Luk 6

Jesu la ɗa̰y tɨ saaw bɛ la

Mat 12.1; Mrk 2.23

1Na Juyb-a na ɗa̰y tɨ saaw bɛ tɨ plaa, tɨ pya̰ tɨ toni mani maan, Jesu ɗen tɨ ya worgɨ hul. Ər bi tɨ wa̰y edɨ ɗolɔ tɨ ya sul sima la a ndigri tɨ a daa a twi. 2Parisyḛ-a tapeer ja ɓə: «Kəyjaa yḭ ka wa̰y ne gṵ hul kway kar na ɗa̰y tɨ saaw bɛ a?» 3Jesu duga gɨ a: «Pay yḭ edɨ wa̰y ne Dabid ka na ɗa̰y ne ndula ka ər na ər bi la lo a? 4Ər wur tɨ Ndɨla li hul ne a kaw na tanda la, ər so mapa ne a naa gɨ Ndɨla, ər twi la ər naa gɨ ər bi ka a twi la. Mapa ne le, wo bla ɓə lɛm tudi lo, lɛ bi tɨ hima ɓina ngoy jo ɓə lɛm tudi.» 5Jesu ja gɨ a cam: «yin Wo Ɓa̰ kaw ən ɗa̰y tɨ saaw bɛ na Baali.»

Wo ne daa taal ɓudu uy

Mat 12.9; Mrk 3.1

6Ɗa̰y tɨ saaw bɛ paa jak, Jesu wur tɨ Juyb-a na li tɨ paa tina hul la ər ɓla gɨ bi wa̰y la. Ɓər paa ne daa tɨ lɨma uy wo nin tɨ li hul. 7Bi tɨ gṵ hul kya̰ la Parisyḛ-a la a kay a ji ɓari tɨ ləg pay Jesu ɓə ɓər ne nina na ɗa̰y tɨ saaw bɛ a? A taam ul mu tɨ jaa kay tɨ ər sul. 8Lɛ Jesu una a ilgɨ. Gɨna ər jaa gɨ ɓər ne daa taal ɓudu uy: «O̰ ndal əm lor tɨ daan le, tɨ bi gun kwi.» Ɓər o̰ ndal la lor tɨ daan la. 9Jesu ja gɨ a: «Ən ɓiri i pay wo na ul mu tɨ ɓari kar ɓee tɨ ɓijim kar? Tɨ wo nina ɓee tɨ wo nɨm ulu tɨ ɗa̰y tɨ saaw bɛ a?» 10Ər ɗo ər ji tɨ a sul gun la ər ja gɨ ɓər ne daa taal ɓudu uy: «Nay əm daa.» Ɓər nay ər daa la ər daa ti nga̰ la. 11Lɛ hul laa ka Parisyḛ-a na bi tɨ gṵ hul ɓla la nari. A ɗolɔ tɨ jaa ɓiri tɨ a daan tuna wa̰y ne a ɓə gɨ Jesu kar.

Jesu ɛr ər bi tɨ wa̰y edɨ dɔkɔmɛ kar sap 10.1; Mrk 3.13

12Na ɗa̰y ɗay, Jesu si tɨ nan sul tɨ Ndɨla soon. Ər soon Ndɨla na siyɛl hul gun. 13Na un lɔ, ər soon ər bi gun tɨ ər ndɔ. Ər ɛr bi dɔkɔmɛ kar sap la ər soon a bi tɨ wa̰y edɨ la. A ji tɨ dɔkɔmɛ kar sap. 14Simo̰ ne ər kay ər ndil ɓə Piyɛr la, ər ɓun tɨ A̰dre la, Jak la, Ja̰ la, Pilip a na Bartelemi la, 15Matyo a na Tomas la, Jak Alpe na ɓa̰ la Simo̰ ne mun lɔr jaa la, 16Jud, Jak na ɓa̰ la, Judas Iskariot, wo tɨ Jesu na sul sulɔ la.

Jesu ɓla gɨ bi wa̰y la ər nen mo̰y la

Mat 4.23

17Grone Jesu wo jir tɨ nan sul na ər bi tɨ wa̰y edɨ gɨna, Ər lor tɨ un bɛl na bi ton so ul tɨ lɔ dɨbla la bi gun tɨ nəgri sul tɨ Jude la. Ta bi tɨ Jerusalɛm la bi tɨ lwərgɨ nii tɨ Tir la, tɨ Sido̰ ne wo tɨ ɗaglə ɗəng mu ɗay la. 18A hina tɨ ər jaa laa la tɨ nina tina tɨ a mo̰y sul la. Ər kun lal ɓijim tɨ bi gun sul la. 19Bi gun taam ul mu tɨ ər ndula dula kəysul dwari wag tɨ ər ndɔ la nen a gun la.

Jesu ɓla gɨ bi wa̰y tɨ nan sul

Mat 5.1

20Gɨna Jesu uma ər ji tɨ ndal, ər ləg ər bi tɨ wa̰y edɨ la ər ja:

«Ndula laar gɨ bi ton ləg ndɔ ka na wa̰y lo,

kəysul Ndɨla na waan tɨ i maan!

21Ndula laar gɨ bi ton ndula ka-a ndogle,

kəysul yḭ ɓə kər!

Ndula laar gɨ yḭ bi tɨ cḛy ndogle,

kəysul yḭ ɓə yiini!

22Ndula laar tɨ i maan gorne bi ɓə i koor

a ɓə i ɓini la a ɓə i ɓurum la,

a ɓə i jaa ɓijim ja gɨ bi yin Wo Ɓa̰ jaa.

23Yḭ ka ndula laar na ɗa̰y ne la yḭ kab na ndula laar la,

kəysul yḭ ləg, i wa̰y tɨ daa sul ɗəng wo tɨ ndɨla sul.

Kəysul ti kuna paa ne jo

a ɓəgɨ ka na nebi a toni.

24Lɛ ndemni gɨ yḭ bi tɨ waani,

kəysul waani ne yḭ na ndogle tɨ i wa̰y tɨ ndula laar ɓudu lag lag!

25Ndemni gɨ bi ton kər ndogle,

kəysul ndula ɓə i kar!

Ndemni gɨ bi tɨ yiini ndogle,

kəysul yḭ ɓə ɓaari par la yḭ ɓə cḛy la!

26Ndemni tɨ i maan gorne bi gun ja jaa ndinimani tuna i sul,

kəysul ti kuna ne jo a ɓəgɨ

ka gɨ nebi ɓori ton toni!»

Peer tɨ pɛni kumkar

Mat 5.38

27«Ən ja gɨ i, yḭ bi ton i wo ən jaa laa le: Yḭ ka i peer tɨ peni kum la ī ka ɓari gɨ bi tɨ i koor la. 28Yḭ jul i mu tɨ bi ne wo i dobɨn sul, yḭ soon Ndɨla gɨ bi ne ka gɨ i ɓijim.

29«Jo wo ɗɨb əm tɨ əm tɛm taal gɨna, yiga gɨ ər taal ɓudu cam, jo wo so əm ngɔmi ɗəng gɨna, ka gɨ ər ngɔmi ɓa̰ kway lo. 30Jo wo ɓiri əm wa̰y gɨna, əm naa gɨ ər, la jo wo ko wa̰y tɨ əm daa gɨna, əm ka ər hula ɓiri lo la. 31Wa̰y ne yḭ taam ɓə ka bi ka gɨ i, yḭ ka gɨ a toni.

32«Jo yḭ ka bi ton ka i kum jo ngoy gɨna, kəy wa̰y tɨ daa sul jo yḭ ɓə tina a? Bi tɨ ɓijim kar kaw ka bi ne ka a kum la. 33Jo yḭ ka ɓari gɨ bi ne ka gɨ i ɓari ngoy gɨna, kəy wa̰y tɨ daa sul jo yḭ ɓə tina a? Bi tɨ ɓijim kar kaw ka wa̰y ne la! 34Jo yḭ uur gɨ bi ne yi ka i ho̰ni ɓə a ɓə gɨ i na duga ngoy a, kəy mum tɨ daa sul yḭ ɓə tina a? Bi tɨ ɓijim kar kaw uur gɨ a peer tɨ ɓijim kar wa̰y nɨ a ɓə gɨ a na duga tɨ gor la! 35Lɛ yḭ, ka i peer tɨ pɛni kum, yḭ ka gɨ a ɓari la. Yḭ uur gɨ bi wa̰y lɛ yḭ ka i ho̰ni kay ɓə a ɓə gɨ i na duga lo. Yḭ ɓə i mum tɨ daa sul ɗəng tina la yḭ ɓə tɨm Ndɨla baw ɗəng nari na ɓimi la. Kəysul ər tɨ wo ndinimani gɨ bi ne una barka kar lo la, gɨ bi hul ɗwayri la.

Ɓari kar gɨ peer

Mat 7.1

36«Yḭ ti bi tɨ ɓari kar kuna i Ba ti wo tɨ ɓari kar la. 37Yḭ ka jaa tungni tɨ i peer sul lo, ɓə Ndɨla kaw ɓə jaa tṵgni tɨ i sul lo la. Yḭ ka jaa ɗula tɨ i peer sul lo, ɓə Ndɨla ɓə jaa ɗula tɨ i sul lo la, ka i hul ɗina i tɨ bi sul ɓə Ndɨla hul ɓə ɗina tɨ i sul la. 38Yḭ naa gɨ bi ɓə Ndɨla ɓə gɨ i naa la. Ndɨla ɓə wa̰y dɨbla bɛ tɨ i sər mu a ɓə dig la nangni ɓari la, ta ɓə sir la ɓə dɔr la. Kəysul wa̰y ne yḭ lɛm na i naa gɨ bi, Ndɨla ɓə gɨ i na lɛmni la.»

39Ər ja gɨ a jaa lar ne cam: «Pay wo ji nina ɓə lɛm ər paa du mu par a? A ɓə tɨba tɨ tulɔ hul lo a? 40Wo tɨ wa̰y edɨ tɨ ɗəng ura wo tɨ gɨ ər wa̰y ɓla lo. Lɛ wo ne edɨ wa̰y ɓari ɓə tɨm kuna wo tɨ gɨ ər wa̰y ɓla. 41Kəyjaa əm ləg ya̰n tɨ əm ɓun ji, lɛ əm lɛm əm ji lɔ ne door kɔb-kɔb ləg lo a? 42Əm ɓə lɔ sula ɓə kəyjo əm ɓə gɨ əm ɓun ja ɓə: “Ka ən jul ya̰n tɨ əm ji lɔ, gorne yim mam ji door kɔb-kɔb a?” Yim ne əm lɛm maler ləg tɨ əm ji lo. Wo gṵ tɨ ndidi! Əm jul maler ne tɨ əm ji toni barita gə̰y gɨna, əm ɓə əm ɓun maan ləg ɓari tɨ jul.»

Tɨla la ər ji la

Mat 7.16

43«Tɨla ndinimani ɓə ji ɓijim twila lo la, tɨla ne ɓijim ɓə ji ndinimani twila lo la. 44Kəysul a una tɨla na ər ji tɨ twila. Wo ɓə ndɔg ji tiini tɨ ngwḭ sul lo la, wo ɓə damnar ji kura tɨ humi sul lo la. 45Wo hul buy gɨna, jaa ɓari jo wag tɨ ər nirimu, lɛ jo wo nirimu tɨ ɓijim gɨna, mum ɓijim jo wag tɨ ər mu la. Kəysul jaa ne wag tɨ woɓari mu, tɨ jaa ne sir ər hul jo wag tɨ ər mu.

Li tɨ ndidi

Mat 7.24

46«Kəyjaa jo yḭ soor ən tɨ i mu sul “Baali, Baali”, lɛ yḭ ka wa̰y ne ən ja gɨ i lo a? 47Wo ne hina tɨ ən ndɔ la laa ən jaa ka na wa̰y, a ɓə ər lɛmni na kəy a? 48Ər wag wo ne kaaw li. Ər yel tulɔ baw ər kay na li lɔ tɨ kura sul. Gorne ndu lɨma o̰ la saaw ɗəng tɨba tɨ li sul kaw lɛm ər bra lo, kəysul a kay li ne lɔ ndinimani. 49Lɛ wo ne laa ən jaa le so ka na cida lo, wag wo ne kaaw li tɨ nəgri sul bla lɔ kay tɨ kura sul. Gorne ndu o̰ ɗəng la saaw tɨ tɨba sul gɨna, ər tɨba sandaw, ər bra cad cad.»

Currently Selected:

Luk 6: nie

Highlight

Copy