Luk 5

Jesu soon ər bi tɨ tomni dɔkɔmɛ kar sap

Mat 14.18; Mrk 1.16

1Ɗa̰y paa Jesu ti tɨ ɗaglə ɗəng tɨ Jenesarɛt mu. Bi dɨbla taypeer tɨ ər sul tɨ Ndɨla jaa laa. 2Ər ləg kwɔ̰rgɨ tɨ ndidi tɨ larɨm mu. Ndɛb-a jir tɨ hul tɨ a man ugu. 3Jesu ɗɔl tɨ kwa̰r paa ne tɨ Simo̰ maan hul. Ər ɓiri Simo̰ ka ər si ɓag ɓa̰ndḛni na ko̰rmu. Jesu ti tɨ nəgri tɨ kwa̰r hul la ər ɗolɔ tɨ gɨ bi wa̰y ɓla.

4Gorne ər tong ər jaa gɨna, ər ja gɨ Simo̰: «Əm si ɓag tɨ larɨm daan, i ɗo man i taam na kaa.» 5Simo̰ duga gɨ ər: «Wo tɨ wa̰y ɓla, yini jab ka nari na siyɛl lɛ i par ka ɓudu in lo, kuna əm ɓiri ən gɨna, ən ɓə man ɗula.» 6A ɗo man la a par kaa dɨbla ka dɨbla la. Gə̰y ndog man taam da̰r. 7A soon a peer neta ti tɨ kwa̰r jak hul ka a hina a yaar a la. A hina la a sir kwɔ̰rgɨ tɨ ndidi na kaa la, gə̰y ndog ne kwə̰rgɨ ɓə duli. 8Gorne Simo̰ Piyɛr ləg wa̰y ne gɨna, ər ha̰w ər ɗa̰y tɨ Jesu kwi, gɨna ər ja: «Baali, əm par əm ndɔ teni tɨ ən ndɔ, kəysul yin tɨ wo tɨ ɓijim kar.» 9Ər ja in kəysul ayri ka ər nari tuna kaa ne a par dɨbla sul. 10Jak la Ja̰ la, Jebede ɓimi ne a an Simo̰ lɔ kaw ayri ka a la. Lɛ Jesu ja gɨ Simo̰: «Ka ayri kar lo! Ɗolɔ kakamle, yim, əm ɓə tɨm ndɛb tɨ biɓari taam ka a hina tɨ ən ndɔ.» 11Gorne a duga na kwɔ̰rgɨ tɨ ko̰rmu gɨna, a nɨm a mum gun la a si tɨ Jesu lɔ la.

Jesu nen wo tɨ yo

Mat 8.1; Mrk 1.40

12Ɗa̰y tɨ plaa, Jesu wo tɨ lɔr ɗəng paa hul. Wo tɨ yo paa hina tɨ ər ndɔ. Gorne ər ləg Jesu gɨna, ər tɨba ər hulgɨ tɨ ər kwi la ər ɓiri ər: «Baali, jo əm hul taam gɨna ən ndula ɓə ndeeri.» 13Jesu nay ər daa, ər do ər la ər ja: «M, ən taam, ka əm ndula ndeeri.» Tɨ daamu, yo wag tɨ ɓər ne ndɔ. 14Gɨna, Jesu naa gɨ ər gṵ sɨgra kuna ne: «Wa̰y ne ka paa əm ka gɨ wo jak ja lo. Lɛ əm si əm ɓla əm ndula gɨ wo tɨ hima ɓina la əm ka gṵ hul tɨ ndula ndeeri ne Moys na maktub kya̰. Nejo a ɓə una ɓə əm ndula ndeeri.» 15Jesu na ndil cḛy na kwi la bi dɨbla hina laa ər jaa la, a ten nina tɨ a mo̰y la. 16Lɛ Jesu jul ər ndɔ ər si tɨ tap hul tɨ Ndɨla soon.

Jesu nen wo ne ndula uy

Mat 1.9; Mrk 2.1

17Ɗa̰y paa, Jesu wo gɨ bi wa̰y ɓla gɨna, Parisyḛ-a tapeer la bi tɨ gṵ hul ɓla tapeer ti wo jaa laa la. A hina na lwərgɨ gun tɨ Galile la, tɨ Jude la, tɨ Jerusalɛm la. Baali na dwari gə̰y na Jesu nɨ ər nen na bi mo̰y. 18Bi hina na wo ne ndula taal ɓudu uy, a yəg ər tɨ njal hul. A taam ul mu tɨ na ər wur tɨ tahul tɨ Jesu Kwi. 19Lɛ a una ul mu ne a ɓə na ər wur lo kəysul bi tɨ dɨbla. Gɨna a ɗɔl tɨ li sul, a kura la a jir ər na njal tɨ bi daan tɨ Jesu kwi. 20Gorne Jesu ləg bi ne na hul kula gɨna, ər ja: «Ən paa kɔr, əm ɓijim teni kəysul Ən hul ɗina ən tɨm sul.» 21Bi tɨ gṵ hul ɓla la Parisyḛ-a la a ɗolɔ tɨ jaa hurga tɨ a daan ɓə: «Ja jo lor wo tɨ Ndɨla ɓurum le a? Ja jo hul ɓə ər ɗina tɨ ɓijim sul a? Tɨ Ndɨla ɓudu ngoy lo a?» 22Lɛ Jesu una a ilgɨ, ər so jaa la ər ja gɨ a: «Kəyjaa yḭ na ilgɨ ɓijim kuna paa ne tɨ i nirimu a? 23Kəyjo tɨ ndog tɨ ja: “Ən hul ɗina ən tɨ ɓijim sul” ɓee “O̰ ndal əm si a?” 24Ən taam ɓə ka yḭ una ɓari ɓə: tɨ nəgri sul le, Yin, Wo Ɓa̰ ən na dwari tɨ hul ɗina tɨ bi ɓijim sul.»#5.24 Jesu may soon ər ndɔ ɓə yḭ tɨ Wo Ɓa̰. Gɨna ər ja gɨ wo ne ndula taal ɓudu uy ɓə: «Ən naa əm gṵ, o̰ ndal, əm so əm kwal la əm si tɨ əm gə̰y!» 25Tɨ daamu, ər o̰ ndal tɨ bi gun kwi, ər so njal ne ər ley na la ər si tɨ ər gə̰y la. Ər teen Ndɨla tɨ ul sul. 26Ɓɔr bi gun ji nari. A teen Ndɨla, ayri ka a la a ja: «Kakamle, yini ləg mum ne ɗa̰y ɓudu wo lɛm ləg lo!»

Jesu soon Lebi

Mat 9.9; Mrk 2.13

27Tɨ mum ne ɓəgri, Jesu wag la ər ləg wo tɨ lambo tay ne ndil ɓə Lebi, ər ti tɨ ər un tɨ lambo tay. Jesu ja gɨ ər: «Hina tɨ ən lɔ!» 28Lebi o̰ ndal, ər nɨm ər mum gun la ər si tɨ Jesu lɔ. 29Lebi ka tudi ɗəng tɨ ər gə̰y gɨ Jesu. Bi tɨ lambo tay dɨbla la bi tapeer dɨbla la a ti tɨ wa̰y tudi mu na a? 30Parisyḛ-a na bi tɨ gṵ hul ɓla, a hurga jaa la a ja gɨ Jesu na bi tɨ wa̰y edɨ ɓə: «Kəyjaa jo yḭ twi wa̰y la yḭ yiḭ ndu la na bi tɨ lambo tay a na bi tɨ ɓijim kar la a?» 31Jesu duga gɨ a: «Tɨ bi ndula nga̰ jo taam doktor lo, lɛ tɨ bi tɨ mo̰y jo taam doctor. 32Ən hina bi ton ləg ndula bi tugla jaa lo, lɛ ən hina bi tɨ ɓijim kar soon, nɨ a par a ndɔ ndemni.»

Jaa ɓiri tuna asam sul

Mat 9.14; Mrk 2.18

33Parisyḛ-a ɓiri Jesu jaa: «Ja̰ na bi tɨ wa̰y edɨ la yini bi la, a ti na ndu yuni lɛ əm bi tuy wa̰y la yiḭ la kəyja a?» 34Jesu ja gɨ a: «bi ne a hom a ɓə ndɔ wa̰y tudi kway gorne wo tɨ ii wo tɨ a daan a? M-m! 35Lɛ lula sul ɓə hina nɨ ɗa̰y paa a ɓə ər jul tɨ a daan gɨna, a ɓə a ndɔ wa̰y tudi kway bla.»

36Jesu ja gɨ a jaa lar ne cam: «Wo ne ɓə sər ɓaani sula na ngɔmi hiin koblo ɗɨb in teni. Kəysul sər ɓaani ne ɗang taygɨ lo ɓə komni, la ɓə ngɔmi dḛr la a ɓə paa wag lo la. 37Wo ɓə ham ɓeri bɛ tɨ ɓɔl hiin hul lo kəysul ɓɔl ɓə umni. Ham la ɓɔl la gun ɓə kud. 38Ndini ham ɓeri bɛ tɨ ɓɔl ɓaani hul. 39Gorne wo yiḭ ham ɓlaa gɨna, ər ɓə ne ɓeri taam cam lo. Kəysul ər ɓə ja ɓə: “Ham ɓlaa ndini ura ham ɓəri.”»

Currently Selected:

Luk 5: nie

Highlight

Copy