Mateus 12

Ca tomi' em' cacaparut oro fariseu pain ca om xao to wa urut pain xumuxut pain sábado

Marcos 2.23-28; Lucas 6.1-5

1Om ca pain homa ne, maqui' ac ne na xec nein ca xao to wa urut pain xumuxut, pain sábado ma'. Maji ta ac caparut na Jeju, xuruxut mama' ac urut pain na totain trigo. Warut pain ca taxipa' urut con ca', pe' ac urut na quem. Je ca caracat urut pain xirinain trigo ma'. Caracat urut pain, cao' ac urut pain na tocwi. 2Ma' nana oro fariseu co querec nanaparut pain ca caracat urut pain quem. Taramaja nana ra ac xucucun na, tomi' ac cocon na Jeju: Noro roron co taxipa' ma ma'. Taramaja nana pain sábado ca', pain ca caracat cacain xirinain trigo ma'. Tomi' caho' ara xi' napari' ca xirao' nucun Moisés pain ca taramaja wa pain sábado ta nonon.

3Om na ta ac ca na Jeju. Om ca noro hwein capijacon Iri' Jam ra, pain ca pijim' xine ca ara ca taramaxicon Davi cara pane, pain ca pe' qui' ca Davi cocon oro win ma' ca pane? 4Corom mao nain xiricon Iri' Jam pane, cao' ac cain na capam' ca an toco' mi' tocwa Iri' Jam. Cao' wi na cocon oro win ma' ca quem. Tomi' caho' paxi' tata pain ca cao' wa, xi xica' to tatara oro sacerdote co cao' nanain ta ara ne ca xirao' nucun Moisés ta. 5Ac i ma' na cocon oro sacerdote ma' quem. Om ca noro hwein ca xirao' nucun Moisés pain ca pijim' qui' tococwa oro sacerdote pain ca taramaja to cacain xiricon Iri' Jam pain sábado quem ra? Tomi' caho' paxi' tata oro wari' pain ca taramaja wa pain sábado ma', ane om tomi' em' tococwa oro sacerdote pain ca taramaja caca pain sábado ne. 6Je ca tomi' xuhu' ca' ac tococwa na. Ma' pin ina. Wata' co hwara' opa cwa', pain ca iri' taramaxicon ta' ca'. Taramaxicon hwara' opa tiquin' ca' inonon oro co tomi' mi' nunuhu' pain oro coximinain xiricon Iri' Jam ta. 7Noro jein ca tomi' nucun Iri' Jam pain capijacon ca'. Ca' na con:

Param inuhu' pain ca xiram pa' huhun oro wari'.

Noc inuhu' pain ca tom tain' mi' e' mahu' pain carawa nuhu' ta.

Ac i ma' na ca tomi' ca Iri' Jam pain capijacon. Mo xi taraju pa' hwein ca tomi' nucun ca', om xi tomi' em' huhun co taxipa' ta' cwa'. Xi em' caca ta na ca tomi' tococwa ma'.

8Je ca tomi' xuhu' ca' ac tococwa na. Taramaxicon ina. Wata' pain ca Iri' Wari' ta' ca', Taramaxicon pan ina. Wata' co tomi' xo' nuhu' pain oro ca ara xi' hwe pain sábado quem na ca tomi' tococwa ma'.

Ca quep xio pin tocwa wari' co xirac micon

Marcos 3.1-6; Lucas 6.6-11

9Mao ta' ta ac ca na Jeju, mao ac cain na xirim ca cut in to xucucun ma'. 10Pe nain i ma' wari' co xirac micon ma'. To nanain i ma' oro fariseu co tocojin' nonon Jeju quem. Ja' noro nonon. Je ca tomi' querec cocon ma': Hohot tara pain ca quep xio wa pain sábado ra? Om ca tomi' caho' capari' pain Iri' Jam ra na ca tomi' cocon ma'.

11Tomi' ac tococwa na: Am ma' ca win ma' nuhu' co wina nain ovelha ma'. Cain' cain' ta' ca pain ca pan' mao nein man ovelha nucun pain sábado ma' quem? Om ta taramaja ca ra? Om ta an hwet tain cain ra? 12Je ca tomi' xuhu' ca': Hohot paxi' na pain ca quep xiho' xine ovelha ma', ane hohot tamana pan ne pain ca quep xiho' tocwa wari' ne. Je ca taxi' xin i ca': Hohot na pain ca ara xin ca awi wa pain sábado ta. Om ca tomi' caho' capari' pain Iri' Jam ta ac tococwa na.

13Tomi' ac con na co xirac micon ma': Coc matam rain mum ma' ta non. Coc matam ac cain na, awi pin ac ne na con. Ac wirain pin na, awi pi' pin na con.

14Hwerehwet mama' ac caca na oro fariseu ma' quem. Tomi' xo' xijexi' ta, ma' ta to' pa' pin xun Jeju ta xucucun.

Ca wata' ne co wara tomi' pe pin ca Iri' Jam pane ta ca Jeju

15Taxi' nonon oro fariseu Jeju quem. Taxi' nonon pain ca to' pa' pin xun cocon ma'. Je ca mao ni ca' tococwa ma'. Ja' ja' ac cocon na oro wari'. Mija nana co ja' ja' nonon. Quep xio quep xio xam' ac tococwa na quem. 16Tomi' mip ac tococwa na: Ta tomi' hwet mahu' cocon oro wari' me ta tata.

17Quep xio pin tata oro wari', ma' ta hwet pin ne ca wara tomi' pe ca profeta Isaías cara pane, pain ca xirao' pe cain ca tomi' nucun Iri' Jam pane. Ca' na con:

18Noro jun wari' ne co tora' ta' cwa', co taramaja mi' napa' cwa'.

Om ca noc ton.

Hohot tamana napa'.

Mi' ton pain Tamatara.

Pijim' totoron oro wari' pain oro xijein macan'.

Oro wari' co om judeu nana ma', tomi' hwet pan ac tococwa tara pain ca ara xo' ne ca',

pain ca main wap ton toton oro wari' co pan teretem nana ma'.

19Om ta tomi' mana' ca,

om ta merem ca,

om ta xec xec ca,

om ta tomi' ximao pe cain oro wanaji cidade.

20Om ta tomi' mana' cocon co naro nana ma',

co an xiho' e' nanain taparain pana ca torotop xat ma',

co an xiho' e' nanain naran ca jo' pin ta' ma'.

Taramaja ac i ma' tara.

Taramaja taramaja maqui' pa' ac con tara xec nein ca to' quiji' pin tain cain oro ca om awi wa.

21Howa ac cocon tara oro wari' co to nanain oro xijein macan' ma' quem.

Ac i ma' na ca xirao' pe ca profeta Isaías con Jeju pain cara pane ta.

Ca tomi' napat cocon Jeju pain ca wirico Caxicon Jam co mi' nem pain ca hwara' opa nem ta cocon pane

Marcos 3.20-30; Lucas 11.14-23

22Ma' ac caca na wari' co o mi' nonon con Jeju wari' co corom pe ho' non caxicon jam. Om na tocon, om na capijacon quem. Quep xio pin ac con na Jeju. Tomi' pin ac ca na, querec pin' ac ca na quem. 23Wa wa ac cocon na oro wari' co querec nanain i ma'. Winacon Davi tara co cwa' ra, co wara tomi' pe ca Iri' Jam pane ra? Wirico tara ra nonon.

24Taraju iri nonon oro fariseu ma' ne, tomi' ximama' ac cocon na Jeju: Om na, om paxi' na ca hwara' opa pan ca pain ca tomi' jein pin cocon oro caxicon jam ta. Wirico Belzebu ma', co taramaxicon nucucun oro caxicon jam ma', wirico co mi' non pain ca hwara' opa nucun. Je ca ha' con pain ca tomi' jein pin cocon oro caxicon jam ta na ca tomi' ximama' cocon ma'.

25Taxi' nain ca coromicat nucucun Jeju quem. Tomi' ac tococwa na: Noro jujun oro wari' co to ho' xucucun pain macaracocon ma'. Mo ta mana' caracan xucucun, to' quiji' pin ac xucucun na, om pin ac caca na quem. Ac i ma' nana oro wari' co to ho' xucucun pain cidade nucucun ma', wiricoco co nari xucucun ma' quem. To ho' paxi' xucucun, nari paxi' xucucun. Mo ta mana' caracan xucucun, noc pin ac xucucun na, to ho' to ho' om pin ac xucucun na quem. 26Ac i ma' na con Caxicon Jam cocon oro win caxicon jam ca ma' quem. Mo xi mana' caracan xucucun, mo xi tomi' jein pin caracan xucucun, ma' xira ca hwara' opa cara ac caca quem ra? Om na. To' om pin ac xucucun xira pain ca hwara' opa nucucun. 27Tomi' ximama' ca' mahu': Wirico Belzebu co mi' nem pain ca hwara' opa wa, je ca ha' quem, pain ca tomi' jein pin momon oro caxicon jam ta mahu'. Cain' cain' caca oro win ma' nuhu' ma' quem? Ma' co mi' nonon pain ca hwara' opa wa quem? Para ha' cocon pain ca tomi' jein pin cocon oro caxicon jam ma' quem? Je ca tomi' xuhu' ca', tomi' ximama' hwe ta pan nunuhu' oro win ma' nuhu' pain ca tomi' ac i ma' mahu' ta. 28Ane mi' pan capa' pain ca hwara' opa wa Tamataracon Iri' Jam ne. Je ca ha' capa' pain ca tomi' jein pin toton oro caxicon jam cwa'. Je ca to' querec pin' pan cuhu' pain ca maqui' pin ne xec nein ca taramaxicon pe ho' pin cuhu' Iri' Jam ta na ca tomi' tococwa ma'.

29Je ca tomi' xuhu' ca' ac tococwa na. Noro jun wari' co cut noc xa tain nain caramaxicon waximain xirim co hwara' opa ma'. Ha' toron pain ca cut noc xa e' cain caramaxicon pain ca om pao' pe querec con ra? Om ta ha' con. To' pa hot pin iri tarain manain xiricon ne, pao' pe ac con tara waximain, ha' pin ac con tara pain ca cut noc xa pi' pin cain caramaxicon#12.29 Pain ca pijim' joc mam' mi' tococwa con wari' co hwara' opa ma', co hwara' opa tiquin' ca' non wari' co cut noc xa tain nain caramaxicon ma', tomi' xo' ca' tata: Wara to' quiji' pin inon Caxicon Jam, xi om ne ca hwara' opa tiquin' ca' ara ton ta. Je ca ha' capa' pain ca tomi' jein pin toton oro caxicon jam co corom to ho' nonon oro wari' ta na ca tomi' xo' tococwa ma'..

30Wari' co om xin ne nain ca tomi' ne ca', wirico co noc napa'. Wari' co om quep xiho' napa', wirico co to' i'ina napa' pain ca taramaja ne quem. 31Je ca tomi' xuhu' ca': Oro wari' co pan teretem nana ma', co ara nanain oro xijein ca caracat wa ma', oro wari' co tomi' napat nonon Iri' Jam ma' quem, xic am pin ac xine tara ca caracat nucucun. Wari' co tomi' napat nain Tamataracon Iri' Jam ma' iri na ne, om ta xic am pin xine ca caracat nucun ta. 32Wari' co tomi' napat napa' pain ca Iri' Wari' ta' ca' quem, xic am pin ac xine tara ca caracat nucun#12.32 Pain ca tomi' ac i ma' ca Jeju ma', tomi' mi' non wari' co cwirin' pin nain ca caracat nucun. Cwirin' pin iri nain ne, xic am pin ac xine na ca caracat nucun. . Wari' co tomi' napat nain Tamataracon Iri' Jam ma' iri na ne, om ta xic am pin camain' xine ca caracat nucun ta. Om om tara, om tara pain oro xec nexi' ca', om om tara pain oro xec ca maqui' ta' ma' quem na ca tomi' tococwa ma'.

33Noro jein panaji memem ma' quem ac tococwa na oro fariseu. Panaji memem ca awi ma', wina awi na. Panaji memem ca om awi ma' iri na ne, wina pan tem na quem. Xac querec iri xine winain ne, querec pin' ac xine na panaji pain ca awi nein, je pain ca om awi nein quem. 34Je ca tomi' xuhu' ta oro caxicon em'. Ma' tara ca awi ac ne ca tomi' nuhu' pain ca om awi pan nuhu' ra? Carawa ca coromicat taxipa' hwe pain iri' xumuhu' ma', je ca tomi' hwet hwe pain capijahu' ma' quem. 35Noro jun wari' co awi ca coromicat nucun ma'. Ac ca cut toco' xo' cain na ca awi ne capijacon pain ximicon, an hwet ac cain na pain ca tomi' nucun. Wari' co om awi ca coromicat nucun ma' iri na ne, ac ca cut toco' xo' cain na ca om awi ne capijacon pain ximicon, an hwet ac cain na pain ca tomi' nucun quem.

36Ane tomi' pan xuhu' pain i ca' ne, tomi' iri'o' inuhu' ta ac tococwa na. Maqui' iri tara xec nein ca wap toton oro wari' pain ca caracat nucucun ta na Iri' Jam ne, tomi' ac tococwa tara: Para tomi' ximama' hwe pane, tomi' hwet xine pain oro ca tomi' ximama' nuhu' cara pane, ac i ma' tara ca tomi' tococwa. 37Wahu' pain i ma' quem, mo ta hohot ne ca tomi' nuhu' pain ca e' e' wet nuhu' ca', tomi' ac cuhu' tara: Hohot hwe, xi om ne ca hohot ara ne ca tomi' nuhu' pane. Mo ta om hohot ne ca tomi' nuhu' pain ca e' e' wet nuhu' ca', tomi' ac cuhu' tara quem: Om ca hohot hwe, xi om ne ca tomi' ximama' ara hwe pain ca e' e' wet nuhu' pane, na e' na pain ca mama' hwein xe ta, ac i ma' tara ca tomi' cuhu' ta na ca tomi' tococwa ma'.

Ca ara rain oro ca to' querec pin' naparut pain ca pe ho' quem Iri' Jam ta cocon Jeju ma'

Lucas 11.29-32

38Ma' ac caca na oro fariseu cocon oro co ca' na taxipa' nanain ca xirao' nucun Moisés ma', tomi' ac cocon na Jeju: Tomi' xim urut pum ta Taramaxicon co ca' na taxipa' capijacon Iri' Jam. Ara rain carawa ca to' querec pin' naparut pain ca pe ho' quem ca hwara' opa nucun Iri' Jam ta. Querec xixi' na urut pain pum ta nonon.

39Wa inuhu' me ac tococwa na. Wahu' pain ca wari' nuhu' pain oro xec nexi' ca', caracat tamana hwe. Xi howa camain' hun Iri' Jam ta. Ara rain carawa ca to' querec pin' naparut pain ca pe ho' quem ca hwara' opa nucun Iri' Jam ma' mahu' ra? Om ta ara tain pahu'. Xica' pe tara Iri' Jam co ara tain nain. Ame hwe e', carawa ca ara ta' ca ca', an xiho' tarain carawa ca ara non profeta Jonas cara pane, co tomi' hwet nain capijacon pane. 40Win ne pain ca corom pe cain moji cote ne hwam Jonas cara pane. Ma' 3 na xec, ma' 3 na xim quem, pain ca corom pe cain moji cote ne hwam con Iri' Jam pane. Ac i ma' ta' pain ca Iri' Wari' ta' ca' quem. Corom pe tain macan'. Ma' 3 tarapa' xec, ma' 3 tarapa' xim quem, pain ca corom pe tain macan' ta. 41Ame hwe e'. Main maqui' tara xec nein ca wap xim cuhu' pain ca wari' nuhu' ta napari' Iri' Jam pain oro xec nexi' ca'. Wap xim iri turuhu' pain oro ca caracat nuhu' ne, coco' ja' pan ac cucuhu' tara oro wari' nein Nínive cara pane. Tomi' em' ac cucuhu' tara: Em' nana caram cwa' ta tuturuhu'. Tomi' ac i ma' tatara, xi cwirin' pan ara caca pain ca hu qui' cocon Jonas pane. An to pin ac cacain na ca caracat nucucun pane. Je ca tomi' xuhu' quem: Je xi cwirin' qui' hwein ca hu pan xuhu' pain xocori ca' quem? Xi hwara' opa tiquin' ca' ara ton Jonas cara pane. Hwara' opa tiquin' ca' ton ca' ira inuhu' ta na ca tomi' tococwa ma'. 42Ac i ma' tara cam pacara pane quem, co taramaxicon pe ho' nonon oro wari' nein Sabá cara pane#12.42 Narima' na taramaxicon nein Sabá cara pane. ac tococwa na. Main maqui' tara xec nein ca wap xim cuhu' Iri' Jam pain ca wari' nuhu' pain oro xec nexi' ca'. Wap xim iri turuhu' pain oro ca caracat nuhu' ne, xat ja' pan ac cuhu' tara taramaxicon nein Sabá cara pane, tomi' em' ac cuhu' tara: Em' nana caram cwa' ta turuhu'. Tomi' ac i ma' tara, xi maqui' ara camain iri' pira pain ca taraju wet ton con Salomão co taxi' tamana pane. Je ca tomi' xuhu' quem: Je xi taraju wet qui' mahu' pain ca tomi' pan xuhu' pain xocori ca' quem? Xi taxi' tiquin' ca' ara ton Salomão cara pane. Taxi' tiquin' ca' ton ca' ira inuhu' ta na ca tomi' tococwa ma'.

Ca in hwet con wari' caxicon jam

Lucas 11.24-26

43Tomi' xun caxicon jam co corom pe ho' non wari' ma' ac tococwa na. Hwet ca' iri non ne, xut ximao e' ac cain na mahweri ca om pe ne com. Xao pe wa tain xumu paxi' na. Noro noro, om iri na ca mam' cain ca xao pe wa pe ne ximicon ne. 44In hwet ton wari' co wara corom pe ho' ta' cara pane ac xucun na. In hwet iri non ne, tomi' querec te ac ca na. Awi na curucun co cwa' ta, ac xirim ca awi tamana, ac xirim ca ton ho' awi tequipain ta na co cwa' ta. Om na xucun jam co corom pe ho' non quem ac xucun na. 45Hwet mao mami' ac ca na, o qui' 7 ac tococwa na oro win caxicon jam ca co om awi camain' nana ma'. Maji ta, corom to ho' xun co cwain co wara corom pe ho' ta' pane ac tococwa na, corom to ho' pin ac cocon na quem. Pan tem paxi' na caxicon jam co o pan nonon oro win caxicon jam ca ma', ane pan teretem tamana pan caca co o qui' ca ma' ne. Ximin tamana pin ac ca na wari' pain ca corom to ho' cocon ma' quem. Ca ma' xica' pe qui' con caxicon jam pane, amon ximin pije' paxi' na ira. Pain ca ma' mija pin cocon ma' iri na ne, ximin tamana pin ac ca na quem. Je ca tomi' xuhu' pain ca wari' nuhu' pain oro xec nexi' ca' ac tococwa na. Main ac i ma' turuhu' Caxicon Jam quem. Wara ximin paxi' hwe. Ame hwe e', main to' ximin mip pin turuhu'. Xi cwirin' hwein ca caracat tamana nuhu' pain ca om howa mahu' ta na ca tomi' cocon oro wari' Jeju pane.

Ca tomi' xun Jeju ta cama jicon cocon xurucun

Marcos 3.31-35; Lucas 8.19-21

46Tomi' tomi' wet iri nonon oro wari' Jeju ne, maqui' ac cama na jicon cocon xurucun. Hwet to nana. Tomi' xun Jeju ta ac cacama na. 47Hwet to nana xerem cam jim ta Jeju ac con na wari' ma'. Tomi' xim nenem ta na ca tomi' con ma'.

48Ma' co na' ta' quem? Ma' co xere ta' quem? Ac i ma' na ca tomi' querec con ma'. 49Xiximi' ac caparut na pain ca taxipa' urut con ca'. Wiricacam caram cwa' co na' ta' cwa', co xere ta' cwa' quem ac ca na. 50Je ca tomi' xuhu' ca' ac tococwa na. Oro wari' co ara nanain ca param nucun Te co pe pawin cain, wiricacam co xere ta' ta, wiricacam co na' ta' quem na ca tomi' caparut pane.

Currently Selected:

Mateus 12: TBPN

Highlight

Copy