Luk 10
10
Jesu toon ər bi wa̰y edɨ dug-kili kar sap
1Lɔ tɨ pla, Baali Jesu ɛr ər bi tɨ wa̰y edɨ jak dug-kili kar sap, ər toon a tɨ ndidi ndidi tɨ ər kwi tɨ lwərgɨ gun hul la tɨ un gun ne yḭrmar taam saal tɨ nin. 2Ər jaa gɨ a: «Cida tɨ ya ɓina tɨ dɨbla, lɛ bi tɨ cida kar gaw. I ɓiri Baali tɨ ya ka ər toon na bi tɨ cida tɨ ya ɓina. 3Yḭ si! Ən toon i kuna həm ɓimi tɨ jərjəng-a daan. 4Yḭ ka gursu sula lo la, i ka bɔg sula lo la, i ka kungu sula lo la. Yḭ ka lura tɨ ul tɨ gɨ bi lapya kar lo la. 5Gorne yḭ wur tɨ wo gə̰y gɨna, yḭ ja ɓə: “Lapya gə̰y na jaal toni bari.” 6Jo wo tɨ gḛy tɨ wo tɨ lapya taam gɨna, i lapya ɓə na ər gḛy. lɛ jo ti kuna paa ne lo a, i lapya ɓə duga gɨ may gḛy. 7Yḭ ti tɨ gə̰y ne hul. Yḭ twi la, i yiḭ wa̰y ne a naa gɨ i. Kəysul, wo ka cida gɨna, ər na ul mu tɨ ər wa̰y tɨ daa sul tina. Yḭ ka bo tɨ jaal jak hul tɨ kwi kwi lo.
8«Tɨ lɔr nii tapeer hul le par i tɨ a ndɔ gɨna, yḭ twi wa̰y ne a ɓə gɨ i naa. 9Yḭ nen bi tɨ mo̰y ne yḭ ɓə tina tɨ lɔr ne hul la yḭ ja gɨ a: “Ndɨla na waan an marway tɨ i ndɔ teni.” 10Lɛ gorne yḭ wur tɨ lɔr hul ne bi ɓə i par tɨ a ndɔ lo a, yḭ si tɨ un tɨ paa tina la yḭ ja gɨ bi gun ɓə: 11“Yini tagri gɨ i, ī lɔr buur tɨ i sul, lɛ yḭ una ɓari ɓə: Ndɨla na waan an teni.” 12Ən ja gɨ i tɨ bayri, na ɗa̰y tɨ sarya kar jaa ne a ɓə tṵgni tɨ i sul ɓə bi tɨ lɔr ɗəng tɨ Sodom maan ura.»
Lwərgɨ ne ɓini hul kula
Mat 11.20-24
13«Jindemni gɨ yḭ bi tɨ Korajin! Jindemni gɨ bi tɨ Betsayda! Kəysul jo mum tɨ ji ɓɔr ne ən ka tɨ i maan, jo ən ka gɨ bi tɨ Tir la, gɨ bi tɨ Sido̰ la gɨna, ɓagcagri a ɓə a hul kula la a ɓə sər tɨ ndemni wur na tɨm tɨ borum daan. 14Nejo na ɗa̰y tɨ sarya kar jaa ne a ɓə tṵgni tɨ bi tɨ lɔr tɨ Tir la Sido̰ la sul ɓə somni ura jaa ne a ɓə tṵgni tɨ i sul. 15Yḭ bi tɨ Kapɛrnom, i kay ho̰ni ɓə i ɓə ɗɔl tɨ ndɨlasul tɨ ndal a? M-m, yḭ ɓə jir tɨ ɓejere jo.»
16Ər ja gɨ ər bi tɨ wa̰y edɨ ɓə: «Wo ne laa jaa tɨ i mu gɨna, laa jaa tɨ ən mu la, wo ne ɓini gɨna, ər ɓini yin la, ta ər ɓini wo ne toon ən la.»
Bi tɨ duk kili kar sap na duga
17Bi tɨ tomni duk kili kar sap duga hina na ndula laar la a ja: «Baali, jinsə kaw wur sul tɨ i lɔ gorne yini ja jaa na əm ndil!» 18Jesu duga gɨ a: «M, na lula sul ɗay, ən ləg Sidan tɨba tɨ ndɨlasul kuna ndɨla yḭba. 19Yḭ laa ɓari: Ən naa gɨ i dwari tɨ saal tɨ kɔ sul la, surga sul la, tɨ i paa tɨ peni na dwari gun yṵga la, wa̰y ɓudu in ɓə i ɓijim kar lo la. 20Yḭ ka ndula laar kar ɓə jinsə oy gɨ i la, lɛ yḭ ka ndula laar kəysul a kya̰ i ndil tɨ ndɨla sul pi.»
Jesu ka ndula laar
21Tɨ daamu, Lal ɓari sir Jesu hul na ndula laar ɗəng la ər ja: «Ən Ba, Baali tɨ ndɨlasul la nəgri sul la, ən ka gɨ əm barka, kəysul wa̰y ne əm waal gɨ bi tɨ jicina la gɨ bi tɨ mum una la, əm ɓla gɨ əm ɓimi. M, ən Ba əm taam ɓə ka ti kuna paa ne. 22Ən Ba naa gɨ ən mum gun tɨ ən daa. Ndɨla na ɓa̰ tɨ jaa a, wo ɓudu ne una ər in teni, lɛ tɨ Ba tɨ Ndɨla ngoy jo una ər, ta wo ne una Ndɨla in teni lɛ tɨ ər ɓa̰ ɓudu ngoy jo una ər la, ɓla ər gɨ bi la.» 23La Jesu yiga ji tɨ ər bi tɨ wa̰y edɨ ndɔ la ər ja gɨ a jaa na a sul: «Ndula laar gɨ wo ne ləg wa̰y ne yḭ ləg! 24Kəysul ən ja gɨ i tɨ bayri nebi dɨbla la woom ton toni a taam wa̰y ne yḭ ləg, ləg lɛ a ləg lo. A taam jaa ne yḭ laa, laa la, lɛ a laa lo la.»
Jaa lar tuna wo tɨ ɓari kar tɨ Samari
25Wo tɨ gṵ hul ɓla paa o̰ la ər ɓiri Jesu jaa tɨ ər sangni, ər ja: «Wo tɨ wa̰y ɓla, kəyjo ən ɓə kar ta ən ɓə tɨm jili na kwi tina a?» 26Jesu duga gɨ ər: «A kya̰ kəy tɨ maktub tɨ gṵ hul a, ɓee əm edɨ waa waa a?» 27Gɨna ər duga gɨ Jesu: «Əm ɓə əm Baali tɨ Ndɨla kumkar na əm nirimu gun la, na əm ndo̰yngɨ gun la, na əm dwari gun la, na əm ilgɨ gun la, ta əm ɓə əm paa kum kar kuna yim maam la#10.27 Deu 6.5.» 28Jesu ja gɨ ər: «Əm jaa tɨ ja ndini nari. Ka kuna ne la, əm ɓə tɨm jili na kwi tina.»
29Lɛ wo tɨ gṵ hul ɓla taam ər ndula jul tɨ jaa ne hul gɨna, ər ɓiri Jesu: «Ja jo tɨ ən paa a?» 30Jesu duga gɨ ər: «Ɓər paa o̰ tɨ lɔr ɗəng tɨ Jerusalɛm si tɨ lɔr ɗəng tɨ Jeriko, tɨ ul, bi tɨ sugɨ par ər, a ko ər mum gun ɗad-ɗad, a ɗɨb ər ka ɗɨb la ər uy digli le a si, a nɨm ər. 31Tɨ gor ɗay, wo tɨ hima ɓina paa si na ul ne, gorne ər ləg ɓər ne gɨna, ər ɗira na ul taal, ɓag teni. 32Lebi na kalɔ paa ne wo cida kar tɨ Ndɨla li hul wag na ul ne la, ər ləg ɓər ne la ər jang ər ɗira na ul taal, ɓag teni la. 33Lɛ wo paa tɨ nəgri sul tɨ Samari si na ul ne la, ər ləg ɓər na jindemni. 34Ər kori ndog tɨ ər ndɔ, ər bɛ nɨm la bḛ la, tɨ ər hura mu la ər ɓəw la. Ər so ər kay ər tɨ ər lamkɛr sul ər si na ər tɨ li tɨ ɓoy par hul, la ər kay ər ji tɨ ər lɔ. 35Na gaan, ər wag na gursə tɨ ndidi ər naa gɨ wo tɨ li tɨ ɓoy par la ər ja gɨ ər: “Kay əm ji tɨ ɓər ne lɔ, mum gun ne əm ka tɨ ər sul ən ɓə gɨ əm səng gorne ən ɓə duga.”»
36La Jesu ja cam: «Tɨm əm ilgɨ hul, bi tɨ tedi ton daan jajo tɨ wo ne bi tɨ sugi ɗɨb ər na paa a?» 37Wo tɨ gṵ hul ɓla duga gɨ ər: «Tɨ wo ne ləg ər jindemni jo tɨ ər paa.» Gɨna Jesu ja gɨ ər: «Əm si, yim kaw əm ka wa̰y kuna paa ne la.»
Jesu wo tɨ Marta a na Mari a maan
38Jesu a na ər bi tɨ wa̰y edɨ a so ul, ər wur tɨ lɔr paa hul, la ii paa ne ndil ɓə Mart par ər tɨ ər gə̰y. 39Ii ne na ɓun tɨ ii paa wo nin, ər ndil ɓə Mari, ər ti tɨ Baali na ɗa̰y lɔ, ər wo ər jaa laa. 40Mart ka cida na kugum. Ər hina ndog tɨ Jesu ndɔ la ər ja gɨ ər: «Baali, ən ɓun tɨ ii ka cida na ən lo, usu əm lo a, ja gɨ ər ka ər yaar ən.» 41Baali duga gɨ ər: «Mart, Mart, əm ilgɨ ɓɔr əm tɨ mum dɨbla sul la əm ka cida na kugum la. 42Lɛ wa̰y ndinimani ɓudu hiina əm ɓə kar jo Mari ka. Wa̰y ne le, wo in ɓə lɛm kula tɨ ər daa lo la.»
Currently Selected:
Luk 10: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
