Atos 4
4
Ca quep cocon Pedro con João oro taramaxicon
1Pijim' pijim' wet nonon oro wari' Pedro con João ma', maqui' ac caca na oro sacerdote#4.1 Oro sacerdote ma', taramaja to nanain cote ne xiricon Iri' Jam. Tomi' mi' nonon con Iri' Jam oro wari', tom tain' mi' nonon pain carawa nucucun quem. cocon taramaxicon nucucun oro guarda co querec wet nanain cote ne xiricon Iri' Jam ma', cocon oro saduceu#4.1 Oro saduceu ma', om ca howa xo' caca. Om ca e' mami' xi' caca oro wari' co cono' nana ta nana. ma' quem, hwet ac cocon na Pedro con João. 2Mana' tamana nana. Om ca hohot camain' cocon ca pijim' nucun Pedro con João ma'. Xi pijim' ca' ara caca: Main e' mami' tatara oro wari' co wara cono' nana ta. Win ne ca e' mami' ca Jeju cara pane, ac i ma' paxi' na ca pijim' nucucun. Ane om hohot pan cocon oro sacerdote cocon oro win ma' caca ma' ne. 3Je ca quep tococwa ma'. Tao' to ac tococwa na pain xirinain ca tao' to tao' to to wa ma'. Xec pa' totoron e' ac tococwa na. Xi xo' um pin ara ne cocon ta nana. 4Ane howa mija caca co taraju nanain ca pijim' nucun Pedro con João ne. Mija pin nana co howa nonon Jeju. Ac ca hwet pin nein na ca 5.000 nucucun pain ca tarama' nucucun.
5Xec pin iri na ne, cut in ac xucucun na oro taramaxicon. Oro taramaxicon nucucun oro judeu ma', cocon oro co ca' na taxipa' nanain ca xirao' nucun Moisés ma' quem, cut in to ac xucucun na pain Jerusalém. 6Ma' na sacerdote co iri' taramaxicon ma' quem, wirico Anás ma'. Ma' na Caifás con João con Alexandre, ma' nana oro xucucun co nari nonon Anás ma' quem. Cut in ac xucucun na. 7O corom qui' jujun ta ac tococwa na oro guarda ma', o corom qui' ac tococwa na Pedro con João. Coco' to jein i ma' ta ac tococwa na, tomi' querec ac tococwa na: Cain' cain' hun ne? Ma' co mi' nuhu' pain ca hwara' opa nuhu' pain ca quep xio pin hun quem? Ma' wixi ca an hwet hwe pain ca quep xio pin hun ma' quem? Ac i ma' na ca tomi' querec tococwa ma'.
8Tomi' ac ca na Pedro. Pe ho' mip non Tamataracon Iri' Jam, tomi' ac tococwa na: Tomi' xim inuhu' ta oro taramaxicon. Tomi' xim inuhu' pain ca taramaxicon to ho' maparut pain ca judeu iri' ca' quem. 9Tomi' querec maparut pain ca quep xiho' urut con co cwa' co carama pe ira. Cain' ca quep xio pin ac hun ma' quem maparut. 10Je ca tomi' urut pahu' ca', taraju pa' jein ca tomi' urut pahu' ca'. Taraju pa' taraju pa' pi' pin tatara oro win ma' nexi' pain ca wari' nein Israel iri' quem. Xio pin na wari' cwa', co xat ja' pan nuhu' cwa'. Ca hwara' opa nucun Jeju Cristo co maqui' nain Nazaré pane, je i ma' pan na ca to' xio pin non ma'. Tatatain mi' paxi' hun pain pana pane, ane to' e' mami' con Iri' Jam ne. 11Wirico Jeju co tomi' mi' ne capijacon Iri' Jam pane:
Pacun ca noc hwe pane, pain ca quep xin paxi' hwein xirim pane,
aram aram iri' pacun nein xirim pin na ta.
Ac i ma' na ca tomi' ne capijacon Iri' Jam con Jeju pane#4.11 Je ca tomi' ne capijacon Iri' Jam pain Salmo 118.22. Tomi' mi' tata oro taramaxicon cocon oro co ca' na taxipa' nanain ca xirao' nucun Moisés. Wiricoco nana co an xiho' nonon co quep xin paxi' nanain xirim. Jeju ma' iri na ne, wirico co an xiho' nain pacun ca mam' quep xine xirim. . 12Je ca tomi' xuhu' ca' ac tococwa na. Xica' pe na Jeju co to' witan taxi' napari'. Om na xucun co to' witan roron oro wari' ta ca Iri' Jam pari', om om na pain oro xijein macan' pain pira quem. Xica' pe na Jeju co to' witan taxi' napari'. Ac i ma' na ca pijim' cocon oro taramaxicon Pedro ma'.
13In ac nonon Pedro con João oro taramaxicon ma'. Xi querec pin' ara cocon pain ca om tomi' jin' nucucun ta. Querec pin' nonon pain ca om taraju pa' homa caca, querec pin' nonon pain ca om ca' na xo' tococwa pain oro ca ca' na wa. Querec pin' nonon pain ca taxipa' cocon Jeju quem. 14Hehe e' nana. Tomi' in pin xun paxi' nonon, ane om tomi' in pin ac cocon ne. Xi querec ara cocon co to' xio pin wa ma'. Xat pe nain i ma', xat pe ho' non Pedro con João. 15Je ca cut hwerehwet to ca' jujun pain ca cut in to nuxut pain ca Sinédrio urut ca' tococwa oro guarda#4.15 Ma' 70 nana oro taramaxicon co cut in nana. Sinédrio nonon oro wari' pain ca cut in xucucun. Ma' na iri' taramaxicon nucucun oro sacerdote, ma' nana oro xucucun taramaxicon nucucun oro sacerdote ma' quem, ma' nana oro fariseu cocon oro saduceu ma' quem. Ac juiz nana, taraju nonon oro wari' co tomi' em' nonon oro win ma' caca, tomi' mi' tomi' mi' ac tococwa na pain ca wap wa oro wari' co em' nana quem.. Cut hwerehwet mama' iri tata ne, tomi' xo' ac xucucun na oro taramaxicon. 16Cain' cain' xuxun quem? Xi taxi' ara tococwa pain ca ara cacain carawa ca om ara taxi' ne ca wari' wa ta. In ac in ac xam' nonon pain oro wari' co to nanain Jerusalém ca'. Om ca mixein nana ta ac xuxun ta. 17Na e' na pain ca tomi' jin' xuxun. Tomi' mip ca' xuxun: Ta pijim' hwet mami' huhun con Jeju oro wari' me ta xuxun. Ma' ta om wawaran mama' ne ca pijim' nucucun, ma' ta om taraju taraju tiquin' caca oro wari' ta xuxun ta. Ac i ma' na ca tomi' xo' nucucun oro taramaxicon ma'.
18Cut corom qui' jujun ta ac tococwa na oro guarda, corom qui' ac ca na Pedro con João. Tomi' mip ac tococwa na: Ta an hwet camain' hwein wixicon Jeju pain ca pijim' huhun oro wari' me. Ta ca' na camain' huhun pain ca tomi' nucun quem me tata.
19Ane tomi' pan caca ne: Cain' cain' xuxut quem? Tomi' in pin xut con Iri' Jam pain ca tomi' ha' xut pahu' ra? Hohot toron Iri' Jam pain ca tomi' in pin xut con ra? Cain' cain' xuxut quem? Tomi' xut e'. 20Xi tacana to taxi' urut ta. Om ca tacana to ac urut. Om ca pijim' hwet maho' ac urut pain oro ca querec urut pane, om ca pijim' hwet maho' ac urut pain oro ca taraju urut pane. Ac i ma' na ca tomi' tococwa ma'.
21Tomi' mip mami' pan ac cocon na oro taramaxicon. Ma' ta jin' cacapari' ta nana. Pa hwerehwet ac cocon na, mama' je ta ac cocon na. Om ca wap ac tococwa, xi jin' ara tococwa oro wari' ta. In ac tamana nonon Iri' Jam oro wari' pain ca querec cacain ca ara nucun Pedro con João ma'. 22Xi wara hwana ara ca wari' co quep xio pin wa pain ca ara an hwet mi' tocwa pain ca hwara' opa nucun Jeju ta. Wara tiquin' ca' nain ca 40 ne cawaxi' nucun quem.
Ca tomi' cocon Iri' Jam co howa nonon Jeju
23Pa hwerehwet iri tata Pedro con João ne, maji in hwet xuxun oro win ma' nexi' ta ac caca na, in hwet ac cocon na. Tomi' hwet tomi' hwet pi' pin ac cocon na pain oro ca tomi' nucucun oro taramaxicon nucucun oro sacerdote cocon oro taramaxicon nucucun oro judeu. 24Taraju iri tata ne, tomi' xun Cotere' Iri' Jam ta ac caca na, tomi' ac cocon na. Ac ca xica' pe ne na ximicocon pain ca tomi' cocon ma'. Tomi' ca' nonon: Taramaxicon nuxut ac cocon na. Wum co quep nain pawin je macan' je oro com ca'. Quep quep pi' pin main oro carawa ca to nain quem. 25Wum co mi' non pain ca tomi' wa hwanana nuxut Davi cara pane, co taramaja mi' nem pane. Je Tamataram ca mi' non pain. Tomi' ca' ron ta non pane:
Para mana' caca oro wari' co om judeu nana quem?
Para coromicat an to xo' ximama' caca oro wari' nein Israel ma' quem, pain ca ari xun cocon Taramaxicon ne quem?
26Mixita xi' nana oro taramaxicon nucucun oro wari' cwa'.
Wara cut in xucucun.
Maji mixita xun Taramaxicon Iri' Jam.
Maji mixita xun Cristo ta xucucun.
Ac i ma' na ca tomi' ca hwanana nuxut Davi cara pane ta Coturut Iri' Jam.
27Iri'o' na quem Taramaxicon nuxut ac cocon na. Cut in xucucun oro taramaxicon pain Jerusalém pane. Wirico Herodes con Pôncio Pilatos cocon oro win ma' nuxut pain ca judeu urut ca', cocon oro wari' co om judeu nana ma' quem, cut in xucucun pane. Tomi' xo' ac xucucun na con Panxima Jeju co tora' ma pane, co win xumu nem pain ca tama' tomi' ha' quem pane. To' pa' pin xun ta ac xucucun na. 28Pain ca tomi' xo' xucucun pain ca to' pa' pin xun cocon pane, ara e' nanain ca wara coromicat an pe xo' pan nem pane. Xi om ne ca hwara' opa pan ara ma ta. Wum co param mi' nonon pain, om ca tomi' caho' momon pain ca to' pa' pin cocon Panxima pane.
29Je ca tomi' urut pum ca' Taramaxicon nuxut ac cocon na. Taraju wet roron pain ca tomi' mip cacaparut pain ca tomi' jin' xuxun paxi' cacaparut ca'. Mi' xut pain ca om pijim' jin' wa pain ca taramaja mi' urut pum ca'. Mi' xut pain ca pijim' hwara' opa urut pain capijam. 30An hwet rain ca hwara' opa nem quem. Ma' ta quep xio pin tococwa wari' co caxi nana. An hwet iri xut pain wixicon Jeju co win xumu nem pain ca tama' tomi' ha' quem ne, ara an hwet pe ac main tara oro ca hwara' opa nem quem. In ac ac quequem tara oro wari' quem, ac i ma' na ca tomi' cocon Iri' Jam pane.
31Pi' pin iri na ca tomi' cocon Iri' Jam ne, cocoroc ac ne na xirim ca cut in to xucucun ma'. Pe ho' mip pe ho' mip xam' ac cocon na Tamataracon Iri' Jam. Pijim' hwet ac cacain na capijacon quem. Om ca pijim' jin' camain' cacain.
Ca cut mi' caracan xucucun pain oro caramaxicocon
32Oro wari' co howa nonon Jeju ma', an xiho' xucucun pain ca coromicat nucucun. Ac ca xica' pe ne na oro ximicocon quem. Om ca narain ho' xucucun pain caramaxicocon. Om ca ma' camain' caca co xica' pe pan ta' pain caramaju ca' caca ma', om na. Mi' caracan mi' caracan xam' xucucun pain oro caramaxicocon. 33Pijim' hwara' opa tamana nana oro apóstolo pain ca pijim' pijim' tiquin' cacain ca e' mami' nucun Taramaxicon nexi' Jeju. Iri' Jam ma', quep xiho' tamana nonon co howa nonon Jeju ma' quem. Quep xiho' quep xiho' pi' pin nonon. 34Om ca ma' xica' pe camain' ca win ma' caca co ximin ma', co om non carawa ma'. Xi ma' ara caca oro win howa caca co ma' nonon xirim je macan' ta. Vender ho' vender ho' ac cacain na, cut cut ac cacain na dinheiro nein ma', 35wara ca' nana oro apóstolo ma', cut mi' ac tococwa pain na. Ma' ma' iri nana co om nonon carawa ne, cut mi' cut mi' xam' ac tococwa pain na quem.
36Ac i ma' na José ma', co maqui' nain xixi pan nein macan' Chipre ma'. Levita na José, xi iri' hwanana ne ara con Levi cara pane#4.36 Taramaja to nanain cote ne xiricon Iri' Jam oro levita pane. Quep xiho' nonon oro sacerdote. Iri' hwanana ne nonon Levi panxica Jacó cara pane. Je ca oro levita tococwa ma'. . O' ma' ni nonon oro apóstolo ma' quem. Barnabé nonon pain capijacocon. Wari' co ja' tomi' querec taxi' ta na ca tomi' mao ne xijein wixicon ca' quem. 37Barnabé ma', ma' non cote ne xitot. Vender ac cain na, cut ac cain na dinheiro nein. Cut mi' ac tococwa na pain oro apóstolo ma'. Cut mi' jujun pain oro xerexi' co om nonon carawa ta tata quem.
Currently Selected:
Atos 4: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
Atos 4
4
Ca quep cocon Pedro con João oro taramaxicon
1Pijim' pijim' wet nonon oro wari' Pedro con João ma', maqui' ac caca na oro sacerdote#4.1 Oro sacerdote ma', taramaja to nanain cote ne xiricon Iri' Jam. Tomi' mi' nonon con Iri' Jam oro wari', tom tain' mi' nonon pain carawa nucucun quem. cocon taramaxicon nucucun oro guarda co querec wet nanain cote ne xiricon Iri' Jam ma', cocon oro saduceu#4.1 Oro saduceu ma', om ca howa xo' caca. Om ca e' mami' xi' caca oro wari' co cono' nana ta nana. ma' quem, hwet ac cocon na Pedro con João. 2Mana' tamana nana. Om ca hohot camain' cocon ca pijim' nucun Pedro con João ma'. Xi pijim' ca' ara caca: Main e' mami' tatara oro wari' co wara cono' nana ta. Win ne ca e' mami' ca Jeju cara pane, ac i ma' paxi' na ca pijim' nucucun. Ane om hohot pan cocon oro sacerdote cocon oro win ma' caca ma' ne. 3Je ca quep tococwa ma'. Tao' to ac tococwa na pain xirinain ca tao' to tao' to to wa ma'. Xec pa' totoron e' ac tococwa na. Xi xo' um pin ara ne cocon ta nana. 4Ane howa mija caca co taraju nanain ca pijim' nucun Pedro con João ne. Mija pin nana co howa nonon Jeju. Ac ca hwet pin nein na ca 5.000 nucucun pain ca tarama' nucucun.
5Xec pin iri na ne, cut in ac xucucun na oro taramaxicon. Oro taramaxicon nucucun oro judeu ma', cocon oro co ca' na taxipa' nanain ca xirao' nucun Moisés ma' quem, cut in to ac xucucun na pain Jerusalém. 6Ma' na sacerdote co iri' taramaxicon ma' quem, wirico Anás ma'. Ma' na Caifás con João con Alexandre, ma' nana oro xucucun co nari nonon Anás ma' quem. Cut in ac xucucun na. 7O corom qui' jujun ta ac tococwa na oro guarda ma', o corom qui' ac tococwa na Pedro con João. Coco' to jein i ma' ta ac tococwa na, tomi' querec ac tococwa na: Cain' cain' hun ne? Ma' co mi' nuhu' pain ca hwara' opa nuhu' pain ca quep xio pin hun quem? Ma' wixi ca an hwet hwe pain ca quep xio pin hun ma' quem? Ac i ma' na ca tomi' querec tococwa ma'.
8Tomi' ac ca na Pedro. Pe ho' mip non Tamataracon Iri' Jam, tomi' ac tococwa na: Tomi' xim inuhu' ta oro taramaxicon. Tomi' xim inuhu' pain ca taramaxicon to ho' maparut pain ca judeu iri' ca' quem. 9Tomi' querec maparut pain ca quep xiho' urut con co cwa' co carama pe ira. Cain' ca quep xio pin ac hun ma' quem maparut. 10Je ca tomi' urut pahu' ca', taraju pa' jein ca tomi' urut pahu' ca'. Taraju pa' taraju pa' pi' pin tatara oro win ma' nexi' pain ca wari' nein Israel iri' quem. Xio pin na wari' cwa', co xat ja' pan nuhu' cwa'. Ca hwara' opa nucun Jeju Cristo co maqui' nain Nazaré pane, je i ma' pan na ca to' xio pin non ma'. Tatatain mi' paxi' hun pain pana pane, ane to' e' mami' con Iri' Jam ne. 11Wirico Jeju co tomi' mi' ne capijacon Iri' Jam pane:
Pacun ca noc hwe pane, pain ca quep xin paxi' hwein xirim pane,
aram aram iri' pacun nein xirim pin na ta.
Ac i ma' na ca tomi' ne capijacon Iri' Jam con Jeju pane#4.11 Je ca tomi' ne capijacon Iri' Jam pain Salmo 118.22. Tomi' mi' tata oro taramaxicon cocon oro co ca' na taxipa' nanain ca xirao' nucun Moisés. Wiricoco nana co an xiho' nonon co quep xin paxi' nanain xirim. Jeju ma' iri na ne, wirico co an xiho' nain pacun ca mam' quep xine xirim. . 12Je ca tomi' xuhu' ca' ac tococwa na. Xica' pe na Jeju co to' witan taxi' napari'. Om na xucun co to' witan roron oro wari' ta ca Iri' Jam pari', om om na pain oro xijein macan' pain pira quem. Xica' pe na Jeju co to' witan taxi' napari'. Ac i ma' na ca pijim' cocon oro taramaxicon Pedro ma'.
13In ac nonon Pedro con João oro taramaxicon ma'. Xi querec pin' ara cocon pain ca om tomi' jin' nucucun ta. Querec pin' nonon pain ca om taraju pa' homa caca, querec pin' nonon pain ca om ca' na xo' tococwa pain oro ca ca' na wa. Querec pin' nonon pain ca taxipa' cocon Jeju quem. 14Hehe e' nana. Tomi' in pin xun paxi' nonon, ane om tomi' in pin ac cocon ne. Xi querec ara cocon co to' xio pin wa ma'. Xat pe nain i ma', xat pe ho' non Pedro con João. 15Je ca cut hwerehwet to ca' jujun pain ca cut in to nuxut pain ca Sinédrio urut ca' tococwa oro guarda#4.15 Ma' 70 nana oro taramaxicon co cut in nana. Sinédrio nonon oro wari' pain ca cut in xucucun. Ma' na iri' taramaxicon nucucun oro sacerdote, ma' nana oro xucucun taramaxicon nucucun oro sacerdote ma' quem, ma' nana oro fariseu cocon oro saduceu ma' quem. Ac juiz nana, taraju nonon oro wari' co tomi' em' nonon oro win ma' caca, tomi' mi' tomi' mi' ac tococwa na pain ca wap wa oro wari' co em' nana quem.. Cut hwerehwet mama' iri tata ne, tomi' xo' ac xucucun na oro taramaxicon. 16Cain' cain' xuxun quem? Xi taxi' ara tococwa pain ca ara cacain carawa ca om ara taxi' ne ca wari' wa ta. In ac in ac xam' nonon pain oro wari' co to nanain Jerusalém ca'. Om ca mixein nana ta ac xuxun ta. 17Na e' na pain ca tomi' jin' xuxun. Tomi' mip ca' xuxun: Ta pijim' hwet mami' huhun con Jeju oro wari' me ta xuxun. Ma' ta om wawaran mama' ne ca pijim' nucucun, ma' ta om taraju taraju tiquin' caca oro wari' ta xuxun ta. Ac i ma' na ca tomi' xo' nucucun oro taramaxicon ma'.
18Cut corom qui' jujun ta ac tococwa na oro guarda, corom qui' ac ca na Pedro con João. Tomi' mip ac tococwa na: Ta an hwet camain' hwein wixicon Jeju pain ca pijim' huhun oro wari' me. Ta ca' na camain' huhun pain ca tomi' nucun quem me tata.
19Ane tomi' pan caca ne: Cain' cain' xuxut quem? Tomi' in pin xut con Iri' Jam pain ca tomi' ha' xut pahu' ra? Hohot toron Iri' Jam pain ca tomi' in pin xut con ra? Cain' cain' xuxut quem? Tomi' xut e'. 20Xi tacana to taxi' urut ta. Om ca tacana to ac urut. Om ca pijim' hwet maho' ac urut pain oro ca querec urut pane, om ca pijim' hwet maho' ac urut pain oro ca taraju urut pane. Ac i ma' na ca tomi' tococwa ma'.
21Tomi' mip mami' pan ac cocon na oro taramaxicon. Ma' ta jin' cacapari' ta nana. Pa hwerehwet ac cocon na, mama' je ta ac cocon na. Om ca wap ac tococwa, xi jin' ara tococwa oro wari' ta. In ac tamana nonon Iri' Jam oro wari' pain ca querec cacain ca ara nucun Pedro con João ma'. 22Xi wara hwana ara ca wari' co quep xio pin wa pain ca ara an hwet mi' tocwa pain ca hwara' opa nucun Jeju ta. Wara tiquin' ca' nain ca 40 ne cawaxi' nucun quem.
Ca tomi' cocon Iri' Jam co howa nonon Jeju
23Pa hwerehwet iri tata Pedro con João ne, maji in hwet xuxun oro win ma' nexi' ta ac caca na, in hwet ac cocon na. Tomi' hwet tomi' hwet pi' pin ac cocon na pain oro ca tomi' nucucun oro taramaxicon nucucun oro sacerdote cocon oro taramaxicon nucucun oro judeu. 24Taraju iri tata ne, tomi' xun Cotere' Iri' Jam ta ac caca na, tomi' ac cocon na. Ac ca xica' pe ne na ximicocon pain ca tomi' cocon ma'. Tomi' ca' nonon: Taramaxicon nuxut ac cocon na. Wum co quep nain pawin je macan' je oro com ca'. Quep quep pi' pin main oro carawa ca to nain quem. 25Wum co mi' non pain ca tomi' wa hwanana nuxut Davi cara pane, co taramaja mi' nem pane. Je Tamataram ca mi' non pain. Tomi' ca' ron ta non pane:
Para mana' caca oro wari' co om judeu nana quem?
Para coromicat an to xo' ximama' caca oro wari' nein Israel ma' quem, pain ca ari xun cocon Taramaxicon ne quem?
26Mixita xi' nana oro taramaxicon nucucun oro wari' cwa'.
Wara cut in xucucun.
Maji mixita xun Taramaxicon Iri' Jam.
Maji mixita xun Cristo ta xucucun.
Ac i ma' na ca tomi' ca hwanana nuxut Davi cara pane ta Coturut Iri' Jam.
27Iri'o' na quem Taramaxicon nuxut ac cocon na. Cut in xucucun oro taramaxicon pain Jerusalém pane. Wirico Herodes con Pôncio Pilatos cocon oro win ma' nuxut pain ca judeu urut ca', cocon oro wari' co om judeu nana ma' quem, cut in xucucun pane. Tomi' xo' ac xucucun na con Panxima Jeju co tora' ma pane, co win xumu nem pain ca tama' tomi' ha' quem pane. To' pa' pin xun ta ac xucucun na. 28Pain ca tomi' xo' xucucun pain ca to' pa' pin xun cocon pane, ara e' nanain ca wara coromicat an pe xo' pan nem pane. Xi om ne ca hwara' opa pan ara ma ta. Wum co param mi' nonon pain, om ca tomi' caho' momon pain ca to' pa' pin cocon Panxima pane.
29Je ca tomi' urut pum ca' Taramaxicon nuxut ac cocon na. Taraju wet roron pain ca tomi' mip cacaparut pain ca tomi' jin' xuxun paxi' cacaparut ca'. Mi' xut pain ca om pijim' jin' wa pain ca taramaja mi' urut pum ca'. Mi' xut pain ca pijim' hwara' opa urut pain capijam. 30An hwet rain ca hwara' opa nem quem. Ma' ta quep xio pin tococwa wari' co caxi nana. An hwet iri xut pain wixicon Jeju co win xumu nem pain ca tama' tomi' ha' quem ne, ara an hwet pe ac main tara oro ca hwara' opa nem quem. In ac ac quequem tara oro wari' quem, ac i ma' na ca tomi' cocon Iri' Jam pane.
31Pi' pin iri na ca tomi' cocon Iri' Jam ne, cocoroc ac ne na xirim ca cut in to xucucun ma'. Pe ho' mip pe ho' mip xam' ac cocon na Tamataracon Iri' Jam. Pijim' hwet ac cacain na capijacon quem. Om ca pijim' jin' camain' cacain.
Ca cut mi' caracan xucucun pain oro caramaxicocon
32Oro wari' co howa nonon Jeju ma', an xiho' xucucun pain ca coromicat nucucun. Ac ca xica' pe ne na oro ximicocon quem. Om ca narain ho' xucucun pain caramaxicocon. Om ca ma' camain' caca co xica' pe pan ta' pain caramaju ca' caca ma', om na. Mi' caracan mi' caracan xam' xucucun pain oro caramaxicocon. 33Pijim' hwara' opa tamana nana oro apóstolo pain ca pijim' pijim' tiquin' cacain ca e' mami' nucun Taramaxicon nexi' Jeju. Iri' Jam ma', quep xiho' tamana nonon co howa nonon Jeju ma' quem. Quep xiho' quep xiho' pi' pin nonon. 34Om ca ma' xica' pe camain' ca win ma' caca co ximin ma', co om non carawa ma'. Xi ma' ara caca oro win howa caca co ma' nonon xirim je macan' ta. Vender ho' vender ho' ac cacain na, cut cut ac cacain na dinheiro nein ma', 35wara ca' nana oro apóstolo ma', cut mi' ac tococwa pain na. Ma' ma' iri nana co om nonon carawa ne, cut mi' cut mi' xam' ac tococwa pain na quem.
36Ac i ma' na José ma', co maqui' nain xixi pan nein macan' Chipre ma'. Levita na José, xi iri' hwanana ne ara con Levi cara pane#4.36 Taramaja to nanain cote ne xiricon Iri' Jam oro levita pane. Quep xiho' nonon oro sacerdote. Iri' hwanana ne nonon Levi panxica Jacó cara pane. Je ca oro levita tococwa ma'. . O' ma' ni nonon oro apóstolo ma' quem. Barnabé nonon pain capijacocon. Wari' co ja' tomi' querec taxi' ta na ca tomi' mao ne xijein wixicon ca' quem. 37Barnabé ma', ma' non cote ne xitot. Vender ac cain na, cut ac cain na dinheiro nein. Cut mi' ac tococwa na pain oro apóstolo ma'. Cut mi' jujun pain oro xerexi' co om nonon carawa ta tata quem.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil