Lucas 8

Oro narima' co quep xiho' nonon Jeju

1Om ca pain homa ne, maji ta ac ca na Jeju, mao ac cain na oro xijein cidade, je pain oro ca paric to ne xirim ma' quem, pijim' mi' ac tococwa na pain capijacon Iri' Jam pain ca taramaxicon pe ho' toton cocon ma'. Ja' ja' nonon co taxipa' ca ma', co ma' 12 nana ma'. 2Ma' nana oro narima' co ja' ja' nonon quem, co wara quep xio ca pane, pain ca tomi' jein pin cocon oro caxicon jam co corom to ho' nanam, wiricacam co wara quep xio pin ca pain ca caxi nequequem quem. Mo nana: Maria co Madalena na xijein wixicam ma', co ma' 7 nana oro caxicon jam co hwerehwet ca' nanam pane. 3Ma' na Joana ma', manacon Cuza ma', co querec wet taxipa' nain caramaxicon taramaxicon Herodes pain xiricon. Ma' na Susana, ma' mija nana xequequem narima' co ja' ja' nonon Jeju quem. Xiram pa' nonon pane, mi' mi' nonon pain oro carawa pane.

Ca pijim' joc mam' mi' tococwa con wari' co wixicaracao' nain tocwi trigo pain totacon

Mateus 13.1-23; Marcos 4.1-25

4Mija nana wari' co hwet nonon Jeju pane. Om ca paric camain' caca. Maqui' nanain oro xijein cidade. Pijim' joc mam' mi' ac tococwa na con wari' co wixicaracao' nain tocwi trigo pain totacon. 5Wixicaracao' tain tocwi trigo pain tota ta ac ca na. Wixicaracao' wixicaracao', ma' ac ne na tocwi trigo ca camara' to nain cacarain wana. Xom pin ac xine na, itac pin ac nein na oro wijimain me quem. 6Ma' ac ne na tocwi trigo ca camara' to nain pacun quem. Orot pin iri na ne, cono' pin ac ne na, xi xo' camain' ne wijimain macan' pain pacun ta. 7Camara' to ac nein na pi wirain tocwi trigo ma' quem. Hwara' wi ac ne na, mo' pan ac nein na tocwi trigo pi quem. 8Oro wirain tocwi trigo ca camara' to nain macan' ca awi ma' iri na ne, hwara' pin ac ne na, mi xo' tamana ac ne na. Pain ca xica' pe ne arain ma', mi 100 na tocwi quem.

Tomi' ac tococwa na: Mo ta taraju pa' xixi' na hwe ma', je ta taraju wet qui' hwe ta tata.

9Tomi' querec ac cocon na Jeju co taxipa' ca ma': Para pijim' joc mam' mi' ma con wari' co wixicaracao' nain tocwi trigo pain totacon quem? Cain' ca tomi' mao ne ca pijim' nem quem na ca tomi' cocon ma'.

10Om na, wara coromicat xo' na Iri' Jam pane ac tococwa na. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Ane om ac i ma' ne cocon oro xucucun wari' co om howa nanapa' ne. Ca' na toton pain capijacon Iri' Jam iri inonon ne, pijim' joc mam' mi' e' inonon pain oro ca pijim' wa. Ma' ta hwet pin ne ca xirao' pe nucun profeta cara pane. Ca' na con pane:

Querec paxi' nana,

ane om querec pin' caca ne.

Taraju taraju paxi' nana,

ane om taraju pa' caca quem ne.

Ac i ma' na ca xirao' pe nucun profeta cara pane ta na ca tomi' tococwa ma'.

11Tomi' xo' ac tococwa na: Ca' na ca tomi' mao ne ca pijim' ne ca', pain ca pijim' joc mam' mi' xuhu' con wari' co wixicaracao' nain tocwi trigo pain totacon ma'. Tocwi trigo ma', tomi' joc mam' mi' nain capijacon Iri' Jam. 12Carawa ca ara nain tocwi ca camara' to nain cacarain wana ma', pain ca itac pin nein oro wijimain me ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Maqui' na Caxicon Jam, cut ca' ac tococwa na pain capijacon Iri' Jam ca wixicaracao' mi' wa pain ximicocon. Ma' ta om howa hwein ta tata, ma' ta om to' witan ca' cuhu' pain ca caracat nuhu' Iri' Jam ta tata. 13Carawa ca ara nain tocwi trigo ca camara' to nain pacun ma', tomi' joc mam' mi' nain carawa ca ara nonon oro wari' co tomi' querec te paxi' nanain capijacon Iri' Jam pain ca xo' taraju cacain ma'. Ane om tomi' querec te cara cacain ne. Tomi' joc mam' mi' nanain pana ca om corom mip caximain pain macan' ma', om ca corom mao nein ximicocon capijacon Iri' Jam. Howa howa ca' nanain, maqui' iri na carawa ca to' i'ina nonon ne, quep em' iri nonon oro wari' pain ca howa cacain capijacon Iri' Jam ma' ne, an to pin ac cacain na ca howa wa. 14Carawa ca ara nain tocwi trigo ca camara' to nain pi ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Pain pin iri na ne, ma' ac ne na oro ca to' i'ina nonon. Win ne tocwi trigo pain ca mo' nein pi ma', ac i ma' na ca to' i'ina tococwa ma'. Toron toron na ximicocon, coromicat ni ca' ac cacain na capijacon Iri' Jam, win xumu win xumu ac cacain na oro caramaji macan' je oro ca param ximama' nucucun ca mam' tomi' querec te caca ma' quem. Om ca horon tiquin' caca pain ca howa nucucun. 15Carawa ca ara nain tocwi trigo ca camara' to nain macan' ca awi ma' iri na ne, tomi' joc mam' mi' nain carawa ca ara nonon oro wari' co taraju nanain capijacon Iri' Jam ma', co an to xo' nanain pain ximicocon ma' quem. Ac ca mi xo' caca na pain ca howa nucucun. Win ne tocwi trigo ca mi xo' ma'. Xumu xo' nana, tomi' ha' nana quem. Querec pin' ac tococwa na pain ca howa cara nucucun ma' quem na ca tomi' xo' tococwa pain ca pijim' joc mam' mi' tococwa con wari' co wixicaracao' nain tocwi trigo pain totacon pane.

Ca pijim' joc mam' mi' tococwa pain naran

Marcos 4.21-25

16Noro jun wari' co tom nain naran ma' quem ac tococwa na. Om ca tatep pa' ca pain tapaxi'. Om ca an corom pe ca pain tequipain tapit quem, om na. Tom an hwet pe na pain maxinain, ma' ta toha mi' tococwa oro wari' co corom nanain xirim ta na. 17Je ca tomi' xuhu' ca' ac tococwa na. Oro ca pijim' ne ca', ca om taraju pa' hwe pain ca pijim' mi' xuhu' con Iri' Jam ca', ac ca joc xim xihwe pain paxi' na pain xocori ca'. Ame hwe e', main mi' turuhu' pain ca taraju pa' wa Iri' Jam. Oro ca pijim' ne ca om taraju pa' hwe pain xocori ca', main tomi' xo' turuhu' pain. 18Je ca tomi' ca' xuhu' ca': Taraju wet jein ca tomi' xuhu' ca'. Wari' co taraju wet ma', co taraju pa' xo' nain ca taraju nucun ma', mi' hwara' mami' ac tocwa tara pain ca taraju pa' wa. Wari' co om taraju wet ma' iri na ne, co om taraju pa' xo' nain ca taraju nucun ma', an ca' ac tocwa tara pain wijimain ca taraju pa' nucun ma' quem na ca tomi' tococwa ma'.

Ca tomi' xun Jeju ta cama jicon cocon xurucun

Mateus 12.46-50; Marcos 3.31-35

19Mo querec xun e' ac cama na jicon cocon xurucun. Hwet xun paxi' nonon, ane om wixicam ac cocon ne. Xi mija ara caca oro wari' co coco' coco' mam' nonon ta. 20Hwet to nana xerem cam jim ta Jeju ac con na wari' ma'. Tomi' xim nenem ta na ca tomi' con ma'.

21Tomi' pan ac ca na Jeju: Oro wari' co howa nanain capijacon Iri' Jam ma', co tomi' ha' nanain quem, wiricacam co na' ta' ta, wiricacam co xere ta' quem na ca tomi' ca ma'.

Ca tomi' om pin cain camana' Jeju

Mateus 8.23-27; Marcos 4.35-41

22Maqui' ac ne na xec pain ca tomi' ca' cocon co taxipa' ca Jeju ma': Maji pan horoho mama' xin xijein cacarain com cain e' ac ca na, piton to ac cacain na mam' horoho wa, pan horoho mama' ac caca na. 23Pain ca pan horoho pan caca co taxipa' ca ma', pi'am ac ca na Jeju. Maqui' pa' ac cocon na camana' ca nuru mip tamana quem. Wap tamana na com ta. Moin' pin tain na mam' horoho nucucun com ira. Cono' pin xi' nana ira. 24Ho' querec xun ta ac cocon na co taxipa' ca ma', ho' querec ac cocon na quem. Taramaxicon co ca' na taxipa' capijacon Iri' Jam! Cono' pin xi' urut ta Taramaxicon nuxut na ca merem cocon ma'.

Querec ac ca na, tequi' pe ac ca na, tomi' in pin ac cain na camana' pain ca wap tamana nein com ma'. Nuru nuru om pin ac ne na camana', wap wap om pin ac ne na com quem. Tacana pe tacana pe pi' pin ac ne na. 25Para om howa mahu' quem ac tococwa na.

Jin' tamana nana ta. Wa wa nonon quem. Cain' cain' ca co cwa' ne ta? Tomi' ha' ximao non oro carawa ra? Tomi' mip iri nain hotowa pain com ne, tomi' ha' ac con na quem na ca tomi' xucucun.

Ca quep xio pin tocwa wari' co corom pe ho' non caxicon jam

Mateus 8.28-34; Marcos 5.1-20

26Pan horoho pan horoho hwet ac cacain na macaracocon oro wari' nein Gerasa ma', ca pe nain xijein cacarain cote ne com ma'. Pe in qui' na macarain Galileia, pe in mao ac ne na macaracocon oro wari' nein Gerasa. 27-28Piri' mao iri na Jeju ne, hwet qui' ac ca na wari' co corom to ho' nonon oro caxicon jam. Win ma' ne paxi' nonon oro wari' nein cidade ma', ane pe ximao pan ca ne. Wara pain na ca om pe mami' ca wom. Om ca pe cain xirim, pe taxipa' nain oro manain pacun ca cut corom to tococwa co cono' nana ma'. Querec iri non Jeju ne, merem ac ca na, xut cam' ac con na, pe torotop mi' ac con na pain caximacon. Merem mip na. Cain' cain' xim mapa' quem Jeju Panxica Iri' Jam co Iri' Taramaxicon pan? Ta quep em' mapa' me ta, tomi' mip inem ta na ca merem mip con ma'. 29Xi wara tomi' mip ara con caxicon jam Jeju ta. Hwet ca' jun co cwa' ta, ac i ma' na ca tomi' mip con caxicon jam nucun. Mija ara xi' na ca quep mip ho' quep mip ho' con caxicon jam nucun ta. Oro wari' ma', quep xun paxi' nonon, pao' pe paxi' nonon pain oro arain too ma', pain caximacon pain micon ma'. Ane cuc tapiripit cain ne. An mao an mao ac con na caxicon jam nucun pain ca om pe ca wari' ma'.

30Tomi' querec pan ac con na Jeju: Cain' cain' ne wuxum quem non.

Om na, Legião napa' wuxu ta ac ca na#8.30 Ca Legião wa ma', ma' na ca tomi' mao nein. Ca mija urut ta na ca tomi' mao nein. Ac i ma' na ca o' ma' cocon oro wari' ma', xi om ne ca mija ara caca oro caxicon jam co corom to ho' nonon ta.. Ac i ma' na ca wuxu mao ca, xi om ne ca mija ara caca oro caxicon jam co corom to ho' nonon ta. 31Jain jain nana caxicon jam nucun ma', pain ca tomi' mip cocon Jeju ma'. Ta tomi' hwerehwet mama' maparut pain cote ne man ca om tawirinain cain, ca quep em' pe toton caparut Iri' Jam ta nonon.

32Cao' to nain i ma' caji mijac ma'. Mija na caji mijac. Iritocwinain ta. Cao' to nain ca tamaja ne macan'. Jain jain ac caca na oro caxicon jam co corom to ho' nonon wari' ma'. Mama' jein caji mijac ma' xut me. Ma' ta corom hwet urut pain ta na ca tomi' mip cocon Jeju.

Mama' jein ta ac tococwa na. 33Hwerehwet ca' ac cocon na, corom hwet ac cacain na caji mijac ma'. Tamanain to pin ac ne na, jein quiji' mama' ac nein na ca tamaja ne macan' ma', jein jein, wara ca' na com ma', pan corom mama' ac ne na, cono' cono' pi' pin ac ne na quem.

34Caram ma' co querec wet nanain caji mijac ma', querec iri nanain caji mijac pain ca cono' cono' pi' pin ne ne, jein mama' ac caca na, tomi' hwet ac cocon na oro wari' co to nanain cidade, wiricoco oro co to nanain oro xitot ma' quem. Tomi' hwet nonon pain oro carawa ca ara ne ma'. 35Maji querec xi' e' ac caca na. Jein hwet iri nonon Jeju ne, querec ac cocon na co awi pin ma', xi om ne ca tomi' jein pin ara tococwa oro caxicon jam nucun ma'. Xao pe ho' nain caximacon Jeju. Pe pin na wom. Tamanain tamanain om pin na. Jin' pin ac caca na. 36Caram ma' co querec nanain ca ara ca Jeju ma', pain ca quep xio pin con co corom to ho' nonon caxicon jam ira, tomi' hwet ac cocon pain na co xo' maqui' nana ma'. 37Taraju iri nana oro wari' ne, jain jain ac caca na, mao ra, paca' rain macaraxut ca' ac cocon na Jeju. Tomi' mip ac i ma' nonon, xi om ne ca jin' tamana ara caca ta.

Na ra ac ca na Jeju, maji in mama' xi' e' ac ca na, piton to ac cacain na mam' horoho wa, horoho in mama' ac cacain na xijein cacarain cain.

38Wari' co awi pin ma', xi om ne ca tomi' jein pin ara tococwa oro caxicon jam nucun ma', jain jain na, hwet xim ta paxi' non Jeju ma', ane tomi' in pin pan tocwa ne. 39Om na, in mao rain xurum, tomi' hwet roron oro wari' nem ma'. Tomi' hwet roron pain oro ca ara mi' quem Iri' Jam ca', pain ca quep xio pin quem ca' na ca tomi' con ma'.

In mao ac ca na, tomi' hwet tomi' hwet pi' pin ac tococwa na oro wari' co to nanain cidade. Xiram pa' napa' Jeju ta, quep xio pin napa' ta na ca tomi' tococwa ma'.

Ca quep xio pin cam narima' Jeju, je pain ca to' e' mami' cam pije' quem

Mateus 9.18-26; Marcos 5.21-43

40Pan horoho in mama' ac cacain na xijein cacarain com Jeju cocon co taxipa' ca ma'. Piri' mama' iri nana ne, mija nana wari' co winim' nonon. Tomi' querec te nonon quem. 41Maqui' ac ca na wari' co querec wet nonon oro win judeu ca pain xirim ca cut in to xucucun ma'. Jairo na wixicon. Xut hwet ac con na Jeju, pe torotop mi' ac con na pain caximacon. Tomi' ac con na, jain jain na pain ca tomi' mip con ma'. Hap ra, ja' ja' ne pain xuru me non. 42Hap ra non Jeju, xi caxi ara cama panxica ta. Xica' pe na panxica, om na xerequem. Ac ca ma' 12 ne na cawaxi' nequem. Mi' pin ta' na ira. Je ca ja' ja' ne pain xuru con Jeju ma'. Ma ac ca na, hwet ac con na quem.

Mija nana wari' co ja' ja' nonon pain wana ma'. Xao xao tamana nonon. 43Pe nain i ma' narima' co ao tamana ma' quem. Ma' 12 na cawaxi' pain ca ao tamana cama. Pi' ca' paxi' nam dinheiro pain ca pagar cocon oro doutor ma', ane om aramao xio taxi' cacam ne. 44Hwet ac con na Jeju pain waracon, quep ac camain na cacaracon womicon. Ane ane ao ximao ao ximao om pin ac cama na ta.

45Ma' co quep napa' quem ac ca na Jeju.

Om ina, om ca quep xim ta nana oro wari' ma', tomi' ac i ma' tomi' ac i ma' pi' pin nana. Je ca tomi' pan con Pedro ma': Cain' cain' xima quem Taramaxicon co ca' na taxipa' capijacon Iri' Jam? Mija nana wari' co xao xao nenem cwa' non.

46Om na, ma' na wari' co quep napa'. Taxi' xije pain ca mam' to' xio pin ton wari' pain ca hwara' opa ne ta na.

47Taxi' pin iri xequem narima' ma' ne, pain ca om joc xa ac con Jeju pain ca quep camain cacaracon womicon ma', jin' ac cama na, cocoroc na pain ca jin' nequem. Xut hwet ac con na, pe torotop mi' ac con na pain caximacon. Om na, wata' co quep nain cacaracon womum. Ma' ta xio ta' pum inem ira. Quep pin iri inon womum ne, xio hap pin ac ta' na ta, ac i ma' na ca tomi' hwet con ma'. Taraju taraju pi' pin nanam oro wari' pain ca tomi' hwet con ma'.

48Tomi' ac cam na Jeju: Xio pin ma ta arain, xi om ne ca howa ara mapa' pain ca quep xio taxi' ta' ca' nam. In mao ra. Ta toron mami' ne xumum me ta na ca tomi' cam ma'.

49Tomi' tomi' wet nam narima' ma', maqui' ac ca na wari', maqui' nain xiricon Jairo ma', co querec wet nonon oro win judeu ca pain xirim ca cut in to xucucun ma'. Mi' pin na panxima ta ac con na. Ta hap ra mami' mon Taramaxicon co ca' na taxipa' capijacon Iri' Jam me ta non.

50Taraju na Jeju ma'. Tomi' ac con na Jairo: Ta jin' ma me ta. Howa e' ne pain ca quep xio taxi' tam ca'. Xio pin ac cama tara ta non.

51Hwet pin iri nanain xiricon Jairo ne, corom xi' e' ac tococwa na co taxipa' ca ma', wirico Pedro con João con Tiago ma'. Wirico cote cama pije', wiricam jicam ma' quem, corom hwet xim e' ac cacam na quem. Narain ho' tata pain ca corom wa oro xucucun wari' co ja' ja' nonon ma'. 52Awaran tamana nana oro wari' co to nanain i ma'. Ta awaran hwe me ta ac tococwa na. Om ca mi' pin cama. Pi'am e' na, ac i ma' na ca tomi' tococwa ma'.

53Tatam' tatam' pi' pin ac cocon na, tomi' ximama' nonon quem. Xi taxi' ara cacam pain ca mi' pin cama ta. 54Ane quep cam pain micam ne. Tomi' ac ca na: Tequi' pe ra ta pije' na ca tomi' cam ma'. 55E' mami' ac cama na, tequi' pe hap ac cama na. Mi' jem pain carawa ca cao' wa ta ac tacacama na quem. 56Wa wa na cote ca cam jicam ma'. Ane tomi' tacacama ne: Ta tomi' hwet huhun pain oro wari' me ta, ta tomi' hwet huhun pain ca to' e' mami' tam ta tata.

Currently Selected:

Lucas 8: TBPN

Highlight

Copy