Matius 27

Inowit si Yisus dii si Pilatus

(Mrk 15:1; Luk 23:1-2; Yns 18:28-32)

1Osarap-sarap po, muimpugo yo ongo wowaidon nu imam om wowaidon nu lobuw Yaudi ri muupakat momatoi so si Yisus. 2Kogosi yo nosiro akod longon Niyo ri om owito yo dii si Pilatus, gobonor nu Ruum so Yudia nu iya iiri.

Minusimpatoi si Yudas

(P'rapan 1:18-19)

3Noilaan-o po ni Yudas Iskariut nu inukuman si Yisus nu potoyon, minususun-a sono iyo. Ulii yo niyo tolu nopulu kaping siin pirok iiri so ongo wowaidon nu imam om wowaidon nu lobuw Yaudi ri, 4om mutongaro yo nu, “Kikoraayan aku so' nopokomouli' aku nu lobuw d'ado sala' nu potoyon,” koo.

Nga sumombuto yo nosiro nu, “Poduli' mai so ikau, okon ko kai ya! Ikau-a ikau,” koo nosiro.

5Bobiti ya niyo siin iiri so Waloi Maayo nu Kinoringan-i om mulaiwo yo iyo musimpatoi.

6Pumpungo yo sono siin iiri nu wowaidon nu imam-i om mutongaro yo nu, “Dai kowasa niasuw siin iitu so poianan nu siin so Waloi Maayo nu Kinoringan, so' pinomatoi nu lobuw,” koo. 7Nokopuupakat-o po nosiro, pokayo yo sono nosiro siin iiri pomoli nu tana' ingoranan nu Tana' nu Moomaal nu Kuron. Tana' oono poolobongan nu lobuw okon ko Yaudi. 8Ono yo ko' sampai kosiono tu, tana' iiri ingoranan nu Tana' Raa' orati nu ono, tana' winoli nu siin pinomatoi nu lobuw.

9Soko iri po, notuman-o tinangar nu poo'abar nu Kinoringan gulu ri, si Yirimia nu, “Orogaan Iyo nu lobuw Israil tolu nopulu siin pirok, 10om siin oono pinomoli nu Tana' nu Moomaal nu Kuron, soko iri nisuu' nu Kinoringan so aku ri,” koo ri.#Ja 11:12-13

Si Yisus so tiningkuangon ni Pilatus

(Mrk 15:2-5; Luk 23:3-5; Yns 18:33-38)

11Nokologa' si Yisus dii si Pilatus, duato yo sono niyo si Yisus nu, “Raja Ko ka nu lobuw Yaudi?” koo.

“Oo. Bana ya tangar mu no,” koo si Yisus, 12nga dai muad sinumambut Iyo nu topudan nu wowaidon nu imam om wowaidon nu lobuw Yaudi ri.

13Pagka soko iri, mutongaro yo si Pilatus so Iyo nu, “Orongou Mu ya ka totapud nosiro so Ikau-o?” koo.

14Nga dai ya muad sinumambut Iyo, sampai noiranan gobonor-i.

Inukuman si Yisus nu potoyon

(Mrk 15:6-15; Luk 23:13-25; Yns 18:39—19:16)

15Koopotan, koduung ong Runat Paska, polabus gobonor nu ido koyuwan kiat so jiil, mongowaid nu koinginan nu lobuw suang. 16Iya oono, kuwai ido koyuwan nojiil obantug nu oraai, ngaran niyo si Barabas. 17Noimpug-o po lobuw-i, mongoduato yo si Pilatus so nosiro nu, “Isai koinginan muyu nilabus ku, si Barabas ko' si Yisus, ono pinokoRaja Nijanji nu Kinoringan-o?” koo. 18Tinangar ni Pilatus soko iri, so' noilaan-o niyo nu inakom nosiro si Yisus, om nikomouli' so iyo, so' mokimurindi nosiro.

19Iya nu dii si Pilatus so poongobisora'an-i, kinodawan iyo nu sawo niyo ri nu, “Ikod-o kisimpor mongoraai nu lobuw d'ado sala' oono, so' kolaa'-laa' sobana upian ku siawi suat so Iyo,” koo.

20Nga ogaran nai' nu ongo wowaidon nu imam-i lobuw suang-i, mindamo so si Pilatus nu nipolabus si Barabas, om si Yisus ukumon nu potoyon. 21Mongoduato po gobonor-i so nosiro nu, “Isai ka su koinginan muyu nilabus ku?” koo.

“Si Barabas!” koo nosiro.

22“Bang soko ono, onu waalon ku so Iyo, ono pinokoRaja Nijanji nu Kinoringan-o?” koo si Pilatus.

“Solibon Iyo!” koo nosiro.

23“Nga onu sala' Niyo,” koo si Pilatus.

Lumuapo yo sono nosiro nu osangat nu, “Solibon-a Iyo!” koo.

24Pagka dai yo koponapan si Pilatus so si Yisus om tumimpuun-o nosiro rumoraayan, mongolapo yo iyo nu sungoi om muugaso yo nu palad so tiningkuangon nu lobuw suang-i maid nu mutangar nu, “D'ado ya ilo-ilo ku nu poomatoi nu lobuw iitu no. Ono yo ko' inugasan ku palad ku no, pongilaan nu kou ya kou nu itu no,” koo.#Pom 21:6-9

25Mimbosango yo lobuw suang-i nu, “Oo, kai ya kai om inonakan mai mogkoilo nu poomatoi nu lobuw oono,” koo.

26Lobusi yo sono ni Pilatus si Barabas om monuuo yo iyo nu lobuw popongolubak om posalib so si Yisus.

Sinoruru si Yisus nu ongo soujar

(Mrk 15:16-20; Yns 19:2-3)

27Nopupus iri, owito yo si Yisus nu ongo soujar-i mian so waloi ni Gobonor Pilatus, om muimpugo yo kiawi' soujar-i so pililiwut Niyo ri.#27:27: Koosampuw nu soujar oono onom naatus. 28Luusi yo Iyo nosiro nu pokakas om poingkolomo yo nu sabung mongkomiang-miang.#27:28: Raja ya su momakai nu sabung mongkomiang-miang. 29Tolungasi yo Iyo nosiro nu wakau kiruwi, pinokotupi nu raja. Popongkuyuto yo nosiro longon wanan Niyo ri nu tutungkud, om sumurukudo nai' nosiro so tiningkuangon Niyo ri monoruru nu, “Otogui Ko yo su raja nu lobuw Yaudi,” koo. 30Durai yo nosiro buatan Niyo ri om olapo nai' tutungkud-i, pinongolubak nu ulu Niyo ri. 31Notopodan-o po nosiro monoruru so Iyo, luuso yo nosiro sabung niingkolom nosiro ri, om pinopusabung nu sabung Niyo ri. Nopupus iri, owito yo Iyo nosiro lumabus nu nisalib.

Nisalib si Yisus

(Mrk 15:21-32; Luk 23:26-43; Yns 19:17-27)

32Laid nosiro manou-panou, nokosambat nosiro ido koyuwan ingoranan so si Simun kiat so Kirini. Sinosogan iyo nosiro monimban nu salib ni Yisus. 33Indadi nokologa' yo sono nosiro so ido tontong ingoranan nu Gulguta, orati “doupuk”.#27:33: doupuk; intawa: duakup 34Poinumo yo nosiro si Yisus nu anggur ginowulan nu ompodu, nga noirosaan-o po Niyo, dai ya ininum Niyo.#Lgu 69:21

35Solibi yo sono Iyo nosiro om musuuso#27:35: Gama' yo po nosiro musuus, momakai nu watu kitanda' mongilo ong isai su komanang. yo ong isai su kosongapan nu pokakas Niyo ri.#Lgu 22:18 36Nopupus iri, mogomo yo nosiro mongipat so Iyo. 37Nopopopak nosiro nu papan so dilanggau nu ulu ni Yisus, pinosuratan nu pinounayan nosiro momatoi so Iyo nu,

Itu Yo Si Yisus,

Raja Nu Lobuw Yaudi.

38Kuwai ya duo lobuw oraai nisalib nosiro, pinotalad so musompodi Niyo ri.

39Ongo lobuw tumalib dii ri, milog-pilog#27:39: Ono yo su poonginsosona nu lobuw Yaudi nu lobuw wokon nu iya iiri. maid-a muragam so Iyo om mutangar nu,#Lgu 22:7; 109:25 40“Minutangar Ko nu uyason Mu Waloi Maayo nu Kinoringan om kotoluan Ko yo mongatag. Bang bana nu Anak Ko nu Kinoringan, ulus-o su' miau Ko,” koo.#Mat 26:61; Yns 2:19

41Ongo wowaidon nu imam, wowaidon nu lobuw Yaudi om moomontuduk nu Ukum-i nga monoruru ya so Iyo nu, 42“Monabang Iyo nu lobuw sondiang, nga dai Iyo kopusintabang. Bang bana nu raja Iyo nu Israil, mulus Iyo nu ono sono tu om poimaid kai nai' so Iyo. 43Poimaid Iyo nu Kinoringan, om minutangar Iyo nu Anak Iyo nu Kinoringan, nadi siowi toko ya ong sopulan ka Iyo nu Kinoringan ko' dai,” koo nosiro.#Lgu 22:8

44Lobuw oraai nisalib so obi' Niyo ri nga monoruru ya so Iyo.

Kinopotoyan ni Yisus

(Mrk 15:33-41; Luk 23:44-49; Yns 19:28-30)

45Tonga' runat-i, tinumuong sono pilolongkop nu tontong iiri solaid tolu nojaam. 46Awi-awi ri, gumiako yo si Yisus mutangar so tangar Niyo nu, “Ili, Ili, Lama Sabaktani!” koo. Orati yo po nu iri nga, “Oo Kinoringan Ku, nokuro su linaiwan Mu Aku?” koo.#Lgu 22:1

47Mutongaro yo ongo lobuw nokorongou nu tinangar Niyo iiri nu, “Momaau Iyo so si Ilia,” koo. 48Mongolapo yo sono ido koyuwan so nosiro nu golugut, om loobi yo so sungoi nu anggur mousom, tonongi yo Niyo so pompod nu kayu, om suloyi yo niyo so munung ni Yisus.#Lgu 69:21

49Nga wokon-i mutangar nu, “Kodi po! Imati toko po ong lumoga' ya si Ilia monabang so Iyo ko' dai,” koo.

50Gumiako po Iyo om nowukatan-o sono.

51Iya ya iiri, tabir so Waloi Maayo nu Kinoringan nga nopiduo nopisi'.#27:51: Tabir oono pinonapad nu Bilik Sobana ko Osusi om Bilik Osusi so Waloi Maayo nu Kinoringan so Yirusalim. Kosudaan-o po nu tabir iiri pubaatan nu riniba om Kinoringan. Nadi, orati yo po nu nopisi' iiri nga koduung minatoi-o si Yisus, dai yo sono koputondiang riniba om Kinoringan. Tana' ri nga ginumugur sampai noongoruntu' su bulud nu kowotuan.#Kin 26:31-33 52Noongobungkar su kolobongan, om osuang lobuw poimaid so Kinoringan iri minatoi-o nga noluli'an sono. 53Noluli'an-o po si Yisus, nosiro nga linumabus-o kiat so kolobongan om minian so Yirusalim. Om osuang lobuw nokosiou so nosiro dii.

54Insan wowaidon nu ongo soujar, iri minongipat nu lobong ni Yisus, nga noiranan nu nosiou noongourug iiri. Sobana ko linumaa' nosiro, om minutangar nu, “Bana-bana ya nu Anak Iyo nu Kinoringan,” koo.

55Kowoinoyan minonundan so si Yisus kiat so Galilia ri, nga nokosiou-a nu nourug iiri so dirawu'. 56Wokon so nosiro, ono yo, si Maria Magdalina, si Maria ino ni Yakubus om ni Yusup, om sawo ni Jibidius.#Luk 8:2-3

Nilobong si Yisus

(Mrk 15:42-47; Luk 23:50-56; Yns 19:38-42)

57Awi ri, lumogaa yo ido koyuwan okaya kiat so Arimatia, ingoranan so si Yusup, mompomaid-a ni Yisus. 58Miano yo iyo dii si Pilatus mokilila' nu olapon bangkai ni Yisus. Suuo yo sono ni Pilatus ongo lobuw niyo ri potaak bangkai ni Yisus so si Yusup. 59Olapo yo ni Yusup bangkai iiri om soluyo yo nu koukuputi owagu, 60om lobongi yo niyo so lobong winaal niyo so bulud nu watu. Noopod iri, tutubi yo niyo nu watu maayo om momponowo yo, 61nga mogom-ogom-a si Maria Magdalina om sangai niyo ri so tiningkuangon nu lobong-i.

Ongo moongipat nu lobong ni Yisus

62Susuab nu Runat Pongintoronan-i, sumombato yo ongo wowaidon nu imam om lobuw Parisi ri so si Pilatus, 63om tongaro yo nu, “Oo tuan! Oondoman mai nu laid po miau nu lobuw moongaakal iri, nokoputangar Iyo nu, ‘So kotolu no oluli'an Aku,’ koo.#Mat 16:21; 17:23; 20:19; Mrk 8:31; 9:31; 10:33-34; Luk 9:22; 18:31-33 64Pagka soko ono, ponuu' yo nu lobuw popongipaton nu lobong oono, musingkologa' nu kotolu no, su' dai otakou nu mompomaid Niyo bangkai Niyo ri om mutangar nai' nosiro nu, ‘Noluli'an-o Iyo,’ koo. Oraai po poongaakal oono ko' poongaakal nosiro nu timpuun-i,” koo nosiro.

65Sumombuto yo si Pilatus nu, “Tudi yo ongo soujar moongipat tu. Nosiro yo su mongipat nu lobong oono,” koo.

66Miano yo sono nosiro maid nu ongo soujar-i mongipat nu lobong-i om momaalo yo nosiro nu ponondu'an so watu pinonutub nu lobong-i.

Currently Selected:

Matius 27: TomPWPgLgPn

Highlight

Copy