Atos 5
5
Ananias cam Safira
1Ane ma' ca co ma' ne, Ananias ma', je i ma' wixicon. Safira na wixicam manacon. Ma' nanam macan' quem. Vender ac cacamain na. 2Pe ho' cara tarapa' tamain dinheiro nein ca', cut mi' e' toton pain pawirinain ca' quem ac xucun na, mo hwet ac tococwa na oro apóstolo ma', cut mi' ac tococwa pain na. Taxi' non manacon pain ca pe ho' cara con tamain dinheiro nein quem.
3Tomi' querec pan ac con na Pedro: Para om ari mon Caxicon Jam pain ca quep mip xim quem ma', pain ca mixein rain Tamataracon Iri' Jam quem ma' Ananias? Xi pe ho' cara ara quem tamain dinheiro ca cut ma pain macaram ta. 4Om ca mene main pain ca om vender querec main ra? Mene main ma' ira. Vender pin iri main ne, om ca mene main dinheiro nein quem ra? Mene main quem. Mo xi pe ho' pi' pin tarapa' ta main, je xi om mi' qui' maparut pain? Cain' cain' xima quem? Para wara coromicat an pe xo' main ca mixein wa ma', pain ca mixein toton maparut ma' quem? Om ca warut ne co mixein ma ma'. Mixein mon Iri' Jam ta. Ac i ma' na ca tomi' con ma'.
5Taraju iri nain i ma' Ananias ma' ne, ane ane mi' pin ac ca na. Mi' pin na, jao hot mao ac ca na. Oro wari' ma', taxi' iri nonon pain ca mi' pin nucun ma' ne, jin' tamana ac caca na. 6Maqui' ac caca na co xo' hwara' nana, wiric pa' ac cacain na curucun, an mamam' hwet mao ac cacain na, an corom pe pin ac cacain na pain manain pacun quem.
7Amon pawin iri na xina ne, ac ca 3 pin ne na hora nein ca mi' pin nucun Ananias ma', corom qui' ac cama na manacon. Om ca taxi' con taxicam pain ca mi' pin nucun. 8Tomi' querec ac cam na Pedro: Cain' ca ma' ne dinheiro ca cut hwe pain macarahu' ma' quem? Ac i ca' mao na cwerein? Tomi' ho' ne ta, ac i ma' na ca tomi' querec cam ma'.
E'e', ac i ma' mao na parut ta ac con na.
9Para tomi' xo' xujuhu' pain ca mixein querec xin hwein Tamataracon Taramaxicon nexi' quem ac cam na. Taraju ra e'. Maqui' pin nana co an corom pe nanain pain manain pacun curucun taxim cara ne. Wiricoco paca' ira. Hwet pin nanain manain xirim ca'. An mamam' mao teterem quem ac cam na.
10Ane ane mi' pin ac cama na cam ma' quem. Mi' pin na, jao hot hwet ac con na pain caximacon Pedro ma'. Corom qui' iri nana co xo' ho' tarama' nana cara ne ne, querec iri nanam pain ca mi' pin cama ma' ne, an mamam' hwet mao ac cacain na cwerequem. An corom pe ac cacain na pain manain pacun pain xijein cacaracon taxicam quem. 11Jin' jin' pi' pin ac caca na co howa nonon Jeju ma'. Oro wari' co taraju nanam pain ca cono' pin nequequem ma', jin' jin' pi' pin ac caca na quem.
Ca quep xio pin tococwa oro wari' co caxi nana
12Oro apóstolo ma', an hwet tamana nanain ca hwara' opa nucun Iri' Jam pain ca ara cacain oro ca om ara taxi' ne ca wari' wa pane. Wa wa tamana nonon oro wari' co to nanain Jerusalém ma'. Co howa nana ma', cut in to cut in to pi' pin xucucun pain ca tacan tiquin' ne xiricon Iri' Jam pain cacarain ma', ca Maxicon Salomão caca oro wari' ma', je i ma' wixinain cocon. Ac ca xica' pe ne na ximicocon pain ca cut in xucucun ma'. 13Oro xucucun wari' co om howa nana ma', tomi' querec te paxi' nonon co howa nana ma' quem. Awi tamana nana ta paxi' nonon, ane jin' pan caca ne. Jin' nana pain ca jao jao ma' xuxun cocon ma'. 14Ane ma' caca co howa pin nana ne. Mija nana, ca tarama' nucucun, ca narima' nequequem ma' quem, aram aram mija pin ac cacama na pain ca howa pin cocon Taramaxicon nexi'. Win ma' ne pin xut pahu' pain ca howa hwe ma' ac tococwa na oro xucucun co wara howa nana ma'. 15Oro apóstolo ma', an hwet tamana nanain ca hwara' opa nucun Iri' Jam pain ca ara cacain oro ca om ara taxi' ne ca wari' wa pane. Maji cut mama' xuxun co caxi nana cwa' ac caca na oro wari' ma', an mamam' an to ac tococwa na pain wana. An toco' to tata pain caji tapit je wi. Ma' ta quep xio cocon Pedro ta na ca coromicat nucucun. Am om na con pain ca quep cocon ma', am na e' con pain ca to' xio quiji' cocon jamicon pain ca aram aram xut tiquin' ca' cocon ca', ac i ma' na ca coromicat nucucun. 16Mija nana wari' co maqui' nanain oro xijein cidade ca to ja' pan nain Jerusalém ma' quem. O qui' tata oro win ma' caca co caxi nana ma'. Cut qui' tata co jain jain nana pain ca corom to ho' cocon caxicon jam quem. Quep xio quep xio pi' pin ac tococwa na.
Ca quep em' tococwa oro apóstolo
17Mana' ac ca na sacerdote co iri' taramaxicon, cocon oro win ma' ca ma', co saduceu nana ma'. Noc tamana tata oro apóstolo, xi om caca oro wari' co tomi' querec te pan nonon ta. 18Je ca quep jujun ta tococwa oro guarda. Quep ac tococwa na, tao' to pin ac tococwa na pain xirinain ca tao' to tao' to to wa ma'. 19Tao' to paxi' tata. Ane maqui' cain xim jam co taramaja mi' non Taramaxicon nexi' ne. Pa pin nain oro manain xirinain ca tao' to tao' to to wa ma', o hwerehwet qui' ac tococwa na quem. Tomi' ac tococwa na: 20Mama' jein ca tao' caho' nein cote ne xiricon Iri' Jam ta. Pijim' jujun oro wari' ma', tomi' hwet jujun pain ca mi' toton cocon pain ca om pi' ra ha' ne ca e' wa Iri' Jam ta. Ac i ma' na ca tomi' cocon jam co taramaja mi' non Taramaxicon nexi'.
21Xec pin iri na ne, corom mama' ac cacain na ca tao' caho' nein cote ne xiricon Iri' Jam. Pijim' ac cocon na oro wari'. Win ne ca tomi' capari' jam co taramaja mi' non Taramaxicon nexi' ne nana.
Sacerdote co iri' taramaxicon ma', cocon oro win ma' ca ma' quem, wara tomi' cut in nonon oro win taramaxicon caca pain ca Sinédrio caca ma'. Tomi' ac tococwa na oro guarda co taramaja to nanain cote ne xiricon Iri' Jam: Mama' jein xirinain ca tao' to tao' to to wa ma'. O qui' ac huhun tara oro apóstolo ta, ac i ma' na ca tomi' tococwa ma'. 22O qui' xuxun ta paxi' nana quem, ane om mam' tococwa ne. In hwet ac cocon na taramaxicon nucucun ma', tomi' hwet ac cocon na: 23Tao' pa' tao' pa' pi' pin paxi' nanain oro manain xirinain ca tao' to tao' to to wa ma'. Coco' to ho' paxi' nanain oro manain oro guarda co querec wet nanain quem. Ane om mam' urut cocon oro apóstolo ne. Pa pin iri urut pain manain ne, wara om nana, ac i ma' na ca tomi' cocon taramaxicon nucucun oro guarda ma'.
24Taraju iri nain i ma' taramaxicon nucucun ne, i'ina ac ne na ximicon. I'ina na ximicocon oro taramaxicon nucucun oro sacerdote ma' quem. Cain' cain' xira cocon ne? Main ca mama' caca quem? Ac i ma' na ca tomi' caca ma'.
25Pain ca hehe hehe wet xucucun ma', maqui' ac ca na wari', tomi' ac ca na: Caram cara ne, co tao' to hwe cara ne, to nanain ca tao' caho' nein cote ne xiricon Iri' Jam ta. Pijim' nonon oro wari' ta. Ac i ma' na ca tomi' ca ma'.
26Maji cocon ta ac ca na taramaxicon ma', ja' ja' ac cocon na oro guarda. Cut qui' ac tococwa na oro apóstolo quem. Tomi' toto tata, om ca quep em' tococwa. Xi jin' ara tococwa oro wari' ta. To' to' cono' pin tatarapari' xi' pain pacun ma nana.
27O corom qui' ac tococwa na, momon cwa' ta ac tococwa na oro taramaxicon ma' quem. Tomi' querec pan ac cocon na sacerdote co iri' taramaxicon ma': 28Tomi' mip urut pahu' ma' ira! Ta an hwet camain' hwein wixicon Jeju pain ca pijim' huhun oro wari' me ta paxi' urut pahu'. Ane om tomi' ha' maparut ne. Pijim' mi' pijim' mi' tiquin' huhun pain ca howa nuhu' oro wari' co to nanain Jerusalém ca'. Ac ca coromicat mi' maparut na pain ca to' pa' pin urut con Jeju ta nonon pain ca tomi' mana' tococwa ma'.
29Cain' cain' xuxut quem ac ca na Pedro cocon oro win apóstolo ca ma'. Hohot xiraparut pain ca tomi' in pin urut con Iri' Jam pain ca tomi' ha' pan urut pahu' pain ca wari' nuhu' ra? Om na ta! Na e' na pain ca tomi' ha' pan urut con Iri' Jam ta. 30To' pa' pin paxi' hun Jeju pain ca tatatain mi' hun pain pana pane. Ane to' e' mami' pan con Iri' Jam co howa caca hwanana nexi' ne. 31Mi' ac con na pain ca xao pe ho' ne pain iri' cwere ca' con#5.31 Taraju pa' jein ca tomi' mao ne ca xao to ho' xine iri' curucun je paraxicon taramaxicon ma'. Xao to ho' pin iri nanain iri' curucun je paraxicon taramaxicon wari' ne, querec pin' ac tococwa na pain ca taramaxicon wi xucucun. Ac i ma' na Jeju ma' quem. Xao pe ho' pin iri nain iri' curucun Iri' Jam ne, querec pin' ac tocwa na pain ca Taramaxicon wi pin con quem.. Mi' non pain ca to' witan xim capari' ca' quem. Ma' ta cwirin' pin hwe pain ca wari' nein Israel hwe ma' napari', ma' ta xic am pin tain ca caracat nuhu' ta napari' quem. 32Je ca tomi' hwet taxipa' urut ca'. Tomi' hwet urut cocon oro wari' pain oro carawa ca ara non Jeju pane. An hwet mi' nonon pain Tamataracon Iri' Jam quem. Iri' Jam ma', wirico co mi' nonon pain Tamataracon oro wari' co tomi' ha' nonon ta. Ac i ma' na ca tomi' cocon oro taramaxicon Pedro con João ma'.
33Taraju iri nonon oro taramaxicon ne, mana' tamana ac cocon na. To' pa' pin xuxun na nonon. 34Ane ma' ca co ma' ne, co win taramaxicon caca ma'. Gamaliel na wixicon. Fariseu#5.34 Judeu nana oro fariseu pane. Ac taramaxicon nana. Tomi' ca' nonon oro win judeu caca: Na e' na pain ca tomi' ha' xin oro ca xirao' nucun Moisés ca tomi' ha' je capari' Iri' Jam ta. Na e' na pain ca tomi' ha' xin oro ca xirao' nucucun oro hwanana nexi' ca tomi' ha' je cacapari' quem. Ma' ta querec hohot capari' Iri' Jam ta nana pane. na Gamaliel. Ca' na taxipa' nain ca xirao' nucun Moisés pane. In ac in ac pi' pin nonon oro wari' ma' quem. Xi om ne ca querec pin' ara cocon pain ca hwara' opa nucun. Tequi' pe ac ca na pain ca cut in to xucucun ma'. Cut hwerehwet mama' camain' jujun e' ac tococwa na oro guarda. Cut hwerehwet mama' ac tococwa na.
35Tomi' ac tococwa na oro win taramaxicon ca ma'. Ma' tara ximixi' cocon caram cwa' ta oro win ma' ne pain ca wari' nein Israel iri' ca'. Coromicat xo' xi' e', om ta quep em' ximama' xuxun me. 36Om ca mam' pe wet hun Teudas cara pane? Taramaxicon ina ma' na pain ca xin to nucun pain ca tomi' in pin cocon oro taramaxicon pane. Ac ca ma' 400 caca na co taxipa' nonon pane. Aram aram to' pa' pin ac tocwa na, wawaran wawaran pi' pin ac caca na co taxipa' ca quem. Om om pin ac caca na pane. 37Pain pije' iri na ne, pain ca xirao' qui' cacain wixicocon oro wari' oro taramaxicon pane, ma' ac ca na Judas co maqui' nain Galileia pane. Tomi' in pin xuxun oro taramaxicon e' ac ca na, mija ac caca na oro win ma' ca co taxipa' nonon quem. Aram aram to' pa' pin ac tocwa na co ma' quem. Ja' wawaran ja' wawaran pi' pin ac tococwa na oro co taxipa' ca pane. 38Je ca tomi' xuhu' ca' ac tococwa na. Om ta quep em' ximama' xuxun wari' cwa'. Pa hwerehwet e' xuxun ta. Mo ta wari' e' ca co pijim' je nonon ma', om ta na cocon pain ca pijim' cara caca ma'. Aram aram om pin ac caca tara ta. Win ca Teudas con Judas cara pane. 39Tara cocon, mo ta Iri' Jam ca co pijim' je nonon ma', om ta na cuhu' pain ca tomi' in pin huhun pain. Mo xi tomi' in pin huhun pain, ari pan ac hun xira Iri' Jam quem. Ac i ma' na ca tomi' tococwa ma'.
40Na ra ac caca na. Wirico Gamaliel co tomi' na pin nonon ma'.
Cut corom qui' jujun ta ac tococwa na oro guarda ma', cut corom ac tococwa na. Wap jujun ta ac tococwa na, wap wap ac tococwa na. Ta tomi' hwet mami' huhun cocon oro wari' Jeju ta ac tococwa na. Mama' je ta ac tococwa na.
41Hwerehwet ca' iri tata pain ca cut in to nucucun ne, tomi' querec te tamana ac caca na. Ca' xucucun pain ca tomi' querec te nucucun: Ac ca hohot xun Iri' Jam na, xi om ne ca mi' ara capari' pain ca jain jain wa pain ca pijim' hwet xuxun con Jeju oro wari' ta xucucun. 42Pijim' tiquin' pijim' tiquin' nana pain oro xijein xec quem. Pijim' to nanain cote ne xiricon Iri' Jam ma', pijim' to nanain xiricocon oro wari' ma' quem. Om ca an to cacain. Wirico Jeju na co Cristo ta nana pain ca pijim' caca ma'.
Currently Selected:
Atos 5: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
Atos 5
5
Ananias cam Safira
1Ane ma' ca co ma' ne, Ananias ma', je i ma' wixicon. Safira na wixicam manacon. Ma' nanam macan' quem. Vender ac cacamain na. 2Pe ho' cara tarapa' tamain dinheiro nein ca', cut mi' e' toton pain pawirinain ca' quem ac xucun na, mo hwet ac tococwa na oro apóstolo ma', cut mi' ac tococwa pain na. Taxi' non manacon pain ca pe ho' cara con tamain dinheiro nein quem.
3Tomi' querec pan ac con na Pedro: Para om ari mon Caxicon Jam pain ca quep mip xim quem ma', pain ca mixein rain Tamataracon Iri' Jam quem ma' Ananias? Xi pe ho' cara ara quem tamain dinheiro ca cut ma pain macaram ta. 4Om ca mene main pain ca om vender querec main ra? Mene main ma' ira. Vender pin iri main ne, om ca mene main dinheiro nein quem ra? Mene main quem. Mo xi pe ho' pi' pin tarapa' ta main, je xi om mi' qui' maparut pain? Cain' cain' xima quem? Para wara coromicat an pe xo' main ca mixein wa ma', pain ca mixein toton maparut ma' quem? Om ca warut ne co mixein ma ma'. Mixein mon Iri' Jam ta. Ac i ma' na ca tomi' con ma'.
5Taraju iri nain i ma' Ananias ma' ne, ane ane mi' pin ac ca na. Mi' pin na, jao hot mao ac ca na. Oro wari' ma', taxi' iri nonon pain ca mi' pin nucun ma' ne, jin' tamana ac caca na. 6Maqui' ac caca na co xo' hwara' nana, wiric pa' ac cacain na curucun, an mamam' hwet mao ac cacain na, an corom pe pin ac cacain na pain manain pacun quem.
7Amon pawin iri na xina ne, ac ca 3 pin ne na hora nein ca mi' pin nucun Ananias ma', corom qui' ac cama na manacon. Om ca taxi' con taxicam pain ca mi' pin nucun. 8Tomi' querec ac cam na Pedro: Cain' ca ma' ne dinheiro ca cut hwe pain macarahu' ma' quem? Ac i ca' mao na cwerein? Tomi' ho' ne ta, ac i ma' na ca tomi' querec cam ma'.
E'e', ac i ma' mao na parut ta ac con na.
9Para tomi' xo' xujuhu' pain ca mixein querec xin hwein Tamataracon Taramaxicon nexi' quem ac cam na. Taraju ra e'. Maqui' pin nana co an corom pe nanain pain manain pacun curucun taxim cara ne. Wiricoco paca' ira. Hwet pin nanain manain xirim ca'. An mamam' mao teterem quem ac cam na.
10Ane ane mi' pin ac cama na cam ma' quem. Mi' pin na, jao hot hwet ac con na pain caximacon Pedro ma'. Corom qui' iri nana co xo' ho' tarama' nana cara ne ne, querec iri nanam pain ca mi' pin cama ma' ne, an mamam' hwet mao ac cacain na cwerequem. An corom pe ac cacain na pain manain pacun pain xijein cacaracon taxicam quem. 11Jin' jin' pi' pin ac caca na co howa nonon Jeju ma'. Oro wari' co taraju nanam pain ca cono' pin nequequem ma', jin' jin' pi' pin ac caca na quem.
Ca quep xio pin tococwa oro wari' co caxi nana
12Oro apóstolo ma', an hwet tamana nanain ca hwara' opa nucun Iri' Jam pain ca ara cacain oro ca om ara taxi' ne ca wari' wa pane. Wa wa tamana nonon oro wari' co to nanain Jerusalém ma'. Co howa nana ma', cut in to cut in to pi' pin xucucun pain ca tacan tiquin' ne xiricon Iri' Jam pain cacarain ma', ca Maxicon Salomão caca oro wari' ma', je i ma' wixinain cocon. Ac ca xica' pe ne na ximicocon pain ca cut in xucucun ma'. 13Oro xucucun wari' co om howa nana ma', tomi' querec te paxi' nonon co howa nana ma' quem. Awi tamana nana ta paxi' nonon, ane jin' pan caca ne. Jin' nana pain ca jao jao ma' xuxun cocon ma'. 14Ane ma' caca co howa pin nana ne. Mija nana, ca tarama' nucucun, ca narima' nequequem ma' quem, aram aram mija pin ac cacama na pain ca howa pin cocon Taramaxicon nexi'. Win ma' ne pin xut pahu' pain ca howa hwe ma' ac tococwa na oro xucucun co wara howa nana ma'. 15Oro apóstolo ma', an hwet tamana nanain ca hwara' opa nucun Iri' Jam pain ca ara cacain oro ca om ara taxi' ne ca wari' wa pane. Maji cut mama' xuxun co caxi nana cwa' ac caca na oro wari' ma', an mamam' an to ac tococwa na pain wana. An toco' to tata pain caji tapit je wi. Ma' ta quep xio cocon Pedro ta na ca coromicat nucucun. Am om na con pain ca quep cocon ma', am na e' con pain ca to' xio quiji' cocon jamicon pain ca aram aram xut tiquin' ca' cocon ca', ac i ma' na ca coromicat nucucun. 16Mija nana wari' co maqui' nanain oro xijein cidade ca to ja' pan nain Jerusalém ma' quem. O qui' tata oro win ma' caca co caxi nana ma'. Cut qui' tata co jain jain nana pain ca corom to ho' cocon caxicon jam quem. Quep xio quep xio pi' pin ac tococwa na.
Ca quep em' tococwa oro apóstolo
17Mana' ac ca na sacerdote co iri' taramaxicon, cocon oro win ma' ca ma', co saduceu nana ma'. Noc tamana tata oro apóstolo, xi om caca oro wari' co tomi' querec te pan nonon ta. 18Je ca quep jujun ta tococwa oro guarda. Quep ac tococwa na, tao' to pin ac tococwa na pain xirinain ca tao' to tao' to to wa ma'. 19Tao' to paxi' tata. Ane maqui' cain xim jam co taramaja mi' non Taramaxicon nexi' ne. Pa pin nain oro manain xirinain ca tao' to tao' to to wa ma', o hwerehwet qui' ac tococwa na quem. Tomi' ac tococwa na: 20Mama' jein ca tao' caho' nein cote ne xiricon Iri' Jam ta. Pijim' jujun oro wari' ma', tomi' hwet jujun pain ca mi' toton cocon pain ca om pi' ra ha' ne ca e' wa Iri' Jam ta. Ac i ma' na ca tomi' cocon jam co taramaja mi' non Taramaxicon nexi'.
21Xec pin iri na ne, corom mama' ac cacain na ca tao' caho' nein cote ne xiricon Iri' Jam. Pijim' ac cocon na oro wari'. Win ne ca tomi' capari' jam co taramaja mi' non Taramaxicon nexi' ne nana.
Sacerdote co iri' taramaxicon ma', cocon oro win ma' ca ma' quem, wara tomi' cut in nonon oro win taramaxicon caca pain ca Sinédrio caca ma'. Tomi' ac tococwa na oro guarda co taramaja to nanain cote ne xiricon Iri' Jam: Mama' jein xirinain ca tao' to tao' to to wa ma'. O qui' ac huhun tara oro apóstolo ta, ac i ma' na ca tomi' tococwa ma'. 22O qui' xuxun ta paxi' nana quem, ane om mam' tococwa ne. In hwet ac cocon na taramaxicon nucucun ma', tomi' hwet ac cocon na: 23Tao' pa' tao' pa' pi' pin paxi' nanain oro manain xirinain ca tao' to tao' to to wa ma'. Coco' to ho' paxi' nanain oro manain oro guarda co querec wet nanain quem. Ane om mam' urut cocon oro apóstolo ne. Pa pin iri urut pain manain ne, wara om nana, ac i ma' na ca tomi' cocon taramaxicon nucucun oro guarda ma'.
24Taraju iri nain i ma' taramaxicon nucucun ne, i'ina ac ne na ximicon. I'ina na ximicocon oro taramaxicon nucucun oro sacerdote ma' quem. Cain' cain' xira cocon ne? Main ca mama' caca quem? Ac i ma' na ca tomi' caca ma'.
25Pain ca hehe hehe wet xucucun ma', maqui' ac ca na wari', tomi' ac ca na: Caram cara ne, co tao' to hwe cara ne, to nanain ca tao' caho' nein cote ne xiricon Iri' Jam ta. Pijim' nonon oro wari' ta. Ac i ma' na ca tomi' ca ma'.
26Maji cocon ta ac ca na taramaxicon ma', ja' ja' ac cocon na oro guarda. Cut qui' ac tococwa na oro apóstolo quem. Tomi' toto tata, om ca quep em' tococwa. Xi jin' ara tococwa oro wari' ta. To' to' cono' pin tatarapari' xi' pain pacun ma nana.
27O corom qui' ac tococwa na, momon cwa' ta ac tococwa na oro taramaxicon ma' quem. Tomi' querec pan ac cocon na sacerdote co iri' taramaxicon ma': 28Tomi' mip urut pahu' ma' ira! Ta an hwet camain' hwein wixicon Jeju pain ca pijim' huhun oro wari' me ta paxi' urut pahu'. Ane om tomi' ha' maparut ne. Pijim' mi' pijim' mi' tiquin' huhun pain ca howa nuhu' oro wari' co to nanain Jerusalém ca'. Ac ca coromicat mi' maparut na pain ca to' pa' pin urut con Jeju ta nonon pain ca tomi' mana' tococwa ma'.
29Cain' cain' xuxut quem ac ca na Pedro cocon oro win apóstolo ca ma'. Hohot xiraparut pain ca tomi' in pin urut con Iri' Jam pain ca tomi' ha' pan urut pahu' pain ca wari' nuhu' ra? Om na ta! Na e' na pain ca tomi' ha' pan urut con Iri' Jam ta. 30To' pa' pin paxi' hun Jeju pain ca tatatain mi' hun pain pana pane. Ane to' e' mami' pan con Iri' Jam co howa caca hwanana nexi' ne. 31Mi' ac con na pain ca xao pe ho' ne pain iri' cwere ca' con#5.31 Taraju pa' jein ca tomi' mao ne ca xao to ho' xine iri' curucun je paraxicon taramaxicon ma'. Xao to ho' pin iri nanain iri' curucun je paraxicon taramaxicon wari' ne, querec pin' ac tococwa na pain ca taramaxicon wi xucucun. Ac i ma' na Jeju ma' quem. Xao pe ho' pin iri nain iri' curucun Iri' Jam ne, querec pin' ac tocwa na pain ca Taramaxicon wi pin con quem.. Mi' non pain ca to' witan xim capari' ca' quem. Ma' ta cwirin' pin hwe pain ca wari' nein Israel hwe ma' napari', ma' ta xic am pin tain ca caracat nuhu' ta napari' quem. 32Je ca tomi' hwet taxipa' urut ca'. Tomi' hwet urut cocon oro wari' pain oro carawa ca ara non Jeju pane. An hwet mi' nonon pain Tamataracon Iri' Jam quem. Iri' Jam ma', wirico co mi' nonon pain Tamataracon oro wari' co tomi' ha' nonon ta. Ac i ma' na ca tomi' cocon oro taramaxicon Pedro con João ma'.
33Taraju iri nonon oro taramaxicon ne, mana' tamana ac cocon na. To' pa' pin xuxun na nonon. 34Ane ma' ca co ma' ne, co win taramaxicon caca ma'. Gamaliel na wixicon. Fariseu#5.34 Judeu nana oro fariseu pane. Ac taramaxicon nana. Tomi' ca' nonon oro win judeu caca: Na e' na pain ca tomi' ha' xin oro ca xirao' nucun Moisés ca tomi' ha' je capari' Iri' Jam ta. Na e' na pain ca tomi' ha' xin oro ca xirao' nucucun oro hwanana nexi' ca tomi' ha' je cacapari' quem. Ma' ta querec hohot capari' Iri' Jam ta nana pane. na Gamaliel. Ca' na taxipa' nain ca xirao' nucun Moisés pane. In ac in ac pi' pin nonon oro wari' ma' quem. Xi om ne ca querec pin' ara cocon pain ca hwara' opa nucun. Tequi' pe ac ca na pain ca cut in to xucucun ma'. Cut hwerehwet mama' camain' jujun e' ac tococwa na oro guarda. Cut hwerehwet mama' ac tococwa na.
35Tomi' ac tococwa na oro win taramaxicon ca ma'. Ma' tara ximixi' cocon caram cwa' ta oro win ma' ne pain ca wari' nein Israel iri' ca'. Coromicat xo' xi' e', om ta quep em' ximama' xuxun me. 36Om ca mam' pe wet hun Teudas cara pane? Taramaxicon ina ma' na pain ca xin to nucun pain ca tomi' in pin cocon oro taramaxicon pane. Ac ca ma' 400 caca na co taxipa' nonon pane. Aram aram to' pa' pin ac tocwa na, wawaran wawaran pi' pin ac caca na co taxipa' ca quem. Om om pin ac caca na pane. 37Pain pije' iri na ne, pain ca xirao' qui' cacain wixicocon oro wari' oro taramaxicon pane, ma' ac ca na Judas co maqui' nain Galileia pane. Tomi' in pin xuxun oro taramaxicon e' ac ca na, mija ac caca na oro win ma' ca co taxipa' nonon quem. Aram aram to' pa' pin ac tocwa na co ma' quem. Ja' wawaran ja' wawaran pi' pin ac tococwa na oro co taxipa' ca pane. 38Je ca tomi' xuhu' ca' ac tococwa na. Om ta quep em' ximama' xuxun wari' cwa'. Pa hwerehwet e' xuxun ta. Mo ta wari' e' ca co pijim' je nonon ma', om ta na cocon pain ca pijim' cara caca ma'. Aram aram om pin ac caca tara ta. Win ca Teudas con Judas cara pane. 39Tara cocon, mo ta Iri' Jam ca co pijim' je nonon ma', om ta na cuhu' pain ca tomi' in pin huhun pain. Mo xi tomi' in pin huhun pain, ari pan ac hun xira Iri' Jam quem. Ac i ma' na ca tomi' tococwa ma'.
40Na ra ac caca na. Wirico Gamaliel co tomi' na pin nonon ma'.
Cut corom qui' jujun ta ac tococwa na oro guarda ma', cut corom ac tococwa na. Wap jujun ta ac tococwa na, wap wap ac tococwa na. Ta tomi' hwet mami' huhun cocon oro wari' Jeju ta ac tococwa na. Mama' je ta ac tococwa na.
41Hwerehwet ca' iri tata pain ca cut in to nucucun ne, tomi' querec te tamana ac caca na. Ca' xucucun pain ca tomi' querec te nucucun: Ac ca hohot xun Iri' Jam na, xi om ne ca mi' ara capari' pain ca jain jain wa pain ca pijim' hwet xuxun con Jeju oro wari' ta xucucun. 42Pijim' tiquin' pijim' tiquin' nana pain oro xijein xec quem. Pijim' to nanain cote ne xiricon Iri' Jam ma', pijim' to nanain xiricocon oro wari' ma' quem. Om ca an to cacain. Wirico Jeju na co Cristo ta nana pain ca pijim' caca ma'.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil