Mateus 24

Oro ca hwet pa' ton nonon oro wari' pain ca aram aram in qui' ta' ca Jeju

Marcos 13.1-31; Lucas 21.5-37

1Maji ta ac caparut na Jeju, mama' ac urut na. Hwerehwet ca' xin iri urut pain ca tao' caho' nein cote ne xiricon Iri' Jam ma' ne, xuruxut hwet ac urut con na pain ca taxipa' urut con ca'. Noro rain xiricon Iri' Jam pain oro quirinain ca'. Awi na xin ne urut con.

2In ac hwein oro xirim ca' ra ac caparut na. Ame hwe e', main maqui' tara xec nein ca to' pa horohot pi' pin xin xine oro xirim ca'. Om ta to wet xica' pe camain' ne oro pacun nein. To' pa horohot pi' pin ac xine tara ta. Tomi' iri'o' inuhu' ta na ca tomi' caparut ma'.

3Mama' ac urut na pain Pacun Nein Oliveira ma'. Xao pe ac ca na Jeju. Xuruxut hwet ac urut con na. Xica' to urut, wirico Jeju, warut pain ca taxipa' urut con ca' quem. Tomi' querec ac urut con na: Ma' xec ca hwet pin ta' ne oro ca tomi' ma ca' ne? Cain' xi querec pin' ac urut pain ca wixicam pin ne xec nein ca in qui' ta' nem je pain ca pi' pin ta' ne macan' ca' quem na ca tomi' querec urut con ma'.

4Om na, ma' tara xumuhu' me ac caparut na. Ta howa huhun oro wari' co mixein xim nunuhu' pain oro carawa ca maqui' ta' ma' me. 5Xi mija xi' ara caca oro wari' co wata' ta nana pain ca an hwet cacain wuxu ca'. Wata' co Cristo tatara, mixein ac tococwa tara oro wari'. Mija tatara wari' co howa nonon quem. 6Taraju ac huhun tara oro wari' pain ca to' parapa' caracan xucucun pain macarahu' ca', je pain ca to' parapa' xucucun pain oro xijein macan' pain pira quem. Je i ma' ira, ta jin' hwe pain me. Na e' na pain ca mixein ac i ma' tococwa oro wari', je pain ca mana' caracan ac i ma' xucucun ma' quem, je curucucun mao tara. Ane om pi' pin hap ta' ne macan' ne, ame hwe e'. 7To' parapa' caracan ac xucucun tara oro wari', oro taramaxicon nucucun ma' quem, mana' caracan ac xucucun tara. Jain jain tamana tatara oro wari' pain oro xijein macan'. Om pin tara oro carawa ca cao' wa. Cocoroc tamana tara macan'. 8Oro ca jain jain nucucun oro wari' pain ca xo' hwet pa' cocon oro ca xirac wa ma', an xiho' tarain ca caxi nequem narima' pain ca xo' caxi cam cawinacam ma', ac i ma' tara cocon oro wari' quem. Ame hwe e', main jain jain tamana tatara ta.

9Noc ac cucuhu' tara oro wari' pain oro xijein macan'. Quep ac cucuhu' tara, cut mi' ac cucuhu' tara cocon oro taramaxicon. Ma' ta quep em' xihwe, ma' ta to' parapa' pin xihwe ta tuturuhu'. Noc noc pi' pin tuturuhu', xi om ne ca howa ara mahu' ta. 10Aram aram mija pin ac caca tara co an to pin nanapa'. Howa howa om pin tatarapa'. Noc ac xucucun tara, tomi' mi' caracan ac xucucun tara cocon oro taramaxicon. 11Mija tatara oro wari' co profeta urut ximama' nana quem. Pijim' mixein ac caca tara, mija tatara wari' co pijim' mixein caca. 12Pan teretem tamana ac caca tara oro wari' pain oro xijein macan'. Mija tatara. Je ca tomi' querec te tomi' querec te om xun cocon oro win ma' caca ma'. 13Wari' co howa cara napa' ma' iri na ne, pain ca howa howa pi' pin pa' cain oro ca quep em' wa ma', wirico tara co to' witan wa ta. 14Pijim' mama' ac cacain tara oro xijein macan' oro wari' ne quem. Tomi' hwet tomi' hwet xam' ac cocon tara oro wari' pain capijacon Iri' Jam ma', pain ca tomi' xo' cocon pain ca taramaxicon pin ta' ca Iri' Jam ma'. Taraju taraju xam' iri tatara oro wari' ne, pi' pin ac ne tara macan' ta.

15Je ca tomi' xuhu' ca' ac caparut na. Main xat pe tarain cote ne xiricon Iri' Jam caji pacun ca Iri' Jam xi' ma ca. To' em' pin tarain cote ne xiricon Iri' Jam. Wara xirao' pe nain profeta Daniel cara pane#24.15 Ma' na iri' caxicon taramaxicon nucucun tatirim pain cara pane, pain ca om maqui' querec ca Jeju pane. To' em' pin nain cote ne xiricon Iri' Jam pane, xi om ne ca quep ara cain caji pacun ca Iri' Jam xi' ma ca, an xat pe ac cain na pain tequipain xiricon Iri' Jam. Wirico co xirao' pe ca Daniel pane. Wara pain paxi' na caxicon taramaxicon pane, ane maqui' ta' ca xucun co an xiho' non ne na Jeju quem. Je ca tomi' tococwa co taxipa' ca ma'. . (Wahu' pain ca noro hwein ca xirao' ne ca', taraju pa' je ta#24.15 Am wirico Mateus ca co tomi' nain i ca'. Ac ca om tomi' pan cain na Jeju..) Querec iri jein ne, 16jein ca' ac hwein tara. Wahu' pain ca to hwein oro cidade pain Judeia ma', jein mama' ac hwein tara oro pacun. 17Wari' co hwet pe ca' nain xiricon ma', mo mao hap ac ca tara. Om ta na ne pain ca corom in mao cain xiricon pain ca cut tain cain caramaxicon. Mo mao hap e' tara ta. 18Wari' co pe nain totacon ma' quem, om ta na ne pain ca in mao cain xiricon pain ca cut ton con oro womicon. Mo mao hap e' tara ta. 19Oro narima' co nam' nana pain oro xec nein ca jein mama' xi' cacama ma', wiricacam co ma' nanam wixicacam hwijima' ma' quem, jain jain tamana tatara. I'ina tamana tataram pain ca jein mama' wa. 20-21Mija tara ca jain jain caca oro wari' pain oro xec nein ca jein mama' xi' caca. Om ca wara querec camain' xine ca jain jain wa ca an xiho' nain pane, pain ca xo' ma' ten qui' ne macan' con Iri' Jam pane, je win jain jain tamana xi' caca oro wari'. Om ta jain jain ac i ma' mami' caca quem. Je ca tomi' xuhu' ca': Tomi' mi' xujuhu' con Iri' Jam ta, tomi' ca' jun: Xiram pa' xut ta Iri' Jam. Mi' xut pain ca awi ne xec pain ca jein mama' xi' urut quem. Om tara pain oro xec ca xio tamana ta, om tara pain sábado quem, ac i ma' tara ca tomi' mi' xujuhu' con Iri' Jam. 22Mo xi om to' wijimain pin cain oro xec nein ca jain jain nucucun oro wari' Iri' Jam ma', om xi witan camain' caca. Ane to' wijimain pin tain cain ne. Xi ma' ara caca oro wari' nucun co tora' ca ma'.

23-24Ma' tatara wari' co tomi' mixein ca' xi' nana: Wata' co Cristo ta tatara. Ca' ac caca tara oro xucucun ma' quem: Wata' co profeta ta tatara pain ca tomi' mixein nucucun. Mixein xuxun oro wari' cwa' tatara, am ha' capari' pain ca mixein xuxun oro wari' co tora' ca Iri' Jam cwa' quem tatara, ara ara ac cacain tara oro ca om ara taxi' ne ca wari' wa ma', wa wa ac cocon tara oro wari'. Je ca tomi' xuhu' ca' ac caparut na. Mo ta tomi' ximama' ca' cucuhu' wari' ma': Noro je, mon cwa' Cristo cwa', mo ta tomi' ac i ma' cucuhu'. Mo ta tomi' ca' cucuhu' quem: Mon cwain Cristo cwain, mo ta tomi' ximama' ac i ma' cucuhu', ta howa huhun me ta. 25Ma' tara xumuhu' me. Wara tomi' xo' inuhu' pain ca om hwet querec cuhu', wara tomi' hwet pi' pin inuhu' pain oro carawa ca hwet pa' xim nuhu' ta.

26Je ca tomi' xuhu' ca', mo ta tomi' ca' cucuhu': Noro je. Mon cwain, co pe mahweri cwain, mo ta tomi' ac i ma' cucuhu', ta jein hwet hun me ta. Mo ta tomi' ca' cucuhu' quem: Noro jun. Corom pe nain xirim ca', mo ta tomi' ac i ma' cucuhu' quem, ta howa huhun me ta. 27In qui' ta' iri ta' pain ca Iri' Wari' ta' ca' ne, ane ane maqui' ac ta' tara, querec querec xam' tatarapa' oro wari' pain oro xijein macan'. Win ne ca ane ane coc wein ca comerem ma', pain ca coc wein qui' cain pira pain quirinain pawin cain, ca coc wein mao ac cain na xijein quirinain pawin cain quem, ac i ma' ta' pain ca maqui' hap ne ta. Querec querec xam' tatarapa' oro wari' ta. 28Win ne pain ca mi' pin pe nein mahweri carawa ma', taxi' taxi' pi' pin nanain oro wari'. Xi om ne ca cut in cut in ara xucun maho ta. Ac i ma' tara pain ca in qui' ta' ne quem. Hwet pin iri tara oro ca tomi' ne ca' ne, taxi' taxi' pi' pin ac cacapa' tara oro wari' pain ca wixicam pin ne ca in qui' ta' ne ta.

29Pain oro xec ma', pain ca win pi' pin ne ca jain jain tamana nucucun oro wari' ma', mixem pin tara tocon xina. Toha toha om pin tara panawo'. Camara' qui' tarain pawin oro pijo'. Cocoroc cocoroc pi' pin tara oro coximinain pawin quem. 30Hwet qui' ac nein pawin tara i ma' ma', ca to' querec pin' tococwa oro wari' pain ca maqui' ta' ne ca'. Wata' pain ca Iri' Wari' ta' ca', maqui' ac ta' tara. Mam' maqui' tain ca hwara' opa ne pain ca toc meremem tamana ne. Oro wari' pain oro xijein macan' ma', awaran awaran xam' ac caca tara pain ca querec cacapa' pain ca maqui' ta' pain tajain nanawin. 31On mip ac ne tara caji taracom. Tomi' ac toton tara oro jam co taramaja mi' nanapa' ma'. Mama' jein oro xijein macan', cut in cut in xam' jujun oro wari' co tora' ca Iri' Jam ta, cut in qui' jujun pain oro xijein macan' pain pira ta, ac i ma' tara ca tomi' toton ta.

32Noro jein panaji figo ma' ac caparut na. Xi to' querec pin' ara capari' pain i ca' ta. Taraju pa' jein ta. Hwerehwet pin iri na xocori tarajain tenenein ne, taxi' pin ac hwein na ca wixicam pin ne oro xec pain ca xain toto ca xina. 33Ac i ma' tara pain ca in qui' ta' ne quem. Querec iri jein ca hwet pin ne oro ca tomi' hwet xuhu' ca' ne, taxi' ac hwein tara ca wixicam pin ne xec pain ca in qui' ta' ne. Om ta pira mami' ne. 34Om ta cono' cono' pi' pin querec caca oro wari' co e' e' wet nana pain xocori ca', hwet pa' ac cocon tara oro ca tomi' hwet xuhu' ca'. Tomi' iri'o' inuhu' ta#24.34 Ca tomi' nucun Jeju ca', pain ca main hwet pa' totoron oro ca tomi' hwet xuhu' ca' ca ma', tomi' mi' nain ca to' pa horohot pin xin xine cote ne xiricon Iri' Jam pain Jerusalém. Iri'o' na ca tomi' nucun quem. Oro wari' co e' e' wet nana pain ca xo' tomi' ac i ma' ca pane, ma' nana co e' e' wet nana pain ca pa horohot pin xine cote ne xiricon Iri' Jam pane. Om ca cono' querec caca pane.. 35Main om pin tara pawin pain macan' ca'. Oro ca tomi' ne ca' iri na ne, om ta pan' ara'am camain' ne ta. To wet cara tara ta na ca tomi' caparut ma'.

Ca om taxi' xine xec nein ca in qui' ta' ca Jeju

Marcos 13.32-37; Lucas 17.20-37

36Om na wari' co taxi' nain iri' xec nein ca in qui' ta' ne ta ac caparut na. Om ca taxi' cacain oro jam co to nanain pawin, om ca taxi' tain quem. Xica' pe na Te co taxi' nain ta. 37Ac pain oro xec nein ca e' e' wet ca Noé cara pane tara, ac i ma' tara pain ca in qui' ta' ne ca', pain ca Iri' Wari' ta' ca'. 38Pain ca om we' querec ne com pain cote ne xowi' pain cara pane, ara e' nanain oro ca ara taxipa' caca oro wari' pane. Co cao' nana, co toc nana, co cut nana narima', co cut nana tarama' pain ca narima' nequequem ma' quem, ara e' nanain ca param nequequem. Ac i ma' ac i ma' nana, om om maqui' pa' ac cocon na xec nein ca corom cain mam' horoho wa Noé cacam oro ca nari nucun pane. 39Co hwerehwet to nana pane, om ca taxi' cacain ca we' pa' xun cocon com. Om ta cono' iri' nana. Ane cono' pin caca ne. Aram aram we' pa' pin nonon com, cono' cono' pi' pin ac caca na. Ac i ma' tara pain ca in qui' ta' ne quem, pain ca Iri' Wari' ta' ca'.

40Maqui' ta' iri tara xec nein ca in qui' ta' ne ne, am ma' 2 caca wari' co taramaja to nanain xitot. An mao ac tocwa tara xucun, an pe pin ac tocwa tara xucun. 41Am ma' 2 cacama oro narima' co ep nana quem. An mao ac tacama tara xequem, an pe pin ac tacama tara xequem quem. 42Je ca tomi' xuhu' ca' ac caparut na. Ma' tara xumuhu' pain ca winim' xo' mahu' me. Xi taxi' hwein xec nein ca in qui' ta' ne ta. 43Mam' pe wet jein carawa ca ara non waximain xirim co wara cut noc xa ca' wa pain caramaxicon ma'. Mo xi taxi' tocwa caxicon wari' co cut noc xa ma', mo xi taxi' cain iri' hora nein xim pain ca maqui' ta' nucun quem, querec wet ac cain xira xiricon. Nain ho' ac cain xira pain ca joc pa hot xine quem. 44Je ca tomi' xuhu' ca' ac caparut na. Na e' na pain ca awori xo' hwe pain ca winim' xim mahu' ma'. Xi in qui' ho' ta' ara ta' ta. Wata' pain ca Iri' Wari' ta' ca', in qui' ho' ta'. Om ca taxi' hwein hora nein ca in qui' ta' ne quem na ca tomi' caparut ma'.

45Na e' na pain ca an xiho' hun wari' co taramaja xo' ma', co coromicat xo' pain ca taramaja mi' xo' con taramaxicon nucun ta ac caparut na. Mao tain pira iri na taramaxicon nucun ne, tomi' mam' ac con na: Querec wet roron oro win ma' ma co taramaja mi' e' nanapa' cwa', querec wet xo' roron pa'ao'. Mi' xo' roron pain carawa ca cao' wa quem na ca tomi' mam' con ma'. 46Mo ta in qui' ca taramaxicon nucun ma', mo ta querec pin' con pain ca querec wet xo' cocon oro win taramaja ca ma', tomi' querec te ac con tara, hohot tamana mapa' pain ca taramaja xo' mi' mapa' ca' ac con tara. 47Tomi' ac con tara: Mi' xim inem pain ca querec wet querec wet pi' pin main oro caramaju ca', ac i ma' tara ca tomi' con taramaxicon nucun. Tomi' iri'o' inuhu' ta. 48Ane om ac i ma' ne pain ca om tomi' ha' ta' nucun ne. Am caxicon wari' ca, am om taramaja xo' ca, am coromicat ca' ca: Om om na taramaxicon ne cara ne, om ta in hap ca ma' toron pain ca coromicat nucun. 49Am wap ximao cocon oro win taramaja ca ma', am miri'om cain ca taramaja nucun pain ca waraju wi xijexi' cocon co toc tamanain to nanain caji tocwa ca mana' ma' quem. 50Ame hwe e', main maqui' pa' toron taramaxicon nucun pain xec nein ca om winim' pan con ma'. Maqui' pa' toron pain iri' hora nein ca om winim' xo' camain' con ma'. 51Wap tamana ac tocwa tara, mao rain ca to pan caca oro wari' co ac ca iri'o' xi' ca' tara me nana ma' ac tocwa tara quem. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun na ca tomi' caparut pane.

Currently Selected:

Mateus 24: TBPN

Highlight

Copy