Mark 13
13
Jerusalɛm na yuga
Mat 24.1-2; Luk 21.5-6
1Gorne Jesu wag tɨ Ndɨla li hul, ər wo tɨ tomni paa ja gɨ ər: «Wo tɨ wa̰y ɓla, əm ləg kura ndinimani ne a kaw na li, əm ləg li ne na ndini!» 2Jesu duga gɨ ər: «Ən ja gɨ i tɨ bayri li ɗəng ne i ləg le, ər kura ɓudu in ɓə gə̰y tɨ paa sul lo, A ɓə tɨbɨn gun.» 3Jesu ti tɨ nan tɨ olib ne lor tɨ Ndɨla li kwi gɨna, Piyɛr la, Jak la, Ja̰ la, A̰dre la ne a jul a ndɔ na ər a ɓiri ər jaa: 4«Əm ja gɨ i na kəykwi mum ne əm ja ɓə wo paa kar ɓə an a? La kəyjo mum ne ɓə paa kar ɓla a?» 5Gɨna Jesu ja gɨ a: «Yḭ ka i jicina tɨ i ndɔ sul la wo in ka i tan lo la. 6Kəysul bi dɨbla wo hina na ən ndil, jakaw ɓə ja ɓə: “Yin tɨ Krist ne Ndɨla ɛr!” La a ɓə bi dɨbla tan. 7Gorne yḭ ɓə sal jaa laa la, sal nig laa la gɨna, i ka i ndɔ cḛy lo. kəysul mum ne ɓə an, lɛ ne tɨ dunya̰ na mu tɨ tong ɗang lo. 8Bi tɨ lɔr ɓudu ɓə ndɔ kay tɨ paa tɨ lɔr jak muna la, woom ɓə o̰ peer muna la, nəgri sul ɓə dig na un tɨ dunya̰ la, ndula ɗəng ɓə tɨba tɨ bi sul la. Gorne mum ne ɓə an gun gɨna, ɓə tɨm kuna pɛw tɨ ɓa̰ twila lɔ ɗula. 9Lɛ i, kay jicina tɨ i ndɔ sul ɓə bi ɓə na i saal tɨ bi tɨ lɔr sul sula kwi la a ɓə i ɗɨb tɨ Juyb-a na ləgɨ tɨ paa tina hul la, a ɓə jaa tungni tɨ i sul tɨ guborno̰-a kwi la, tɨ woom la kwi yin jaa. Tɨ un ne yḭ ɓə na ən ja jaa tɨ a kwi. 10Toni barita mum ne ɓə an, ka ən Jaa Ndinimani beel tɨba tɨ bi gun tulɔ tɨ dunya̰. 11Gorne a wo na i saal tɨ jaa tungni tɨ i sul gɨna, i ka ilgɨ tɨ ja ne wo wag tɨ i mu lo, kəysul tɨ yḭ jo i wo ja jaa lo, lɛ tɨ Lal ɓari jo wo ja jaa tɨ i mu gor. 12Peer ɓungɨ ɓə a ɓungɨ sul sula tɨ a humna la, ba ɓə ər ɓa̰ sul sula tɨ ər humna la, ɓimi ɓə o̰ a bəgɨ koor la. A ɓə a nɨm tɨ bi tɨ bi humna daa nɨ a ɓə a humna la. 13Bi gun ɓə i koor yin jaa, lɛ wo ne par ər hul kula sɨgra marway mu tɨ tong gɨna ɓə nina.»
Ɗa̰y tɨ ngɨnɨm
Mat 24.15-28; Luk 21.20-24
14Jesu ja gɨ ər bi tɨ wa̰y edɨ cam: «Gorne yḭ ləg wo tɨ mum yuga ɗəng ti tɨ un ne hiina ər ɓə tɨm tɨ nin lo gɨna, Ka wo tɨ wa̰y edɨ kay jicina ɓari tɨ ər ndɔ sul! Kuna ne gɨna, ka wo ne wo tɨ Jude yey waal ndɔ tɨ nan gɔl. 15Wo ne wo tɨ durdur sul lɛm jir wa̰y sula tɨ hul lo, 16Wo ne wo tɨ waal hul ɓə duga hina tɨ gə̰y ər sər sula cam lo la. 17Ndemni gɨ aa bi tɨ ɓimi yina la ton wo gɨ ɓimi huma naa la, na ɗa̰y ne! 18Yḭ soon Ndɨla ka wa̰y ne ka an na tyɛr mu kwi lo! 19Kəysul pɛw ɗəng ne ɗa̰y ɓudu in tɨba tɨ lɔr nəgri sul lo ɓagcagri tɨ mum lɔ ɗula, marway kakamle. La batan pɛw kuna paa ne ɓə duga tɨba tɨ lɔr nəgri sul cam lo bad. 20Jo hiina Baali ka na ɗa̰y ne mu duga tɨ ɓəgri lo gɨna, wo ɓudu ne ɓə nina in teni, lɛ ər duga na ɗa̰y ne mu tɨ ɓəgri ər bi ne ər ɛr a jaa. 21Jo wo ja gɨ i ɓə Krist, wo le ɓee wo ɗay gɨna, i ka ər hul kula lo. 22Kəysul Mesi ɓori la nebi ɓori la, a ɓə o̰ a ɓə mum ne ka ayri kar la, mum ne ɓɔrji dɨbla kar tɨ bi tan, jo a ten ul mu gɨna, a ɓə bi ne Ndɨla ɛr a kaw tan la. 23Yḭ, kay jicina tɨ i ndɔ sul! Kəysul ən ja gɨ i jaa ne toni teni.»
Jesu ja jaa tuna ər duga sul
Mat 24.29-31; Luk 21.25-28
24Jesu ja gɨ a cam: «tɨ ɗa̰y ne hul tɨ pɛw ɓəgri, lula ɓə duga ɗoy matata la, pya̰ ɓə sadala par la, 25meri ɓə tɨbɨn tɨ nəgri la, mum tɨ dwari gun ne wo tɨ ndɨlasul ɓə tɨbɨn tɨ lɔr. 26Na ɗa̰y ne bi ɓə Wo Ɓa̰ ləg, ər ɓə hina tɨ goblə daan na dwari ɗəng. 27Ər ɓə malayka-a la saw tɨ nḛni tomni tɨ nəgri jal sul tɨ nḛni la ndɨlasul mu tɨ tong la tɨ bi gun tɨ duya̰ ne Ndɨla ɛr a tay.»
Wa̰y edɨ tuna ndɔgɨ sul
Mat 24.32-35; Luk 22.29-33
28Yḭ una wa̰y edɨ ne ndɔgɨ ɓla gɨ i: gorne ər gangɨ duga ti wori la ər ɔri do la gɨna, yḭ una ɓə saw sul tɨ ndog teni. 29Tɨ jaa ji ɓudu la, gorne yḭ ləg mum ne an gɨna, yḭ una ɓə Wo Ɓa̰ tɨ ndog tɨ ul mu. 30Kuri ən ja gɨ i tɨ bayri, bi kalɔ ne le ɓə ulu gun lo jo mum ne ɓə an. 31Ndɨlasul la nəgri sul la ɓə ɗira lɛ, ən jaa ɓə ɗira lo bad.
Ndɨla ɓudu jo una ɗa̰y tɨ mu tɨ tong
Mat 24.36-44
32«Lɛ jaa ne tuna ɗa̰y sul ɓee lula sul gɨna, wo ne una in teni. Malayka tɨ ndɨlasul la yin Wo Ɓa̰ kaw i una lo lɛ, ən Ba ɓudu ngoy jo una. 33I kay jicina tɨ i ndɔ sul, yḭ ka ley lom lo, kəysul yḭ una ɗa̰y ne wa̰y ne ɓə an lo. 34Ɓə tɨm kuna wo tɨ saal tɨ ɓoy ne nɨm ər gə̰y. Ər naa gɨ ər bi tɨ cida li ka a ɓaw. Ər na gɨ jakaw ər cida la ər naa gɨ wo tɨ jal ɓaw gṵ nɨ ər ka ley lom lo. 35Yḭ kay jicina tɨ i ndɔ sul kəysul yḭ una ɗa̰y ne Baali tɨ gə̰y ɓə duga hina lo: Ɓə tɨm na jeel ɓee, na siyɛl daan ɓee, na un lɔ ɓee na gaan kaw i ɓə una lo. 36Jo ər duga ər hina ər do ī tɨ lɔr gɨna, ər ka i tina tɨ lom sul lo. 37Jaa ne ən ja gɨ i le ən ja gɨ bi gun: Yḭ ka lom ɗula tɨ i ji lo.»
Currently Selected:
Mark 13: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
