so Kinoringan, su' dai ourug so aku kiawi' tinangar muyu no,” koo.

25Nopupus-o po si Pitrus om si Yuanis mutangar suat so pongoilaan nosiro so si Yisus, om nopaabar nu tinongaran ni Yisus, mululio yo nosiro so Yirusalim. Laid nosiro manou-panou mululi' ri, nopaabar nosiro nu tinongaran ni Yisus so osuang kampung so wonuo nu Samaria.

Si Pilipus om wowaidon kiat so Itiupia

26Nopupus iri mutongaro yo ido susuu'on nu Kinoringan so si Pilipus nu, “Tungag-o om purongkat-o so solatan maid nu lalan tumaad kiat so Yirusalim mian so Gaja,” koo. (Lalan iiri sobana ko oyiyingo.) 27Murongkato yo sono si Pilipus. Laid niyo manou-panou-i nokosambat iyo nu ido wowaidon kiat so Itiupia. (Iyo yo po pinongoorapan nu kosiinan nu raja woinoi dii so Itiupia.) Wowaidon iiri koo'opod mongusaa' nu Kinoringan so Yirusalim, 28om mosaan niyo so pomponowan muli'. Mogom-ogom iyo so korita kuda sinokoyan niyo ri, mongobasa' nu buuk sinurat ni Yisaya, poo'abar nu Kinoringan gulu ri. 29Mutongaro yo Atod nu Kinoringan so si Pilipus nu, “Rani yo so sosokoyan oono,” koo. 30Indadi rumonio yo si Pilipus so sosokoyan-i, om norongou niyo wowaidon iiri mongobasa' nu buuk sinurat ni Yisaya. Duato yo niyo wowaidon-i nu, “Oorotian mu ya ka bosa'on mu no?” koo.

31Sumombuto yo wowaidon-i nu, “Onu ka koorati-rati ku ong d'ado ya montuduk so aku?” koo. Indadi posokoyo yo sono niyo si Pilipus so korita kuda niyo ri mokimuobi'. 32Itu yo su binasa' niyo,

“Iyo soko dumba ginaras,

om soko uyog nu dumba

dai mukai ong burutan.

Soko iri yo,

dai muad minimbongut Iyo.

33Pubaagan Iyo,

om dai otoop

poongobisara' so Iyo.

Matoi Iyo nu d'ado solusuk,”

koo ri.#Yis 53:7-8

34Mutongaro yo wowaidon iiri so si Pilipus nu, “Obari aku yo ong isai kuanon nu poo'abar nu Kinoringan oono, iyo ka kondiri ko' lobuw sondiang?” koo. 35Kiat so ayat iiri, tumimpuuno yo sono si Pilipus potarang nu Abar Owarong suat so si Yisus. 36Laid nosiro manou-panou, nokolalag sono nosiro nu sungoi. Mutongaro yo wowaidon iiri so si Pilipus nu, “Siowi, kisungoi tidi. Gaam nai' mokidiu' aku so ikau,” koo. [ 37Mutongaro yo si Pilipus nu, “Kowasa ko ya diu'on ong bana nu poimaid ko so si Yisus,” koo.

Sumombuto yo wowaidon-i nu, “Poimaid aku yo so si Yisus. Iyo yo su Anak nu Kinoringan,” koo.]

38Suuo yo nu wowaidon-i moomongkuyut nu sosokoyan-i pointoron. Sumondoto yo nosiro so sungoi-i, om diuo yo iyo ni Pilipus. 39Nokotidong nosiro, milok po su inongoi si Pilipus nu Atod nu Kinoringan kiat dii. Dai yo sono nosiou nu wowaidon-i si Pilipus, indadi lumombuso yo iyo maid nu sobana ko osudu'an. 40Pogsiou ni Pilipus, dii yo iyo so bandar Asdud. Lumongkopo yo sono iyo so bandar iiri paabar suat so si Yisus sampai nokologa' so bandar Kaisaria.

Currently Selected:

Pinongoorapan 8: TomPWPgLgPn

Highlight

Copy