Atos 3
3
Ca quep xio pin tocwa wari' co carama pe
1Maqui' ac ne na xec pain ca mama' cacain cote ne xiricon Iri' Jam Pedro con João. Piquirim pin na xina, pain 3 hora ma', mama' ac caca na. Wirico co ma' xina nucucun oro wari' pain ca tomi' taxipa' cocon Iri' Jam pain xiricon pane, je curucucun pane. 2Hwet xin iri nanain ne, wara an mamam' nonon wari' co carama pe ma'. Wara carama pe qui' nain ca xo' pan' qui' nucun pain ca pije' nucun. An mamam' an mamam', wara ca' na cote ne capijain manain xirim ca corom ac caca oro wari' ma', an terem' ac cocon na. Capijain Man Ca Awi ta na wixinain cote ne manain xirim ma'. Je curucucun pane, an mamam' an terem' taxipa' nonon pain i ma', pain oro xijein xec. Ma' ta xiram pa' xine, mi' xine pain dinheiro ta cocon oro wari' co corom xi' nana ma' nonon.
3Corom xin ca tao' caho' nein xiricon Iri' Jam ca' iri nana Pedro con João ne, querec pan ac cocon na co ma' co terem' pe nain i ma'. Xiram pa' xine, mi' xine pain dinheiro ta ac tococwa na.
4Noro tamana pan ac cocon na Pedro con João ma'. Noro xut ta ac con na Pedro.
5Noro ac tococwa na. Mi' tatarapa' xi' pain carawa ma tata.
6Tomi' ac con na Pedro: Om paxi' napa' dinheiro ta, ane na capa' pain ca ara mi' xim pain xijein carawa ne. Ara mi' xim pain, xi om ne ca ara mi' ron pain ara capa' Jeju co maqui' nain Nazaré pane ta. Tequi' pe ra e'. Xut ra ta. Ac i ma' na ca tomi' con ma'. 7Quep ac con na pain micon ma', pain iri' curucun ma'. An tequi' pe ac con na. Ane ane hwara' opa hap pin ac ne na caximacon pain caramacon quem. 8Tequi' pe hap ac ca na, xut pin ac ca na quem. Ja' ja' ac tococwa na pain ca corom mama' cacain xiricon Iri' Jam ma'. Xut in na, to' jao cun na pain ca tomi' querec te nucun quem. Awi tamana na Iri' Jam, awi tamana na Iri' Jam ta na ca tomi' nucun. 9Querec querec xam' nonon oro wari' ma', pain ca xut nucun ma'. Taraju nonon pain ca awi tamana na Iri' Jam ta ca ma' quem. 10Querec pin' nonon quem. Wirico xin co ma' co xao pe ho' e' nain Capijain Man Ca Awi pain xiricon Iri' Jam cara ne? Wirico xin co tama' xiram pa' xine, mi' xine pain dinheiro cara ne, ac i ma' na ca tomi' xucucun ma'. Cain' cain' xira ne ac xucucun na, wa wa ac caca na pain ca querec cacain carawa ca ara non co ma' co carama pe ira.
Ca pijim' cocon oro wari' Pedro
11Quep quep wet non Pedro con João co ma' co quep xio pin wa ma'. Wa wa xam' nonon oro wari' quem. Jein hwet ac tococwa na pain ca tacan tiquin' ne xiricon Iri' Jam pain cacarain ma', ca Maxicon Salomão caca oro wari' ma', je i ma' wixinain cocon. Jein jein hwet tata pain i ma'. 12Querec iri nonon oro wari' Pedro ma' ne, pain ca jein hwet cocon ma', tomi' ac cocon na: Para joc herehe ne tucuhu' pain ca querec hun co cwa', pain ca xut pin ca ca' oro win ma' ne pain ca wari' nein Israel iri' ca'? Para noro tamana maparut quem? To' xut totoron pain ca hwara' opa pan nucucun ma' maparut ra? To' xut totoron pain ca xuruxut xo' pan nucucun pain ca win xumu e' cacain ca param nucun Iri' Jam ma' maparut ra? 13Om na ta! Ca hwara' opa pan nucun Iri' Jam ta, co Iri' Jam ne caca hwanana nexi' cara pane, Abraão con Isaque con Jacó cara pane, wirico pan na co quep xio pin non wari' cwa', wirico co an hwet mi' nuhu' pain ca hwara' opa tamana nucun Jeju cara pane, co taramaja mi' taxipa' non pane. Quep jun Jeju ta huhun oro taramaxicon nuhu' pane, o mi' ac cocon na con taramaxicon Pilatos quem. Ma' ta to' pa' pin cocon oro soldado nem ta nonon pane. Om pin ton paxi' non Jeju Pilatos pane. Ane tomi' napat pan hun ne. Noc urut con ta hun. 14Iri' Wari' co wara tora' ca Iri' Jam paxi' na Jeju pane, pain ca to' witan roron oro wari' ta con pane. Tama' xut xo' paxi' na pane quem. Ane noc urut con ta hun Pilatos ne. Ta om pin mon me ta hun. Param urut con co ma' co to' pa' wari' ma', wirico tara co om pin ma ta hun. 15To' pa' pin iri nonon Jeju oro soldado ne, ac ca to' pa' pan hun na. To' pa' pin hun ma' ira! To' pa' pin hun co ma' co to' e' napari' cwa', co mi' xim napari' pain ca e' cara wa pain pawin ta. Ac i ma' paxi' hwe, ane to' e' mami' con Iri' Jam ne. Querec urut con pain ca e' mami' nucun quem. 16Wirico Jeju co to' xio pin non wari' cwa'. Querec hun. Querec pin' hun quem. Awi pin na, xut pin na, xi om ne ca howa ara urut con Jeju ta. Querec querec xam' hun ma' ira tata.
17Taxi' paxi' inuhu' ta xere ac tococwa na. Taxi' inonon oro taramaxicon nexi' pain ca judeu iri' ca' quem. Wirico paxi' na Jeju co wara tomi' pe pin ca Iri' Jam pane, ane om querec pin' hun ne. Je ca noc urut con ta hun pane. Je ca to' pa' pin hun quem. 18Wahu' paxi' na co to' pa' non pane. Ane ara pan cain ca wara tomi' pe nucun Iri' Jam ne. Ac i ma' na ca hwet pin ne capijacon ca xirao' to caca oro profeta pane. Jain jain tamana tara pain ca to' pa' pin tocwa Cristo ta na ca xirao' to cacain ca tomi' pe nucun Iri' Jam pane. 19Je ca tomi' xuhu' ca' ac tococwa na. Cwirin' pin je. Coromicat ni pin je. Howa jun Iri' Jam, ma' ta xic am pin cain ca caracat nuhu'. 20Ma' ta maqui' pa' cuhu' oro xec nein ca xao to wa ne xumuhu' con Taramaxicon nexi'. Ma' ta mam' mami' capari' con Jeju ma', co Cristo ma', co wara tora' ca pain ca taramaxicon pe ho' roron ta con pari'. 21Na e' na pain ca mon to wet cain pawin pain xocori ca'. Mon to wet mon to wet ca' tara, maqui' pa' ac con tara oro xec nein ca quep xocori pin tain cain oro carawa Iri' Jam. Win ne ca wara tomi' pe ca pain cara pane, pain ca tomi' hwet jujun pain ca tomi' ne oro wari' ta tococwa oro profeta nucun pane. 22Je ca wara tomi' pe ca Moisés cara pane. Ca' na con pane:
Main mi' turuhu' con profeta Taramaxicon Iri' Jam ma'.
An xiho' tarapa' pain ca profeta ta' ca'.
Iri' win ma' nuhu' tara.
Na e' na pain ca taraju wet hun.
Tomi' ha' jein oro ca tomi' nucun quem.
23Wari' co om tomi' ha' non ma', om ta wari' ne mami' cocon oro wari' nucun Iri' Jam.
Ac i ma' na ca wara tomi' pe ca Moisés pane.
24Tomi' ac i ma' tomi' ac i ma' xam' nana oro profeta pane. Samuel, oro xucucun profeta co maqui' nana pa'ao' quem, wara tomi' pe nanain oro carawa ca ara napari' pain oro xec nexi' ca'. 25Oro ca tomi' pe nucun Iri' Jam ca an xin tiquin' mi' caca oro profeta pane, je ca tomi' pe pan capari' Iri' Jam quem. Wahu', warut, ca' iri', tomi' pan napari' cocon. Capijacon ca tomi' an pe xo' mi' cocon hwanana nexi' pain ca tomi' qui' con Abraão cara pane, wari' pan co tomi' ca quem. Ca' na ca tomi' con pane: Aram aram ma' pin iri tara winam cocon waram winam con panxima ne, mi' ac ton tara pain ca ara mi' cocon pain ca awi tamana wa oro wari' pain oro xijein macan'. Ac i ma' na ca wara tomi' pe con Abraão Iri' Jam pane.
26Je ca tomi' xuhu' ca' ac tococwa na. Iri' Jam ma', mam' napari' con Jeju co tama' taramaja mi' non pane. Mam' cain' napari' con pain ca judeu iri' ca'. Ma' ta ara mi' momon pain oro ca awi wa ta non pari'. Ma' ta cwirin' cwirin' pi' pin cacain oro ca caracat nucucun pum ta non pari'. Ac i ma' na ca pijim' cocon oro wari' Pedro pane.
Currently Selected:
Atos 3: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
