Ja̰ 14

Jesu tɨ ul tɨ saal tɨ Ndɨla ndɔ

1Jesu ja gɨ ər bi: «I hul ka i dugun lo, lɛ yḭ ko Ndɨla hul la, i ko ən hul la. 2Tɨ ən Ba gə̰y, un tɨ tɨm tɨ dɨbla wo nin, jo tɨ in lo a, ən ɓə gɨ i ja ɓə ən ɓə saal tɨ gɨ i un kaaw tɨ tɨm tɨ nin a? 3Lɛ gorne ən si ən kaaw gɨ i un teni gɨna, ən ɓə duga hina i to nɨ un ne ən ti tɨ nin gɨna, yḭ ɓə tɨm na ən la. 4Un ne ən wo saal tɨ nin, yḭ una teni.» 5Tomas ɓiri ər: «Yini una un ne əm wo saal tɨ nin lo. Ka waa yini ɓə ul tɨ saal tɨ nin una a?» 6Jesu duga gɨ ər: «Yin tɨ ul la, jaa kuri la, tɨm jili la. Wo lɛm saal tɨ Ba ndɔ bla yin lo. 7Jo yḭ una ən, yḭ ɓə ən Ba una la. Ndogle, yḭ una ər la, i ləg ər la.» 8Pilip ja gɨ ər: «Baali, əm ɓla gɨ i əm Ba la yini kaw ɓə i lɛm la.» 9Jesu duga gɨ ər: «Pilip, ən ti na i ɓagcagri lɛ əm una ən lo a? Wo ne ləg ən a, ləg ən Ba teni. Ka waa ta əm ɓə ja ɓə “əm ɓla gɨ i əm Ba cam a?” 10Ən ti tɨ ən ba ndɔ la ən ba ti tɨ ən ndɔ la. Pay əm ko jaa ne hul lo a? Jaa ton ən ja gɨ i o̰ tɨ ən ndɔ lo. Tɨ ən Ba ne ti tɨ ən ndɔ jo ka ər mum ne gun. 11Yḭ ko ən hul gorne ən ja ɓə: Yin la, ən Ba la, i tɨ ɓudu.

12«Ən jaa gɨ i tɨ bayri, wo ne ko ən hul ɓə ən mum tɨ kar ne kar la. Ər ɓə ne ura dwari kar la, kəysul ən wo saal tɨ ən Ba ndɔ. 13Mum gun ne yḭ ɓə ɓiri na ən ndil, ən ɓə gɨ i kar nɨ ka ən Ba Ndɨla ten na taan tɨ ən ndɔ. 14Jo yḭ ɓiri wa̰y na ən ndil gɨna, ən ɓə gɨ i kar.»

Ndɨla ha̰w gṵ tɨ Lal ɓari naa

15Gɨna Jesu ja gɨ a: «Jo yḭ ka ən kum a, yḭ ɓə ən gṵ hul oy. 16Ən ɓə ən Ba ɓiri ka ər toon gɨ i wo ne ɓə hina i hul ɗini naa na kwi marway. 17Tɨ Lal tɨ kuri ne bi tɨ dunya̰ ɓə ər tina lo, kəysul a ɓə ər ləg lo la, a ɓə ər una lo la. Lɛ yḭ, una ər teni, la ər ti na i teni la, ər ɓə na i tɨm marway la. 18Ən ɓə i nɨm na sul ne kuna ɓimi ɓeer lo. Ən ɓə hina tɨ i ndɔ. 19Ndogle, bi tɨ dunya̰ ɓə ən ləg lo, lɛ yḭ ɓə ən ləg kəysul ən ti jili la yḭ kaw, i ɓə tɨm jili la. 20La na ɗa̰y ne hul, yḭ ɓə una ɓə: yin wo tɨ ən Ba ndɔ la, yḭ wo tɨ ən ndɔ la, yin wo tɨ i ndɔ la.

21«Wo ne par ən gṵ hul la ər so ər ka na cida la, ər ka ən kum kuri. Wo ne ka ən kum, ən Ba ɓə ər kum kar la, yin kaw ən ɓə ər kum kar la, ən ɓə ən ndula ɓla gɨ ər la.» 22Jud, ne tɨ Judas Iskariot lo ja gɨ Jesu: «Baali, əm ɓə əm ndula ɓla gɨ yini, lɛ kəyjaa gɨ bi tɨ dunya̰ ɓla lo a?» 23Jesu duga gɨ ər: «Wo ne ka ən kum oy ən jaa tɨ ja. Ən Ba ɓə ər kumkar, yini ɓə hina tɨ ər ndɔ, ən Ba la yin la, yini ɓə tɨm tɨ ər gə̰y. 24Wo ne ka ən kum lo oy ən jaa tɨ ja lo. Jaa ne ən wo gɨ i ja ndogle o̰ tɨ ən ndɔ lo, lɛ tɨ ən Ba ne ton ən ndɔ. 25Ən ja gɨ i mum ne kəysul ɗang ən wo tɨ i ndɔ. 26Wo ne ɓə i yaar tɨ Ndɨla na Lal ne ən Ba ɓə gɨ i tomni na ən ndil, ər ɓə i ho̰ni jani tɨ jaa gun ne ən ja gɨ sul.

27«Ən nɨm i na lapya, tɨ ən lapya jo ən naa gɨ i. Ən naa gɨ i kuna bi tɨ dunya̰ maan lo. Yḭ ka ayri kar lo la yḭ ka oy lo la. 28Yḭ laa jaa ne ən ja gɨ i: “Ən wo saal, lɛ ən ɓə hina tɨ i ndɔ.” Jo yḭ ka ən kum a, yḭ ɓə ndula laar kar kəysul yḭ una ɓə ən wo saal tɨ ən Ba ndɔ, kəysul ən ba tɨ ɗəng ura ən. 29Ən ja gɨ i jaa ne ndogle, toni barita mum ne ɓə hina, la gorne a hina gɨna, yḭ ɓə hul kula. 30Ən ɓə gɨ i ja jaa cam lo, kəysul Sidan waa̰y tɨ dunya̰ sul wo hina. Ər na dwari ɓa̰ in tɨ ən sul lo. 31Lɛ ka bi tɨ dunya̰ una ɓə ən ka ən Ba kum, la ən ka mum gun ne ən Ba ja gɨ ən tɨ kar teni la. Yḭ o̰ tɨ ndal, ka i nɨm un ne!»

Currently Selected:

Ja̰ 14: nie

Highlight

Copy