Lucas 2
2
Ca pan' qui' nucun Jeju
Mateus 1.18-25
1Pan' qui' iri na João ne, om ca pain homa ne, tomi' ac ca na iri' taramaxicon nucucun oro romano ma', Augusto ma'. Tomi' tomi' pi' pin tata oro wari' co to nanain oro macan' ca taramaxicon pe ca pane. Na e' na pain ca xirao' to xine oro wuxuhu' ta tata. 2Je ca xo' xirao' to ten qui' xine wixicocon oro wari' pane. Pain ca taramaxicon taramaxicon wet ca Quirino pain Síria pane, je ca xirao' to xine wixicocon oro wari'. 3Oro wari' ma', mama' mama' pi' pin ac cacain na iri' cidade ca camara' to caca oro hwanana nucucun pane, ma' ta xirao' to xine wixixi' ta nana quem.
4Je ca mao ca José ma' quem, mao nain cidade ca camara' to caca hwanana nucun cara pane. Paca' nain cidade nucun pain Nazaré ma', ca pe nain Galileia ma', mao ac cain na Judeia cain, pain cidade ca pan' pe ne ca pije' nucun taramaxicon Davi cara pane. Xi iri' hwanana ne ara con Davi José ta. Belém na wixinain cidade ca pan' pe ca Davi pane. 5An mao nam Maria ma', co an ta' ca ma'. Xirao' to tatarain wixixi' ta nam. Nam' na Maria ma' quem.
6Pain ca to to wet cacamain Belém ma', maqui' pin ac ne na xec nein ca pan' ta' ca cawinacam. 7Pain ca xo' tan' mama' cacama ma', noro paxi' nanain ca pi'am to wa pain xirim ca pi'am to caca oro wari' co maqui' nanain pira. Ane om mam' cacamain ca pi'am to wa ne. Pi'am to e' nanain xirinain burro je ovelha. Je ca pan' pe ca cawinacam. Je win ma' cam pije', wirico co pan' cain' cacam oro xequequem humaxicam co camara' xi' nana pa'ao'. Wiric pa' ac con na con wom, an terem' pe ac con na pain pana ca cao' to ne oro carawa.
8Pain xim nein ca pan' qui' ca cawinacam ma', ma' nana wari' co querec wet nanain ovelha nucucun. Hwet to nanain i ma', pain ca cao' to ne ovelha nucucun. Querec wet towa nanain. Pe xipana na Belém ma'. 9Hwet qui' ac ca na jam co taramaja mi' non Iri' Jam. Xat pe ho' nonon. Toha toha mam' pin nonon ca toc meremem nucun Iri' Jam quem. Jin' tamana nana. 10Ta jin' mahu' me ta ac tococwa na. Taraju wet xine. Tomi' hwet xim inuhu' pain ca awi wa ca xo' hwet pa' nuhu' ma'. Ja' tomi' querec te tamana turuhu'. Ja' tomi' querec te ja' tomi' querec te pi' pin totoron oro wari' quem. 11Pan' qui' na wari' co to' witan xim nuhu' ta. Xo' pan' nain xim ca'. Pan' pe nain Belém ca', ca pan' pe pan ne ca pije' nucun taramaxicon Davi cara pane. Pije' co xo' pan' cwa', wirico co Cristo#2.11 Ca' na ca tomi' mao nein ca Cristo wa cocon oro judeu pane. Iri' wari' co wara tora' ca Iri' Jam pane ta nonon. Iri' Taramaxicon tara, wirico tara co to' witan toton nonon oro wari' ta nonon. ma', co iri' Taramaxicon ma'. 12Mo querec je. Mam' iri jun pije' co wiric pa' wa con wom ne, co terem' pe nain pana ca cao' to ne oro carawa ma', taxi' ac mahu' tara pain ca tomi' iri'o' xuhu' ca' na ca tomi' tococwa ma'.
13Ane ane hwerehwet qui' ac caca na oro jam co taramaja mi' nonon Iri' Jam. Mija nana. Om ca paric camain' caca. Awi na Iri' Jam awi na Iri' Jam ta nana pain ca tomi' querec te cocon ma'. Tomi' ac caca na: 14Tomi' querec te tomi' querec te pi' pin nonon Iri' Jam oro co to nanain iri' pawin cain. Toron toron om pin tara ximicocon oro wari' co xiram pa' pan ca pain macan' ca' quem na ca tomi' caca ma'.
15In mama' iri nanain pawin oro jam co taramaja mi' nonon Iri' Jam ma' ne, tomi' xo' ac xucucun na caram ma', co querec wet nanain ovelha nucucun ma'. Maji pain Belém ta. Querec xun pije' co xo' pan' ma', co tomi' hwet ca Iri' Jam ta nana.
16Jein mama' ac cacain na Belém. Mam' nanam Maria con José, mam' nonon pije' ma' quem, co terem' pe nain pana ca cao' to ne oro carawa ma'. 17Querec iri nonon pije' ne, tomi' hwet tomi' hwet pi' pin ac cocon na oro wari' pain ca tomi' nucun jam co taramaja mi' non Iri' Jam ma', pain ca tomi' hwet cocon con pije' ma'. 18Oro wari' co taraju nanain ca tomi' nucucun ma', wa wa wa wa pi' pin ac caca na. 19Maria ma' iri na ne, mam' pe wet cara ac camain na oro ca taraju cama ma', ca tomi' hwet cacam caram ma' co querec wet taxipa' nanain ovelha nucucun ma'. Om ca ji'am pin camain. Tama' coromicat e' nain.
20In mama' ac caca na caram ma' co querec wet nanain ovelha nucucun. Awi ma awi ma nonon Iri' Jam pain ca in ac cocon ma'. Tomi' querec te urut pum pain oro ca taraju urut pum, je pain oro ca querec urut pain ca hwet urut con pije' ma' quem. Iri'o' na ca tomi' nucun jam co taramaja mi' nem ta, ac pain ca tomi' hwet caparut na ta nonon pain ca tomi' querec te cocon ma'.
21Ma' 8 pin iri na xec nucun pije' ma' ne, pain ca wac xirac xin taparinain ca xirac nucun caca ma', wac xirac ac cocon na, o' ma' pin ac cocon na quem. Jeju ta nonon. Je ca wara o' ma' con jam co taramaja mi' non Iri' Jam pane, pain ca om nam' querec con jicon pane.
Ca an mao cocon pain cote ne xiricon Iri' Jam Jeju
22Aram aram maqui' pin ac ne na xec nein ca tomi' ha' xin cacamain ca xirao' nucun Moisés ma', cam narima' co xo' wijima ma'#2.22 Pain cara pane, cocon hwanana nucucun oro judeu pane, om ca querec hohot cama narima' co xo' wijima. Na e' na pain ca hohoc xo' xequem ta na ca xirao' nucun Moisés pane. Wiricam, wirico cote ca cawinacam quem, hohoc xo' ac xequequem na, querec hohot mami' ac cacam na Iri' Jam, je cwerequequem pane. . An mao ac cocon na Jeju pain cote ne xiricon Iri' Jam pain Jerusalém. Ma' ta an hwet pe mi' xun con Iri' Jam ta nana. 23Mon cwa' ta xun con Iri' Jam nana, win ne ca xirao' pe xine pain oro ca tomi' ha' je ca Iri' Jam. Ca' na ca xirao' pe xine con pane: Mi' tatarapa' cocon oro hwijima' co camara' cain' nana cacam jicocon ta, iri' mene toton ta na ca xirao' pe xine con pane. 24An mao nonon Jeju pain cote ne xiricon Iri' Jam pain Jerusalém ma' quem, ma' ta mi' xun pain carawa nexi' ca' nana. Win ne ca xirao' pe xine pain oro ca tomi' ha' je ca pane. Ca' na ca xirao' pe xine con pane: Cut mi' 2 tatarapa' con wixicon parawom. Mo ta om cacam wixicon parawom, cut mi' 2 ac cacapa' tara con wixicon xucu' ta na ca xirao' pe xine con#2.24 Om ca caramaju cama Maria con José. Je ca cut e' cacama wixicon coxut. Mo xi caramaju cacama, cut mi' ac tococwa xira pain wijimain taramaji ovelha Iri' Jam..
25Ma' pe nain Jerusalém wari' ma', co Simeão na wixicon. Xut xo' na Simeão. Win xumu e' nain oro ca param nucun Iri' Jam. Winim' non wari' co to' om pin tain nain ca tomi' xaxa' nucucun oro wari' nein Israel ma', pain ca to' witan ton cocon ma'. Pe ho' mip non Tamataracon Iri' Jam quem. 26Wara tomi' pe non Tamataracon Iri' Jam pane. Om ta mi' pin querec ma, querec ac mon tara Cristo co wara tomi' pe ca Iri' Jam pane na ca tomi' pe con pane. 27Tomi' ac con na Tamataracon: Mao rain cote ne xuru ta non, mao ac ca na. An corom qui' iri non pije' cote ca cam jicon ma' ne, pain ca ara xin cacamain ca xirao' nucun Moisés ma', pain ca mon cwa' ta xun Iri' Jam ta cacama ma', 28awin ac con na pain taparacon. Tomi' querec te ac con na Iri' Jam:
29Mi' ho' ne pain ca mi' pin wa ta Taramaxicon ne.
Wata' pain ca taramaja mi' xim ca', mi' ho' ne pain ca mi' pin wa me.
Xi ma' ma' wet ne carawa ca winim' ta' ca', pain ca winim' ton wari' co to' witan ton nonon oro wari'.
Xi om ne ca hwet pin ara ne ca wara tomi' pe mi' mapa' pane ta.
30Xi querec ho' ara ton wari' co mi' maparut cwa', co to' witan xim naparut cwa'.
31Mi' maparut con.
Querec pin' querec pin' pi' pin totoron oro wari' pain oro xijein macan'.
32Ac naran totoron oro wari' co om judeu nana ma'.
To' querec pin' totoron pain ca iri'o' ne capijam.
To' querec pin' totoron pain ca wari' ne maparut quem,
pain ca wari' nein Israel urut ca'.
Ac i ma' na ca tomi' con Iri' Jam Simeão ma', pain ca awin con Jeju pain taparacon.
33Tomi' ac i ma' iri non pije' Simeão ne, wa wa ac ca na cote ca cam jicon. 34Tomi' ac tacacama na: Param inon Iri' Jam pain ca ara mi' cuhu' pain oro ca awi wa ta tata. Taraju wet ne e' ac cam na Maria ma', jicon Jeju ma': Ma' na ca coromicat an pe xo' nucun Iri' Jam con cawinam cwa', cocon oro win ma' nexi' pain ca wari' nein Israel iri' ca'. Wirico cawinam tara co to' quiji' mija toton nonon co om howa nonon ma', to' witan mija totoron co howa nonon ma' quem, ac i ma' na ca coromicat an pe xo' nucun Iri' Jam con. Wirico Iri' Jam co mi' napari' con. Ma' ta querec pin' hwein wana ca hwet ac mahu' ta paxi' napari'. Ane ma' mija caca oro win ma' nexi' co tomi' in pin xun nonon ne. Noc urut pum ta totoron. 35Querec pin' ac xine tara ca coromicat nucucun pain iri' ximicocon. Tomi' xaxa' tamana ac ma tara quem Maria. Ac ca xucun' pa' xim quem tara cote ne quit pain xumum na ca tomi' cam Maria Simeão ma'.
36Pe nain cote ne xiricon Iri' Jam narima' ma' quem. Ana na wixicam. Profetisa na#2.36 Narima' co profetisa ma', an xiho' non wari' co profeta ma' quem. An an ari na ca taramaja nequequem ma', pain ca tomi' hwet taxipa' cacamain capijacon Iri' Jam ca an hwet mi' cacam Tamataracon.. Cote cama ma', Fanuel ma', iri' hwanana ne non hwanana Aser cara pane. Horon tamana na Ana. Ma' paxi' nam tarama' pain cara pane. Wara mi' pin ca' nam taxicam pane. Ma' 7 e' na cawaxi' pain to ho' xequequem pane, mi' pin ac ca na. 37Om ca an mami' con tarama' Ana. Wara tiquin' mao na cawaxi' nequem quem, ma' 84 na cawaxi' nequem. Om ca paca' camain' camain ca tao' caho' ne cote ne xiricon Iri' Jam. In ac taxipa' non Iri' Jam pain ca pe torotop mi' querec te con. An pe taxipa' nain ca cao' wa pain ca tomi' con, je cwerequem, pain xec je pain xim quem.
38Pain ca tomi' tomi' wet ca Simeão ma', je win maqui' cama Ana ma'. Xut hwet ac cacam na. Tomi' querec te inem con pije' cwa' ta Te Iri' Jam ac cama na. Tomi' hwet ac tococwa na oro wari' con pije' ma'. Tomi' hwet tomi' hwet xam' tata con co winim' nanain xec nein ca to' witan toton cocon oro wari' nein Jerusalém Iri' Jam.
39Ara ara pi' pin iri nanain oro ca ara je cacam Iri' Jam pain ca xirao' nucun Moisés ne, in mama' ac cacamain na cidade nequequem ma', pain Nazaré pain Galileia ma'. 40Hwara' hwara' ac ca na pije' ma'. Ca hwara' hwara' ca ma', ca hwara' opa pin ca ma', ca ximicon hwanana ca ma'. Quep xiho' non Iri' Jam, tama' ara mi' non pain oro ca awi wa quem.
Ca pije' nucun Jeju ma', pain ca pe cain cote ne xiricon Cote ca
41Pain oro cawaxi' pane, mama' taxipa' nanain Jerusalém jicon Jeju con cote ca pane. Maqui' iri na oro xec nein Páscoa#2.41 Páscoa na wixinain xec nein ca tomi' querec te xucucun oro judeu pain ca mam' pe wet cocon oro hwanana nucucun pain ca to' witan ca' tococwa pain Egito pain cara pane. ne, mama' ac cacama na. Ma' ta tomi' querec te wi xi' cocon oro win ma' nexi' ta nana. 42Ma' 12 pin iri na cawaxi' nucun Jeju ne, maji ta arain ac cocon na, win iri' pane nana, mama' ac cacama na. 43Pi' pin iri na oro xec nein ca tomi' querec te nequequem ne, in mama' xi' ta ac cacama na José cam Maria ma', mama' ac cacama na. Ane to wet ca pa'ao' Jeju ne. To wet nain Jerusalém. Om ca taxi' con jicon con cote ca. 44Ja' ja' napari' xi' ma nonon cocon oro win ma' cacama co xuruxut wi cacama ma'. Xuruxut xuruxut irawin pa' iri nanam ne, mon ne mon ne ac cacama na, pirao' xun ta ac cocon na cocon oro ca nari nequequem cocon oro win ma' nequequem ma'. Mon quem mon quem nonon. 45Paxi' nonon. Pirao' xun pain Jerusalém ta ac cacama na, in mama' ac cacama na. Mon quem mon quem nonon.
46Xec pa' ac cacam na, xec pa' ac cacam na. Xijein xec pin iri na ne, mam' ac cocon na. Mam' pe nonon pain ca tao' caho' nein cote ne xiricon Iri' Jam. Xao pe pe nain ximijacocon oro co ca' na taxipa' nanain capijacon Iri' Jam ma'. Taraju tata pain ca ca' na cacain, tomi' querec tomi' querec ac tococwa na quem. 47Caram ma' co taraju nonon pain ca tomi' querec ca ma', wa wa wa wa pi' pin nonon quem. Taraju pa' na xin co cwa' ne ta? Tomi' xo' na xin ne ca' nonon.
48Jicon con cote ca ma', querec iri nonon pain ca xao pe ho' cocon co ca' na taxipa' nanain capijacon Iri' Jam ma' ne, wa wa tamana ac cocon na. Cain' cain' ximaparut quem arain non jicon ma'. Mija na ca jain jain urut pum pain ca pirao' urut pum ne non.
49Para pirao' mahu' ma' quem ac cacam na. Om ca taxi' mahu' ra? Je xi pe tarain xiricon Cote ca mahu' quem nanam. 50Ac i ma' paxi' na ca tomi' cacam ma'. Ane om taraju pa' cacamain ca tomi' nucun ne.
51Hwet ac tacacama na, xuruxut xuruxut in mama' ac cacamain na Nazaré. Tomi' ha' nanam quem. Jicon ma', om ca ji'am pin camain i ma' ca ara ne con cawinacam ma'. Mam' pe wet cara nain. 52Hwara' hwara' ac ca na Jeju ma'. Aram aram hwara' pin ac ca na. Ximicon hwanana pin na, coromicat xo' na, ma' na ximicon. Hohot non Iri' Jam, hohot nonon oro wari' ma' quem.
Currently Selected:
Lucas 2: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
Lucas 2
2
Ca pan' qui' nucun Jeju
Mateus 1.18-25
1Pan' qui' iri na João ne, om ca pain homa ne, tomi' ac ca na iri' taramaxicon nucucun oro romano ma', Augusto ma'. Tomi' tomi' pi' pin tata oro wari' co to nanain oro macan' ca taramaxicon pe ca pane. Na e' na pain ca xirao' to xine oro wuxuhu' ta tata. 2Je ca xo' xirao' to ten qui' xine wixicocon oro wari' pane. Pain ca taramaxicon taramaxicon wet ca Quirino pain Síria pane, je ca xirao' to xine wixicocon oro wari'. 3Oro wari' ma', mama' mama' pi' pin ac cacain na iri' cidade ca camara' to caca oro hwanana nucucun pane, ma' ta xirao' to xine wixixi' ta nana quem.
4Je ca mao ca José ma' quem, mao nain cidade ca camara' to caca hwanana nucun cara pane. Paca' nain cidade nucun pain Nazaré ma', ca pe nain Galileia ma', mao ac cain na Judeia cain, pain cidade ca pan' pe ne ca pije' nucun taramaxicon Davi cara pane. Xi iri' hwanana ne ara con Davi José ta. Belém na wixinain cidade ca pan' pe ca Davi pane. 5An mao nam Maria ma', co an ta' ca ma'. Xirao' to tatarain wixixi' ta nam. Nam' na Maria ma' quem.
6Pain ca to to wet cacamain Belém ma', maqui' pin ac ne na xec nein ca pan' ta' ca cawinacam. 7Pain ca xo' tan' mama' cacama ma', noro paxi' nanain ca pi'am to wa pain xirim ca pi'am to caca oro wari' co maqui' nanain pira. Ane om mam' cacamain ca pi'am to wa ne. Pi'am to e' nanain xirinain burro je ovelha. Je ca pan' pe ca cawinacam. Je win ma' cam pije', wirico co pan' cain' cacam oro xequequem humaxicam co camara' xi' nana pa'ao'. Wiric pa' ac con na con wom, an terem' pe ac con na pain pana ca cao' to ne oro carawa.
8Pain xim nein ca pan' qui' ca cawinacam ma', ma' nana wari' co querec wet nanain ovelha nucucun. Hwet to nanain i ma', pain ca cao' to ne ovelha nucucun. Querec wet towa nanain. Pe xipana na Belém ma'. 9Hwet qui' ac ca na jam co taramaja mi' non Iri' Jam. Xat pe ho' nonon. Toha toha mam' pin nonon ca toc meremem nucun Iri' Jam quem. Jin' tamana nana. 10Ta jin' mahu' me ta ac tococwa na. Taraju wet xine. Tomi' hwet xim inuhu' pain ca awi wa ca xo' hwet pa' nuhu' ma'. Ja' tomi' querec te tamana turuhu'. Ja' tomi' querec te ja' tomi' querec te pi' pin totoron oro wari' quem. 11Pan' qui' na wari' co to' witan xim nuhu' ta. Xo' pan' nain xim ca'. Pan' pe nain Belém ca', ca pan' pe pan ne ca pije' nucun taramaxicon Davi cara pane. Pije' co xo' pan' cwa', wirico co Cristo#2.11 Ca' na ca tomi' mao nein ca Cristo wa cocon oro judeu pane. Iri' wari' co wara tora' ca Iri' Jam pane ta nonon. Iri' Taramaxicon tara, wirico tara co to' witan toton nonon oro wari' ta nonon. ma', co iri' Taramaxicon ma'. 12Mo querec je. Mam' iri jun pije' co wiric pa' wa con wom ne, co terem' pe nain pana ca cao' to ne oro carawa ma', taxi' ac mahu' tara pain ca tomi' iri'o' xuhu' ca' na ca tomi' tococwa ma'.
13Ane ane hwerehwet qui' ac caca na oro jam co taramaja mi' nonon Iri' Jam. Mija nana. Om ca paric camain' caca. Awi na Iri' Jam awi na Iri' Jam ta nana pain ca tomi' querec te cocon ma'. Tomi' ac caca na: 14Tomi' querec te tomi' querec te pi' pin nonon Iri' Jam oro co to nanain iri' pawin cain. Toron toron om pin tara ximicocon oro wari' co xiram pa' pan ca pain macan' ca' quem na ca tomi' caca ma'.
15In mama' iri nanain pawin oro jam co taramaja mi' nonon Iri' Jam ma' ne, tomi' xo' ac xucucun na caram ma', co querec wet nanain ovelha nucucun ma'. Maji pain Belém ta. Querec xun pije' co xo' pan' ma', co tomi' hwet ca Iri' Jam ta nana.
16Jein mama' ac cacain na Belém. Mam' nanam Maria con José, mam' nonon pije' ma' quem, co terem' pe nain pana ca cao' to ne oro carawa ma'. 17Querec iri nonon pije' ne, tomi' hwet tomi' hwet pi' pin ac cocon na oro wari' pain ca tomi' nucun jam co taramaja mi' non Iri' Jam ma', pain ca tomi' hwet cocon con pije' ma'. 18Oro wari' co taraju nanain ca tomi' nucucun ma', wa wa wa wa pi' pin ac caca na. 19Maria ma' iri na ne, mam' pe wet cara ac camain na oro ca taraju cama ma', ca tomi' hwet cacam caram ma' co querec wet taxipa' nanain ovelha nucucun ma'. Om ca ji'am pin camain. Tama' coromicat e' nain.
20In mama' ac caca na caram ma' co querec wet nanain ovelha nucucun. Awi ma awi ma nonon Iri' Jam pain ca in ac cocon ma'. Tomi' querec te urut pum pain oro ca taraju urut pum, je pain oro ca querec urut pain ca hwet urut con pije' ma' quem. Iri'o' na ca tomi' nucun jam co taramaja mi' nem ta, ac pain ca tomi' hwet caparut na ta nonon pain ca tomi' querec te cocon ma'.
21Ma' 8 pin iri na xec nucun pije' ma' ne, pain ca wac xirac xin taparinain ca xirac nucun caca ma', wac xirac ac cocon na, o' ma' pin ac cocon na quem. Jeju ta nonon. Je ca wara o' ma' con jam co taramaja mi' non Iri' Jam pane, pain ca om nam' querec con jicon pane.
Ca an mao cocon pain cote ne xiricon Iri' Jam Jeju
22Aram aram maqui' pin ac ne na xec nein ca tomi' ha' xin cacamain ca xirao' nucun Moisés ma', cam narima' co xo' wijima ma'#2.22 Pain cara pane, cocon hwanana nucucun oro judeu pane, om ca querec hohot cama narima' co xo' wijima. Na e' na pain ca hohoc xo' xequem ta na ca xirao' nucun Moisés pane. Wiricam, wirico cote ca cawinacam quem, hohoc xo' ac xequequem na, querec hohot mami' ac cacam na Iri' Jam, je cwerequequem pane. . An mao ac cocon na Jeju pain cote ne xiricon Iri' Jam pain Jerusalém. Ma' ta an hwet pe mi' xun con Iri' Jam ta nana. 23Mon cwa' ta xun con Iri' Jam nana, win ne ca xirao' pe xine pain oro ca tomi' ha' je ca Iri' Jam. Ca' na ca xirao' pe xine con pane: Mi' tatarapa' cocon oro hwijima' co camara' cain' nana cacam jicocon ta, iri' mene toton ta na ca xirao' pe xine con pane. 24An mao nonon Jeju pain cote ne xiricon Iri' Jam pain Jerusalém ma' quem, ma' ta mi' xun pain carawa nexi' ca' nana. Win ne ca xirao' pe xine pain oro ca tomi' ha' je ca pane. Ca' na ca xirao' pe xine con pane: Cut mi' 2 tatarapa' con wixicon parawom. Mo ta om cacam wixicon parawom, cut mi' 2 ac cacapa' tara con wixicon xucu' ta na ca xirao' pe xine con#2.24 Om ca caramaju cama Maria con José. Je ca cut e' cacama wixicon coxut. Mo xi caramaju cacama, cut mi' ac tococwa xira pain wijimain taramaji ovelha Iri' Jam..
25Ma' pe nain Jerusalém wari' ma', co Simeão na wixicon. Xut xo' na Simeão. Win xumu e' nain oro ca param nucun Iri' Jam. Winim' non wari' co to' om pin tain nain ca tomi' xaxa' nucucun oro wari' nein Israel ma', pain ca to' witan ton cocon ma'. Pe ho' mip non Tamataracon Iri' Jam quem. 26Wara tomi' pe non Tamataracon Iri' Jam pane. Om ta mi' pin querec ma, querec ac mon tara Cristo co wara tomi' pe ca Iri' Jam pane na ca tomi' pe con pane. 27Tomi' ac con na Tamataracon: Mao rain cote ne xuru ta non, mao ac ca na. An corom qui' iri non pije' cote ca cam jicon ma' ne, pain ca ara xin cacamain ca xirao' nucun Moisés ma', pain ca mon cwa' ta xun Iri' Jam ta cacama ma', 28awin ac con na pain taparacon. Tomi' querec te ac con na Iri' Jam:
29Mi' ho' ne pain ca mi' pin wa ta Taramaxicon ne.
Wata' pain ca taramaja mi' xim ca', mi' ho' ne pain ca mi' pin wa me.
Xi ma' ma' wet ne carawa ca winim' ta' ca', pain ca winim' ton wari' co to' witan ton nonon oro wari'.
Xi om ne ca hwet pin ara ne ca wara tomi' pe mi' mapa' pane ta.
30Xi querec ho' ara ton wari' co mi' maparut cwa', co to' witan xim naparut cwa'.
31Mi' maparut con.
Querec pin' querec pin' pi' pin totoron oro wari' pain oro xijein macan'.
32Ac naran totoron oro wari' co om judeu nana ma'.
To' querec pin' totoron pain ca iri'o' ne capijam.
To' querec pin' totoron pain ca wari' ne maparut quem,
pain ca wari' nein Israel urut ca'.
Ac i ma' na ca tomi' con Iri' Jam Simeão ma', pain ca awin con Jeju pain taparacon.
33Tomi' ac i ma' iri non pije' Simeão ne, wa wa ac ca na cote ca cam jicon. 34Tomi' ac tacacama na: Param inon Iri' Jam pain ca ara mi' cuhu' pain oro ca awi wa ta tata. Taraju wet ne e' ac cam na Maria ma', jicon Jeju ma': Ma' na ca coromicat an pe xo' nucun Iri' Jam con cawinam cwa', cocon oro win ma' nexi' pain ca wari' nein Israel iri' ca'. Wirico cawinam tara co to' quiji' mija toton nonon co om howa nonon ma', to' witan mija totoron co howa nonon ma' quem, ac i ma' na ca coromicat an pe xo' nucun Iri' Jam con. Wirico Iri' Jam co mi' napari' con. Ma' ta querec pin' hwein wana ca hwet ac mahu' ta paxi' napari'. Ane ma' mija caca oro win ma' nexi' co tomi' in pin xun nonon ne. Noc urut pum ta totoron. 35Querec pin' ac xine tara ca coromicat nucucun pain iri' ximicocon. Tomi' xaxa' tamana ac ma tara quem Maria. Ac ca xucun' pa' xim quem tara cote ne quit pain xumum na ca tomi' cam Maria Simeão ma'.
36Pe nain cote ne xiricon Iri' Jam narima' ma' quem. Ana na wixicam. Profetisa na#2.36 Narima' co profetisa ma', an xiho' non wari' co profeta ma' quem. An an ari na ca taramaja nequequem ma', pain ca tomi' hwet taxipa' cacamain capijacon Iri' Jam ca an hwet mi' cacam Tamataracon.. Cote cama ma', Fanuel ma', iri' hwanana ne non hwanana Aser cara pane. Horon tamana na Ana. Ma' paxi' nam tarama' pain cara pane. Wara mi' pin ca' nam taxicam pane. Ma' 7 e' na cawaxi' pain to ho' xequequem pane, mi' pin ac ca na. 37Om ca an mami' con tarama' Ana. Wara tiquin' mao na cawaxi' nequem quem, ma' 84 na cawaxi' nequem. Om ca paca' camain' camain ca tao' caho' ne cote ne xiricon Iri' Jam. In ac taxipa' non Iri' Jam pain ca pe torotop mi' querec te con. An pe taxipa' nain ca cao' wa pain ca tomi' con, je cwerequem, pain xec je pain xim quem.
38Pain ca tomi' tomi' wet ca Simeão ma', je win maqui' cama Ana ma'. Xut hwet ac cacam na. Tomi' querec te inem con pije' cwa' ta Te Iri' Jam ac cama na. Tomi' hwet ac tococwa na oro wari' con pije' ma'. Tomi' hwet tomi' hwet xam' tata con co winim' nanain xec nein ca to' witan toton cocon oro wari' nein Jerusalém Iri' Jam.
39Ara ara pi' pin iri nanain oro ca ara je cacam Iri' Jam pain ca xirao' nucun Moisés ne, in mama' ac cacamain na cidade nequequem ma', pain Nazaré pain Galileia ma'. 40Hwara' hwara' ac ca na pije' ma'. Ca hwara' hwara' ca ma', ca hwara' opa pin ca ma', ca ximicon hwanana ca ma'. Quep xiho' non Iri' Jam, tama' ara mi' non pain oro ca awi wa quem.
Ca pije' nucun Jeju ma', pain ca pe cain cote ne xiricon Cote ca
41Pain oro cawaxi' pane, mama' taxipa' nanain Jerusalém jicon Jeju con cote ca pane. Maqui' iri na oro xec nein Páscoa#2.41 Páscoa na wixinain xec nein ca tomi' querec te xucucun oro judeu pain ca mam' pe wet cocon oro hwanana nucucun pain ca to' witan ca' tococwa pain Egito pain cara pane. ne, mama' ac cacama na. Ma' ta tomi' querec te wi xi' cocon oro win ma' nexi' ta nana. 42Ma' 12 pin iri na cawaxi' nucun Jeju ne, maji ta arain ac cocon na, win iri' pane nana, mama' ac cacama na. 43Pi' pin iri na oro xec nein ca tomi' querec te nequequem ne, in mama' xi' ta ac cacama na José cam Maria ma', mama' ac cacama na. Ane to wet ca pa'ao' Jeju ne. To wet nain Jerusalém. Om ca taxi' con jicon con cote ca. 44Ja' ja' napari' xi' ma nonon cocon oro win ma' cacama co xuruxut wi cacama ma'. Xuruxut xuruxut irawin pa' iri nanam ne, mon ne mon ne ac cacama na, pirao' xun ta ac cocon na cocon oro ca nari nequequem cocon oro win ma' nequequem ma'. Mon quem mon quem nonon. 45Paxi' nonon. Pirao' xun pain Jerusalém ta ac cacama na, in mama' ac cacama na. Mon quem mon quem nonon.
46Xec pa' ac cacam na, xec pa' ac cacam na. Xijein xec pin iri na ne, mam' ac cocon na. Mam' pe nonon pain ca tao' caho' nein cote ne xiricon Iri' Jam. Xao pe pe nain ximijacocon oro co ca' na taxipa' nanain capijacon Iri' Jam ma'. Taraju tata pain ca ca' na cacain, tomi' querec tomi' querec ac tococwa na quem. 47Caram ma' co taraju nonon pain ca tomi' querec ca ma', wa wa wa wa pi' pin nonon quem. Taraju pa' na xin co cwa' ne ta? Tomi' xo' na xin ne ca' nonon.
48Jicon con cote ca ma', querec iri nonon pain ca xao pe ho' cocon co ca' na taxipa' nanain capijacon Iri' Jam ma' ne, wa wa tamana ac cocon na. Cain' cain' ximaparut quem arain non jicon ma'. Mija na ca jain jain urut pum pain ca pirao' urut pum ne non.
49Para pirao' mahu' ma' quem ac cacam na. Om ca taxi' mahu' ra? Je xi pe tarain xiricon Cote ca mahu' quem nanam. 50Ac i ma' paxi' na ca tomi' cacam ma'. Ane om taraju pa' cacamain ca tomi' nucun ne.
51Hwet ac tacacama na, xuruxut xuruxut in mama' ac cacamain na Nazaré. Tomi' ha' nanam quem. Jicon ma', om ca ji'am pin camain i ma' ca ara ne con cawinacam ma'. Mam' pe wet cara nain. 52Hwara' hwara' ac ca na Jeju ma'. Aram aram hwara' pin ac ca na. Ximicon hwanana pin na, coromicat xo' na, ma' na ximicon. Hohot non Iri' Jam, hohot nonon oro wari' ma' quem.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil