Mark 3
3
Jesu nen ɓər paa na ɗa̰y tɨ saaw bɛ
Mat 12.9-14; Luk 6.6-11
1Jesu duga wur tɨ Juyb-a na li tɨ paa tina hul cam. Wo ne daa taal ɓudu uy wo tɨ nin. 2Parisyḛ-a kay a ji tɨ Jesu lɔ tɨ ər ləg pay ər ɓə ɓər ne nina na ɗa̰y tɨ saaw bɛ a. Kəysul a taam jaa kay tɨ ər sul. 3Jesu ja gɨ ɓər ne daa taal ɓudu uy ɓə: «O̰ ndal əm lor le, tɨ bi daan.» 4La ər ɓiri a: «Ɗa̰y tɨ saaw bɛ tɨ ɗa̰y tɨ ɓari kar ɓee ɓijim kar a? Ti tɨ wo nina ɓee ti tɨ wo humna a?» Lɛ wo ja jaa lo. 5Jesu ləg a na hul laa. A hul sɨgra ka Jesu ngɨnɨm nari. Ər ja gɨ ɓər ɓə: «Nay əm daa!» Ɓər nay ər daa la ər daa ti nga̰ la. 6Parisyḛ-a wag a si a ten peer na Erod na bi. A taam ul mu tɨ Jesu humna. 7Gɨna Jesu wag si na ər bi tɨ wa̰y edɨ tɨ ɗaglə ɗəng tɨ Galile taal, bi dɨbla si tɨ ər lɔ: A o̰ tɨ Galile la, Jude la 8Jerusalɛm la, Idum la tɨ lwərgɨ tɨ Jurdḛ taal la, tɨ nəgri sul ti Tir la, Sido̰ la. Bi ne hina tɨ ər ndɔ kəysul a laa wa̰y gun ne ər ka. 9Gɨna Jesu ja gɨ ər bi tɨ wa̰y edɨ ka par gɨ ər kwa̰r ɗa̰y sul nɨ ka bi ka ər dugun lo. 10Kuna ər nen bi dɨbla, bi tɨ mo̰y gun sənga peer tɨ ər dula tɨ nina tina. 11Gorne bi tɨ lal ɓijim ləg ər gɨna, a ha̰w a ɗa̰y tɨ ər kwi la a ɗo ngɔr ɓə: «Yim tɨ Ndɨla na ɓa̰!» 12Lɛ Jesu kway gɨ a un na gṵ sɨgra ɓə: «I ka ən ɓla gɨ bi ɓə yin tɨ Ndɨla na ɓa̰ lo.»
Jesu ɛr ər bi tɨ wa̰y edɨ
Mat 10.1-4; Luk 6.12-16
13Lɔ tɨ pla Jesu ɗɔl tɨ nan sul. Ər soon bi ne ər taam a la a hina tɨ ər ndɔ. 14Ər ɛr bi dɔkɔmɛ kar sap ər kay a ər bi tɨ wa̰y edɨ la a ɓə na ər tɨm na ɗa̰y sul. 15Ər toon a ɗo beel tɨ Jaa Ndinimani na dwari tɨ jins kun tɨ bi sul. 16Bi tɨ wa̰y edɨ dɔkɔmɛ kar sap ne ər ɛr a jo le: Simo̰ ne Jesu kay ər ndil Piyɛr la, 17Jak, Jebede na ɓa̰ la, ər ɓun tɨ Ja̰ ne Jesu kay ər ndil ɓə Bwanerges, ne ji ɓə ndɨla tɨ ɗuri na ɓa̰ la, 18A̰dre la, Pilip la, Bartelemi la, Matyo la, Tomas la, Jak Alpe na ɓa̰ la, Tade la, Simo̰ la, wo ne moon ər lɔr jaa la, 19Judas Iskariot wo tɨ Jesu sul huna la.
Jesu a na bi tɨ gṵ hul ɓla
Mat 12.22-32; Luk 11.14, 12.10
20Jesu a na ər bi tomni a si tɨ gə̰y. Bi dɨbla nari taygɨ cam ne a lɛm wa̰y tudi lo. 21Gorne ər peer nimni laa, a hina tɨ na ər duga na dwari kəysul a ja ɓə: «ər sul tɨ tugla lo.» 22Bi tɨ gṵ hul ɓla o̰ tɨ Jerusalɛm, a ja ɓə: «ər na Beljebul» la «Tɨ jinsə wa̰ay jo naa gɨ ər dwari tɨ jinsə-a kun!» 23Jesu soon a la ər ja gɨ a jaa na lar: «Sidan na wa̰ay ɓə ər ndula kun waa a? 24Jo bi tɨ waan hul ɓudu jo moon peer gɨna, a waan ɓə lɛm tɨm lo. 25Jo bi tɨ nimni ɓudu hul moon peer nimni gɨna, a nimni ɓə lɛm tɨm lo. 26Jo Sidan duga moon ər ndɔ gɨna, ər waan ɓə tungni la ər lɛm tɨm lo bad, ta ər mu ɓə kud. 27Wo ɓə lɛm wur tɨ wo tɨ dwari li hul tɨ ər mum to bla ər ɓəwlu lo. Lɛ jo ər ɓəw ər gɨna, ər ɓə ər mum to gun bla. 28Ən ja gɨ i tɨ bayri: Ndɨla hul ɓə ər ɗina tɨ bi tɨ ɓijim kar sul la, bi tɨ Ndɨla ɓurum sul la. 29Lɛ jo wo ne ɓurum Ndɨla Lal gɨna, Ndɨla hul ɓə ɗina ər tɨ ər ɓijim sul lo bad. Ɓijim ne ɓə ər par na kwi yɔd.» 30Jesu ja gɨ a kuna ne kəysul a ja ɓə: «Sidan si na ər.»
Jesu na na̰ la ər ɓungɨ la
Mat 12.46-50; Luk 8.19-21
31Jesu na na̰ la ər ɓungɨ la a hina a lor tɨ bayri a ton wo ka soon ər. 32Bi dɨbla ti yeri Jesu la a hina a ja gɨ ər ɓə: «Ləg! Əm na̰ la əm ɓungɨ tɨ ɓərgɨ la, əm ɓungɨ tɨ aa la, a taam əm wo bayri.» 33Jesu duga gɨ a: «Jajo tɨ ən na̰ la ən ɓungɨ tɨ ɓərgɨ la a?» 34Jesu ləg bi ne ti yeri ər, la ər ja ɓə: «Bi ton ti tɨ ən kwi le jo tɨ ən na̰ la ən ɓungɨ la. 35Wo ne ka wa̰y ne Ndɨla hul taam jo tɨ ən ɓun tɨ ɓər la, ən ɓun tɨ ii la, ən na̰ la.»
Currently Selected:
Mark 3: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
