Luk 19

Jesu a na Jase

1Jesu wur tɨ lɔr ɗəng tɨ Jeriko la ər ɗira la. 2Ɓər paa ndil ɓə Jase wo nin, ər tɨ bi tɨ lambo tay na wa̰ay. Ər tɨ wo tɨ wani. Ər taam ləg ɓə jaa jo tɨ Jesu a? 3Lɛ ər lɛm Jesu ləg lo, kəysul bi tɨ dɨbla la yḭr tɨ wo ɗul. 4Ər yey tɨ kwi, ər ɗɔl tɨ tɨla ɗəng sul tɨ Jesu ləg, kəysul ər wo ɗira na ul ɗay. 5Gorne Jesu an tɨ un ne gɨna, ər uma ər ji la ər ja gɨ ər: «Jase tung əm ndɔ, əm jir, kəysul kakamle ən ɓə lom tɨ əm gə̰y.» 6Jase jir saan, par Jesu tɨ ər ndɔ tɨ ər gə̰y na ndula laar ɗəng. 7Gorne bi gun ləg in a, a wur a mu tɨ lɔr la a ja: «Ər si ər ley tɨ wo tɨ ɓijim kar maan.» 8Lɛ Jase o̰ lor tɨ Baali kwi ja gɨ ər: «Baali, əm ləg, ən ɓə gɨ bi tɨ ndemni ən mum tɨ tina na taal naa la, jo ən ka gɨ wo ɓijim gɨna ən ɓə gɨ ər duga lahul tɨ niyeni la.» 9Jesu ja gɨ ər: «Kakam le nina wur tɨ gə̰y ne, kəysul yim kaw əm tɨ Abraham na kalɔ kuri la. 10Kəysul Yin, Wo Ɓa̰ ən hina bi ton haam taam tɨ a nina.»

Jaa lar tuna daab sul

Mat 25.14

11Jesu ja jaa lar paa cam gɨ bi ne wo ər jaa laa. Kəysul a wo tɨ ndog na Jerusalɛm, la bi ilgɨ ɓə Ndɨla na waan ɓə wag tɨ daamu. 12Gɨna ər ja: «Wo tɨ wani paa si tɨ ɓoy ɓag ka a kay ər tɨ waan sul barita ər ɓə duga hina. 13Ər soon ər bi tɨ cida dɔkɔmɛ la ər naa gɨ a gursu bɔg dɔkɔmɛ la ər ja gɨ a: “Yḭ yiga na i lɔ marway ta ən ɓə na duga.” 14Lɛ ər bi tɨ lɔr hul koor ər. A toon bi tɨ ər lɔ ka a ja gɨ wo ne ɓə ər kay tɨ waan sul ja ɓə: “Yini taam ɓə wo ne ka waan tudi tɨ yi sul lo.” 15Gorne a kay ər tɨ waan sul gɨna, ər duga ər hina tɨ ər lɔr nəgri sul. Ər soon ər bi tɨ cida ne ər naa gɨ a gursu ɓɔg tɨ a ndɔ tɨ una pay a yiga na lɔ a? 16Wo ne toni hina la ər ja gɨ ər: “Baali, əm gursu ɓɔg hina na ndu dɔkɔmɛ tɨ paa sul.” 17Waa̰y ja gɨ ər: “Tɨ ɓari, yim tɨ wo tɨ cida tugla kəysul tɨ mum ɓḭ hul. Kuna yim tɨ wo ne ko əm hul tɨ mum ɓḭ sul, ən kay əm guberno̰ tɨ lwərgɨ nii dɔkɔmɛ sul.” 18Wo tɨ ndidi mani hina ja gɨ ər: “Baali, əm daab so ndu tɨ luni tɨ paa sul.” 19Baali ja gɨ wo ne: “Yim kaw ən kay əm guberno̰ tɨ lwərgɨ nii tɨ luni sul la.” 20Wo tɨ tedi mani hina ja gɨ ər: “Baali, əm gursu bɔg jo le. Ən waal ər tɨ sər daan. 21Ən oy gɨ əm, kəysul yim tɨ wo sɨgra. Yim ɗol gɨ wo wa̰y gɨna, əm ko əm wa̰y na mugor la, əm ɓya̰ wa̰y ne əm ndu lo la.” 22Waa̰y ja gɨ ər: “Na jaa ne wag tɨ əm mu, ən ɓə jaa tṵgni tɨ əm sul, yim tɨ wo tɨ cida ɓijim. Əm una ɓə yin tɨ wo sɨgra ne ən ko ən wa̰y ne ɗol la, la ən ɓya̰ wa̰y ne ən ndu lo la. 23Lɛ, kəyja jo əm bɛ ən gursu tɨ ba̰k nɨ gorne ən duga gɨna, ən ɓə kula na ndu lo a?” 24La ər ja gɨ bi ne ti tɨ ɗay: “I ko ər daab i naa gɨ wo ne si na dɔkɔmɛ tɨ paa sul.” 25A ja gɨ ər: “Baali, yḭr na daab dɔkɔmɛ teni.” 26Ər duga gɨ a: “Ən ja gɨ i, wo ne na wa̰y tɨ daa, a ɓə gɨ ər paa naa tɨ sul lɛ, wo ne na wa̰y lo, a ɓə ne ɓa̰ ndḛ tɨ ər daa kula teni. 27Tuna ən peer tɨ peni sul, ya̰ ne a taam ɓə ən ka waan tudi tɨ a sul lo, yḭ hina na a la, i hun a tɨ ən kwi le.”»

Jesu wur tɨ Jerusalɛm

Mat 21.1; Mrk 11.1; Ja̰ 12.12

28Gorne Jesu ja jaa kuna ne gɨna, ər si tɨ bi kwi tɨ saal tɨ Jerusalɛm. 29Gorne ər an ndog na lɔr tɨ Betpaje la tɨ Betani la tɨ nan ne a soon ər ndil ɓə nan tɨ Olibe taal gɨna, Jesu toon ər bi tɨ wa̰y edɨ tɨ ndidi. 30Ər ja gɨ a: «I si tɨ lɔr ne ti tɨ i kwi ɗay, gorne i an tɨ lɔr mu, i ɓə lamkɛ̰r ɓa̰ ne wo ho̰on lo ɗang ne a ɓəw tina. Yḭ cigri ər, i hina na. 31Jo wo ɓiri i: “Kəyjaa yḭ cigri ər a?” yḭ ja gɨ ər: “Baali jo taam ər.”»

32Bi tɨ tomni si la a ten mum gun kuna Jesu ja gɨ a la. 33Gorne a wo lamkɛr ɓa̰ cigri a, Baali ɓiri a: «Kəyjaa yḭ cigri lamkɛr ɓa̰ a?» 34A duga gɨ ər: «Baali jo taam ər.» 35A si na ər a na gɨ Jesu, a bɛ sər tɨ lamkɛr bəgri la kay Jesu tɨ sul. 36Gorne ər wo saal, bi ba̰y sər tɨ ul. 37Gorne a an ndog tɨ Jerusalɛm na ul tɨ jir tɨ nan tɨ olibe gɨna, ər bi tɨ wa̰y edɨ dɨbla ka ndula laar. A teen Ndɨla na dwari tuna mum ne ɓɔrji gun ne a ləg. 38A ja: «Ka Ndɨla jul mu tɨ wa̰ay ne hina na Baali ndil sul. Lapya tɨ ndɨlasul la ka mum gun tɨ ndɨlasul teen Ndɨla la.» 39Parisyḛ-a tapeer ne wo tɨ bi daan ja gɨ Jesu: «Wo tɨ wa̰y ɓla, ja gɨ əm bi tɨ wa̰y edɨ ka hoon a mu.» 40Jesu duga gɨ a: «Ən ja gɨ i, jo a hoon a mu gɨna, kərgɨ ɓə ngɔr kar la.»

Jesu cḛy Jerusalɛm kum

41Gorne Jesu an ndog na lɔr ɗəng tɨ Jerusalɛm la ər ləg lɔr ne in a, ər cḛy ər kum, la ər ja: 42«Ay yi bi tɨ Jerusalɛm, hiina toni i una ɓə i lapya gɨna ɓə ndini. Lɛ yḭ una lo! Lɛ ndogle, wa̰y ne wal gɨ i ndɔ, yḭ ɓə ər ləg lo! 43Kəysul lula sul ɓijim ɓə gɨ i hina. I peer tɨ pɛni ɓə wa̰y mura na i sul yeri la, a ɓə tulɔ yila tɨ i sul yeri. Ta a ɓə i kubgɨ la, a ɓə i ɛ̰wni tɨ daan la. 44A ɓə əm yunga hari na ər bi gun la, ta ɓə kura ɓudu in nɨm tɨ paa sul lo. Kəysul yḭ ka lula sul ne Ndɨla hina ləg i na wa̰y bla!»

Jesu wo Ndɨla li hul

Mat 21.12; Mrk 11.15; Ja̰ 2.13

45Jesu wur tɨ Ndɨla li jaal hul la ər ɗolɔ tɨ bi tɨ cingɨ kar kun. 46Ər ja gɨ a: «A kya̰ tɨ Ndɨla maktub hul ɓə ən li ɓə tɨm li tɨ Ndɨla soon lɛ yḭ ka ər kuna un tɨ sugi maan!» #19.46 Esa 56.7

47Jesu ɓla gɨ bi wa̰y na ɗa̰y sul tɨ Ndɨla li jaal hul. Bi tɨ hima ɓina na woom la, bi tɨ gṵ hul ɓla la, bi nii na woom la, a taam ul tɨ ər humna. 48Lɛ a una wa̰y tɨ kar lo kəysul bi gun ti kɛgɛgɛ tɨ ər jaa laa.

Currently Selected:

Luk 19: nie

Highlight

Copy