Ja̰ 4

Jesu a na ii tɨ Samari

1-3Parisyḛ-a laa ɓə bi dɨbla so ul tɨ Jesu lɔ la ər ka bi dɨbla batɛm ura Ja̰, lɛ Jesu may ka wo ɓudu in batɛm lo. Ər bi tɨ wa̰y edɨ jo ka gɨ bi batɛm. Gɨna gorne Jesu laa jaa ne, ər nɨm lɔr nəgri tɨ Jude la ər duga ər si tɨ Galile. 4Tɨ saal tɨ Galile, ər ɓə Samari ɗira barita ər ɓə an tɨ nin.

5Nejo, ər hina tɨ lɔr ɗəng ne a soon ɓə Sikar ne tɨ nəgri sul tɨ Samari, ndog na waal ne Jakob naa gɨ ər ɓa̰ tɨ Josep toni. 6Tɨ un ne Jakob na bili wo tɨ nin. Ɓɔr tɨ saal ɓoy ka Jesu nari, la ər ti tɨ bili ne mu na wa̰y tɨ tili daan.

7Ii paa tɨ Samari hina ndu kar. Jesu ɓiri ər ɓə: «Na ən ndu tɨ yḭḭ.» 8Na lula sul ne, ər bi tɨ lɔr si tɨ lɔr ɗəng hul tɨ tudi taam. 9Ii tɨ Samari ja gɨ Jesu ɓə: «yim tɨ Juyb lo a? Ka waa ta əm ɓiri yin ii tɨ Samari ndu tɨ yḭḭ a?» Ər jaa in kəysul Juyb-a na bi tɨ Samari a laa paa mu lo. 10Jesu duga gɨ ər: «Jo əm una wa̰y kede ne Ndɨla naa gɨ bi la jo əm una wo ne ɓiri əm ndu tɨ yḭḭ la gɨna, tɨ yim jo əm ɓə ər ndu tɨ yḭḭ ɓiri la, ər ɓə gɨ əm ndu tɨ tɨm jili naa.» 11Ii duga gɨ ər: «Baali, yim na Sɔl tɨ ndu kar lo la, ta bili tɨ baw la, ka waa ta əm ɓə ndu tɨ tɨm jili ne tina a? 12Yim ura ī kaa tɨ Jakob ne may yḭḭ ndu ne la, ər bi yḭḭ la ta ər yiḭ kur yḭḭ la, ta ər nɨm ər naa gɨ i a?» 13Jesu duga gɨ ər: «Wo ne yḭḭ ndu tɨ bili ne, ndu yuni jak ɓə ər kar cam, 14lɛ wo ne yḭḭ ndu ne ən ɓə gɨ ər naa, ndu yuni jak ɓə ər kar lo bad. Ndu ne ən ɓə gɨ ər naa ɓə tɨm kuna ndu cina tɨ ər ndɔ. Tɨm jili na kwi ɓə wag tɨ ndu cina ne ji.» 15Ii duga gɨ ər: «Ən Baali, əm naa gɨ ən ndu ne ka ndu yuni jak ka ən kar lo la, ən ɓə duga hina ndu jak kar tɨ un ne cam lo.»

16Gɨna Jesu ja gɨ ər: «Əm si əm soon əm ɓər le əm duga əm hina əm ten ən.» 17Ii duga gɨ ər: «Ən na ɓər lo.» La Jesu ja gɨ ər: «Jaa ne əm ja ɓə “ən na ɓər lo” tɨ kuri, 18kəysul əm na ɓərgɨ tɨ luni toni, la yḭr ne əm ti na ər ɗay kaw, tɨ əm ɓər lo. Əm jaa tɨ kuri.» 19Gɨna ii ja gɨ Jesu: «Baali, ən ləg kadar yim tɨ nebi! 20I kəgɨ tɨ Samari a yabu Ndɨla tɨ nan ne sul lɛ yḭ Juyb i ja ɓə un tɨ Ndɨla yabu wo tɨ Jerusalɛm pi.» 21Jesu duga gɨ ər: «Ii, əm ko ən hul, lula sul wo hina ne bi ɓə Ndɨla yabu tɨ nan ne sul lo la, tɨ Jerusalɛm lo la. 22Yḭ bi tɨ Samari, yḭ yabu Ndɨla lɛ yḭ una Ndɨla lo ɗang. Lɛ yini Juyb, i yabu Ndɨla la yini una ər la, kəysul nina o̰ tɨ Juyb-a ndɔ. 23Lula sul wo tɨ hina, la ər an teni. Bi ne yabu Ndɨla na hul ɓudu, ɓə ī Ba yabu na Ndɨla Lal la, na kuri la, kəysul tɨ bi kuna paa ne jo Ndɨla taam a. 24Kəysul, Ndɨla tɨ Lal, ka bi ne yabu ər, yabu ər na Lal la kuri la.» 25Ii ja gɨ ər: «Ən una ɓə ɗa̰y paa Mesi, yḭr ne Ndɨla par ər sul na nɨm ɓə hina. Gorne ər ɓə hina gɨna, ər ɓə gɨ i mum gun lɔ jul.» 26Jesu duga gɨ ər: «Wo ne Ndɨla par ər sul na nɨm tɨ yin ne ən wo gɨ əm jaa ja le.»

27Tɨ lula sul ne, Jesu na bi tɨ wa̰y edɨ duga tɨ lɔr ɗəng hul hina. Ɓɔr a ji kəysul Jesu wo ja jaa na ii. Lɛ wo ɓudu in tɨ a daan təng mu ɓiri ər ɓə: «Kəy jaa jo əm ɓiri ii ɓee kəyja jo əm jor jaa na ii ne a?» 28Gɨna ii nɨm ər dong ər duga ər si tɨ lɔr ɗəng hul ər ja gɨ bi ɓə: 29«Yḭ hina i ləg ɓər ne jul mum gun ne ən ka lɔ. Pay ər tɨ Mesi lo a?» 30Bi wag tɨ lɔr ɗəng hul. A hina a ten Jesu.

31Tɨ gorne, Jesu na bi tɨ wa̰y edɨ ka ndemni tɨ ər ndɔ. A ja gɨ ər: «Wo tɨ wa̰y ɓla, əm twi wa̰y!» 32Lɛ Jesu ja gɨ a: «Ən twi wa̰y ne yḭ una lo teni.» 33Gɨna ər bi tɨ wa̰y edɨ ɓiri peer: «Wo paa hina gɨ ər na wa̰y tudi a?» 34Jesu duga gɨ a: «Ən tudi tɨ wo ne toon ən na hul laar kar la cida ne ər toon ən tɨ kar tong la. 35Yḭ may ja ɓə: “Tɨ pya̰ tɨ nḛni hul ya ɓina lula sul ɓə lɛm.” Lɛ yin, ən ja gɨ i, yḭ uma i ji, yḭ ləg wərgɨ ɓari, ya ji ɓla teni la tɨ ndog tɨ ɓina la! 36Wo ne ɓya̰ ya ten ər wa̰y tɨ daa teni la ər tay ya ji gun tɨ tɨm jili na kwi la. Nejo, wo ne ndu la wo ne ɓya̰ ya la, a ɓə ndula laar kar tɨ paa, 37yḭr ne ɓla ɓə jaa laar ne ja ɓə “wo paa ndu la wo paa jak ɓya̰ la” tɨ kuri. 38Ən toon i tɨ ya ɓina tɨ waal ne yḭ ka cida tɨ hul lo. Bi tapeer ten pɛw tɨ cida lɛ yḭ gɨna, i ka ndula laar na a cida.»

39Bi tɨ Samari dɨbla tɨ lɔr ɗəng ne hul a ko Jesu hul tuna ii ne na jaa sul. Ii ja gɨ a tɨ bayri ɓə: «Ɓər ne jul gɨ ən mum gun ne ən ka lɔ.» 40Nejo gorne bi tɨ Samari a hina tɨ ər ndɔ gɨna, a ɓiri ər ka ər ti na a. La Jesu ti na a ɗa̰y tɨ ndidi. 41Bi dɨbla ko a hul cam kəysul yḭr mar ər ja gɨ a jaa na mu 42la a ja gɨ ii ɓə: «Yini ko i hul na jaa ne əm ja gɨ i ngoy lo, lɛ na jaa ne yini may laa la, ta yini una kuri ɓə ər tɨ wo tɨ bi nina la.»

Jesu nen ɓər ɗəng paa na ɓa̰

43Ɗa̰y ndidi tɨ plaa, Jesu nɨm un ne. Ər si tɨ Galile. 44Jesu may ja gɨ a tɨ bayri ɓə: «ɗa̰y ɓudu wo ka gɨ nebi hormo̰ tɨ ər lɔr nəgri sul lo.» 45Gɨna gorne ər an tɨ Galile, bi tɨ lɔr nəgri tɨ Galile a par ər tɨ a ndɔ ɓari, kəysul ya̰ mɨna a si tɨ pya̰ tɨ Pak kar tɨ Jerusalɛm la a ləg mum gun ne Jesu ka tɨ un tɨ pya̰ kar na a ji.

46Jesu duga hina tɨ Kana, tɨ Galile, tɨ un ne ər yɛr ndu na ham. Tɨ un ne, ɓər ɗəng paa ne ka cida na wa̰ay wo nin. Ər ɓa̰ tɨ mo̰y tɨ Kapɛrnom. 47Ər laa ɓə Jesu o̰ tɨ Jude, ər hina tɨ Galile teni. Ər si ər ten Jesu la ər ka gɨ ər kɔgri ka ər si tɨ Kaparnom tɨ ər ɓa̰ ne wo ulu nina. 48Jesu ja gɨ ər: «Jo i ləg wa̰y ne ɓɔr i ji la ka i ayri lo la gɨna, yḭ ɓə i hul kula lo bad!» 49Wo ɗəng ne duga gɨ ər: «Baali, əm hina tɨ ən gə̰y toni barita ka ən ɓa̰ uy.» 50Jesu ja gɨ ər: «Əm si tɨ gə̰y, əm ɓa̰ ten lapya teni.» Ɓər ko mu tɨ Jesu na jaa sul la ər duga ər si tɨ gə̰y la. 51Gorne ər wo saal tɨ gə̰y a, ər bi tɨ cida tung ər kwi la a ja gɨ ər: «Əm ɓa̰ ten lapya!» 52La ər ɓiri a: «Na kəy lula sul jo ər ndula golgo a?» A duga gɨ ər: «Liyɛli, na lula ɓudu tɨ tili jo ndula sila nɨm ər.» 53Gɨna ɓa̰ ba ho̰ni jani tɨ lula sul ne Jesu ja gɨ ər ɓə ər ɓa̰ ten lapya teni. Gɨna, ɓər la ər nimni gun a ko Jesu hul. 54Tɨ wa̰y ne ɓɔrji tɨ ndidi mani ne Jesu ka gorne ər duga tɨ Jude tɨ nəgri sul tɨ Galile.

Currently Selected:

Ja̰ 4: nie

Highlight

Copy