Marcos 14

Ca tomi' xo' xucucun pain ca to' pa' pin xun cocon Jeju

Mateus 26.1-5; Lucas 22.1-6; João 11.45-57

1Wixicam pin ac ne na Páscoa ma'#14.1 Páscoa na wixinain xec nein ca tomi' querec te xucucun oro judeu pain ca mam' pe wet cocon oro hwanana nucucun pain ca to' witan ca' tococwa pain Egito pain cara pane., je oro xec nein ca tomi' querec te xucucun oro judeu ma', pain ca cao' e' cacain capam' ca om joc wanan wa pain ca to' memerem nein ma' quem. Om ca pira ne, ma' 2 e' na xec pain ca maqui' ta' ne ma'. Oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma' quem, tomi' xo' ac xucucun na. Cain' cain' xuxun Jeju quem? Cain' xi quep noc xa ac xun quem? Cain' xi to' pa' pin ac xun quem? 2Om ta quep xun pain oro xec nein ca tomi' querec te nexi' ca'. Ma' ta om teretem caca oro wari' ta, ac i ma' na ca tomi' xo' xucucun ma'.

Ca ji'ao mi' tocwa pain caji towaxi' Jeju

Mateus 26.6-13; João 12.1-8

3Pe ac cain na Betânia Jeju, cao' pe nain xiricon wari' ma'. Simão na wixicon. Ma' non caji nan Simão pain cara pane. Xut hwet ac con na Jeju narima' ma'. An nain caji towaxi' ca hu awi ma', ca wara ji'ao pe cama pain caji too ca mam' quep xine pain ca awi ne pacun ca taramac tamana. Homain nardo#14.3 Caji towaxi' ma' cam, maqui' nain caximain pana. Nardo na wixinain cocon oro wari'. na wixinain caji towaxi'. Mija na dinheiro nein. Jicat ac camain na tamain too nein, ji'ao mi' ac con na pain winacon Jeju.

4Ma' nana co cao' to ho' nonon ma' quem. Mana' nanam. Cain' cain' xira cam ne nana. Para waraju camain caji towaxi' ma' quem? 5Je xi vender camain quem? Cut ac camain xira cote ne dinheiro nein, 300 xira denário ca cut cama ta. Mi' tiquin' ac tococwa xira pain oro wari' co om nonon carawa na ca tomi' in pin cacam ma'.

6Ane tomi' ca Jeju ne: Je i ma' ira, to wet iri cama ma'. Miri'om jem. Para tomi' em' hwem ma' quem? Hohot na pain ca an hwet mi' ac i ma' capa' pain ca tomi' querec te nequem. 7Tama' ma' ara xi' nunuhu' oro wari' co om nonon carawa. To ho' cara tuturuhu' pa'ao'. Ha' tuturuhu' pain ca tama' quep xiho' huhun quem. Wata' iri na ne, om ta pe ho' cara xuhu'. 8Narima' cwa', mi' xim paxi' napa' pain carawa ca awi. Ane ma' e' cam homain nardo ca' ne. Je ca ji'ao mi' capa' pain. Win ne ca ji'ao mi' xim cacapa' pain homain towaxi' pain ca aram aram an corom pe xim cacapa' pain manain pacun ma', wara ji'ao mi' napa' pain homain towaxi' narima' cwa', pain ca e' e' wet ta' ca'. 9Je ca tomi' xuhu' ca', tomi' iri'o' inuhu'. Oro wari' co pijim' mama' xin nanain pira ma', pain ca tomi' hwet xun cacapa' cocon oro xucucun wari' ma', pijim' hwet ac cacain tara ca ara mi' capa' cam cwa' ta. Mam' pe wet cara ac tacama tara ta na ca tomi' tococwa ma'.

Ca quep xiho' xuhu' pain ca quep xun hun Jeju ta cocon oro taramaxicon nucucun oro sacerdote Judas

Mateus 26.14-16; Lucas 22.3-6

10Judas Iscariotes ma', co to' 12 nonon co taxipa' ca Jeju ma', hwet ac cocon na oro taramaxicon nucucun oro sacerdote. Tomi' ac cocon na: Quep xiho' xuhu' pain ca quep xun hun Jeju. Tomi' mi' xuhu' con ta nonon.

11Taraju iri nonon ne, tomi' querec te tamana ac caca na. Mi' xut pum pain dinheiro con ta ac cocon na. Ma ac ca na, noro noro ac con na. Cain' xi tomi' mi' toton con ne ac ca na. Hohot tara pain xec ca' ra? Am pain xim ca' tara quem na ca tomi' pan xucun.

Ca toc wi cacain comi memem con Jeju

Mateus 26.17-30; Lucas 22.7-23

12Maqui' pin iri na iri' xec nein ca cao' querec te e' cacain capam' ca om joc wanan wa pain ca to' memerem nein ne, pain xec nein ca to' pa' taxipa' cacain wijimain taramaji ovelha ca to' mam' pe wet nonon pain ca witan ca' cacain Egito oro hwanana pane, tomi' querec ac cocon na Jeju co taxipa' ca ma': Main ca ara to jein maparut pain carawa nein Páscoa pain ca cao' querec te nexi' quem nonon.

13Tomi' xo' ac tococwa na, ma' 2 nana co tomi' xo' ca ma'. Xuruxut mama' jein cidade ma'. Xut cam' ac cuhu' tara wari' co an nain caji tapaxi' pain com. Ja' ja' corom mao ac hun tara pain xirim. 14Tomi' ac hun tara waximain xirim ma': Tomi' nem Taramaxicon nuxut co ca' na taxipa' capijacon Iri' Jam ta. Main man ca tomi' pe mapa' pane, ca cao' querec te to xin urut pain carawa nein Páscoa quem nem. Cao' querec te wi ta' cocon co taxipa' ta' cwa' nem ta ac hun tara. 15Main i ca', piri' mama' xi' ta ac cuhu' tara. Querec jein ta ac cuhu' tara pain cote ne manain xiricon ma', ca wara awori to ne oro coximinain ma'. Wara ara an to xo' jein pain i cain, ma' ta cao' querec te iri' ta ac tococwa na.

16Ma ac caca na, mama' ac cacain na cidade. Mam' ac cocon na wari' co tomi' ca Jeju, mam' nanain manain xirim ca tomi' ca quem. Ara an to xo' ac cacain na carawa ca cao' querec te xi' caca pain Páscoa quem.

17Xo' um pin iri na ne, maqui' ac ca na Jeju. Wirico, wiricoco co taxipa' ca ma', co ma' 12 nana ma', maqui' ac caca na. 18Cao' xi' ta, xao to ho' ac xucucun na, cao' cao' ac caca na. Cao' cao', tomi' ho' na Jeju: Ma' napari' co quep xiho' toton nonon co noc nanapa' ma', co quep xim nanapa' ma' nonon. Win ma' nuhu' ta nonon. Tomi' iri'o' inuhu', tomi' mi' tarapa' cocon co noc nanapa' ta nonon.

19Tomi' xaxa' tamana ac caca na. Wata' tara pum ra ac con na xucun ma', wata' tara pum ra ac cocon na oro xucucun ma' quem. Wata' tara pum ra wata' tara pum ra xam' nonon.

20Win ma' nuhu' cwa' ac tococwa na. Win ma' nuhu' pain ca taxipa' mahu' ca', pain ca ma' 12 hwe ca'. Wirico tara co xin cam wi napa' pain capam' pain too ca mam' cao' wa ca' tata. 21Mi' pin ta' paxi' ina pain ca Iri' Wari' ta' ca'. Win ne ca xirao' pe cacapa' oro profeta pane. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ma' ne, co quep xim nanapa' ma'. Ximin tara. Hohot xira pain ca om pan' ne ca pije' nucun cam jicon ta na ca tomi' tococwa ma'.

22Cao' ac caca na, cao' cao'. An ac cain na capam' Jeju. Tomi' querec te urut pum pain ca mi' maparut pain capam' ca' quem Te na, jicat caracan ac cain na, mi' ac tococwa pain na. Ma' ta. Cao' jein. Capam' ca', an xiho' nain cwere ta ac tococwa na. 23An ac cain na ca mam' toc wa ca ji'ao pe xine comi memem ma' quem. Tomi' querec te urut pum pain ca mi' maparut pain comi memem ca' quem Te iri na ne, an mi' ac tococwa pain na. Toc toc pi' pin ac caca na. 24Comi memem ca', an xiho' nain cocu ta ac tococwa na. Je ca to' querec pin' cuhu' pain ca tomi' an pe xo' mi' cuhu' Iri' Jam cwa', pain ca to' witan xim cuhu' ca'. Ao mao iri tara cocu pain ca mi' pin ta' ne ca' ne, je win ara pin tain cain ca wara tomi' an pe nucun. Mija tatara oro wari' co mi' pin caho' ta' ta' quem. 25Om ta toc mami' tain comi memem ta ac tococwa na. Tomi' iri'o' inuhu', om ta toc mami' tain comi memem. Om om, maqui' pa' ac capa' tara iri' xec nein ca toc pe tain ta' pain i cain, pain ca taramaxicon pe ca Te cwain, toc ac tain xocori tara pain i cain ta na ca tomi' tococwa ma'.

26Com iri nanain tamara' pain ca in ac cocon Iri' Jam ne, hwerehwet mama' ac caca na, mama' ac cacain na Pacun Nein Oliveira ma'.

Ca paca' xim mahu' pain xim ca' cocon co taxipa' ca Jeju

Mateus 26.31-35; Lucas 22.31-34; João 13.36-38

27Tomi' ac tococwa na co taxipa' ca ma': Paca' paca' pi' pin xim mahu', xi xirao' pe ara xine pain capijacon Iri' Jam pata' pane. Ca' na pata':

To' pa' pin ton co querec wet taxipa' nain ovelha ma',

wawaran mama' ac ne tara oro ovelha nucun.

Ac i ma' na ca xirao' pe xine pain capijacon Iri' Jam pane, pain ca xirao' pe xine ca tomi' nucun pata' pane. 28Ane e' mami' ta' ta' ne. E' mami' iri ta' ne, wara mao ac tain tara Galileia. Maqui' ac hwe tara pa'ao' na ca tomi' tococwa ma'.

29Tomi' pan ac ca na Pedro: Paca' paca' pi' pin paxi' teterem oro xucucun co taxipa' ma cwa'. Wata' iri na ne, om ta paca' xim ta na ca tomi' con ma'.

30Om na ta Pedro ac ca na. Tomi' toton momon oro wari' pain xim ca'. Aca tara me, om ta aca mami' querec ca, wara tomi' ac momon tara: Om ca querec pin' ton ta ac momon tara pata'. Ma' 3 tara ca tomi' ac i ma' toton ma quem. Tomi' iri'o' inem ta Pedro na ca tomi' con ma'.

31Om na ta ac ca na, tomi' mip na. Om ta tomi' ac i ma' toton. Mo ta to' pa' wi pin xim cacapa' pum, je i ma' ira, om ta tomi' camain' toton pain ca om ca querec pin' ton ta toton pum na. Ac je ac je pi' pin na ca tomi' nucucun oro xucucun ma' quem.

Ca pe cain Getsêmani Jeju

Mateus 26.36-46; Lucas 22.39-46

32Mama' ac cacain na totain oliva ma', ca Getsêmani caca oro wari' ma'. Tomi' pan ac cocon na co taxipa' ca Jeju ma'. Xao to to jein i ca', pain ca tomi' ton Te ta tata.

33Harahap je ta ac tococwa na Pedro con Tiago con João ma', o mama' ac tococwa na. Xuruxut xuruxut, toron tamana ac ne na ximicon Jeju. Jain jain pin na. Mija na. 34Tomi' xaxa' tamana ina ta ac tococwa na. Mija na ca tomi' xaxa' ta', pain iri' xumu ca', mija ina ta! Tomi' xaxa' tomi' xaxa' mi' pin ma' ac ta' pain tara, ac je na pata'. Mon to wet jein i ca'. Ta pi'am hwe me, momon querec je ta tata.

35Xut xut xat, terem' tucu mi' ac cain na macan'. Tomi' ac con na Cote ca. Am ha' quem, pain ca nain ho' mapa' pain carawa ca ara xim napa' pain xec ca' quem. 36Te. Te ac con na. Om na carawa ca tanacam' nem ta Te. Nain ho' ne pain ca jain jain ta' ne ca', pain ca mi' pin ta' ne ca' quem Te. Tara pum, nain ho' ne pain me paxi' inem. Ane param e' tain ca param pan nem ne. Noc inain ca param ne ca' na ca tomi' con Cote ca.

37In hwet ac tococwa na. Wara pi'am nana. Tomi' ac con na Pedro ma', co Simão na xijein wixicon ma'. Pi'am ma ra Simão? Om ca momon querec ac ma ra? Xica' pe tara hora nein ca querec je xuhu' ca' inuhu' ne non. 38Ta pi'am hwe me ta ac tococwa na. Momon tomi' jun Iri' Jam, ma' ta om ja' camara' xihwe pain ca tomi' querec cuhu' Caxicon Jam ta. Tomi' ha' xi' paxi' hwe pain xumuhu' ma', ane om hwara' opa hwe pain curuhu' ma' ne na ca tomi' tococwa ma'.

39In ca' mami' ac tococwa na, tomi' mami' ac con na Cote ca. Ac ca tomi' con cara ne na pain ca tomi' mami' con ma'. 40In hwet ac tococwa na, wara pi'am mami' nana quem, xi in tamana ara ne matacocon ta. Hehe ac cocon na.

41In mao mami' ac ca na, tomi' mami' ac con na Cote ca, in hwet mami' ac tococwa na. Je win 3 pin ne ca in hwet in hwet tococwa ma'. Tomi' ac tococwa na: Pi'am pi'am wet hwe ra? Xao to wa xao to wa wet hwein xumuhu' ra tata. Je i ma' ira, maho' jein ta ac tococwa na. Maqui' pin nana co quep xim nanapa' cwa'. Wata' pain ca Iri' Wari' ta' ca', quep ho' xim nanapa'. Maqui' pin na co tomi' mi' xim napa' cocon oro caracat ta. 42Tequi' to je ta. Maji cocon. Maqui' nain i ma' co tomi' mi' xim napa' cocon ta na ca tomi' tococwa ma'.

Ca quep cocon Jeju

Mateus 26.47-56; Lucas 22.47-53; João 18.1-11

43Tomi' tomi' wet na Jeju, maqui' ac ca na Judas ma', co to' 12 nonon co taxipa' ca ma'. Mija nana wari' co ja' ja' nonon. Wiricoco oro taramaxicon co ja' ja' jun nonon. Mo nana: Oro taramaxicon nucucun oro sacerdote ma', oro co ca' na taxipa' nanain ca xirao' nucun Moisés ma', oro taramaxicon nuxut pain ca judeu urut ca' quem, wiricoco co hwet jun nonon. Cut nana cote ne quit je pana quem. 44Judas ma', co tomi' mi' toton nonon con Jeju ma', wara tomi' xo' nonon oro wari' co ja' ja' nonon ma'. Ma' ta querec pin' hun ta nonon. Ca' nonon: Wari' co xup ta' ma', wirico tara co quep hwe. Querec wet xo' jun pain ca an mao hun quem nonon.

45Xut hwet hap ac con na. Taramaxicon co ca' na taxipa' capijacon Iri' Jam na ca tomi' con ma'. Xup ac con na. 46Quep ac cocon na, pao' pe ac cocon na quem. 47Coc xicot ac cain na cote ne quit wari' co xat pe nain i ma', wara ca' na co ma' co taramaja mi' e' non sacerdote co iri' taramaxicon ma', ton tapit pin ac cain na taraxicon.

48Cain' cain' xihwe quem ac ca na Jeju. Para cut hwein cote ne quit je pana mam' wap wa pain ca quep xim mahu' ma' quem? Ac ca an noc xa taxipa' ta' carawa na pahu' ra na ca tomi' tococwa ma'. 49Wara pe ho' paxi' inuhu' pain oro xijein xec pane, pain ca ca' na pe tain cote ne xiricon Iri' Jam capijacon pane. Je xi quep qui' mahu' pain i cain pane? Je i ma' pahu' ta ac tococwa na. Na e' na pain ca hwerehwet pin ne oro ca xirao' to caca oro profeta pain capijacon Iri' Jam pane ta na ca tomi' tococwa ma'.

50Paca' ac cocon na co taxipa' ca ma'. Jein mama' jein mama' pi' pin nana. 51Ma' na xo' hwara' co ja' ja' non ma' quem. Wiric pa' e' xucun con cote ca wom. Quep xun paxi' nonon quem. 52Ane an pe pin con cote ca womicon ne, mo mao curucun ac ca na quem.

Ca an mi' tocwa cocon oro taramaxicon co hwara' opa tamana nana

53An mao ac cocon na Jeju. An mi' nonon con sacerdote co iri' taramaxicon. Cut in ac xucucun na oro taramaxicon quem. Mo nana: Oro taramaxicon nucucun oro sacerdote ma', oro taramaxicon nuxut pain ca judeu urut ca', oro co ca' na taxipa' nanain ca xirao' nucun Moisés ma' quem. Cut in cut in pi' pin ac xucucun na. 54Ja' tequi' pira ca' non Jeju Pedro ma' quem. Xut ac ca na, wara ca' na ca tao' caho' nein xiricon sacerdote co iri' taramaxicon ma', xao pe ho' ac cocon na oro guarda ma'. Nonoc ta' xe ta na.

55Tomi' xo' ac xucucun na oro taramaxicon nucucun oro sacerdote ma', cocon oro xucucun taramaxicon co cut in xucucun pain ca Sinédrio caca ma'#14.55 Ma' 70 nana oro taramaxicon co cut in xucucun. Sinédrio nonon oro wari' pain ca cut in xucucun. Ma' na iri' taramaxicon nucucun oro sacerdote, ma' nana oro xucucun taramaxicon nucucun oro sacerdote ma' quem, ma' nana oro fariseu cocon oro saduceu ma' quem. Ac juiz nana, taraju nonon oro wari' co tomi' em' nonon oro win ma' caca, tomi' mi' tomi' mi' ac tococwa na pain ca wap wa oro wari' co em' nana quem. . Pirao' xuxun oro wari' co xina ximama' nanapari' con Jeju ta. Querec inon pain ca caracat nucun, pan tem tamana na, tomi' mixein ac i ma' tatarapari'. Taraju iri xuxun ne, ha' ac capari' tara pain ca tomi' hwet xuxun pain oro taramaxicon nucucun oro romano ma', to' pa' pin ac cocon tara ta, ac i ma' paxi' na ca tomi' xo' pan xucucun. Ane om mam' tocwa wari' co tomi' hwet xo' nain con ne. 56Mija paxi' nana wari' co tomi' hwet ximama' nanain con. Ane om tomi' xo' caca ne. Om ca an an ari xijein ca tomi' nucucun.

57Ma' ac caca na co tomi' hwet xut pahu' con ta nana ma' quem, xina ximama' ac caca na: 58Taraju urut con pain ca tomi' ca' ca pane: To' pa horohot pin tain cote ne xiricon Iri' Jam ca quep caca wari' ca' nain xirim ca in ac to taxipa' xun Iri' Jam ca'. Ma' 3 pin iri tara xec nein ne, quep pan ac tain tara wirain xiricon Iri' Jam. Om tara wari' co quep nain ta na, ac i ma' na ca xina ximama' nucucun. 59Tomi' ac i ma' paxi' nana, ane om an an ari xijein ca tomi' nucucun ne.

60Tequi' pe ac ca na sacerdote co iri' taramaxicon ma'. Xat pe nain ximijacocon. Tomi' querec ac con na Jeju: Je xi tomi' in pin momon caram cwa', pain ca tomi' em' quequem ca' quem non.

61Ane tacana pe ca Jeju ne. Om ca tomi' in pin camain' tococwa#14.61 Para tacana pe ca Jeju quem? Jin' na ron? Wixipa' na ron? Om na ta. Taxi' tata pain ca xina ximama' nucucun. Miri'om e' tata. Je ca tacana pe ca ma'. Je ca om tomi' in pin camain' tococwa..

Tomi' querec mami' ac con na: Wum co Cristo cwa' ra? Wum co Panxica Iri' Jam co awi cwa' ra non.

62Wata' cwa' ira ac ca na Jeju. Main maqui' tara xec nein ca querec xim mahu' pain ca xao pe ho' ton Iri' Jam co hwara' opa pan. Wata' pain ca Iri' Wari' ta' ca', querec ac mahu' tara pain ca xao pe ho' tain iri' curucun pain i cain. Ame hwe e', wata' pain ca Iri' Wari' ta' ca', querec ac mahu' tara pain ca taramaxicon wi ta' con. Querec ac mahu' tara pain ca maqui' ta' pain tajain nanawin ta non.

63Taraju iri nain ca tomi' nucun Jeju sacerdote co iri' taramaxicon ma' ne, mana' tamana ac ca na, i' pin ac con na womicon. Xi mana' tamana ara ca ta. Je xi om tomi' hwet jein ca em' nucun co cwa' mami' xuxun oro wari' cwa' quem? 64Taraju pin iri hun pain ca tomi' ximao nucun ma', pain ca wata' co Cristo ta ca ma'. Cain' ca coromicat hwe con quem ac tococwa na.

Mi' pin tara ta, xi caracat ara ca pain ca tomi' ximao nucun ta ac caca na. Tomi' ac i ma' tomi' ac i ma' pi' pin nana.

65Ma' ac caca na co cupa' nonon ma'. Tatep pa' nanain tocon, to' to' ac cocon na quem. Ma' co to' nem cwa' quem? Tomi' hwet rain wixicon co to' nem cwa' ta nonon. An mao ac cocon na oro guarda ma', wap wap ac cocon na quem.

Ca tomi' ximao ca Pedro pain ca om ca querec pin' ton Jeju ta ca

Mateus 26.69-75; Lucas 22.54-62; João 18.15-27

66Pe nain i ma' Pedro ma', pain ca tao' caho' nein xiricon sacerdote co iri' taramaxicon ma'. Tomi' querec pe nonon Jeju pain tequipain xirim pain pawin ma', tahwet pe na Pedro pain macan' ma' quem. Xut tiquin' ca' ac con na xojam' co taramaja mi' e' non taramaxicon. 67Querec ac con na pain ca nonoc cain xe. Noro noro ac con na. Tomi' ac con na: Pe ho' mon Jeju co maqui' nain Nazaré ma' quem non.

68Om na ta ac cam na. Om ca querec pin' ton, om ca taxi' tain ca tomi' ma ma' quem ac cam na. Xut hwet ac cain na man ca corom ac xine ca tao' caho' nein xirim ma'.

69Querec iri non pain ca pe cain i ma' ne, tomi' mami' ac cama na: Wari' nucun Jeju na co ma' ta tata oro wari' co to nanain i ma'. 70Tomi' in pin mami' ac ca na quem. Om na, om ca querec pin' ton ta nam.

Om om, tomi' ac cocon na caram ma' co xao to to nanain i ma' quem. Wari' nucun Jeju ma ma' ira. Xi wari' nein Galileia ara ma ta nonon.

71Tomi' ximao ac ca na Pedro: Om na ta! Tomi' iri'o' inuhu' ta. Taraju napa' Iri' Jam ta. Om ca querec pin' ton co ma' co tomi' hwe ma'. Mo ta om tomi' iri'o' xuhu', wap ac capa' tara Iri' Jam ta na.

72Aca mami' ac ca na me. Ma' 2 pin na ca aca nucun. Mam' pe wet ac cain na ca tomi' nucun Jeju pane. Om ta aca mami' querec ca me, tomi' ac momon tara: Om ca querec pin' ton ta ac momon tara pata', ma' 3 tara ca tomi' ac i ma' toton momon ma' quem Pedro non pane. Aca ac ca na quem.

Currently Selected:

Marcos 14: TBPN

Highlight

Copy