Luk 7
7
Jesu nen əli ɗəng na wo tɨ cida kar
Mat 8.5
1Gorne Jesu tong ər jaa tɨ ja gun gɨ bi gɨna, ər si tɨ Kapɛrnom. 2Tɨ lɔr ne, eli-a na ɗəng paa wo nin, yḭr tɨ wo tɨ Rom, Yḭr na wo tɨ ər cida kar ne ər ka ər kum nari tɨba mo̰y ndog na ulu. 3Gorne eli-a ɗəng ne laa jaa tuna Jesu sul gɨna, ər toon gɨ Juyb-a na bi nii tapeer ka a ka gɨ ər kɔgri ka ər hina ər nen ər wo tɨ cida kar. 4A hina tɨ Jesu ndɔ la a ka gɨ ər kɔgri la, a ja gɨ ər ɓə: «Ɓər ne lɛm ne əm ɓə ər yaar. 5Kəysul ər ka i bi kum nari. Tɨ yḭr jo ər kaaw i li tɨ paa tina ne na wa̰y tɨ ər daa.» 6Gɨna Jesu si na a. Gorne an ndog na gə̰y a, eli ɗəng toon ər peer korgɨ ka a ja gɨ ər: «Baali, ka əm ndula ɓɔr lo, kəysul ən lɛm ne əm ɓə hina tɨ ən gə̰y lo. 7Nejo ən lɛm saal na ən ndɔ tɨ əm ndɔ lo. Əm ja jaa ɓudu ɓə ən wo tɨ cida kar ɓə nina tina la. 8Yin kaw ən na bi nii tɨ ən sul, ən na əli tɨ ən lɔ la. Gorne ən ja gɨ wo ɓudu tɨ a daan “əm si”, gɨna ər si, la gorne ən ja gɨ paa jak “hina”, gɨna ər hina la, gorne ən ja gɨ ən wo tɨ cida: “Ka wa̰y ne”, gɨna ər ka la.» 9Gorne Jesu laa jaa ne wag tɨ ɓər ne mu gɨna, ɓɔr ər ji. Ər yiga ər ji, ər ləg bi ne si tɨ ər lɔ. Ər ja gɨ a: «Ən ja gɨ i tɨ bayri, Tɨ Israhel kaw ən ten wo tɨ hul kula kuna paa ne lo.» 10Eli-a na ɗəng na ər bi tɨ wa̰y edɨ duga si tɨ gə̰y gɨna, a ten ər wo tɨ cida kar na lapya.
Ii tɨ ndirimu na ɓa̰ duga ti jili
11Daa bra, Jesu si tɨ lɔr ɗəng ne ndil ɓə Nayn. Ər bi tɨ wa̰y edɨ la bi dɨbla la si na ər. 12Gorne ər an ndog tɨ lɔr ɗəng ne mu gɨna, ər ten bi wo saal tɨ ulu bili. Tɨ ii tɨ ndirimu na ɓa̰ ɓudu lag lag jo uy. Bi tɨ lɔr ɗəng hul dɨbla an ər lɔ. 13Gorne Baali ləg ii ne gɨna, ər ləg ər jindemni la ər ja gɨ ər: «Ka cḛy lo!» 14La ər kori tɨ njal ndɔ ər do na ər daa. Bi ne yəg ulu lor tɨ gor gɨna Jesu ja ɓə: «Ɓa̰ ɓər, ən naa gɨ əm gṵ, o̰ ndal!» 15Gɨna ɓa̰ ulu o̰ tɨ ndal ti na lɔ la, ər ɗolɔ tɨ jaa ja la. Jesu wur tɨ ər na̰ daa. 16Ayri ka bi gun la a teen Ndɨla la. A ja: «Ndɨla na nebi ɗəng paa wag tɨ i daan, la tɨ Ndɨla may jo hina tɨ ər bi yar!» 17Tɨ un gun tɨ nəgri sul tɨ Jude la tɨ lɔr nəgri ne yer ər sul la bi laa jaa tuna wa̰y ne Jesu ka sul.
Ja̰ Batis na bi tɨ wa̰y edɨ
Mat 11.2
18Ja̰ na bi tɨ wa̰y edɨ jul mum ne ka paa lɔ gun gɨ a Baali. Ja̰ soon bi tɨ ndidi tɨ a daan 19la ər ton a tɨ Baali ndɔ tɨ ər ɓiri: «Pay yim tɨ wo ne wo hina ɓee yini ɓə wo paa jak a̰y a?» 20Gorne bi ne hina tɨ Jesu ndɔ gɨna a ja gɨ ər: «Ja̰ Batis jo toon i tɨ əm ɓiri pay yim tɨ wo ne əm ɓə hina ɓee, i ɓə wo jak a̰y a?» 21Na lula sul ne, Jesu nen bi galdəb dɨbla. Ər nɨm bi ne Sidan par a tɨ ndal la ər təng bi ji nina dɨbla ji la. 22Ər duga gɨ Ja̰ na bi tɨ wa̰y edɨ ɓə: «Yḭ duga i si tɨ Ja̰ ndɔ la i ja gɨ ər mum gun ne yḭ ləg la yḭ laa la. Bi ji nina ləg un la, bi kɔgri si tugla la, bi tɨ yo ndula ndeeri la, bi huru laa jaa la, bi tɨ ulu wag tɨ ngalɨm la, bi tɨ ndemni laa Jaa Ndinimani beel la. 23Ndula laar gɨ wo ne nɨm ər hul kula lɔ lo yin jaa!»
Jesu ja jaa tuna Ja̰ Batis sul
24Gorne Ja̰ Batis na bi tɨ wa̰y edɨ duga si gɨna, Jesu ɗolɔ tɨ ja jaa tuna Ja̰ Batis sul gɨ bi. Ər ja ɓə: «Kəy wa̰y jo i si i ləg tɨ tap hul a? Uun ne saaw dig a? 25Ɓee kəy wa̰y jo yḭ si i ləg a? Wo ne wur ngɔmi ndinimani a? Jo tɨ bi tɨ ngɔmi ne towol dɨbla wur lɛ a ti tɨ waani daan la, tɨ woom bang hul la! 26Kəyjo yḭ si i ləg cam a? Pay tɨ nebi a? M, ən ja gɨ i tɨ bayri, Ja̰ tɨ nebi la ər ura nebi dwari cam. 27Kəysul Ja̰ Batis tɨ wo ne Ndɨla na maktub ja jaa tuna ər sul ɓə: “Ən ton ən wo tɨ tomni tɨ əm kwi, tɨ gɨ əm ul kaaw.” 28Ən ja gɨ i tɨ bayri, tɨ bi gun ne aa toy a daan, wo ne ɗəng ura Ja̰ Batis in teni, lɛ wo ne gaw tɨ Ndɨla na waan hul jo tɨ ɗəng ura ər. 29Bi gun la, bi tɨ lambo tay la, a laa ər jaa gɨna, a una ɓə Ndɨla tɨ wo tugla la a ka Ja̰ Batis na batɛm la. 30Lɛ Parisyḛ-a la bi tɨ gṵ hul kya̰ la a ɓini wa̰y ne Ndɨla taam gɨ a kar la a ɓini Ja̰ Batis na batem kar la.
31«Ən ɓə bi kalɔ tɨ ndogle lɛmni na kəy bi a? A wag jaa a? 32A wag ɓimi ne a ti tɨ un bayri a soon peer:
“Yini koon gɨ i hu
lɛ yḭ ɓoon lo.
Yini so kwan tɨ ulu cḛy,
lɛ yḭ cḛy lo la.”
33«Ja̰ Batis hina, ər twi mapa lo la ər yḭḭ ham lo la lɛ yḭ ja ɓə: Ər na jinsə. 34Wo Ɓa̰ hina, ər twi la ər yḭḭ la gɨna, yḭ ja ɓə: “Ər tɨ wo agri la, wo tɨ ham yḭḭ dɨbla la! Yi ka ər na bi tɨ lambo tay la bi tɨ ɓijim kar paa kɔr.” 35Lɛ bi ton kay jicina tɨ a ndɔ sul, a ləg ər wa̰y tɨ kar tɨ tugla hari na ɓimi gun.»
Jesu wo tɨ Parisyḛ paa ne ndil ɓə Simo̰ na gə̰y
36Ɗa̰y paa, Parisyḛ-a paa hom Jesu tɨ ər gə̰y ka ər twi wa̰y na ər. Jesu si tɨ ɓər ne maan la ər ti tɨ wa̰y tudi mu na ər la. 37Ii tɨ ɓijim kar paa wo tɨ lɔr ne hul. Gorne ər laa ɓə Jesu wo wa̰y tudi tɨ Parisyḛ ne maan gɨna, ər hina na itɨr sir gaasa ne a kaw na Albatrɨ. 38Ər ti tɨ Jesu bəgri, ndog na ər ɗa̰y lɔ. Ər cḛy, ər ji ndeni tɨbɨn tɨ Jesu ɗḛygɨ. Gɨna, ər pla Jesu ɗḛygɨ na ər sul ɓwḭ. Ər laam la ər bɛ itɨr tɨ sul la.
39Gorne Parisyḛ ne hom Jesu ləg wa̰y ne gɨna, ər ja tɨ ər hul ɓə: «Jo ɓər tɨ Ndɨla na nebi kuri a, ər ɓə ii ne do ər ndɔ le una pay ər tɨ kəy wo a? Ər tɨ ɓijim kar.» 40Gɨna Jesu so jaa, ja gɨ ər: «Simo̰, yin na jaa ɓa̰ ndeni tɨ gɨ əm ja.» Simo̰ duga gɨ ər: «M, Baali, əm ja gɨ ən.» 41La Jesu ja: «Ɗa̰y paa wo tɨ hula na bi tɨ hula tɨ ndɨdi səng hula. Ne toni mani ɓə gɨ ər gursu aru mi duga. Ne tɨ plaa mani ɓə gɨ ər gursu dugmi duga la. 42Kuna a ji tɨ ndidi gun na gursu tɨ gɨ ər hula səng lo, ər jul hula tɨ a ji tɨ ndidi gun sul. Tɨ a daan, jaa jo ɓə ɓər ne kum kar nari ɓə paa ura a?» 43Simo̰ duga gɨ ər: «Jo tɨ yin a, tɨ wo ne ər jul hula ɗəng ura paa tɨ ər sul.» La Jesu ja gɨ ər: «Əm jaa tɨ kuri.»
44Ər yiga ər ji tɨ ii sul la ər ja gɨ Simo̰: «Əm ləg ii ne a? Gorne ən wur tɨ əm maan əm naa gɨ ən ndu tɨ ən ɗa̰y ugu lo, lɛ ii ne ugu ən ɗa̰y na ər ji ndeni la, ər pla ən ɗa̰y na ər sul ɓwḭ la. 45Əm par ən tɨ əm ndɔ na mu njum lo, lɛ yḭr, na lula sul ne ər wur tɨ əm gə̰y a, ər mugla ən ɗa̰y njum lo. 46Əm bɛ nɨm tɨ ən sul tɨ gɨ ən hormo̰ naa lo, lɛ ii ne bɛ itɨr tɨ ən ɗḛygɨ sul. 47Nejo, ən ja gɨ əm tɨ bayri ɓə, Ndɨla hul ɗina ər tɨ ər ɓijim dɨbla sul, tɨ nejo ər ka na ən kum nari. Lɛ wo ne Ndɨla hul ɗina tɨ ər ɓijim dɨbla lo, ɓə ər ka kum nari lo la.» 48Gɨna ər ja gɨ ii: «Ən hul ɗina ən tɨ əm ɓijim tɨ kar sul.» 49Bi ne ti na ər tɨ tudi mu a ilgɨ tɨ a hul ɓə: «Ɓər ne tɨ kəy wo jo ər si marway ər ja ɓə ər hul ɗina ər tɨ ɓijim sul a?» 50Lɛ Jesu ja gɨ ii: «Əm hul kula nen əm: Si na lapya.»
Currently Selected:
Luk 7: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
