João 4

Jeju cam narima' nein Samaria

1Mija nana wari' co ja' ja' nonon Jeju ma', mija nana co ja' ca pain com quem, ac i ma' na ca tomi' caca oro wari' pane. Taraju nana oro fariseu ma' quem. Mija tiquin' ca' nonon co ja' ja' nonon João ma', mija tiquin' ca' nonon co ja' pan ca pain com João ma' quem na ca taraju caca oro fariseu. 2Om paxi' na ca ja' pan cocon pain com oro wari' Jeju ma'. Warut pain ca taxipa' urut con ca', ja' pan urut cocon pain com. 3Taramaxicon nexi' Jeju ma', taxi' pin iri nonon oro fariseu ne, pain ca taraju cacain ca tomi' nucucun oro wari' ma', pain ca ma' mija caca co taxipa' pin nonon ma', maji ta ac caparut na, paca' ac urut pain na Judeia, in mama' ac urut pain na Galileia.

4Pain ca in mama' xin Galileia caparut Jeju ma', tomi' ca' naparut: Na e' na pain ca ac urut pain wana ca ac tiquin' nain Samaria ma' ta naparut. 5Xuruxut tiquin' xuruxut tiquin' ca' urut pain oro xijein cidade ca to nain Samaria, aram aram hwet ac urut pain na Sicar, je i ma' cidade ca hwet urut ma'. Sicar ma', pe ja' pan nain macaracon Jacó cara pane, ca mi' con panxica José pane. 6-8Je ca pe ne manain com ca xe' ca Jacó pane quem.

Cut xi' carawa ca cao' wa ta ac urut na pain ca taxipa' urut con Jeju ca', mama' ac urut pain na cidade. Jeju ma' iri na ne, xao pe ja' pan nain manain com ma'. Xi om ne ca jam' pin ara ca pain ca xut wa ta. Tocon xina pin na.

Maqui' ac cama na narima' nein Samaria. Cam ta' com na. Tomi' ac cam na Jeju: Xiram pa' ne, cam mi' wijimain ne pain com ma' nam.

9He ac cama na. Para cam mi' ne pain com mapa' ma', pain ca wari' nein Samaria ta' ca' ac cama na. Xi judeu ara ma ta na ca tomi' con ma'. Tomi' ac i ma' na, xi om ne ca noc ara xucucun oro judeu cocon oro wari' nein Samaria ta#4.9 Oro wari' nein Samaria pane, judeu paxi' nana hwanana nucucun pain cara pane, ane cut cacam tatirim co om howa nonon Iri' Jam ne. Aram aram howa ni pin ac caca na. Camara' iri nana mana panxicaca cocon waram winacocon ne, howa ximama' ac caca na quem. Oro judeu co howa howa wet nonon Iri' Jam ma', noc nonon oro wari' nein Samaria. Caxicon wari' hwe ta nonon. Xi an xiho' maparut pain ca howa nuxut ca' nonon..

10Om na, mo xi querec pin' main carawa ca mi' xim quem Iri' Jam ca', mo xi querec pin' mapa' pain ca cam mi' ne pain com xim ca' quem, cam mi' ne pain com pan ac mapa' xira, mi' ac xim xira pain iri' com ca to' e' cara nain ca wari' wa ta ac cam na.

11Cain' cain' xima quem ac con na. Xi xopain ara ne manain com ca'. Om nem too ca mam' cam main quem. Cain' xi cam ac main com ca to' e' cara nain ca wari' wa ma' quem? 12Manain com ca', mi' napari' pain hwanana nexi' Jacó cara pane. Wirico co toc nain cominain, toc nanain mana panxica, toc nain oro winacon pane quem. Hwara' opa tiquin' ca' inon xi' ma mon pain ca cam mi' xim mapa' pain com ca to' e' cara nain ca wari' wa ra na ca tomi' con ma'.

13Om na, wari' co toc nain com ca', pe' mami' tara, toc ta' com mami' tara ta ac cam na. 14Wari' co toc nain com ca mi' ta' ta' ca' iri na ne, om ta toc ta' com mami' ca. Com ca mi' ta' ta' ca', an xiho' nain ca hoi hoi ne com ca weweweo cara ma'. Weweweo pe tarain ximicon wari' co howa napa'. To' e' cara ac con tara, mi' ac tocwa tara pain ca pe ho' cara con Iri' Jam pain pawin quem na ca tomi' cam ma'.

15Xiram pa' ne e' ac cama na. Cam mi' ne pain com ca tomi' ma ma'. Om ac ne tara ca toc ta' com mami' ta'. Om ac ne tara ca cam mami' tain com pain i ca' quem na.

16Mo'o ron taxim, in qui' ac ma tara con ta ac cam na.

17Om napa' tarama' ta ac cama na.

Tomi' iri'o' ma pain ca om napa' tarama' ta ma ma' ac cam na. 18Xi wara ma' 5 ara quem tarama' pane ta ac cam na. Om ca an xo' mon tarama' co pe ho' nem pain xocori ca' quem. Tomi' iri'o' ma ma' ira nam.

19Querec pin' inem ta. Profeta ma ma' ira ac con na. 20Oro hwanana nuxut cara pane, in ac to taxipa' nonon Iri' Jam pain pacun ca', pain ca pe torotop mi' cocon ma' ac con na. Wahu' iri na ne, pain ca judeu hwe ma', tomi' ac hwe na: Na e' na pain ca in ac pe tocwa Iri' Jam pain Jerusalém ta, ac i ma' na ca tomi' hwe ma' non.

21Howa ne pain ca tomi' xim ca' narima' ac cam na. Wixicam pin ta' ara xi' na xec pain ca om in ac pe mami' tocwa Iri' Jam pain pacun ca'. Om ta in ac pe mami' tocwa pain Jerusalém quem. 22Wahu' pain ca wari' nein Samaria hwe ma', om ca querec pin' hun co in ac hwe. Warut pain ca judeu urut ca' iri na ne, querec pin' urut con co in ac urut. Xi wara coromicat mi' pan ara caparut pain ca coromicat an pe xo' cain ca param nucun pane, pain ca to' witan toton oro wari' ta ca pain cara pane. Win ma' nuxut pan tara co to' witan ca' toton nonon pain ca caracat nucucun oro wari' ta. 23Ame ma e', main maqui' tara xec nein ca in ac xo' cocon Cotere' Iri' Jam oro wari'. Je Tamataracon tara ca mi' nonon pain. Mi' totoron pain ca in ac xo' cocon pain ca querec pin' iri'o' cocon quem. Wara maqui' pin na xec nein ca in ac ac i ma' cocon quem. Oro wari' co in ac ac i ma' nonon ma', wiricoco co param pan ca Cotere' Iri' Jam pain ca in ac tatarapa' ta cocon ma'. 24Om ca wari' ca Iri' Jam. Iri' Jam na. Je ca na e' ne pain ca mi' capari' pain ca in ac xo' xin Tamataracon. Na e' na pain ca mi' capari' pain ca in ac xo' xun pain ca querec pin' iri'o' xun quem na ca tomi' cam ma'.

25Tomi' ac cama na: Maqui' ta' tara iri' taramaxicon co Messias urut, wirico Cristo ta. Main maqui' ta' tara, taxi' inon. Maqui' iri tara ne, tomi' xo' tomi' xo' pi' pin ac caparut tara pain oro ca param nucun Iri' Jam ac con na.

26Je ca tomi' xim ca' ac cam na: Wata' ta, pain ca tomi' xim ca', wata' co Messias cwa' na ca tomi' cam ma'.

27Pain ca tomi' tomi' wet cam narima' Jeju ma', maqui' ac urut na pain ca taxipa' urut con ca'. He! Pijim' nam narima' ra, ac i ma' na ca coromicat nuxut. Ane miri'om urut con cam ne. Om ca tomi' querec urut cam pain ca ma' carawa ca param ma ma' urut cam. Om ca tomi' querec urut con pain ca pijim' cam.

28Narima' ma', an pe ac camain na ca mam' cam cama com ma', in mao ac camain na cidade. Tomi' tomi' xam' ac tococwa na oro wari': 29Harahap je. Querec jun wari' co tomi' hwet tomi' hwet pi' pin napa' pain oro carawa ca ara ta' pane. Om ta wirico ca co Messias ra na ca tomi' tococwa oro wari' ma'.

30Jein hwerehwet ca' ac cacain na cidade, hwet ac cocon na Jeju pain ca xat pe ca ma'.

31Pain ca in mao camain cidade nequem ma', tomi' ac urut con na Jeju. Cao' ra carawa ca' Taramaxicon co ca' na taxipa' capijacon Iri' Jam urut con.

32Om na, ma' napa' xijein carawa ca cao' ta'. Om ca taxi' hwein, ac i ma' na ca tomi' caparut.

33Ma' tara wari' co mi' non pain carawa ca cao' wa ra ac xujuxut na.

34Tomi' ac caparut na: Ac carawa ca cao' wa napa' ca tomi' ha' ton Te co hwet roron oro wari' ta napa' pane. Ac carawa ca cao' wa napa' ca ara ara pi' pin tain ca taramaja ne ca ara ra capa' pane. 35Ca' na ca tomi' nuhu': 4 pin iri tara panawo' ne, cut ac xine tara caramaji xitot, ac i ma' paxi' na ca tomi' hwe ma'. Ane tomi' pan xuhu' pain i ca' ne: Noro jujun oro wari' co xuruxut hwet nanapari' ma'. An xiho' nanain xitot ca paca' pin oro memem nein ma'. Maqui' pin na xec nein ca na e' ne pain ca howa jun Iri' Jam ta huhun ma'. 36Mo ta quep xiho' huhun, mo ta to' taraju pa' huhun pain capija ca', mo ta howa pin cacapa' pahu', mi' ac xihwe tara pain carawa ca awi pain ca taramaja nuhu'. Win ca waximain xitot co cut jein nonon pain caramaji totacon oro wari' nucun co taramaja mi' nonon ma'. Mi' ac tococwa na pain carawa ca awi pain ca taramaja nucucun. Oro wari' co howa nanapa' pahu', e' cara tatara, to ho' cara totoron Iri' Jam pain pawin quem. Wari' co pijim' hwet nonon pain capija oro wari' ma', an xiho' non wari' co oin' nain xitot. Oro xucucun co maqui' nana pa'ao' iri nana ne, co to' taraju pa' nonon pain capija ma', an xiho' nonon wari' co cut nanain caramaji xitot. Howa pin iri tatara ne, tomi' querec te wi ac caca tara quem. 37Iri'o' na ca tomi' taxipa' caca oro wari' ma': Ma' na co oin' nain xitot ma', ma' na xucun co cut nain caramaji ma' quem, ac i ma' na ca tomi' taxipa' caca oro wari'. 38Je ca tomi' xuhu' ca' ac caparut na. To' taraju pa' jujun pain capija oro wari' ma' inuhu' ta. Om paxi' na ca wahu' ne co pijim' hwet cain' nonon pain capija. Ma' nana oro xucucun co taramaja tamana nana pain ca pijim' hwet cocon pain capija pane. Wahu' iri na ne, ac ca cut pan hwein tara caramaji ca taramaja nucucun. Ac i ma' na ca tomi' caparut pain ca taxipa' urut con ca'.

39Oro wari' nein Samaria co to nanain Sicar ma', mija nana co howa pin nonon Jeju. Xi om ne ca taraju ara cacam narima' ma', pain ca tomi' hwet tomi' hwet pi' pin napa' pain oro carawa ca ara ta' ta cocon ma'. 40Hwet iri nonon Jeju ne, tomi' ac cocon na: Pe ho' xut ta nonon. Ma, pe ho' wijimain ac cocon na. Ma' 2 na xec nein ca pe ho' cocon ma'.

41Mija ac caca na oro xucucun wari' co taraju nonon pain ca pijim' nucun. Howa pin ac cocon na quem. 42Tomi' ac cacam na narima': Howa pin urut con Jeju ta. Om ca howa e' urut con pain ca taraju urut pum pain ca tomi' hwet maparut con, om na. Howa urut con, xi om ne ca taraju pan ara urut pain ca tomi' nucun ta. Je ca howa urut con ca'. Querec pin' urut con. Wirico na co to' witan taxi' ca' nonon pain ca caracat nucucun oro wari' pain oro xijein macan' ca' na ca tomi' cacam ma'.

Ca quep xio pin tocwa panxica co taramaja mi' non taramaxicon

432 pin iri na xec pain ca to ho' urut cocon oro wari' nein Samaria ne, maji ta ac caparut na Jeju, mama' ac urut pain na Galileia. 44Wara tomi' ca' ara xi' na Jeju pane: Om ca tomi' querec te tocwa profeta pain iri' macaracon, ac i ma' na ca wara tomi' ca pane. 45Tan' mama' iri urut pain Galileia ne, tomi' querec te ac cocon na Jeju oro wari' co to nanain i cain. Wari' nein Galileia ma', mama' ara xi' nanain Jerusalém pane, pain ca tomi' querec te xin cacain xec nein Páscoa pane. Querec nanain oro ca ara ca Jeju pain i cain quem. Je ca tomi' querec te cocon pain ca wa' mao cain Galileia ma'.

46In mao ac cain na Caná Jeju, Caná pain Galileia ma'. Je pain Caná ma', ca ara comi uva pin pe cain com pane. Pe nain i ma' taramaxicon co taramaja mi' non iri' taramaxicon. Maqui' nain Cafarnaum ma'. Caxi na panxica. 47Tomi' ac caca na oro wari': Maqui' nain Judeia Jeju ta, wa' qui' nain Galileia ca' nana. Taraju iri na co ma' co caxi panxica ma' ne, mo hwet ac con na Jeju pain Caná. Jain jain na, mi' pin ta' na panxita' ta Jeju ac con na. Xiram pa' ne con. Mao rain xuru cain, pain Cafarnaum cain. Quep xio ron ta na ca tomi' con ma'.

48Wa inuhu' me ac con na Jeju. Mo ta om querec mahu' pain ca an hwet mi' xuhu' pain ca hwara' opa ne ca', pain ca ara tain carawa ca om ara taxi' ne ca wari' wa ca', om ac ne na ca howa mahu' ta na ca tomi' con ma'.

49Om na ta taramaxicon ac con na. Maqui' hap ra pain ca om mi' querec ca panxita' me. Mo ta om hap ma con, mi' pin ac ca tara ta non.

50In mao rain xurum ta. Awi pin na panxima ta ac con na Jeju.

Howa ac cain na ca tomi' nucun. In mao ac ca na.

51Xut xut wet nain wana, xuruxut cam' ac cocon na co taramaja mi' e' nonon ma'. Awi pin na panxima ta nonon.

52Cain' cain' ne con? Main ca pe ca xina pain ca awi pin nucun quem ac tococwa na.

Pain xec pane, tocon xina pin iri na ne, nahwere' pin ac ca na ta nonon.

53Na ra ac ca na. Je i ma' jamicon xina ca tomi' capa' Jeju pain xec pane, pain ca awi pin na panxima ta capa' pane ac ca na. Howa pin ac con na Jeju. Howa pin nonon Jeju oro ca nari nucun co to ho' nonon pain xiricon ma' quem.

54Pain ca paca' cain Judeia Jeju ma', pain ca in mao cain Galileia pane, je win 2 pin ne ca an hwet pe cain ca hwara' opa nucun pain ca ara cain ca om ara taxi' ne ca wari' wa pane.

Currently Selected:

João 4: TBPN

Highlight

Copy