Markus 9
9
1Mutongaro po si Yisus nu, “Ondomo muyu yo, kuwai so kou tuui dai po matoi ong dai po kosiou nu Kinoringan mogkuasa soko raja,” koo.
Mininda buatan ni Yisus
(Mat 17:1-13; Luk 9:28-36)
2Koonoman kiat nu iri, owito yo ni Yisus si Pitrus, si Yakubus, om si Yuanis sulod ni Yakubus tumidong so bulud opangkat nu siro ya siro, om mininda sono buatan Niyo kosiowan nosiro. 3Pokakas Niyo ri nga milat-kilat nu kooputi'. So wonuo tu ado lobuw kopomupu nu pokakas koinong nu iri kooputi'. 4Mintolango yo sono si Musa om si Ilia osiowan nosiro mutangar-tangar so si Yisus. 5Mutongaro yo sono si Pitrus so Iyo nu, “Oo Guru, owarong bana toko tuui. Bang moingin Ko, momosalag aku tuui tolu, ido Dikau, ido ni Musa, om ido ni Ilia,” koo. 6Sobana yo dai oilaan ni Pitrus ong onu otoop tongaron niyo, so' sobana ko lumaa' nosiro.
7Dai po nopupus si Pitrus mutangar, kuwai sono kawut onawau tinumapu' dii so nosiro, om kiat so kawut iiri nokorongou nosiro nu bongut nu, “Itu yo su Anak sinomodan Ku. Koinsanang sobana Iyo nu inawo Ku. Rongowo muyu yo totongaron Niyo no,” koo.#Mat 3:17; Mrk 1:11; Luk 3:22 #2 Ptr 1:17-18 8Monomburorowo yo sono nosiro so pililiwut nosiro ri, nga d'ado yo nosiou nosiro sondiang ko si Yisus po.
9Tumaad nosiro so bulud-i, pogoso yo ni Yisus mompomaid Niyo ri nu, “Bang dai po oluli'an Aku, Anak nu Riniba, kodi muyu po obar-obari so isai yo po nopusiou muyu sisuna ri,” koo.
10Inasip-a nosiro tinangar Niyo iiri, nga minududuat nosiro ong onu kuanon Niyo nu koluli'an. 11Mongoduato yo mompomaid Niyo ri nu, “Nokuro su minutangar moomontuduk nu Ukum nu si Ilia po su gulu lumoga'?” koo.#Mal 4:5; Mat 11:14
12Sumombuto yo si Yisus nu, “Bana ya nu si Ilia po gulu lumoga'. Om iyo yo nai' su monodia' nu onu yo po. Nga Aku, Anak nu Riniba okon ko soko ono. Nokosurat-o so Buuk nu Kinoringan nu, Aku yo po osuang kosonsora'an om pokoraayon nu lobuw. 13Nga mutangar Aku so kou, nokologa' yo si Ilia. Pubaag-baagan-a iyo nosiro mongowaid nu koinginan nosiro musuat nu nokosurat so Buuk nu Kinoringan suat so iyo,” koo si Yisus.
Minomali' si Yisus nu lolaing sinorungan
(Mat 17:14-21; Luk 9:37-43a)
14Nokopululi' si Yisus om tolu mompomaid Niyo ri so mompomaid wokon-i, nosiou nosiro osuang lobuw om ongo moomontuduk nu Ukum mokimusiwal so nosiro. 15Nosiou-o po Iyo nu lobuw suang-i, noiranan nosiro, om mundako yo lumoga' dii so Iyo. 16Mongoduato yo Iyo so nosiro nu, “Onu ka pinuupokatan muyu om moomontuduk nu Ukum iiri?” koo.
17Sumombuto yo ido koyuwan kiat so nosiro nu, “Oo Guru, inowit ku anak ku iitu tuui so Ikau so' sinorungan nu moinat om nobobou sono. 18Bang sumoup-o iyo, mogilamba yo so tana' no, muputa-puta su kobang, muatip su nipon, om kumosig koyuwan niyo no. Minindamo aku yo so mompomaid Mu no nu iposusub ku moinat oono nga dai ya osusub,” koo.
19Tongaro yo ni Yisus nosiro nu, “Kou su lobuw kisala' dai poimaid. Dai Aku osanang mido-ido so kou, nga tinaanan Ku ya nu laid iiri. Owito yo lolaing mu no tuui!” koo. 20Owito yo sono nu lobuw iiri lolaing-i dii so Iyo.
Nosiou-o po nu moinat-i si Yisus, unggogo yo niyo lolaing-i sampai nogupol om muid-luid, om muputa-puta su kobang.
21Duato yo sono Niyo amo nu lolaing iiri nu, “Komuro yo ka kolaid lolaing oono soko itu?” koo.
Sumombuto yo amo ri nu, “Kiat po koworos. 22Dadan moinat oono posubo so iyo so apui om potuop so sungoi nu momatoi so iyo. Indadi bang kodapat Ko, luluudi om tobangi kai yo,” koo.
23Mutongaro yo si Yisus nu, “Onu tinangar mu ri? Ong kodapat Ko, k'ikau? Onu yo po ourug-a ong poimaid-a,” koo.
24Lumuapo yo amo ri nu, “Oo Tuhan! Poimaid aku, nga koimaidan ku owako po. Tobango aku yo su' sobana ko poimaid aku,” koo.
25Nosiou ni Yisus nu osuang sono lobuw muimpug, suuo yo Niyo moinat iiri nu, “Oo su moinat mongobongol om mongobobou, labus-o so lolaing iitu no, om ikod-o sono kipululi',” koo.
26Lumuapo yo moinat-i om unggogo yo niyo lolaing-i om lumobuso yo. Nosiou nosiro lolaing iiri nu soko bangkai, sampai nokoputangar nosiro nu, “Minatoi-o lolaing-o,” koo. 27Nga kuyuti yo ni Yisus longon nu lolaing-i om tuudo yo Niyo potungag, om tumungago yo sono.
28Nokouli' si Yisus, lumogaa yo mompomaid Niyo ri mongoduat nu, “Nokuro su dai mai nosusub moinat iiri?” koo.
29Sumombuto yo Iyo nu, “Moinat soko iri, dai osusub ong dai mogdu'a po laid,” koo si Yisus.
Ponuturanan koinduo ni Yisus suat so kopotoyan Niyo
(Mat 17:22-23; Luk 9:43-45)
30Mulaiwo yo sono si Yisus om mompomaid Niyo ri kiat dii, om lumombuso yo linumalan so Galilia. Dai Iyo moingin nu oilaan nu lobuw ong siombo Iyo, 31so' montuduk Iyo sono nu mompomaid Niyo ri nu, “Dai olaid ikomouli' Aku, Anak nu Riniba so kopogboya'an nu lobuw. Potoyon Aku, nga so kotolu no oluli'an Aku ya,” koo.
32Dai noorotian nosiro nituduk Niyo ri, nga dai kooku' nosiro mongoduat so Iyo.
Isai su oogot so ponokodan nu Kinoringan?
(Mat 18:1-5; Luk 9:46-48)
33Nokologa' yo sono nosiro so Kapornaum om dii so waloi-i, duato yo ni Yisus mompomaid Niyo ri nu, “Onu ka pinusisiwalan muyu sisuna so lolanon-i?” koo.
34Nga dai ya sinumambut nosiro so' minudodaawa nosiro so lolanon-i ong isai su oogot so nosiro.#Luk 22:24 35Mogomo yo si Yisus om paawo yo Niyo opulu om duo mompomaid Niyo ri, om mutongaro yo nu, “Lobuw moingin nu oogot po ko' kiawi' wokon, subai mugogoma'on suat so lobuw suang,” koo.#Mat 20:26-27; 23:11; Mrk 10:43-44; Luk 22:26 36Owito yo ni Yisus ido lolaing so tiningkuangon nosiro ri om koromi yo Niyo maid nu mutangar nu, 37“Isai monorima' nu lobuw soko lolaing iitu, so' poimaid so Aku, monorima' ya so Aku. Om lobuw monorima' so Aku, okon ko Aku ya su torima'on, nga monorima' po so Iyo ono minonuu' so Aku no,” koo si Yisus.#Mat 10:40; Luk 10:16; Yns 13:20
Isai dai lumawan so toko, nosiro yo su kouna'an toko
(Luk 9:49-50)
38Mutongaro yo si Yuanis so si Yisus nu, “Oo Guru! Nokosiou kai nu lobuw minonusub nu moinat mongorait nu ngaran Mu. Pinogos mai iyo, so' okon-a ko kiat so puimpugan toko,” koo.
39Nga sumombuto yo si Yisus nu, “Adang-o pogoson iyo, so' d'ado ido kopomaal nu koiran-iran mongorait nu ngaran Ku, om mongoraai-a sono so Aku. 40Om isai dai lumawan so toko, iyo yo su kouna'an toko.#Mat 12:30; Luk 11:23 41Ondomo muyu yo, isai poinum so kou so' moongowaid kou so Aku, Raja Nijanji nu Kinoringan, tantu kotorima' iyo nu tutungkap kiat so Kinoringan.#Mat 10:42
Gogoma'on koowit nu lobuw so koraayan
(Mat 18:6-9; Luk 17:1-2)
42Isai koowit-owit nu lobuw wokon momaal nu koraayan, oinsaadan. Owarong po korobotuan liou niyo no nu watu maayo om itobung so raat. 43Bang longon mu no su koowit so ikau momaal nu koraayan, totoko yo om odai. Owarong po sompopodi longon mongimaid so Kinoringan ko' duo nga kosubo so noraka. #Mat 5:30 [ 44So tontong oono yo dai matoi giuk, om apui-o dai moda'.]#9:44: Tinu-tinu solinan silaid-i noporuang nu ayat iitu. 45Bang akod mu no su koowit so ikau momaal nu koraayan, totoko yo om odai. Owarong po sompopodi akod mongimaid so Kinoringan ko' duo akod nga kosubo so noraka. [ 46So tontong oono yo dai matoi giuk, om apui-o dai moda'.]#9:46: Tinu-tinu solinan silaid-i noporuang nu ayat iitu. 47Sungkito om odai yo mato mu no nu koowit so ikau momaal nu koraayan. Owarong po sompopodi mato masuw so Pogkuosaan nu Kinoringan so surga, ko' duo maam mato nga kosubo so noraka.#Mat 5:29 48So tontong oono yo dai matoi giuk, om apui-o dai moda'.#Yis 66:24
49Kosonsora'an-o yo su poidu' nu koraayan kiat so lobuw poimaid, soko asin koimbarong nu ingkookan iri niusaa' so Kinoringan.
50Bang malo yo asin-o, d'ado yo sono kosudaan.#Mat 5:13; Luk 14:34-35
Soko ono ya pudi kou mompomaid Ku. Bang dadan kou mualod, ado yo sono kosudaan. Indadi, adang-o mualod, nga pususulut kou yo,” koo.
Currently Selected:
Markus 9: TomPWPgLgPn
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
Markus 9
9
1Mutongaro po si Yisus nu, “Ondomo muyu yo, kuwai so kou tuui dai po matoi ong dai po kosiou nu Kinoringan mogkuasa soko raja,” koo.
Mininda buatan ni Yisus
(Mat 17:1-13; Luk 9:28-36)
2Koonoman kiat nu iri, owito yo ni Yisus si Pitrus, si Yakubus, om si Yuanis sulod ni Yakubus tumidong so bulud opangkat nu siro ya siro, om mininda sono buatan Niyo kosiowan nosiro. 3Pokakas Niyo ri nga milat-kilat nu kooputi'. So wonuo tu ado lobuw kopomupu nu pokakas koinong nu iri kooputi'. 4Mintolango yo sono si Musa om si Ilia osiowan nosiro mutangar-tangar so si Yisus. 5Mutongaro yo sono si Pitrus so Iyo nu, “Oo Guru, owarong bana toko tuui. Bang moingin Ko, momosalag aku tuui tolu, ido Dikau, ido ni Musa, om ido ni Ilia,” koo. 6Sobana yo dai oilaan ni Pitrus ong onu otoop tongaron niyo, so' sobana ko lumaa' nosiro.
7Dai po nopupus si Pitrus mutangar, kuwai sono kawut onawau tinumapu' dii so nosiro, om kiat so kawut iiri nokorongou nosiro nu bongut nu, “Itu yo su Anak sinomodan Ku. Koinsanang sobana Iyo nu inawo Ku. Rongowo muyu yo totongaron Niyo no,” koo.#Mat 3:17; Mrk 1:11; Luk 3:22 #2 Ptr 1:17-18 8Monomburorowo yo sono nosiro so pililiwut nosiro ri, nga d'ado yo nosiou nosiro sondiang ko si Yisus po.
9Tumaad nosiro so bulud-i, pogoso yo ni Yisus mompomaid Niyo ri nu, “Bang dai po oluli'an Aku, Anak nu Riniba, kodi muyu po obar-obari so isai yo po nopusiou muyu sisuna ri,” koo.
10Inasip-a nosiro tinangar Niyo iiri, nga minududuat nosiro ong onu kuanon Niyo nu koluli'an. 11Mongoduato yo mompomaid Niyo ri nu, “Nokuro su minutangar moomontuduk nu Ukum nu si Ilia po su gulu lumoga'?” koo.#Mal 4:5; Mat 11:14
12Sumombuto yo si Yisus nu, “Bana ya nu si Ilia po gulu lumoga'. Om iyo yo nai' su monodia' nu onu yo po. Nga Aku, Anak nu Riniba okon ko soko ono. Nokosurat-o so Buuk nu Kinoringan nu, Aku yo po osuang kosonsora'an om pokoraayon nu lobuw. 13Nga mutangar Aku so kou, nokologa' yo si Ilia. Pubaag-baagan-a iyo nosiro mongowaid nu koinginan nosiro musuat nu nokosurat so Buuk nu Kinoringan suat so iyo,” koo si Yisus.
Minomali' si Yisus nu lolaing sinorungan
(Mat 17:14-21; Luk 9:37-43a)
14Nokopululi' si Yisus om tolu mompomaid Niyo ri so mompomaid wokon-i, nosiou nosiro osuang lobuw om ongo moomontuduk nu Ukum mokimusiwal so nosiro. 15Nosiou-o po Iyo nu lobuw suang-i, noiranan nosiro, om mundako yo lumoga' dii so Iyo. 16Mongoduato yo Iyo so nosiro nu, “Onu ka pinuupokatan muyu om moomontuduk nu Ukum iiri?” koo.
17Sumombuto yo ido koyuwan kiat so nosiro nu, “Oo Guru, inowit ku anak ku iitu tuui so Ikau so' sinorungan nu moinat om nobobou sono. 18Bang sumoup-o iyo, mogilamba yo so tana' no, muputa-puta su kobang, muatip su nipon, om kumosig koyuwan niyo no. Minindamo aku yo so mompomaid Mu no nu iposusub ku moinat oono nga dai ya osusub,” koo.
19Tongaro yo ni Yisus nosiro nu, “Kou su lobuw kisala' dai poimaid. Dai Aku osanang mido-ido so kou, nga tinaanan Ku ya nu laid iiri. Owito yo lolaing mu no tuui!” koo. 20Owito yo sono nu lobuw iiri lolaing-i dii so Iyo.
Nosiou-o po nu moinat-i si Yisus, unggogo yo niyo lolaing-i sampai nogupol om muid-luid, om muputa-puta su kobang.
21Duato yo sono Niyo amo nu lolaing iiri nu, “Komuro yo ka kolaid lolaing oono soko itu?” koo.
Sumombuto yo amo ri nu, “Kiat po koworos. 22Dadan moinat oono posubo so iyo so apui om potuop so sungoi nu momatoi so iyo. Indadi bang kodapat Ko, luluudi om tobangi kai yo,” koo.
23Mutongaro yo si Yisus nu, “Onu tinangar mu ri? Ong kodapat Ko, k'ikau? Onu yo po ourug-a ong poimaid-a,” koo.
24Lumuapo yo amo ri nu, “Oo Tuhan! Poimaid aku, nga koimaidan ku owako po. Tobango aku yo su' sobana ko poimaid aku,” koo.
25Nosiou ni Yisus nu osuang sono lobuw muimpug, suuo yo Niyo moinat iiri nu, “Oo su moinat mongobongol om mongobobou, labus-o so lolaing iitu no, om ikod-o sono kipululi',” koo.
26Lumuapo yo moinat-i om unggogo yo niyo lolaing-i om lumobuso yo. Nosiou nosiro lolaing iiri nu soko bangkai, sampai nokoputangar nosiro nu, “Minatoi-o lolaing-o,” koo. 27Nga kuyuti yo ni Yisus longon nu lolaing-i om tuudo yo Niyo potungag, om tumungago yo sono.
28Nokouli' si Yisus, lumogaa yo mompomaid Niyo ri mongoduat nu, “Nokuro su dai mai nosusub moinat iiri?” koo.
29Sumombuto yo Iyo nu, “Moinat soko iri, dai osusub ong dai mogdu'a po laid,” koo si Yisus.
Ponuturanan koinduo ni Yisus suat so kopotoyan Niyo
(Mat 17:22-23; Luk 9:43-45)
30Mulaiwo yo sono si Yisus om mompomaid Niyo ri kiat dii, om lumombuso yo linumalan so Galilia. Dai Iyo moingin nu oilaan nu lobuw ong siombo Iyo, 31so' montuduk Iyo sono nu mompomaid Niyo ri nu, “Dai olaid ikomouli' Aku, Anak nu Riniba so kopogboya'an nu lobuw. Potoyon Aku, nga so kotolu no oluli'an Aku ya,” koo.
32Dai noorotian nosiro nituduk Niyo ri, nga dai kooku' nosiro mongoduat so Iyo.
Isai su oogot so ponokodan nu Kinoringan?
(Mat 18:1-5; Luk 9:46-48)
33Nokologa' yo sono nosiro so Kapornaum om dii so waloi-i, duato yo ni Yisus mompomaid Niyo ri nu, “Onu ka pinusisiwalan muyu sisuna so lolanon-i?” koo.
34Nga dai ya sinumambut nosiro so' minudodaawa nosiro so lolanon-i ong isai su oogot so nosiro.#Luk 22:24 35Mogomo yo si Yisus om paawo yo Niyo opulu om duo mompomaid Niyo ri, om mutongaro yo nu, “Lobuw moingin nu oogot po ko' kiawi' wokon, subai mugogoma'on suat so lobuw suang,” koo.#Mat 20:26-27; 23:11; Mrk 10:43-44; Luk 22:26 36Owito yo ni Yisus ido lolaing so tiningkuangon nosiro ri om koromi yo Niyo maid nu mutangar nu, 37“Isai monorima' nu lobuw soko lolaing iitu, so' poimaid so Aku, monorima' ya so Aku. Om lobuw monorima' so Aku, okon ko Aku ya su torima'on, nga monorima' po so Iyo ono minonuu' so Aku no,” koo si Yisus.#Mat 10:40; Luk 10:16; Yns 13:20
Isai dai lumawan so toko, nosiro yo su kouna'an toko
(Luk 9:49-50)
38Mutongaro yo si Yuanis so si Yisus nu, “Oo Guru! Nokosiou kai nu lobuw minonusub nu moinat mongorait nu ngaran Mu. Pinogos mai iyo, so' okon-a ko kiat so puimpugan toko,” koo.
39Nga sumombuto yo si Yisus nu, “Adang-o pogoson iyo, so' d'ado ido kopomaal nu koiran-iran mongorait nu ngaran Ku, om mongoraai-a sono so Aku. 40Om isai dai lumawan so toko, iyo yo su kouna'an toko.#Mat 12:30; Luk 11:23 41Ondomo muyu yo, isai poinum so kou so' moongowaid kou so Aku, Raja Nijanji nu Kinoringan, tantu kotorima' iyo nu tutungkap kiat so Kinoringan.#Mat 10:42
Gogoma'on koowit nu lobuw so koraayan
(Mat 18:6-9; Luk 17:1-2)
42Isai koowit-owit nu lobuw wokon momaal nu koraayan, oinsaadan. Owarong po korobotuan liou niyo no nu watu maayo om itobung so raat. 43Bang longon mu no su koowit so ikau momaal nu koraayan, totoko yo om odai. Owarong po sompopodi longon mongimaid so Kinoringan ko' duo nga kosubo so noraka. #Mat 5:30 [ 44So tontong oono yo dai matoi giuk, om apui-o dai moda'.]#9:44: Tinu-tinu solinan silaid-i noporuang nu ayat iitu. 45Bang akod mu no su koowit so ikau momaal nu koraayan, totoko yo om odai. Owarong po sompopodi akod mongimaid so Kinoringan ko' duo akod nga kosubo so noraka. [ 46So tontong oono yo dai matoi giuk, om apui-o dai moda'.]#9:46: Tinu-tinu solinan silaid-i noporuang nu ayat iitu. 47Sungkito om odai yo mato mu no nu koowit so ikau momaal nu koraayan. Owarong po sompopodi mato masuw so Pogkuosaan nu Kinoringan so surga, ko' duo maam mato nga kosubo so noraka.#Mat 5:29 48So tontong oono yo dai matoi giuk, om apui-o dai moda'.#Yis 66:24
49Kosonsora'an-o yo su poidu' nu koraayan kiat so lobuw poimaid, soko asin koimbarong nu ingkookan iri niusaa' so Kinoringan.
50Bang malo yo asin-o, d'ado yo sono kosudaan.#Mat 5:13; Luk 14:34-35
Soko ono ya pudi kou mompomaid Ku. Bang dadan kou mualod, ado yo sono kosudaan. Indadi, adang-o mualod, nga pususulut kou yo,” koo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.