Mateus 22
22
Ca pijim' joc mam' mi' tococwa con taramaxicon co an ta' narima' panxica
Lucas 14.15-24
1Pijim' mami' xuhu' ta ac ca na Jeju, pijim' joc mam' mi' ac tococwa na con taramaxicon co an ta' narima' panxica ma'. Ca' na ca pijim' nucun: 2Carawa ca ara ne pain ca taramaxicon pe ho' cocon oro wari' Iri' Jam ma', an xiho' nain carawa ca ara ne con taramaxicon ma', co an ta' narima' panxica. Taramaxicon ma', tomi' ac ca na: Cut in xi', cao' querec te wi xijexi' pain ca an ta' narima' panxita' cwa' ta na. 3Tomi' ac tococwa na wari' nucun ma', co taramaja mi' e' nonon ma'. Harahap je jujun oro wari' co wara tomi' ta' pane, pain ca cao' querec te wi xijexi' e' toton pane tata. Ma ac caca na, mama' ac caca na. Tomi' paxi' tata, ane noc urut pain ta caca ne.
4Tomi' ac tococwa na oro xucucun wari' co taramaja mi' e' nonon ma'. Mo tomi' mami' jujun oro wari' co wara tomi' ta' pane. Awori pi' pin na oro carawa ca cao' querec te wi xi' iri' ta. Wara to' parapa' pin urut pain boi nuxut je oro wijimain boi nuxut ca homa tamana quem. Awori pi' pin na. Harahap je, cao' querec te wi xijexi' con panxita' co an ta' narima' ta jujun ta na ca tomi' tococwa ma'.
5Mama' ac caca na. Tomi' mami' paxi' tata, ane om ha' caca ne. Miri'om nonon, mama' ni ca' nonon. Mao nain totacon xucun. Mao ac cain na ca vender pe wa carawa xucun ma' quem. 6Oro xucucun ma' iri nana ne, quep ac cocon na oro wari' nucun taramaxicon, to' to' ac cocon na, to' parapa' pin ac cocon na quem.
7Mana' tamana ac ca na taramaxicon. To' parapa' pin jujun ta ac tococwa na oro soldado nucun. To' parapa' pin jujun caram cwain co to' parapa' pin nonon oro wari' ne cara ne. Tom pin jein cidade nucucun quem ta na ca tomi' tococwa ma'.
8Tomi' ac tococwa na oro wari' nucun co taramaja mi' e' nonon ma'. Awori pin paxi' na oro carawa ca mam' tomi' querec te wi xi' iri' con panxita' co an ta' narima' cwa' quem. Ane miri'om cacapa' co harahap je paxi' ta' ne. Om ca hohot ne pain ca maqui' caca quem, xi tomi' ha' pan caca ta. 9Je ca tomi' xuhu' ca' ac tococwa na. Mama' jein oro wana cain. Tomi' tomi' xam' jujun oro wari' co mam' to hwe pain wana cain ta tata.
10Mama' ac cacain na oro wana. Cut in cut in pi' pin ac tococwa na oro wari' co mam' caca ma'. Cut in ac tococwa na co awi nana, cut in ac tococwa na co om awi nana quem. Mija nana wari' co maqui' nana, xao xao tamana xucucun pain xirinain ca cao' querec te to xi' caca ma'.
11Mo querec toton oro wari' co maqui' nana ne ac ca na taramaxicon ma', corom ac ca na, querec ac con na wari' co om pe non iri' wom nein ca mam' tomi' querec te wa ma'. 12Tomi' querec ac con na: Cain' cain' xima quem win ma' ne? Para corom ma pain ca om pe mon iri' wom ma' quem non. Hehe ac ca na.
13Tomi' ac tococwa na wari' nucun co taramaja mi' e' nonon ma'. Tucu jein caximacon co cwa' ta, tucu jein micon ma' quem. Xin hwet mi' jun pain ca jitacat nein cain. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun ta na ca tomi' tococwa ma'. Ac i ma' na taramaxicon co tomi' nonon oro wari' pain ca cao' querec te wi xijexi' con panxita' co an ta' narima' ca ma'.
14Je ca tomi' xuhu' ca' ac tococwa na. Ma' mija paxi' nana co tomi' ca Iri' Jam ma'. Ane ma' paric ca' e' caca co tora' ca ne na ca tomi' tococwa ma'.
Ca tomi' querec tococwa pain ca pagar xine imposto
Marcos 12.13-17; Lucas 20.20-26
15Hwerehwet mama' ac caca na oro fariseu ma'. Tomi' xo' ac xucucun na: Cain' cain' xuxun quem? Tomi' querec xun e'. Mo ta tomi' ximao ca, querec pin' ac tocwa tara pain ca om iri'o' nucun ta nana.
16Mo tomi' jun e' ac tococwa na oro win ma' caca cocon oro win ma' ca taramaxicon Herodes ma' quem. Ma ac caca na, mo hwet ac cocon na Jeju. Tomi' ac cocon na: Tomi' xim urut pum ta taramaxicon co ca' na taxipa' capijacon Iri' Jam. Taxi' urut pum pain ca om mixein ma ma'. Ca' na xo' maparut pain capijacon Iri' Jam ca an hwet mi' naparut pain ca xuruxut xo' wa pain ca tomi' ha' je caparut ca'. Querec querec ac wiricoco pi' pin nenem oro wari' ma' quem. Co hwara' opa nana ma', co om hwara' opa nana ma' quem, querec querec ac wiricoco nenem, xi tomi' querec te paxica' momon ta. 17Je ca tomi' querec xim urut pum ca' ac cocon na. Cain' cain' ne ca coromicat nem quem, pain ca tomi' capari' Moisés quem? Hohot na pain ca pagar tocwa pain imposto taramaxicon nucucun oro romano ra? Om ca hohot ne ra? Ac i ma' na ca tomi' querec ximama' cocon Jeju ma'.
18Ane querec pin' cocon Jeju ne, querec pin' nonon pain ca mixein nucucun. Ac ca iri'o' xi' ca' tara me hwe ra ac cocon na. Para tomi' querec ximama' mahu' ma'? Param mahu' pain ca tomi' pan tem wa ra tata. 19Je i ma' ira, mi' xine pain moeda ca mam' pagar xine imposto ta ac tococwa na. An mi' ac cocon na pain denário.
20Tomi' querec ac tococwa na: Ma' jamicon co cwa', pain moeda ca'? Ma' wixicon co cwa' ca xirao' pe xine pain quem na ca tomi' querec tococwa ma'.
21Jamicon taramaxicon nucucun oro romano ta. Wixicon quem nonon.
Je ca tomi' xuhu' ca' ac tococwa na. Carawa ca mene ca taramaxicon nucucun oro romano ma', mi' ac hun pain tara. Carawa ca mene ca Iri' Jam ma' iri na ne, mi' ac hun pain tara quem na ca tomi' tococwa ma'.
22Taraju iri nanain ca tomi' nucun ne, wa wa ac cocon na. Paca' ac cocon na, mama' ac caca na quem.
Ca tomi' querec cocon pain ca e' mami' xi' caca co wara cono' nana ma'
Marcos 12.18-27; Lucas 20.27-40
23Pain xec nein ca tomi' querec cocon Jeju pain imposto oro fariseu ma', ma' ac caca na oro saduceu ma', co howa ca' nana quem: Om ca e' mami' xi' caca co wara cono' nana ta na ca howa nucucun. Tomi' querec xun Jeju ta ac caca na, xuruxut hwet ac cocon quem. 24Tomi' xim urut pum ta taramaxicon co ca' na taxipa' capijacon Iri' Jam ac cocon na. Ca' na ca xirao' mi' capari' Moisés cara pane: Mo ta mi' pin ca wari' ma', mo ta om wanxi' mi' cam manacon ma', na e' na pain ca an cam coxa' ca. Ma' ta wijima cama con ta taram. Pije' co aram aram wanxi' mi' cam ma', ac ca wanxi' con tara cwaji' ca co wara mi' pin ta, ac i ma' na ca xirao' mi' capari' Moisés pane. 25Je ca tomi' querec xim urut pum quem ac cocon na. Ma' na win ma' nuxut pane. Ma' 6 nana xurucun. Co pan' cain' pane, an ac cam na narima', aram aram mi' pin ac ca na. Om ca wanxi' ca. Mi' pin ca' nam manacon. An ac cam na coxa' ca co ja' corom mao non ma' quem. 26Ac i ma' na co ma' quem. An nam manacon cwaji' ca, aram aram mi' pin ac ca na. Om ca wanxi' ca. Ac i ma' na co ja' corom mao non co ma' quem. An nam manacon cwaji' ca, aram aram mi' pin ac ca na. Om ca wanxi' ca co ma' quem. Ac i ma' ac i ma' pi' pin nana, an an xam' nanam manacon cwaji' caca co pan' cain' pane, aram aram cono' ac caca na, om ca wanxi' camain' caca pane. 27Cono' pin iri nana waram taxicam ne, aram aram mi' pin ac cama na narima' ma' quem. 28Je ca tomi' querec xim urut pum ca' quem ac cocon na. Maqui' iri tara xec nein ca e' mami' xi' caca co wara cono' nana ma' ne. Mon xira co narima' ne tam nam quem? Ma' 7 ara xi' nana co an nanam pane, an an xam' nanam pane na ca tomi' querec cocon ma'.
29Om ca coromicat xo' hwe ta ac tococwa na. Om ca taraju pa' hwein capijacon Iri' Jam ca xirao' to caca oro profeta cara pane, xi querec pin' hwein ca hwara' opa tamana nucun ma', pain ca ha' con pain ca to' e' mami' cocon oro wari' co wara cono' nana ma' quem. 30E' mami' iri tatara co wara cono' nana ne, an xiho' ac cocon tara oro jam co taramaja mi' nonon Iri' Jam. Om ta cut caca narima'. Ca narima' nequequem ma', om ta cut cacama tarama' quem. 31Pain ca e' mami' xi' caca co wara cono' nana ma' iri na ne, wara tomi' xo' nuhu' Iri' Jam ma'. Om ca noro hwein capijacon con Abraão con Isaque con Jacó cara pane ra? Wara pain paxi' na ca cono' caca pane, ane tomi' ca' con Moisés Iri' Jam pane ne: 32Wata' co Iri' Jam cwa'. Iri' Jam ne napa' Abraão cwa', Iri' Jam ne napa' Isaque cwa', Iri' Jam ne napa' Jacó cwa' quem. Iri' Jam ne Iri' Jam ne wet nanapa' ta na ca tomi' con Moisés Iri' Jam pane. Je ca taxi' xuxun pain ca e' e' wet nucucun quem. Xi Iri' Jam ne cocon Iri' Jam oro wari' co wara cono' nana ta. Iri' Jam ne e' nonon oro wari' co e' nana ta na ca tomi' tococwa ma'.
33Taraju iri nanain ca tomi' nucun oro wari' ma' ne, wa wa ac cocon na. Ac i ma' na ca pijim' jimao nucun ra ac xucucun na#22.33 Oro saduceu pane, pain ca om ta e' mami' xi' caca co wara cono' nana ta caca ma', jain jain nonon oro wari' pain ca howa an xiho' cocon. Na e' na pain ca an xiho' cacapari' pain ca howa nexi' ca' nana. Je ca tomi' querec cocon Jeju cocon caram ma' co cono' ca' nanam manacocon. Hehe tara Jeju, om ta tomi' xo' ac capari' xi' paxi' nonon. Ane tomi' xo' tococwa ne. Hehe pan ac caca na. To' quiji' pan tata pain ca howa ximama' nucucun. .
Ca xirao' nucun Moisés ca awi tiquin' ca' nain oro wirain ca xirao' nucun
Marcos 12.28-34; Lucas 10.25-28
34Jeju ma', tomi' hehe pin nonon oro saduceu. Taxi' pin iri nanain i ma' oro fariseu ne, cut in ac xucucun na, xuruxut hwet ac cocon na Jeju. 35Tomi' pan ac ca na win ma' caca ma', co tomi' xo' taxi' nain oro ca xirao' nucun Moisés ma'. Tomi' querec ton e' ac ca na. Am tomi' ximao ca, am om tomi' ximao ca quem na. Je ca tomi' querec con Jeju: 36Tomi' xim inem ta co ca' na taxipa' capijacon Iri' Jam. Mija paxi' na oro ca xirao' nucun Moisés ca tomi' ha' je capari' ca'. Ma' ca xirao' nucun ca awi tiquin' ca' nain oro wirain ca xirao' nucun quem na ca tomi' querec con ma'.
37Tomi' ac ca na Jeju. Main ca' con:
Ta noc hun Iri' Jam co Taramaxicon ne hwe me ta.
Na e' na pain ca tomi' querec te mip hun pain iri' xumuhu'.
Jain jain jun pain ca tomi' querec te mip hun ta.
Ta coromicat ni ca' hun me ta.
Ac i ma' napari'. 38Je i ma' ca xirao' nucun ca awi tiquin' ca' nain oro wirain ca xirao' nucun. 39Ma' na wirain ca xirao' nucun ca awi quem. An xiho' nain i ca' ca tomi' ta' ne. Ca' na ca xirao' nein:
Ta noc huhun oro win ma' nuhu' me ta.
Win ne ca om noc pan xujuhu' ma' quem ta.
Ac i ma' napari' quem. 40Wari' co tomi' ha' nain ca xirao' nucun Moisés ca tomi' ta' ne, ha' ac con tara pain ca tomi' ha' cain oro xijein ca xirao' nucun. Ha' ac con tara pain ca tomi' ha' cain oro ca xirao' nucucun oro profeta ma' quem na ca tomi' con ma'.
Ca tomi' querec tococwa pain ca ma' co iri' hwanana ne ca Cristo co wara tomi' pe ca Iri' Jam pane tococwa
Marcos 12.35-37; Lucas 20.41-44
41Cut in cut in wet xucucun oro fariseu ma', pain ca tomi' cocon Jeju ma'. Tomi' querec pan ac tococwa na quem: 42Cain' cain' ne ca coromicat nuhu' con Cristo quem? Ma' co hwanana ne ca quem tata.
Hwanana ne non taramaxicon Davi cara pane ac cocon na.
43Cain' cain' xira quem ac tococwa na. Davi cara pane, co wina non Cristo pane, Taramaxicon ne non quem. Je Tamataracon Iri' Jam ca mi' non pain ca tomi' nucun pane. Para Taramaxicon ne con pain ca xirao' pe nucun quem? Xi tomi' ac i ca' ara ca Davi pain ca tomi' mi' con Cristo pane:
44Tomi' non Taramaxicon ne Iri' Jam co iri' Taramaxicon ma'.
Xao pe ho' ne pain iri' cwere ca'#22.44 Noro jein ca tomi' xo' nein pain macan' pain Mateus 20.30 pain ca xao pe ho' tocwa Iri' Jam pain iri' curucun. .
Aram aram maqui' pa' ac quem tara xec nein ca to' quiji' pin toton ta' co noc nenem ma'.
Taramaxicon pe ho' cara ac momon tara ta.
Ac i ma' na ca tomi' xucucun Iri' Jam con Cristo pane ta na ca xirao' nucun Davi pane.
45Je ca tomi' xuhu' ca' ac tococwa na. Taramaxicon ne non Cristo Davi cara pane. Cain' cain' xira quem? Ma' tara ca wina ac con quem ra na ca tomi' tococwa ma'#22.45 Cristo co to' witan roron oro wari' ta ca Iri' Jam pane, winacon Davi paxi' na pain ca wari' nucun pane. Ane Taramaxicon ne pan con Davi ne, xi om ne ca Taramaxicon pan ara ca Cristo pain ca Iri' Jam nucun ta..
46Hehe ac cocon na. Maho' pin ac cacain na ca tomi' querec ximama' cocon ma', xi hehe ara cocon ta.
Currently Selected:
Mateus 22: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil
