Luk 18

Jaa lar tuna ii tɨ ndirimu la wo tɨ jaa tṵgni sul la

1Jesu ja gɨ a jaa lar ne tɨ gɨ a ul mu ɓla tɨ Ndɨla soon na ɗa̰y sul bla tuni. 2Ər ja gɨ a: «Tɨ lɔr ɗəng paa hul, wo tɨ jaa tṵgni paa ne oy gɨ Ndɨla lo la, ta ər ka gɨ wo hormo̰ lo la. 3Ii tɨ ndirimu paa wo tɨ lɔr ne hul la. Ii ne hina tɨ ər ndɔ na ɗa̰y sul ɓiri ər: “Kaaw jaa ne wo yini na ən paa tɨ pɛni i daan.” 4Laahul dɨbla ər ɓini, lɛ may ilgɨ tɨ ər hul la ər ja ɓə: “Jo ən oy gɨ Ndɨla lo la, ən ka gɨ wo hormo̰ lo kaw, 5ii tɨ ndirimu ne ɓɔr ən ji nari, ən ɓə ər jaa kaaw lo gɨna, ii ne ɓə ən sul pɛw.”» 6Baali ja cam: «Yḭ laa jaa ne wo tɨ jaa tṵgni ne ɓijim ja! 7Yḭ ilgɨ ɓə Ndɨla ɓə bi ne ər ɛr a ne a cḛy tɨ ər sul tili la syɛl la jaa kaaw lo a? Ɓə ər ɓə a nɨm a? 8Ən ja gɨ i tɨ bayri, ər ɓə a jaa kaaw saan. Lɛ ɗa̰y ne Yin, Wo Ɓa̰ ən ɓə duga hina, pay ər ɓə bi tɨ hul kula tina tɨ nəgri sul cam a?»

Jaa lar tuna Parisyḛ la bi tɨ lambo tay la sul

9Ər ja jaa lar ne tuna bi ne ləg a ndɔ ɓə ya̰ tɨ bi tugla tɨ Ndɨla kwi lɛ, a ləg a peer a ka na wa̰y lo. 10Ər ja ɓə: «Bi tɨ ndidi si tɨ Ndɨla li hul tɨ Ndɨla soon. Ɓudu tɨ Parisyḛ la ɓudu tɨ wo tɨ lambo tay la. 11Ne tɨ Parisyḛ lor tɨ ndal, ər soon Ndɨla tɨ ər hul: “Ən Ndɨla, ən ka gɨ əm barka kəysul, yin ti kuna bi taapeer lo. Ya̰ tɨ bi tɨ sugi la, bi tugla lo la, bi tɨ juna kar la, ən ka gɨ əm barka kəysul ən ti kuna wo tɨ lambo tay ne lo la. 12Yin, ən so asam laahul tɨ ndidi na suk ɓudu, la ən naa gɨ Ndɨla ən jaka tuna mum gun ne ən ten la.» 13Wo tɨ lambo tay lor ɓag. Ər wur ər ji tɨ lɔr la ər ɗɨb ər tən, ər hurga jaa ɓə: «Ən Ndɨla, əm ləg ən jindemni kəysul yin tɨ wo tɨ ɓijim kar!» 14Jesu ja gɨ bi: «Wo tɨ lambo tay ne gorne ər duga tɨ gə̰y, Ndɨla ka ər na wo tugla tɨ ər kwi, lɛ Parisyḛ gɨna, Ndɨla ka ər na wo tugla lo tɨ ər kwi. Kəysul wo ne uma sul tɨ ndal, Ndɨla ɓə ər sul wur tɨ lɔr, lɛ wo ne wur sul tɨ lɔr Ndɨla ɓə ər sul uma tɨ ndal.»

Jesu par ɓimi tɨ ər ndɔ

Mat 19.13; Mrk 10.13

15Bi hina na ɓimi tɨ Jesu ndɔ ka ər kay ər daa tɨ a sul la ka ər jul ər mu tɨ a sul. Gorne ər bi tɨ wa̰y edɨ ləg wa̰y ne a, a meer-a la a kway gɨ a un la. 16Jesu soon a la ər ja gɨ a ɓə: «Yḭ nɨm ɓimi ka a hina tɨ ən ndɔ, yḭ ka gɨ a ul mu kway lo, kəysul Ndɨla na waan ti gɨ bi ne ka ndɔ kuna ɓimi no̰. 17Tɨ kuri, ən ja gɨ i, jo wo par Ndɨla waan tɨ ər ndɔ kuna ɓimi lo gɨna ər ɓə wur tɨ nin lo bad.»

Wo tɨ waani

Mat 19.16; Mrk 10.17

18Wa̰ay paa ɓiri Jesu jaa: «Wo tɨ wa̰y ɓla ne ndinimani, kəyjo ən ɓə kar tɨ tɨm jili na kwi tina a?» 19Jesu duga gɨ ər ɓə: «Kəyjaa əm soon ən wo ndinimani a? Wo ndinimani in teni, lɛ Ndɨla ɓudu ngoy jo tɨ wo ndinimani. 20Əm una gṵ hul ne: “Əm ka juna kar lo la, ka wo humna kuna əm hul taam lo la, ka wa̰y sila lo la, ka jaa ha̰w tɨ bi sul lo la, ka gɨ əm ba la əm na̰ la hormo̰.”» 21Ɓər duga gɨ ər: «Ən ɗolɔ tɨ mum ne kar toni na ən kɔr.» 22Gorne Jesu laa ər jaa gɨna, ər duga gɨ ər: «Gə̰y gɨ əm wa̰y ɓudu cam: Ka kingɨ na əm mum tɨ tina gun teni, la əm ɓaan gɨ bi ndemni gursu. Ne gɨna, əm ɓə mum tina tɨ ndɨlasul pi. Tɨ mum ne mu tɨ tong gɨna, əm hina tɨ ən lɔ.» 23Gorne ɓər ne laa jaa ne gɨna, ər ndula laar ər lo, kəysul ər tɨ wo tɨ wani.

24Gorne Jesu ləg ər kuna ne gɨna, ər ja: «Pɛw nari gɨ wo tɨ wani tɨ wur tɨ Ndɨla waan hul. 25Tɨ ndog nari gɨ lɔgum tɨ wur tɨ ibra ho̰on lɛ pɛw nari gɨ wo tɨ wani tɨ wur tɨ Ndɨla waan hul.» 26Bi ne laa ər jaa ne a ja ɓə: «Tɨ in gɨna, jajo ɓə nina tina a?» 27Jesu duga gɨ a: «Gɨ woɓari gɨna pɛw nari lɛ wa̰y ne bunga Ndɨla in teni.»

28Piyɛr ja gɨ ər: «Yini nɨm i mum tɨ tina gun lɛ i so ul tɨ əm lɔ.» 29Jesu ja gɨ ər: «Tɨ kuri, ən ja gɨ i, jo wo nɨm ər gə̰y la, ər ii la, ər ɓungɨ la, ər bəgɨ la, ər ɓimi la Ndɨla na waan jaa gɨna, 30ər ɓə a tina dɨbla tɨ dunya̰ ne le la, ər ɓə tɨm jili na kwi tina gaana la.»

Jesu ja jaa tuna ər ulu sul la ər duga tɨm jili sul la

Mat 20.17; Mrk 10.32

31Jesu jul ər bi dɔkɔmɛ kar sap si na a la ər ja gɨ a: «Yḭ laa, yi wo ul sul tɨ saal tɨ Jerusalɛm. Mum gun ne Ndɨla na nebi kya̰ tuna tɨ Yin, Wo Ɓa̰ sul ɓə an. 32Kəysul a ɓə ən nɨm tɨ bi tɨ Ndɨla una lo daa, a ɓə ən ɓəji kar la, a ɓə ən ɓurum la, a ɓə hirgɨ tɨbɨn tɨ ən ji la. 33Gorne a tong ən ɗɨb na ngar a, a ɓə ən humna la. Ən ɓə ngalɨm ɗɨb wag na ɗa̰y tɨ tedi hul la.» 34Lɛ ər bi una ər jaa ne lɔ lo, kəysul ər ji wal gɨ a ndɔ, la a una jaa ne Jesu taam gɨ a ja lo la.

Jesu nen wo ji nina

Mat 20.29; Mrk 10.46

35Jesu an ndog na Jeriko, wo ji nina paa ti tɨ ul taal, ər wo wa̰y ndɔri. 36Gorne ər laa bi gṵ tɨ ɗira gɨna, ər ɓiri pay kəy jo ka paa a? 37A duga gɨ ər ɓə Jesu wo tɨ Najarɛt jo wo ɗira. 38Gɨna ər ɗo ngɔr tɨ ndal: «Jesu, Dabid na ɓa̰ kaa, ləg ən jindemni!» 39Bi ne si tɨ ər kwi toni kway gɨ ər un tɨ ngɔr kar: «Dabid na kaa, ləg ən jindemni.» 40Jesu lor tɨ gor naa gṵ ka a hina na ər. Gorne ər hina ndog a, Jesu ɓiri ər: 41«Kəyjo əm taam ka ən ka gɨ əm a?» Wo ji nina duga gɨ ər: «Ən Baali, ka ən ji duga ləg un.» 42Jesu duga gɨ ər: «Əm ləg un, əm hul kula nen əm.» 43Daamu, ər ləg un la ər si tɨ Jesu lɔ la. Ər bɛ gɨ Ndɨla taan. Bi gun ne ləg wa̰y ne ka paa, a teen Ndɨla la.

Currently Selected:

Luk 18: nie

Highlight

Copy