Luk 9

Jesu ton ər bi tɨ wa̰y edɨ ulɓudu na ya̰m ndidi

Mat 10.5; Mrk 6.7

1Jesu tay ər bi tɨ wa̰y edɨ dɔkɔmɛ kar sap. Ər naa gɨ a ul mu la dwari tɨ jinsə kun la, tɨ mo̰y nina la. 2Ər ton a ka a ɗo beel tuna Ndɨla na waan sul la, ka a nen mo̰y la. 3La ər ja gɨ a: «Gorne yḭ wo saal, ka wa̰y ɓudu in sula lo: Ngurum lo la, bɔg lo la, mapa lo la, gursə lo la, ka jakaw ka ər sər tɨ ndidi sula lo la. 4Gorne yḭ wur tɨ wo gə̰y gɨna, yḭ ti tɨ nin marway i o̰ i si. 5Jo gorne yḭ si tɨ nin lɛ a par i ɓoy lo gɨna, yḭ nɨm lɔr ɗəng ne le yḭ ɗɨb i kungu na buur tɨ a sul. Kuna ne yḭ ɓə gɨ a ɓijim ne a ka ɓla.» 6Jesu na bi tɨ wa̰y edɨ o̰, a si na lwərgɨ lwərgɨ. A ɗo beel tuna Jaa Ndinimani sul la a nen bi tɨ mo̰y na un gun la.

Erod ka ayri

Mat 14.1; Mrk 6.14

7Erod ne tɨ guberno̰ tɨ nəgri sul tɨ Galile laa jaa ne gun tuna wa̰y ne ka paa sul. Ər una wa̰y ne ər ɓə ilgɨ lo, kəysul bi tapeer ja: «Tɨ Ja̰ Batis jo duga ti jili.» 8Tapeer ja ɓə: «Tɨ Eli wo tɨ Ndɨla ja jaa ɓagcagri jo wag cam.» Tapeer cam ja ɓə: «Tɨ Ndɨla na nebi paa tɨ caa jo duga ti jili.» 9Lɛ Erod ja ɓə: «Yin maan ən naa ən gṵ ka a tḭ Ja̰ Batis sul, lɛ jaa jo tɨ wo ne ka mum ne ən laa a?» La ər taam ul mu tɨ Jesu ləg la.

Jesu naa gɨ bi dɨbla wa̰y tudi

Mat 14.13; Mrk 6.30; Ja̰ 6.1

10Jesu na bi tɨ wa̰y edɨ duga hina, a jul gɨ ər mum gun ne a ka lɔ. Ər wag na a tɨ bayri ɓag ɓa̰ndeni ndog na lɔr ɗəng ne a soon Betsayda taal. 11Gorne bi laa ər taal gɨna a si tɨ ər lɔ. Jesu par a tɨ ər ndɔ, ər ja gɨ a jaa tuna Ndɨla na Waan sul la ər nen bi ne taam nina tina la.

12Lɛ lula ɗolɔ tɨ tɨba, ər bi tɨ wa̰y edɨ dɔkɔmɛ kar sap kori tɨ ər ndɔ la a ja gɨ ər: «Əm kun bi ka a si tɨ lwərgɨ nii lwərgɨ ɓḭ la tɨ un bəgri la ne yeri un ne la ka a ten wa̰y tudi la kəysul un ne yini ti tɨ nin le tɨ taap hul.» 13Lɛ Jesu ja gɨ a: «Yḭ may naa gɨ a wa̰y tudi!» Lɛ a duga gɨ ər: «Yini na mapa tɨ luni la ka tɨ ndidi ngoy, in lo a yini ɓə saal mapa huna gɨ bi ne gun naa.» 14Kəysul bi ɓərgɨ ne ti tɨ un ne lɛm ndog dubu mi.

Jesu ja gɨ ər bi tɨ wa̰y edɨ: «Yḭ kay a tɨ lɔr na kur duk mi, duk mi.» 15Jesu na bi tɨ wa̰y edɨ ka wa̰y ne ər ja gɨ a la a kay bi gun tɨ nəgri la. 16Jesu so mapa tɨ luni la kaa tɨ ndidi la, ər uma ər ji tɨ ndɨla sul ər jul ər mu tɨ mapa ne sul, ər ha̰w mapa ər naa gɨ ər bi ka a ɓaan gɨ bi gun. 17Bi gun twi la a kər la. Ta a to mapa ne gə̰y krang dɔkɔmɛ kar sap.

Jesu tɨ kəy wo a

Mat 16.13; Mrk 8.27

18Ɗa̰y paa Jesu a na ər bi tɨ wa̰y edɨ a wag jak na bi. Gɨna Jesu jul ndula tɨ ər bi tɨ wa̰y edɨ daan tɨ Ndɨla soon. Ər bi tɨ wa̰y edɨ taypeer tɨ ər ndɔ. Gɨna ər ɓiri a jaa: «Kəyjaa jo bi ja tuna ən sul a?» 19A duga gɨ ər: «Bi tapeer ja ɓə əm tɨ Ja̰ Batis, peer paa ja ɓə əm tɨ nebi Eli la tapeer ja cam ɓə yim tɨ nebi paa caa ne wag tɨ ngalɨm.» 20Jesu ja gɨ a: «A yḭ, i ja ɓə yin tɨ ja a?» Gɨna Piyɛr duga gɨ ər: «Yim tɨ Krist wo ne Ndɨla ɛr əm.» 21Lɛ Jesu peer a na gṵ sɨgra ɓə: «Yḭ ka gɨ wo jaa ne tuna ən sul in ja lo.» 22La Jesu ja gɨ a cam ɓə: «Yin Wo Ɓa̰ ɓə pɛw tina nari, bi nii ɓə ər ɓini la, bi tɨ hima ɓina na woom hari na bi tɨ gṵ hul ɓla ɓə ər ɓini la. A ɓə ər humna, lɛ ɗa̰y tedi tɨ plaa gɨna, ər ɓə wag tɨ ngalɨm.»

Ul sula tɨ Jesu lɔ

Mat 16.24-28; Mrk 8.34–9.1

23La Jesu ja gɨ bi gun: «Jo wo taam ul sula tɨ ən lɔ gɨna, ka ər ɓini ər ndula ya̰m la, ər so ər tɨla tɨ tərgɨ na ɗa̰ysul barita, ər so ul tɨ ən lɔ. 24Kəysul wo ne taam ər ndula ya̰m ɓaw ɓə ər ndula ya̰m haam, lɛ wo ne haam ər ndula ya̰m yin jaa gɨna, ɓə nina tina. 25Jo wo ten mum gun tɨ dunya̰ lɛ ər ndoygɨ kud gɨna, may yuga ər ndula ya̰m. Yḭr ne ər barka maan tɨ kəy a? 26Jo gorne wo ka kaar tɨ ən sul la, tɨ ən jaa sul la gɨna, Yin, Wo Ɓa̰ kaw ən ɓə kaar kar tɨ ər sul la. Gorne ən ɓə duga hina tɨ ən taan hul la, tɨ ən ba na taan hul la, ta tɨ malayka-a ne ndeeri na taan hul la. 27La ən ja gɨ i tɨ bayri, tɨ bi ne ti le daan bi tapeer a ɓə Ndɨla na waan ləg na hina barita a ɓə ulu ɗang.»

Jesu na ji yɛr

Mat 17.14; Mrk 9.2

28Lɛm ndog na ɗa̰y maarta tɨ plaa na Jesu na jaa tɨ ja bəgri, ər so Piyɛr la, Ja̰ la, Jak la si na a tɨ nan sul tɨ Ndɨla soon. 29Gorne Jesu wo Ndɨla soon gɨna, ər ji yɛr, ər ngɔmi duga buy kar-kar. 30La tɨ daamu bi tɨ ndidi lor wo na ər ja jaa. Tɨ Moys la, nebi Eli la. 31A wag a ndula yibɨn a jaa ja tuna ər saal ulu tɨ Jerusalɛm. 32Piyɛr na ər peer tɨ ndidi a ley lom mag-mag, lɛ gorne a jar gɨna, a ləg Jesu na ndula yibɨn la bi tɨ ndidi ne ti na ər la. 33Gorne bi tɨ ndidi ne wo Jesu nɨm gɨna, Piyɛr ja gɨ ər ɓə: «Baali, ndini ne yi ɓə tɨm tɨ un ne. Ka i kaaw li tanda tɨ tedi, ɓudu gɨ yim la, ɓudu gɨ Moys la, ɓudu gɨ Eli la.» Ər una jaa ne ər ja ji lo. 34Gorne ər wo jaa ja kuna ne ɗang, goblə jir tɨ a sul la kubgɨ a. Gorne goblə jir tɨ a sul gɨna, ayri ka Jesu na bi tɨ wa̰y edɨ. 35A laa wo gṵ tɨ goblə hul ja ɓə: «Ne le tɨ ən ɓa̰ ne ən ɛr ər, yḭ laa ər jaa!» 36Dabra tɨ gṵ ne ɓəgri, a ləg Jesu gḛy na ər sul ngoy. Jesu na bi tɨ wa̰y edɨ ti mu guni na lula sul ne, mum ne ka paa a jul gɨ wo lɔ lo.

Jesu nen ɓa̰ ne jinsə yiga ər ji

Mat 17.14; Mrk 9.14

37Ɗa̰y tɨ plaa gorne a jir tɨ nan sul, bi dɨbla hina a tung Jesu kwi. 38La wo paa ka ngɔr tɨ bi daan: «Wo tɨ wa̰y ɓla, ən ka gɨ əm kɔgri, ɗo əm ji tɨ ən ɓa̰ ne sul, yḭr tɨ ən ɓa̰ ɓudu lag-lag. 39Lula sul paa gɨna, Jinsə par ər, la ər ka ngɔr tɨ daamu la ər nibri na huyri tɨ ər mu. Ta ər wag tɨ ər ndula saan lo la, ər wur ər jindemni nari. 40Ən ka əm bi tɨ wa̰y edɨ kɔgri ka a kun jinsə ne, lɛ a lɛm ər kun lo.» 41Jesu so jaa ər ja gɨ a: «Yḭ bi hul sɨgra la bi tɨ ɓijim kar tɨ lula sul ne, ən ɓə na i tɨm marway an tɨ wa? Ən ɓə ən daa kay tɨ i lɔ marway an tɨ wa? I hina gɨ ən na əm ɓa̰ le!» 42Gorne ɓa̰ kori ndog gɨna, jinsə nibri ər na dwari la ɗoli ər tɨ nəgri. Lɛ Jesu meer jinsə ka ər wag tɨ ɓa̰ ne ndɔ. Ər jul jinsə tɨ ɓa̰ sul kinding la ər naa ər gɨ ər ba la. 43Ɓɔr bi gun ne ti tɨ un ne ji la a ja ɓə Ndɨla tɨ wo ɗəng.

Jesu ja jaa tuna ər ulu sul cam

Mat 17.22-23; Mrk 9.30-32

Kuna wa̰y gun ne Jesu ka ɓɔr bi ji cam gɨna, ər ja gɨ ər bi tɨ wa̰y edɨ: 44«Yḭ laa jaa ne ən ɓə gɨ i ja ɓari: “A ɓə, yin, Wo Ɓa̰ nɨm tɨ bi tɨ ɓijim kar daa.”» 45Lɛ ər bi tɨ wa̰y edɨ una jaa ne ji lo. Jaa ne ji waal gɨ a ndɔ nɨ a ka ji una lo. La a lɛm ər jaa ɓiri lo tuna jaa ne sul, kəysul ayri ka.

Jaa jo tɨ wo ɗəng nari a?

Mat 18.1; Mrk 9.33

46Jesu na bi tɨ wa̰y edɨ ɗolɔ tɨ peer gaglə. Tɨ una ɓə ja jo tɨ wo ɗəng tɨ a daan a? 47Jesu una a jaa tɨ ilgɨ tɨ a nirimu. Gɨna ər so ɓa̰ paa, ər kay ər tɨ ər taal, 48la ər ja gɨ a: «Wo ne par ɓa̰ ne tɨ ər ndɔ na yin ndil, ər par wo ne toon ən tɨ ər ndɔ la. Kəysul wo ne gaw tɨ i daan, tɨ yḭr jo ər tɨ wo ɗəng.» 49Ja̰ so jaa, ja ɓə: «Ɓər ɗəng, yini ləg wo paa ne kun jinsə na əm ndil la yini taam gɨ ər un kway tɨ kar, kəysul yḭr si tɨ əm lɔ na yi lo.» 50Lɛ Jesu duga gɨ ər: «Ka gɨ ər un kway lo, kəysul wo ne tɨ i paa tɨ pɛni lo tɨ i wo.»

Bi tɨ lɔr nəgri tɨ Samari ɓini Jesu

51Gorne lula sul ne Ndɨla wo Jesu jul tɨ dunya̰ hul an ndog gɨna, Jesu so ul tɨ saal tɨ Jerusalɛm. 52Ər toon bi tɨ wa̰y edɨ tɨ ər kwi. Bi ne so ul a si, a wur tɨ lɔr paa tɨ bi tɨ Samari maan hul tɨ gɨ ər un kaaw. 53Lɛ bi tɨ lɔr ne ɓini ər par tɨ a ndɔ kəysul ər so ul tɨ Jerusalɛm#9.53 Ər o saal tɨ Jerusalɛm tɨ Ndɨla yabu. Bi tɨ Samari jaa ɓə a ɓə Ndɨla yabu tɨ nan sul tɨ Samari ngoy lɛ Juyb-a jaa ɓə bi ɓə ndɨla yabu tɨ Jerusalɛm o ngoy la, nejo a ɓini Jesu par tɨ a ndɔ.. 54Gorne ər bi tɨ wa̰y edɨ Jak a na Ja̰ a ləg wa̰y ne gɨna, a ja ɓə: «Baali, jo əm taam a, yini ɓə gṵ naa ka laa o̰ tɨ ndɨla sul tɨba tɨ bi ne gun sul tɨ a yunga.» 55Lɛ Jesu yiga ji tɨ a ndɔ la ər meer a. 56La a so ul tɨ saal lɔr paa jak.

Bi ne taam saal tɨ Jesu lɔ

Mat 8.19-22

57Gorne a wo tɨ ul sul, ɓər paa ja gɨ Jesu: «Ən taam ul sula tɨ əm lɔ na un gun.» 58Jesu duga gɨ ər: «Ngrəngɨ-a na tori la, ɗḭ tɨ ndɨlasul na ləgɨ la, lɛ Yin, Wo Ɓa̰ ən na un tɨ sul wur tɨ nin lo.»

59Ər ja gɨ wo paa jak: «Hina tɨ ən lɔ.» Lɛ ɓər ne ja gɨ ər: «Baali, naa gɨ ən ul mu ka ən si ən bili ən ba bari.» 60Jesu duga gɨ ər: «Nɨm bi ton ka ndɔ bi tɨ ulu ka a bili a ulu lɛ yim əm si əm ɗo beel tuna Ndɨla na waan sul.»

61Wo paa cam jaa: «Baali, ən ɓə saal tɨ əm lɔ, lɛ naa ən ul mu ka ən si ən ka gɨ bi tɨ ən gə̰y lapya bari.» 62La Jesu ja gɨ ər: «Wo ne wo mɨna sul par, jo ər ləg un tɨ ɓəgri gɨna, ər ɓə wur tɨ Ndɨla waan hul lo.»

Currently Selected:

Luk 9: nie

Highlight

Copy