Markus 1

Pontudukan ni Yuanis Moongodiu'

(Mat 3:1-12; Luk 3:1-18; Yns 1:19-28)

1Itu yo su ponimpuunan nu Abar Owarong suat so si Yisus Kristus, Anak nu Kinoringan, 2soko nokosurat so buuk ni Yisaya, iri poo'abar nu Kinoringan gulu ri nu,

“Koo Kinoringan, ‘Itu yo sinuu' Ku,

suu'on Ku yo iyo mogulu so Ikau

monginduas nu lolanan Mu,’

koo.#Mal 3:1

3Maau-paau ido koyuwan

so padang pantai nu,

‘Posodiaa yo inawo muyu no,

nu kologa'an nu TUHAN,

soko monginduas kou nu lalan

ong lumoga' raja,’ koo iyo,”

koo si Yisaya.#Yis 40:3

4Linumoga' yo sono si Yuanis Moongodiu' iiri so padang pantai, mongodiu' nu lobuw. Mutongaro yo iyo nu, “Rorogo kou yo momaal nu koraayan om mokidiu' yo. Bang waalon muyu ono, ompunan kou nu Kinoringan kiat so koraayan muyu,” koo. 5Osuang sono lobuw kiat so pilolongkop nu wonuo nu Yudia om kiat so bandar Yirusalim minian dii so iyo mongaabar so tiningkuangon nu lobuw suang nu koraayan nosiro, om diuo yo ni Yuanis so Bowang Yurdan-i.

6Minupokakas si Yuanis nu bulu nu unta winaal, kambot niyo ri nga kulit, om ookanon niyo kokapu om paa' nu munsong.#2 Raj 1:8 7Minongaabar iyo nu, “Lumoga' po ido koyuwan maayo kopogboya'an ko' aku, om dai su otoop monguripon so Iyo. 8Mongodiu' aku so kou nu sungoi, nga Iyo yo su monaak so kou nu Atod nu Kinoringan pororogo so kou momaal nu koraayan,” koo si Yuanis.

Pinongodiu'an so si Yisus

(Mat 3:13-17; Luk 3:21-22)

9Iya iiri linumoga' si Yisus kiat so Najarit so wonuo nu Galilia, om diniu' Iyo ni Yuanis so Bowang Yurdan. 10Laid Niyo tumindal-i, nosiou Niyo nopitas su langit, om minuntiba Atod nu Kinoringan soko asang sinumangkad so ulu Niyo ri. 11Norongou-o sono bongut nu Kinoringan kiat so surga nu, “Ikau-o su anak Ku nu koosomodan Ku. Koinsanang Ko bana nu inawo Ku,” koo.#Pgn 22:2; Lgu 2:7; Yis 42:1; Mat 3:17; 12:18; Mrk 9:7; Luk 3:22

Kininaman si Yisus nu Wowaidon

nu Moinat

(Mat 4:1-11; Luk 4:1-13)

12Mogtuui inowit si Yisus nu Atod nu Kinoringan so padang pantai. 13Opat nopulu runat laid Niyo dii-dii kininaman nu Wowaidon nu Moinat, om mido-ido nu kulos-kulos#1:13: kulos-kulos; intawa: sotua ongo sisiau, nga tinabang-a Iyo nu ongo susuu'on nu Kinoringan.

Pinaau ni Yisus opat moomukot

(Mat 4:12-22; Luk 4:14-15; 5:1-11)

14Nojiil-o po si Yuanis, linumoga' yo si Yisus dii so Galilia potuturan nu Abar Owarong kiat so Kinoringan nu, 15“Oduruk-o mogkuasa Kinoringan. Indadi rorogo kou yo momaal nu koraayan om poimaid-o nu Abar Owarong oono,” koo.#Mat 3:2 16Laid ni Yisus manou-panou so imbing nu Liu' Galilia ri, nosiou Niyo duo musulod momukot, si Simun om si Andrias. 17Tongaro yo Niyo nosiro nu, “Waid kou yo s'aku. Tudukan Ku kou mongingol nu lobuw maid so Aku,” koo. 18Ogoli ya sono nosiro pukot nosiro ri, om maido yo so si Yisus.

19Nokolombus-lombus nosiro, nosiou ni Yisus duo musulod si Yakubus om si Yuanis, inonakan ni Jibidius, mongatag nu pukot so alud. 20Paawo yo ni Yisus nosiro om ogoli yo nosiro amo nosiro ri om ongo kukumoraja ri, om maido yo so si Yisus.

Lobuw sinorungan nu moinat

(Luk 4:31-37)

21Nokologa' yo sono si Yisus om mompomaid Niyo ri so Kapornaum. Runat Pongintoronan-i, mosuwo yo si Yisus so waloi sosombooyangan-i om montuduko yo. 22Noiranan kolobuwan-i so' montuduk Iyo maid nu kopogboya'an, okon ko soko moomontuduk nu Ukum ni Musa.#Mat 7:28-29

23Mosuwo yo sono ido koyuwan sinorungan nu moinat, om gumonsoko yo nu, 24“Oo Yisus, lobuw Najarit, onu ka waalon Mu so kai? Mongobinasa Ko bo gaam so kai. Otondu'an ku ya Ikau. Ikau-o su osusi sinuu' nu Kinoringan,” koo.

25Suuo yo ni Yisus moinat sinumarung iiri nu, “Ukokop-o! Pulaiw-o kiat so lobuw iitu!” koo.

26Pokoporo yo sono nu moinat-i koyuwan nu lobuw-i maid nu ginumonsok, om inuyud-a lumabus. 27Lobuw suang-i nga noiranan nu iri, om mududuat nu, “Okon ko nogina-gina tangar Niyo iiri. Kikuasa iyo monusub nu komoinatan om musimaid nosiro nu ponuu'an Niyo,” koo.

28Nokololongkop-o sono abar suat so si Yisus so wonuo nu Galilia.

Minomali' si Yisus nu lobuw suang

(Mat 8:14-17; Luk 4:38-41)

29Noopod iri, lumobuso yo si Yisus kiat so waloi sosombooyangan-i, om miano yo nosiro si Yakubus om si Yuanis so waloi ni Simun om ni Andrias. 30Nokaasuw si Yisus so waloi-i, pokoiloo yo sono Iyo nu kolobuwan-i nu tumogom iwan ni Simun om migi-gili so poomoturuwan. 31Mobio yo si Yisus so woinoi iiri om kuyuti yo Niyo longon-i monuud potungag. Iya ya iiri nopoli'an-o woinoi-i om pookano yo niyo nosiro.

32Nolidop su runat, osuang lobuw minongowit nu lobuw sumakit om sinorungan nu moinat dii si Yisus. 33Muimpugo yo lobuw suang kiat so pilolongkop nu bandar iiri so natad nu waloi-i. 34Polii yo sono ni Yisus lobuw suang iiri nu boroginis nu osakit om sususubo yo Niyo komoinatan-i. Pagka otondu'an Iyo nu komoinatan-i, dai linila'an Niyo nosiro mutangar.

Minontuduk si Yisus so Galilia

(Luk 4:42-44)

35Otuong-tuong po nu susuab-i, tumungago yo si Yisus om miano yo so tontong oyiyingo so dilabus nu bandar-i mogdu'a. 36Diumo yo sono Iyo ni Simun om kouna'an niyo ri. 37Nooyangan-o po nosiro si Yisus, tongaro yo nosiro nu, “Kiawi' lobuw modium so Ikau,” koo.

38Nga, sumombuto yo si Yisus nu, “Lumombus toko yo so bandar wokon so kumoronian. Subai montuduk Aku ya pudi dii, so' ono yo su tomod Ku,” koo.

39Lumongkopo yo sono si Yisus so wonuo nu Galilia ri montuduk so ongo waloi sosombooyangan om monusub nu moinat.#Mat 4:23; 9:35

Minomali' si Yisus nu lobuw binolangon

(Mat 8:1-4; Luk 5:12-16)

40Kuwai lobuw binolangon#1:40: Mongowaid nu oturan nu ugama Yaudi, lobuw kiosakit nu ono dai otoop mongusaa' so Kinoringan so waloi sosombooyangan. minian dii si Yisus. Sumorukudo yo iyo so tiningkuangon ni Yisus om mutongaro yo nu, “Bang moingin Ko Tuan, opoli'an Mu ya aku,” koo.

41Noluluudan si Yisus nu lobuw iiri. Kaangi yo sono Niyo palad Niyo ri potopop so lobuw iiri om mutongaro yo nu, “Moingin aku ya. Opoli'an ko yo sono,” koo. 42Iya ya iiri nopoli'an-o lobuw-i. 43Suuo yo sono ni Yisus lobuw iiri pouli' om kinodawan nu oogot nu, 44“Rongowo yo, kodi yo itu no obar-obari so isai-isai ya, nga panou-o osikap mian so imam mokiudio. Oopod ono pongusaa' yo suat so kinopoli'an mu soko iri nisuu' ni Musa, pongilaan nu lobuw suang nu nopoli'an ko yo sono,” koo si Yisus.#Ot 14:1-32

45Nga minompanou-a lobuw iiri paabar so siombo-ombo ya, om dai sono kaasuw si Yisus so bandar ong osiou nu lobuw suang. Indadi minogol-a sono Iyo so tontong obubulun so dilabus nu bandar-i. Soko iri pona, osuang-a lobuw kiat so ombo-ombo lumoga' dii so Iyo.

Currently Selected:

Markus 1: TomPWPgLgPn

Highlight

Copy