João 11

Ca mi' pin nucun Lázaro

1Caxi ac ca na wari' pane. Lázaro na wixicon. Wari' nein Betânia na, je i ma' wixinain ca paric to ne xirim ca pe ca cacam mana cowe ca ma', Maria cam Marta ma'. 2Wiricam Maria co cam ja' nain caximacon Taramaxicon nexi' Jeju pain caji towaxi' ca hu xain pane, co xic nain caximacon pain tenenequem pane. Wirico coxa' cama Lázaro co caxi ma'. 3Mo'o jun Jeju ta ac cacama na mana cowe ca ma'. Caxi na iri' win ma' nem co om noc ma cwa' Taramaxicon nuxut ca' jun ta nana. Mo'o xun ta ac caca na, mama' ac caca na.

4Taraju iri nain i ma' Jeju ne, tomi' ac ca na: Caxi paxi' na Lázaro, ane om mi' pin ta' ca pain ne. Caxi e' na. Ma' ta querec pin' cacapa' pain ca hwara' opa ne oro wari' ta na Te Iri' Jam. Ma' ta querec pin' quequem pain ca hwara' opa nem quem napa' pain ca Panxita' capa' ta na.

5Jeju ma', om paxi' na ca noc cacam Marta cam Maria con Lázaro ma' quem. Tomi' querec te tamana paxi' nanam. 6Ane mon to wet ca ne. Taxi' iri non pain ca caxi nucun ne, mon to wet ac ca na. Ma' 2 na xec nein ca mon to wet cain xirim ca pe ca ma'. 7To to. Maji ta, in mama' xin Judeia ta ac caparut na pain ca taxipa' urut con ca'#11.7 Je ca to cacama Lázaro cacam mana cowe ca quem, to nanain Judeia..

8Taramaxicon co ca' na taxipa' capijacon Iri' Jam ac urut con na. Om ca pain homa ne pain ca to' to' mi' pin xim pain pacun quequem oro taramaxicon pain Judeia cain. Para in mao tain i cain ma ma' quem urut con.

9Om na ta ac caparut na. Ma' 12 na hora nein xec. Mo ta xut cain xec wari' ma', om ca xut macoru ca. Xi querec pa' ara ca pain ca toha nein xec ta. 10Mo ta xut cain xim quem, xut macoru ac ca na. Xi querec pin' ca pain ca om con naran ta naparut#11.10 Ca' na ca tomi' ta' ca Jeju ira: Te Iri' Jam ma', wara coromicat an pe xo' nain xec nein ca mi' pin ta' ne. Pain ca om maqui' querec capa' xec nein ma', ac ca xut tain xec na. Taxi' inon Te pain ca narain ho' capa' cocon oro wari' co noc nanapa' cwa' ta na ira..

11Tomi' iri naparut pain i ma' ne, tomi' tomi' tiquin' ac caparut na: Pi'am na win ma' nexi' Lázaro. Hwet ton ina. Ma' ta ho' querec ton ta naparut.

12Taramaxicon nuxut ac urut con na. Mo ta pi'am ca, xio pin ac ca tara ta na ca tomi' urut con ma'.

13Tomi' mi' paxi' nain ca mi' pin nucun Lázaro Jeju ma'. Ane om taraju pa' urut con ne. Tomi' tarain ca pi'am nucun ma' urut con. 14Tomi' xo' ac caparut na: Mi' pin na Lázaro ta. 15Tomi' querec te paxi' ina pain ca om pe ho' ton pain ca mi' pin nucun quem. Xi param ara xuhu' pain ca howa mip mahu' pain ca maqui' ton Te Iri' Jam ta ac caparut na. Ame hwe e', querec iri xine pain ca ara ta' ta' con ne, howa mip ac mahu' tara ta naparut. Maji hwet xun ta ac caparut na.

16Tomi' ac caparut na win ma' nuxut Tomé ma', Tomé co Horoman Pe na xijein wixicon ma', tomi' naparut pain ca taxipa' urut con Jeju: Maji con, ma' ta cono' wi xun ta naparut.

17Tan' mama' ac urut na. Mon quem ac ca na Jeju.

Om na, ma' 4 pin na xec pain ca an corom pe pin cacain curucun pain manain pacun ta ac cocon na.

18Om ca pira ca' nein Jerusalém Betânia ma'. Om ca hwet ne ca 3 ne quilômetro nein pain ca pira ca' nein ma'. 19Je ca ma' mija caca oro win judeu urut co hwet nanam Marta cam Maria ma' quem. Quep xiho' xixim pain ca tomi' xaxa' tamana nequequem con coxa' cacama ta nanam. 20Taraju iri na Marta ne, pain ca maqui' na Jeju ta caca ma', hwet ac con na. To wet na pa'ao' coxa' cama Maria ma'. Pe cara nain xiricacam. Xut hwet ac con na Marta.

21Tomi' ac con na: Taramaxicon ne. Mo xi pe main i ca' pane, om xi mi' pin ca xa' ta. 22Mi' pin paxi' na. Ane taxi' xim pain ca ha' quem Iri' Jam pain oro carawa ca mi' ne mon con xa' ne. Mi' terem pain na ca tomi' cama ma'.

23E' mami' tara coxa' ma ta ac cam na.

24Taxi' ina, taxi' inon pain ca aram aram e' mami' ta' ca pain ca win pi' pin ta' ne macan' ca' ac con na.

25Om na ta Marta ac cam na. Wata' co mi' nain ca e' mami' wa. Wata' co mi' nain ca e' cara wa. Wari' co howa napa', e' ac ca tara. Mi' pin paxi' tara, e' cara tara pain pawin ta. 26Wari' co howa napa' pain ca e' e' wet nucun ma', om ta pi' ra ha' ne ca e' nucun. Howa main ca tomi' xim ca' quem Marta na ca tomi' querec cam ma'.

27Howa ina ta Taramaxicon ne ac cama na. Howa inem pain ca Cristo ma ma', pain ca Panxica Iri' Jam ma ma', pain ca mao rain macan' ta qui' quem Cote ma pane na ca tomi' con ma'.

28Tomi' iri nain i ma' ne, in ca' ac con na, mo tomi' tam xa' ta ac cama na. Mo hwet ac cam na, tomi' hohomu ac cam na: Maqui' na Taramaxicon nexi' co ca' na taxipa' capijacon Iri' Jam ta Maria ac cam na. Hap ra nem ta ac cam na.

29Taraju iri nain i ma' Maria ne, tequi' pe hap ac cama na, hwet ac con na. 30Jeju ma', om ca hwet querec cain oro xirim ca to cacama ma'. Pe pe wet nain ca mam' pe con Marta. 31Oro win judeu urut co to ho' nanam Maria pain xiricam ma', co quep xiho' nanam pain ca tomi' xaxa' tamana nequem ma', querec iri nanam pain ca tequi' pe hap nequem ma' ne, pain ca hwet mao hap cama ma', ja' ja' ac cacam na. Mao tarain manain pacun ca an terem' pe cocon coxa' cama cwain nanam. Aca pe tarain i cain nanam.

32Hwet iri non Jeju Maria ne, querec iri non ne, pe torotop mi' ac con na pain caximacon. Taramaxicon ne ac con na. Mo xi pe main i ca' pane, om xi mi' pin ca xa' ta non.

33Querec iri nam Maria pain ca aca cama ne. Querec iri nonon pain ca awaran caca oro wari' co ja' ja' nanam ma' ne. Xiram pa' tamana ac cacam na. Mija na ca jain jain ca cacam. 34Main ca an corom pe pe hwein curucun quem ac cacam na.

Hap ra ta Taramaxicon. Querec ra e' ac cocon na.

35Aca xoc ac ca na Jeju.

36Noro jun ta ac caca na oro wari' ma'. Om ca noc con ra nana.

37Je xi nain ho' qui' con pain ca mi' pin wa quem? Je xi quep xio qui' con quem ca' nana oro xucucun ma' quem. Win ne ca quep ma' pin cain tocon co om tocon pane nana.

38Xiram pa' mami' ac tococwa na. Mija na ca jain jain ca cocon. Xut hwet ac cain na ca an corom pe pe cacain curucun ma', pain manain pacun ma'. Ma' na wirain pacun ca mam' tao' pa' caho' cacain quem.

39Joc hwet pin jein pacun ma' ta ac ca na.

Om na ta Taramaxicon ne, cunu pin na ta ac cama na cowe ca ma', wiricam Marta ma'. Ma' 4 pin ara xi' na xec pain ca mi' pin nucun ta non.

40Tomi' ac cam na: Cain' cain' xima quem? Tomi' xim ne ira. Mo ta howa mapa', querec ac main tara ca hwara' opa nucun Te Iri' Jam xim ne ira nam.

41Joc hwet pin ac cacain na pacun ma'. Noro pawin ac ca na, tomi' ac con na Cote ca: Tomi' querec te inem pain ca ha' mapa' pain ca tomi' xim ca' Te. 42Taxi' paxi' inem pain ca tama' ha' mapa' pain ca tomi' xim ca'. Ane tomi' ac i ma' xim ca' ne. Ma' ta taraju cacapa' oro wari' cwa'. Ma' ta howa cacapa' pain ca hwet roron pain macan' mapa' ca' quem na ca tomi' con Iri' Jam.

43Tomi' iri non ne, merem ac ca na, merem mip na: Hwet qui' ra ta Lázaro na ca merem mip ca ma'.

44Hwet qui' ac ca na. Wara wiric pa' nonon con wom pain caximacon pain micon pain tocon. Hot ca' jun con wom ma' ta. Xut tara e' jun ta ac tococwa na.

Ca tomi' xo' xucucun pain ca to' pa' pin xun cocon Jeju

Mateus 26.1-5; Marcos 14.1-2; Lucas 22.1-2

45Oro wari' co hwet xim nanam Maria ma', querec iri nonon Jeju ma' ne pain ca to' e' mami' con Lázaro ma', ma' mija ac caca na co howa nonon pain ca maqui' con Iri' Jam. 46Ma' mija paxi' nana co howa nonon ma', ane ma' caca oro xucucun co hwet nonon oro fariseu ma' ne. Tomi' hwet nonon pain ca to' e' mami' con Lázaro Jeju.

47Cut in xijexi' ta ac xucucun na oro taramaxicon nucucun oro sacerdote cocon oro fariseu ma', tomi' cut in ac cocon na oro win taramaxicon caca ma', pain ca Sinédrio caca ma'#11.47 Ma' 70 nana oro taramaxicon co cut in nana. Sinédrio nonon oro wari' pain ca cut in xucucun. Ma' na iri' taramaxicon nucucun oro sacerdote, ma' nana oro xucucun taramaxicon nucucun oro sacerdote ma' quem, ma' nana oro fariseu cocon oro saduceu ma' quem. Ac juiz nana, taraju nonon oro wari' co tomi' em' nonon oro win ma' caca, tomi' mi' tomi' mi' ac tococwa na pain ca wap wa oro wari' co em' nana quem.. Cain' cain' xuxun Jeju quem ac caca na. An hwet pe tamana ara xi' nain ca hwara' opa nucun pain ca ara cain ca om ara taxi' ne ca wari' wa ta nana. 48Mo ta miri'om xun, howa howa xam' ac cocon tara oro wari', wum co taramaxicon ta ac cocon tara. Maqui' ac caca tara oro romano, to' pa horohot pin ac cacain tara cote ne xirim ca in ac to xun Iri' Jam. To' quiji' pin ac cacapari' tara, to' em' pin ac cacain tara macaraxi' ca' quem, ac i ma' xucucun.

49Tomi' ac ca na Caifás. Sacerdote co iri' taramaxicon na Caifás pain cara pane, pain cawaxi' nein ca om mi' pin querec ca Jeju pane. Tomi' ac ca na: Om ca taxi' camain' hwein carawa ca ara xim napari' con Jeju ta. 50Ac ca om taraju pa' hwe a xira. Hohot napari' pain ca mi' pin xica' pe ca wari' ta. Mi' pin caho' tarapari'. Ma' ta om cono' cono' pi' pin iri' pain ca judeu iri' ca', ac i ma' na ca tomi' cocon oro win ma' ca ma'.

51Ca tomi' nucun Caifás ma', pain ca mi' pin caho' totoron oro win ma' ca Jeju ta ca ma', om ca maqui' nein ca coromicat pan nucun, om na. Wirico Iri' Jam co mi' non pain. Xi om ne ca sacerdote co iri' taramaxicon ara ca pain cawaxi' ca om mi' pin querec ca Jeju pane. 52Pain ca mi' pin caho' totoron oro win ma' caca ma', om ca tomi' e' tococwa oro win judeu urut. Tomi' tata oro wari' nucun Iri' Jam co cut in toton ca ma' quem, co wawaran to nanain oro xijein macan' ma' quem. Ma' ta win ma' ne xucucun ta na. Ac ca nari xucucun tara ta na.

53Je i ma' xec nein ca tomi' an pe xo' cacain ca to' pa' pin xun cocon Jeju ma'. 54Je ca mo mo pe ca' cocon oro wari' Jeju ma' quem. Om ca xut mao pe mami' cain Judeia. Maji pain oro xijein cidade ca to ja' pan nain mahweri cain ac caparut na pain ca taxipa' urut con ca', hwet ac urut cocon na oro wari' co to nanain ca paric to ne xirim pain Efraim. Mon to wet ac urut pain na i cain con.

55Om ca pira mami' ne xec nein Páscoa, je i ma' xec nein ca tomi' querec te wi urut pain ca judeu urut ca'. Mija nana oro win judeu urut co wara mama' nanain Jerusalém. Ma' ta hohoc xo' mam' xijexi' ta nana#11.55 Pain cara pane, pain ca tomi' querec te caca oro judeu pain xec nein Páscoa pane, na e' na pain ca hohoc xo' mam' xucucun pain com, ma' ta hohot xun Iri' Jam ta nana. . 56-57Oro taramaxicon nucucun oro sacerdote cocon oro fariseu ma', wara tomi' nonon oro wari': Mo ta taxi' hun Jeju pain ca pe pan ca ma', na e' na pain ca tomi' hwet mi' maparut con. Ma' ta quep xut con na ca tomi' cocon ma'. Je ca pirao' cocon Jeju quem. Tomi' querec ac xucucun na co to nanain ca tao' caho' nein cote ne xiricon Iri' Jam. Cain' ca coromicat hwe quem xucucun. Om ta maqui' cain ca tomi' querec te nexi' ron na ca tomi' querec xucucun ma'.

Currently Selected:

João 11: TBPN

Highlight

Copy