Matius 28

Kinoluli'an ni Yisus

(Mrk 16:1-8; Luk 24:1-12; Yns 20:1-10)

1Osarap-sarap po nu runat koido ri, miano yo si Maria Magdalina om sangai niyo ri so lobong ni Yisus. 2Milok po su gumugur tana' ri nu sobana ko oontob nu ido susuu'on nu Kinoringan kiat so surga, minongoluid nu watu pinonutub nu lobong-i, om mogomo yo. 3Soko kudilop buatan nu susuu'on iiri, om pokakas-i sobana ko oputi'. 4Sobana ko linumaa' kolobuwan minongipat nu lobong-i, sampai nokokikip om noodan soko lobuw minatoi.

5Mutongaro yo susuu'on iiri so duo woinoi-i nu, “Ikod kou yo kilaa'! Oilaan ku ya nu modium kou so si Yisus, iri nisalib-i. 6Nga d'ado yo Iyo tuui so' noluli'an-o, soko tinangar Niyo nu gulu ri. Siowi toko yo so pinopolakan-i. 7Uli' kou yo osikap, om tuturani muyu mompomaid Niyo ri nu noluli'an-o Iyo, om kosiono minogulu yo Iyo so Galilia. Dii osiou muyu Iyo. Ondomo muyu yo kodau ku so kou oono,” koo susuu'on-i.

8Mulaiwo yo sono kiduo woinoi iiri kiat so lobong-i maid nu lumaa' nga osudu'an-a. Mogowo yo nosiro paabar nu noongourug iiri so mompomaid ni Yisus.

9Milok po su lumoga' si Yisus sumambat nu duo woinoi iiri om mutongaro yo nu, “Osanang kou yo,” koo. Mundako yo sono nosiro rumani, kumorom so akod Niyo ri, sumamba. 10Mutongaro yo Iyo so nosiro nu, “Ikod kou yo kilaa'! Tuturani muyu yo kosusulodan Ku ri, su' mian nosiro so Galilia om osambat Aku nosiro dii,” koo.

Tuturan nu soujar minongipat nu lobong-i

11Laid manou-panou nu duo woinoi iiri, mulio yo sono tinu-tinu soujar minongipat nu lobong ni Yisus, potuturan nu noongourug iiri so ongo wowaidon nu imam-i. 12Nokopuupakat-o po ongo wowaidon nu imam-i om wowaidon nu lobuw nu Yaudi ri, taaki yo sono nosiro soujar minongipat nu lobong ni Yisus nu osuang siin, 13inuyud mutangar nu, “Tuturani muyu yo nu tinakou nu mompomaid ni Yisus bangkai Niyo ri nu laid muyu moturuw-i. 14Om bang orongou ono nu gobonor-o, imuunan mai ya iyo su' dai kou kooyang nu kopuraai-raayan,” koo nosiro.

15Olapo yo nu soujar-i siin nitaak so nosiro ri, om waalo yo niongosuu' so nosiro ri. Nokolongkop-o sono tuturan iiri so lobuw Yaudi om kakal-a poimaid nosiro nu tuturan oono nu ono sono tu.

Minokisiou si Yisus nu ongo mompomaid Niyo ri

(Mrk 16:14-18; Luk 24:36-49; Yns 20:19-23; P'rapan 1:6-8)

16Miano yo sono opulu om ido mompomaid ni Yisus so Galilia, so bulud nituduk ni Yisus so nosiro ri.#Mat 26:32; Mrk 14:28 17Nosiou-o po Iyo nosiro so bulud iiri, mongusaa'o yo nosiro so Iyo. Nga kuwai so nosiro dai po otoroido inawo. 18Mobio yo sono si Yisus dii so nosiro om mutongaro yo nu, “Tinaakan Aku nu kopogboya'an nu onu-onu ya so riniba tu om so surga. 19Indadi, panou kou yo paabar nu tinongaran Ku, su' kiawi' bansa so wonuo tu poimaid so Aku, om diu'on muyu nosiro mongorait nu ngaran nu Amo, ngaran Ku Anak Niyo, om Atod nu Kinoringan.#P'rapan 1:8 20Tuduki muyu yo nosiro momaal nu niongosuu' Ku so kou ri, om ondomo muyu yo nu maid-waid Aku so kou musingkologa' nu pongoowi'an nu wonuo tu,” koo si Yisus.

Currently Selected:

Matius 28: TomPWPgLgPn

Highlight

Copy