Mateus 26

Ca tomi' xo' xucucun pain ca to' pa' pin xun cocon Jeju

Marcos 14.1-2; Lucas 22.1-2; João 11.45-57

1Pi' pin iri na ca pijim' nucun Jeju ne, tomi' ac caparut na pain ca taxipa' urut con ca'. 2Taxi' hwein ca wixicam pin ne Páscoa#26.2 Páscoa na wixinain xec nein ca tomi' querec te xucucun oro judeu pain ca mam' pe wet cocon oro hwanana nucucun pain ca to' witan ca' tococwa pain Egito pain cara pane. . Ma' 2 pin iri tara xec ne, maqui' ac ne tara, ma' ac ca tara wari' co tomi' mi' xim napa' cocon oro taramaxicon. Tatatain mi' ac cacapa' tara pain pana. Wata' pain ca Iri' Wari' ta' ca', tatatain mi' tatarapa' pain pana, wa wa mi' pin pe ac tain tara ta na ca tomi' caparut.

3Cut in ac xucucun na oro sacerdote co taramaxicon nana ma', cocon oro taramaxicon nuxut pain ca judeu urut ma' quem. Cut in xucucun pain cote ne xiricon sacerdote co iri' taramaxicon ma'. Caifás na wixicon. 4Tomi' xo' ac xucucun na: Cain' xi quep noc xa ac xun Jeju quem? Na e' na pain ca om taxi' cacapari' oro wari' ta. Quep xun, to' pa' pin jun ta ac xuxun tara oro taramaxicon nucucun oro romano cwa'. 5Om ta quep xun pain oro xec nein ca tomi' querec te nexi' ca'. Ma' ta om teretem caca oro wari' ta na pain ca tomi' xo' xucucun ma'.

Ca ji'ao mi' tocwa pain caji towaxi' Jeju

Marcos 14.3-9; João 12.1-8

6To ac urut pain na Betânia ma'. Wirico Jeju, warut pain ca taxipa' urut con quem, mama' ac urut pain na xiricon Simão co ma' non caji nan pane ira. 7Cao' cao' wet iri na Jeju ne, xut hwet ac con na narima' ma'. An nain caji towaxi' ca hu awi ma', ca wara ji'ao pe cama pain caji too ca mam' quep xine pain ca awi ne pacun ca taramac tamana. Mija na dinheiro nein caji towaxi' ma' quem. Ji'ao mi' ac con na pain winacon Jeju.

8Querec iri urut cam pain ca ji'ao mi' con pain winacon caji towaxi' ma' ne, mana' ac urut cam na. Para waraju camain caji towaxi' ma' quem urut. 9Je xi vender camain quem? Cut tamana ac camain xira cote ne dinheiro nein. Mi' tiquin' ac tococwa xira pain oro wari' co om nonon carawa, ac i ma' na ca tomi' nuxut.

10Jeju ma', taxi' naparut pain ca tomi' nuxut. Je ca tomi' caparut ma': Para tomi' em' hwem narima' cwa' quem? Miri'om jem. Hohot na pain ca an hwet mi' ac i ma' capa' pain ca tomi' querec te nequem. 11Tama' ma' ara xi' nunuhu' oro wari' co om nonon carawa. To ho' cara tuturuhu' pa'ao'. Ha' tuturuhu' pain ca tama' quep xiho' huhun quem. Wata' iri na ne, om ta pe ho' cara xuhu'. 12Narima' cwa', pain ca ji'ao mi' capa' pain caji towaxi' ca', ac ca wara ji'ao mi' capa' pain caji towaxi' na pain cwere pain ca aram aram an corom pe pin xim cacapa' pain manain pacun quem. 13Je ca tomi' xuhu' ca', tomi' iri'o' inuhu'. Oro wari' co pijim' mama' xin nanain pira ma', pain ca tomi' hwet xun cacapa' cocon oro xucucun wari' ma', pijim' hwet ac cacain tara ca ara mi' capa' cam cwa' ta. Mam' pe wet cara ac tacama tara ta na ca tomi' caparut ma'.

Ca quep xiho' xuhu' pain ca quep xun hun Jeju ta cocon oro taramaxicon nucucun oro sacerdote Judas

Marcos 14.10-11; Lucas 22.3-6

14Win ma' nuxut ma', co to' 12 naparut pain ca taxipa' urut con Jeju cwa', co Judas Iscariotes caca oro wari' ma', hwet ac cocon na oro taramaxicon nucucun oro sacerdote. 15Tomi' ac cocon na: Cain' cain' ne moeda nein prata ca mi' xim mahu' pain ca quep xiho' xuhu' con Jeju quem? Tomi' mi' xuhu' con, quep ac hun tara ta nonon.

Mi' 30 xut pum pain moeda nein prata con ta ac cocon na, cut mi' 30 ac cocon pain na quem.

16Noro ac con na. Cain' xi tomi' mi' toton con ne xucun. Hohot tara pain xec ca' ra? Hohot tara pain xim ca' ra na.

Ca toc wi urut pain comi memem con Jeju

Marcos 14.12-26; Lucas 22.7-23

17Maqui' pin iri na iri' xec nein ca cao' querec te e' cacain capam' ca om joc wanan wa pain ca to' memerem nein ne, xuruxut hwet ac urut con na Jeju ma', pain ca taxipa' urut con ca'. Tomi' querec ac urut con na: Main ca ara to jein maparut pain carawa nein Páscoa pain ca cao' querec te nexi' quem urut con.

18Tomi' xo' ac caparut na: Xuruxut mama' jein cidade ma'. Pirao' ac hun tara win ma' nexi' cara ne. Tomi' ac hun tara: Tomi' nem Taramaxicon nexi' co ca' na taxipa' napari' pain capijacon Iri' Jam ta jun. Wixicam pin iri na ca mi' pin ta' ne ta nem ta jun. Tomi' querec te wi ta' cocon co taxipa' ta' pain carawa nein Páscoa ca' quem nem ta jun. Je ca tomi' xim ca' nem, cao' querec te to xut pain xurum ta nem ta jun quem na ca tomi' caparut ma'.

19Ma ac urut na, ara ac urut pain na ca tomi' xo' caparut Jeju. Ara an to xo' urut pain carawa ca cao' querec te xi' urut pain Páscoa quem.

20Xo' um pin iri na ne, cao' xi' ta ac caparut na Jeju ma', xao to ac urut na. Wirico, warut pain ca taxipa' urut con ca' quem, pain ca 12 urut ca', xao to xi' ta, xao to ho' ac xujuxut na, 21cao' ac urut na quem. Cao' cao', tomi' ho' naparut Jeju: Ma' napari' co quep xiho' toton nonon co noc nanapa' ma', co quep xim nanapa' ma' naparut. Win ma' nuhu' ta naparut. Tomi' iri'o' inuhu', tomi' mi' tarapa' cocon co noc nanapa' ta naparut.

22Tomi' xaxa' tamana ac urut na. Taramaxicon ne ac urut con na. Wata' tara pum ra ac urut con na. Wata' tara pum ra wata' tara pum ra xam' urut con.

23Wirico co cwa' co xin cam wi napa' pain capam' pain too ca mam' cao' wa ca', wirico tara co tomi' mi' xim napa' cocon co noc nanapa' ta ac caparut na. 24Mi' pin ta' ina pain ca Iri' Wari' ta' ca'. Win ne ca xirao' pe cacapa' oro profeta pane. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ma' ne, co quep xim nanapa' ma'. Ximin tara. Hohot xira pain ca om pan' ne ca pije' nucun cam jicon ta na ca tomi' caparut ma'.

25Tomi' querec ac con na Judas ma', co tomi' mi' ton non ma': Cain' cain' ma quem Taramaxicon co ca' na taxipa' capijacon Iri' Jam? Wum ta mapa' ra? Ac i ma' na ca tomi' con ma'.

Wum ma' ira. Win ne ca tomi' pan ma ma' na ca tomi' con ma'.

26Cao' ac urut na, cao' cao'. An ac cain na capam' Jeju. Tomi' querec te urut pum pain ca mi' maparut pain capam' ca' quem Te na, jicat caracan ac cain na, mi' ac caparut pain na. Cao' jein ta ac caparut na. Capam' ca', an xiho' nain cwere ta ac caparut na.

27An ac cain na ca mam' toc wa ca ji'ao pe xine comi memem ma' quem. Tomi' querec te urut pum pain ca mi' maparut pain comi memem ca' quem Te iri na ne, an mi' ac caparut pain na. Toc toc xam' je ta ac caparut na. 28Comi memem ca', an xiho' nain cocu ta ac caparut na. Je ca to' querec pin' cuhu' pain ca tomi' an pe xo' mi' cuhu' Iri' Jam cwa', pain ca to' witan xim cuhu' ca'. Ao mao iri tara cocu pain ca mi' pin ta' ne ca' ne, je win ara pin tain cain ca wara tomi' an pe nucun. Mija tara oro wari' co mi' pin caho' ta' ta' quem. Xic am pin ac xine tara ca caracat nucucun pata'. 29Om ta toc mami' tain comi memem pain xocori ca'. Tomi' iri'o' inuhu', om ta toc mami' tain pain xocori ca'. Om om, maqui' pa' ac capa' tara iri' xec nein ca toc pe tain ta' pain i cain quem, pain ca taramaxicon pe ca Te cwain, toc wi ac xuhu' tara pain xocori comi memem ta ac caparut na quem.

30Com iri urut pain tamara' pain ca in ac urut con Iri' Jam ne, hwerehwet mama' ac urut na, mama' ac urut pain na Pacun Nein Oliveira ma'.

Ca paca' xim mahu' pain xim ca' caparut pain ca taxipa' urut con ca'

Marcos 14.27-31; Lucas 22.31-34; João 13.36-38

31Tomi' ac caparut na pain ca taxipa' urut con ca'. Pain xim ca', om ta xec querec ne, paca' paca' pi' pin ac mahu' tara. Xi xirao' pe ara xine pain capijacon Iri' Jam pata' pane. Ca' na pata':

To' pa' pin ton co querec wet taxipa' nain ovelha ma',

wawaran mama' ac ne tara oro ovelha nucun.

Ac i ma' na ca xirao' pe xine ca tomi' nucun Iri' Jam pata' pane. 32Ane e' mami' ta' ta' ne. E' mami' iri ta' ne, wara mao ac tain tara Galileia. Maqui' ac hwe tara pa'ao' na ca tomi' caparut ma'.

33Tomi' pan ac con na Pedro: Paca' paca' pi' pin paxi' teterem oro xucucun co taxipa' ma cwa'. Wata' iri na ne, om ta paca' camain' xim ta na ca tomi' con ma'.

34Om na ta Pedro ac con na. Tomi' toton momon oro wari' pain xim ca'. Om ta aca querec ca me, wara tomi' ac momon tara: Om ca querec pin' ton ta ac momon tara pata'. Ma' 3 tara ca tomi' ac i ma' toton ma quem. Tomi' iri'o' inem ta Pedro na ca tomi' con ma'.

35Om na ta ac ca na, om ta tomi' ac i ma' toton. Mo ta to' pa' wi pin xim cacapa' pum, je i ma' ira, om ta tomi' camain' toton pain ca om ca querec pin' ton ta toton pum na. Ac je ac je pi' pin na ca tomi' nuxut pain ca taxipa' urut con quem.

Ca pe cain Getsêmani Jeju

Marcos 14.32-42; Lucas 22.39-46

36Maji ta ac caparut na Jeju, mama' ac urut pain na totain oliva ma', ca Getsêmani caca oro wari' ma'. Wirico Jeju, warut pain ca taxipa' urut con ca' quem, mama' ac urut na pain Getsêmani. Xao to to jein i ca', pain ca tomi' ton Te pain i cain ta ac caparut na.

37Harahap je ta ac tococwa na Pedro cocon mana panxica Zebedeu ma', co ma' 2 nana ma'. O mama' ac tococwa na. Xuruxut xuruxut, tomi' xaxa' ac ca na Jeju. Jain jain pin na. Mija na. 38Tomi' xaxa' tamana ina ta ac tococwa na. Mija na ca tomi' xaxa' ta', pain iri' xumu ca', mija ina ta! Tomi' xaxa' tomi' xaxa' mi' pin ma' ac ta' pain tara, ac je na pata'. Mon to wet jein i ca' ac tococwa na. Ta pi'am hwe me, momon querec wi xi' ta tata.

39Xut xut xat, pe torotop tucu hwet mi' ac cain na macan'. Tomi' ac con na Cote ca: Te ac con na. Am xin ne mapa' pain ca tomi' xim ca'. Nain ho' ne pain ca jain jain ta' ne ca', pain ca mi' pin ta' ne ca' quem Te. Tara pum, nain ho' ne pain me paxi' inem, ane param e' tain ca param pan nem ne. Noc inain ca param ne ca' na ca tomi' con Cote ca.

40In hwet ac tococwa na. Wara pi'am nana. Tomi' ac con na Pedro: Pi'am hwe ra Pedro? Om ca momon querec wi ac mahu' ra? Xica' pe tara hora nein ca querec wi xi' ta xuhu' ne ira non Pedro. 41Ta pi'am hwe me ta ac tococwa na. Momon tomi' jun Iri' Jam, ma' ta om ja' camara' xihwe pain ca tomi' querec cuhu' Caxicon Jam ta. Tomi' ha' xi' paxi' hwe pain xumuhu' ma', ane om hwara' opa hwe pain curuhu' ma' ne na ca tomi' tococwa ma'.

42In ca' mami' ac tococwa na, tomi' mami' ton Te ta ac ca na quem. Te ac con na. Am om xin ne mapa' pain ca tomi' xim ca', pain ca nain ho' ne pain ca jain jain ta' ne pain ca mi' pin ta' ne ca' xim ca'. Mo ta jain jain ra mapa', mo ta mi' pin ra mapa' quem. Je i ma' pum ta Te. Param e' inain ca param pan nem ta na ca tomi' con ma'.

43In hwet ac tococwa na, wara pi'am mami' nana quem, xi in tamana ara ne matacocon ta.

44Paca' mami' ac tococwa na, tomi' mami' ac con na Cote ca. Je win 3 pin ne ca tomi' con Cote ca. Ac ca wara tomi' con cara ne na pain ca tomi' mami' con ma'.

45In hwet ac tococwa na co taxipa' ca ma'. Tomi' ac tococwa na: Pi'am pi'am wet hwe ra? Xao to wa xao to wa wet hwein xumuhu' ra tata. Maqui' pin nana co quep xim nanapa' cwa'. Wata' pain ca Iri' Wari' ta' ca', quep ho' xim nanapa'. Maqui' pin na co tomi' mi' xim napa' cocon oro caracat ta. 46Tequi' to je ta. Maji cocon. Maqui' nain i ma' co tomi' mi' xim napa' cocon ta ac tococwa na.

Ca quep cocon Jeju

Marcos 14.43-50; Lucas 22.47-53; João 18.1-11

47Tomi' tomi' wet na Jeju, maqui' ac ca na Judas ma', co to' 12 naparut pain ca taxipa' urut con Jeju cwa'. Mija nana wari' co ja' ja' nonon. Om ca paric camain' caca, mija nana. Wiricoco oro taramaxicon co hwet jun nonon. Mo nana: Oro taramaxicon nucucun oro sacerdote ma', oro taramaxicon nuxut pain ca judeu urut ca' quem, wiricoco co hwet jun nonon. Cut nana cote ne quit je pana ca mam' wap wa quem.

48Judas ma', co tomi' mi' toton nonon con Jeju ma', wara tomi' xo' nonon oro wari' co ja' ja' nonon ma'. Ma' ta querec pin' hun ta nonon. Ca' nonon: Wari' co xup ta' ma', wirico tara co quep hwe ta nonon. 49Xut hwet hap ac con na. Maqui' ina ta Taramaxicon co ca' na taxipa' capijacon Iri' Jam na ca tomi' con ma'. Xup ac con na.

50Ara ho' rain ca ara ta' ma ma' win ma' ne ac con na Jeju.

Xuruxut hwet hap ac cocon na, quep ac cocon na, pao' pe ac cocon na quem. 51Coc xicot ac cain na cote ne quit win ma' nuxut co xat pe ho' non Jeju ma', wara ca' na wari' co taramaja mi' e' non sacerdote co iri' taramaxicon ma', to' pa' ton na ira, ton mapi' ac cain na taraxicon.

52Om na, joc corom pin rain cote ne quit nem pain jajinain ma' ta ac con na Jeju. Oro wari' co mam' mixita nanain cote ne quit nucucun ma', mam' cono' pin ac caca tara pain cote ne quit quem. 53Cain' cain' ne ca coromicat nem quem? Om ta quep xiho' con Cote ca mapa' ra? Mo xi quep xiho' ne ton, mam' hap ac capa' xira cocon oro jam co taramaja mi' nonon. Mija xira ca 1.000 nucucun. Om xi narain ho' capa' cocon ta. 54Ane om na capa' pain ca quep xiho' ne ton ne. Mo xi quep xiho' ne ton, pan' am ac ne xira ca xirao' to caca oro profeta co wara tomi' pe nanain carawa ca ara xim napa' ta na ca tomi' con win ma' nuxut ma'.

55Cain' cain' xihwe quem ac tococwa na oro wari' co quep xun nonon ma'. Para cut hwein cote ne quit je pana mam' wap wa pain ca quep xim mahu' ma' quem? Ac ca an noc xa taxipa' ta' carawa na pahu' ra na ca tomi' tococwa ma'. Wara pe ho' paxi' inuhu' pain oro xijein xec pane, pain ca ca' na pe tain cote ne xiricon Iri' Jam capijacon pane. Je xi quep qui' mahu' pain i cain pane? 56Je i ma' pahu' ta ac tococwa na. Oro ca ara napa' ca', ca xirao' to caca oro profeta pain capijacon Iri' Jam pane, na e' na pain ca hwerehwet pin ne pain xocori ca', ac i ma' na ca tomi' tococwa ma'.

Paca' ac urut con na Jeju pain ca taxipa' urut con ca'. Jein mama' jein mama' pi' pin urut.

Ca an mi' tocwa cocon oro taramaxicon co hwara' opa tamana nana

Marcos 14.53-65; Lucas 22.66-71; Lucas 23.1-25; João 18.12-14; João 18.19-24

57Caram ma' co quep nonon Jeju ma', an mao ac cocon na pain xiricon sacerdote co iri' taramaxicon. Caifás na wixicon taramaxicon. Wara cut in xucucun pain i ma' oro co ca' na taxipa' nanain ca xirao' nucun Moisés ma', cocon oro taramaxicon nuxut pain ca judeu urut ca' quem. 58Ja' tequi' pira ca' non Jeju Pedro ma' quem. Xut ac ca na, wara ca' na ca tao' caho' nein xiricon sacerdote co iri' taramaxicon ma', corom mao ac ca na, xao pe ho' ac cocon na oro guarda ma' quem. Querec ta' carawa ca ara ton non Jeju ta xucun.

59Tomi' xo' ac xucucun na oro taramaxicon nucucun oro sacerdote ma', cocon oro xucucun taramaxicon co cut in xucucun pain ca Sinédrio caca ma'. Pirao' xuxun wari' co xina ximama' napari' con Jeju ta. Querec inon pain ca caracat nucun, pan tem tamana na, tomi' mixein ac i ma' tatarapari'. Taraju iri xuxun ne, ha' ac capari' tara pain ca tomi' hwet xuxun pain oro taramaxicon nucucun oro romano ma', to' pa' pin ac cocon tara ta, ac i ma' paxi' na ca tomi' xo' pan xucucun#26.59 Ma' 70 nana oro taramaxicon co cut in xucucun. Sinédrio nonon oro wari' pain ca cut in xucucun. Ma' na iri' taramaxicon nucucun oro sacerdote, ma' nana oro xucucun taramaxicon nucucun oro sacerdote ma' quem, ma' nana oro fariseu cocon oro saduceu ma' quem. Ac juiz nana, taraju nonon oro wari' co tomi' em' nonon oro win ma' caca, tomi' mi' tomi' mi' ac tococwa na pain ca wap wa oro wari' co em' nana quem. . 60Ane om mam' tocwa wari' co tomi' hwet xo' nain con ne. Mija paxi' nana wari' co xina nana ma', ane tomi' ximama' e' caca ne. Om ca an an ari xijein ca tomi' ximama' nucucun.

Aram aram ma' pin ac caca na co xuruxut hwet nonon oro taramaxicon ma'. Ma' 2 nana. 61Tomi' hwet xut pahu' con Jeju ta ac cocon na. Ca' na ca taraju urut pane, taraju urut con pain ca tomi' cain i ca' pane nana. Ha' napa' pain ca to' pa horohot pin tain cote ne xiricon Iri' Jam ta na. Ma' 3 pin iri tara xec nein ne, quep mami' pan ac tain tara ta na ca tomi' ca pane, taraju urut con ta nana.

62Tequi' pe ac ca na sacerdote co iri' taramaxicon. Tomi' querec ac con na Jeju: Je xi tomi' in pin momon caram cwa', pain ca tomi' em' quequem ca' quem non.

63Ane tacana pe ca Jeju ne. Om ca tomi' in pin camain' tococwa#26.63 Para tacana pe ca Jeju quem? Jin' na ron? Wixipa' na ron? Om na ta! Taxi' tata pain ca xina ximama' nucucun. Miri'om e' tata. Je ca tacana pe ca ma'. Je ca om tomi' in pin camain' tococwa..

Tomi' ac con na: Wum co Cristo cwa' ra? Tomi' xo' xut e'. Xi taraju ara quem Iri' Jam co e' cara ta. Taraju nem pain ca tomi' nem quem. Wum co Panxica Iri' Jam ra non.

64Wata' cwa' ira. Win ne ca tomi' pan ma ma' ac ca na Jeju. Ane tomi' tomi' pi' pin xuhu' pain i ca' ne. Main maqui' tara xec nein ca querec xim mahu' pain ca xao pe ho' ton Iri' Jam co hwara' opa pan. Wata' pain ca Iri' Wari' ta' ca', querec ac mahu' tara pain ca xao pe ho' tain iri' curucun pain i cain. Querec ac mahu' tara pain ca maqui' wi ta' pain tajain nanawin quem ta na ca tomi' con ma'.

65Taraju iri nain ca tomi' nucun Jeju sacerdote co iri' taramaxicon ma' ne, i' pin ac con na womicon. Xi mana' tamana ara ca ta. Tomi' ximao non Iri' Jam co cwa' ta. Je xi om tomi' hwet jein ca em' nucun co cwa' mami' xuxun oro wari' cwa' quem? Taraju pin iri hun pain ca tomi' ximao nucun ma', pain ca wata' co Cristo ta ca ma'. 66Cain' ca coromicat hwe con quem ac ca na.

Em' na ta, na e' na pain ca to' pa' pin tocwa ta ac caca na.

67Ma' ac caca na co cupa' nonon pain tocon ma', to' to' ac cocon na. Ma' ac caca na oro xucucun co wap nonon quem. 68Ma' co to' nem cwa' quem? Tomi' hwet rain wixicon co to' nem cwa'. Win ne ca wata' co Cristo cwa' ta ma ma', ac i ma' na ca tomi' ximama' nucucun.

Ca tomi' ximao ca Pedro pain ca om ca querec pin' ton Jeju ta ca

Marcos 14.66-72; Lucas 22.54-62; João 18.15-18; João 18.25-27

69Tahwet xao pe na Pedro ma' quem. Xao pe pe nain ca tao' caho' nein xirim. Xut hwet ac con na xojam' co taramaja pe nain i ma'. Tomi' ac con na: Pe ho' mon Jeju co maqui' nain Galileia ma' quem non.

70Om na ta ac cam na. Om ca taxi' tain ca tomi' ma ma' ta nam. Taraju taraju xam' nonon pain ca tomi' ac i ma' ca ma'.

71Xut hwet ac cain na man ca corom ac xine ca tao' caho' nein xirim ma' quem. Querec ac con na xequem xojam' co taramaja pe nain i ma'. Tomi' ac cama na cam ma' quem, tomi' nonon oro wari' co to nanain i ma'. Co ma' ma', pe ho' non Jeju co maqui' nain Nazaré ta nonon.

72Tomi' in pin mami' ac ca na Pedro. Om na! Om ca querec pin' ton co ma' ta na. Taraju napa' Iri' Jam quem. Mo ta mixein ta', wap ac capa' tara ta. Om ca querec pin' ton ta na.

73Om om, xuruxut hwet ac cocon na Pedro co to nanain i ma'. Tomi' ac cocon na: Wari' nucun Jeju ma ma' ira. Win ne ca tomi' an xiho' momon oro wari' nucun ma', ac iri' ca tomi' nucucun ma ma' ira na ca tomi' cocon ma'.

74Tomi' ximao ac ca na Pedro: Om na ta! Tomi' iri'o' inuhu' ta. Taraju napa' Iri' Jam ta. Om ca querec pin' ton co ma' ta. Mo ta om tomi' iri'o' ta', wap ac capa' tara Iri' Jam ta na.

Aca ho' na me. 75Mam' pe wet ac cain na ca tomi' nucun Jeju pane. Om ta aca querec ca me, tomi' ac momon tara, om ca querec pin' ton ta ac momon tara pata', ma' 3 tara ca tomi' ac i ma' toton ma quem Pedro, ac i ma' na ca wara tomi' con pane. Hwet mao ac ca na, aca tamana ac ca na quem.

Currently Selected:

Mateus 26: TBPN

Highlight

Copy