Mateus 16
16
Ca ara rain carawa ca to' querec pin' naparut pain ca pe ho' quem Iri' Jam ta cocon Jeju
Marcos 8.11-13; Lucas 12.54-56
1Xuruxut hwet ac cocon na Jeju oro fariseu cocon oro saduceu. Tomi' querec xun ta nana. Am iri'o' ca, am om iri'o' ca quem nana. Je ca tomi' cocon ma': Ara rain carawa ca to' querec pin' naparut pain ca pe ho' quem ca hwara' opa nucun Iri' Jam ta nonon.
2Ane tomi' in pin tococwa ne. Cain' ca tomi' hwe pain ca querec hwein nanawin pain irawin quem? Mo ta awi tamana ne nanawin pain ca corom mao ta' ca xina ma', tomi' ac hwe na: Xec awi tara xina ta ac hwe na. 3Xec iri na ne, pain iri' xo' xec ma', mo ta mixem ne nanawin ma', tomi' ac hwe na: Pan' ta' na xowi' pain xec ca' ac hwe na quem. Je ca tomi' xuhu' ca' ac tococwa na. Noro iri hwein nanawin ne, querec pin' ac hwein na ca awi ca xina je pain ca pan' ta' ne xowi' ma'. Je xi querec pin' hwein carawa ca ara ta' pan ca Iri' Jam pain macan' ca' quem? 4Wa inuhu' me ac tococwa na. Wahu' pain ca wari' nuhu' pain oro xec nexi' ca', caracat tamana hwe. Xi howa camain' hun Iri' Jam ta. Ara rain carawa ca to' querec pin' naparut pain ca pe ho' quem Iri' Jam ma' mahu' ra? Om ta ara tain pahu'. Xica' pe tara Iri' Jam co ara tain nain. Ame hwe e', carawa ca ara ta' ca ca', an xiho' tarain carawa ca ara non Jonas cara pane#16.4 Noro xin Mateus 12.40. Tomi' non Jonas cara pane, pain ca ma' 3 ne xec pain ca corom pe cain moji cote ne hwam pane. Ac i ma' ta' pain ca ma' 3 xim capa' xec pain ca corom pe tain manain pacun ta na Jeju quem. .
Mao ta' ina ta ac tococwa na, mao ac ca na quem.
Ca pijim' ximama' nucucun oro fariseu cocon oro saduceu
Marcos 8.14-21
5Maji ta ac urut na pain ca taxipa' urut con Jeju cwa', pan horoho mama' ac urut na pain xijein cacarain com. Om ca cut mam' urut pain capam'. Ji'am pin urut pain.
6Ma' tara xumuhu' me ac caparut na Jeju. Ein jein ca to' memerem nein capam' nucucun oro fariseu cocon oro saduceu ta naparut.
7Na ra ac urut na. Xi cut mam' xin capam' ta, je ca tomi' ac i ma' capari' ca' xujuxut.
8Taxi' naparut Jeju quem, taxi' naparut pain ca tomi' ac i ma' xujuxut. Para tomi' ac i ma' xujuhu' pain ca om cuhu' capam' ma' quem naparut. Je xi howa mip mahu' quem ac caparut na. 9Om ca taraju pa' querec hwe ra ac caparut na. Om ca mam' pe wet hwein capam' ca ma' 5 e' capari' pane, pain ca jicaracat mi' toton pain co 5.000 nana pane? Cain' ca ma' ne cotain pawirinain ca cut ho' moin' hwe pane quem? 10Om ca mam' pe wet hwein capam' ca ma' 7 e' capari' pane quem, pain ca jicaracat mi' toton pain co 4.000 nana. Cain' ca ma' ne cotain pawirinain ca cut ho' moin' hwe pane quem? 11Je xi taraju pa' mahu' pain ca om tomi' mi' tain capam' ca' quem? Ma' tara xumuhu' me, ein jein ca to' memerem nein capam' nucucun oro fariseu cocon oro saduceu inuhu' ta na ca tomi' xo' caparut ma'.
12Na ra ac urut na, taraju pa' pin ac urut na quem. Om na xin ca tomi' mi' capari' pain iri' ca to' memerem nein capam' ca' ne urut. Tomi' mi' napari' pain oro ca pijim' ximama' nucucun oro fariseu cocon oro saduceu ta urut.
Ca tomi' hwet pin cain iri' wixicon Jeju Pedro
Marcos 8.27-30; Lucas 9.18-21
13Mama' xin oro cidade ca to ja' pan nain Cesareia Filipe cain ta ac ca na Jeju, xuruxut mama' ac urut na quem. Tan' mama' iri urut ne, tomi' querec ac caparut na pain ca taxipa' urut con ca'. Om ta cain' ca wari' ca ne cacapa' oro wari' ra? Cain' ca coromicat mi' cacapa' pain ca Iri' Wari' ta' quem naparut.
14Om na, ma' nana co João co ja' taxipa' com cara pane xi' ma nenem ac urut con na. Ma' nana oro xucucun co profeta Elias cara pane xi' ma nenem. Ma' ac caca na co profeta Jeremias cara pane xi' ma nenem. Oro xucucun ma' iri nana ne, om na, xucun profeta xi' ma nenem quem na ca tomi' urut con ma'.
15Wahu' quem? Cain' ca coromicat mi' pan mahu' quem ac caparut na.
16Wum co Cristo ta. Panxica Iri' Jam co e' cara ma ta ac con na Simão Pedro.
17Param mi' nem pain ca awi wa Iri' Jam ta Simão panxica João ac con na Jeju. Xi wari' ca co an hwet mi' nem pain ca tomi' nem ma', pain ca Cristo ma ta mapa' ma', pain ca Panxica Iri' Jam ma ta mapa' ma'. Te ma', co pe pawin cain, wirico co an hwet mi' nem pain ca tomi' nem. 18Je ca tomi' xim ca' Simão ac con na. Pedro na xijein wuxum. Xi om ne ca ac pacun ara ma ta. Je ara xi' na ca tomi' mao nein wuxum. Ca tomi' hwet nem ma' quem, pain ca howa inem pain ca Cristo ma ma', pain ca Panxica Iri' Jam ma mapa' ma', ac iri' cote ne pacun na. Oro wari' co howa ac i ma' xi' nanapa' ma', iri' wari' ne ac toton tara, to' hwara' opa ac toton tara quem. Om ta to' quiji' pin ac cocon Caxicon Jam co taramaxicon pe ho' nonon oro win caxicon jam ca quem. 19To' taramaxicon pin toton cocon oro wari' co taramaxicon pe ho' ca Iri' Jam quem. Carawa ca tomi' caho' ma pain macan' ca', wara tomi' caho' nain Iri' Jam pain pawin cain. Carawa ca hohot na ta ma pain macan' ca', wara hohot na ta nain Iri' Jam pain pawin cain quem na ca tomi' con Pedro Jeju ma'.
20Tomi' mip ac caparut na pain ca taxipa' urut con ca'. Ta tomi' hwet mahu' cocon oro wari' pain xocori ca' me, ta tomi' hwet huhun pain ca Cristo ta' ca' me naparut.
Ca wara tomi' pe cain ca mi' pin ta' nucun je pain ca e' mami' ta' nucun quem
Marcos 8.34—9.1; Lucas 9.22-27
21Je i ma' xec nein ca tomi' xo' pin caparut Jeju pane. Tomi' xo' pin naparut pain ca taxipa' urut con ca'. Tomi' ho' tomi' ho' ac caparut na. Na e' na pain ca mao tain Jerusalém ta. Wa' mao iri tain i cain ne, quep em' ac cacapa' tara oro taramaxicon nexi' pain ca judeu iri' ca', cocon oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés. To' jain jain tamana tatarapa', to' pa' pin ac cacapa' tara. Ma' 3 pin iri tarapa' xec pain ca mi' pin ne ne, e' mami' ac ta' tara ta na ca tomi' xo' caparut ma'.
22Quep ac cain na taparacon Jeju Pedro. Coc papan hwet mao ac con na, tomi' ac cain na taraxicon: Om na ta Taramaxicon ne. Nain ho' terem pain Iri' Jam ta. Om ta to' pa' quequem oro wari' ta non.
23Xat tucu in hwet ac con na Jeju. Ac Caxicon Jam a xima pain ca tomi' querec mapa' ta Pedro. Mo ca' ne ta ac con na. To' i'ina mapa'. An xiho' main pacun ca pe wana ma', pain ca tao' pan' pin ton mapa' ca'. Om ca an xiho' main ca coromicat nucun Iri' Jam. An xiho' e' main ca coromicat nein ca wari' wa ta na ca tomi' con Pedro Jeju.
24Tomi' ac caparut na pain ca taxipa' urut con ca'. Wari' co ja' ja' xim napa' ma', miri'om ac cain tara ca param nucun. Om ta xiram pa' camain' cain curucun pain ca jin' cain ca mi' pin wa. Ac ca an tiquin' pan cain tara panaxicon ca mam' tatatain mi' xun tocwa ma'. Ja' ja' ac capa' tara ta. 25Xi e' cara pe tain cain pawin wari' co win xumu e' nain ca param pan nucun pain macan' ta. Wari' co miri'om nain ca param pan nucun pain macan' ca' iri na ne, pain ca win xumu e' capa' ma', wirico tara co e' cara pe tain nain pawin ta. 26Je ca tomi' xuhu' ca' ac caparut na. Mo ta ma' ma' xam' capari' oro carawa pain macan' ca'. Mo ta miri'om xin ca e' cara wa pain pawin cain, mo ta mama' xin cote ne xe quem. Ma' na ca quep xiho' ac capari' oro caramaji macan' ca cut iri' pain ca e' e' wet nexi' ra? Om ca quep xiho' capari' ta! Xi ma' ne caramaji macan' ca mam' an in ac xin ca e' cara nexi' ta. 27Je ca tomi' xuhu' ca' ac caparut na. Ja' ja' xine. Ta jin' huhun oro wari' co quep em' xim nunuhu' pain ca ja' ja' mahu' me. Maqui' ta' ara xi' na xec nein ca in qui' ta' ne ca', wata' pain ca Iri' Wari' ta' ca', in qui' ac tain tara pawin. Maqui' wi ta' cocon oro jam co taramaja mi' nanapa'. Maqui' wi ta' pain ca hwara' opa nucun Te quem. Pagar ac toton tara oro wari', pagar toton pain oro ca ara caca pain ca e' e' wet nucucun. Win ne ca ara hwe pane toton, mi' mi' xam' ac toton pain tara. Wahu' quem, win ne ca ara hwe pain ca ja' ja' mahu' pane xuhu', pagar pagar xam' ac xuhu' tara quem. 28Wahu' pain ca to ho' mahu' ca', ma' tatara co querec xim nanapa' pain ca taramaxicon pe ho' pin toton toton oro wari' ne quem. Querec tatarapa' pain ca Iri' Wari' ta' ca'. Om ta cono' querec caca, wara querec tatarapa', ame hwe e'. Tomi' iri'o' inuhu' ta na ca tomi' caparut ma'#16.28 Pain ca tomi' cain i ma' Jeju ma', ac ca tomi' tococwa na pain ca querec jimao pin ta' ne tocon pain cote ne pacun ma', pain ca hwet pa' xun cocon Elias con Moisés ma', pain ca mon cwa' Panxita' co om noc camain' ta' cwa' ton con Cote ca quem. Noro jein Mateus 17.1-8..
Currently Selected:
Mateus 16: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
