Mark 4
4
Jaa lar tuna wa̰y tɨ ndulu sul
Mat 13.1-9; Luk 8.4-8
1Jesu ɗolɔ tɨ gɨ bi wa̰y edɨ cam tɨ ɗaglə ɗəng tɨ Galile mu. Bi dɨbla ti yeri ər nejo ər ɗɔl ər ti tɨ kwa̰r hul tɨ larɨm daan la bi gun ti ndog tɨ nəgri tɨ larɨm mu. 2Jesu ɓla gɨ a mum dɨbla na lar la ər ja gɨ a ɓə: 3«Yḭ laa, ɗa̰y paa wo tɨ waal wag si ndulu. 4Gorne ər ɗɨga nduri gɨna, nduri tapeer tɨba tɨ ul taal la, ɗḭ hina twi. 5Tapeer tɨbɨn tɨ kərgɨ sul, a ten nəgri dɨbla lo, a o̰ saan, kəysul nəgri ne a tɨba tɨ nin somni. 6Gorne lula sila gɨna, a peel la a oli la, kəysul a ndeem teni. 7Nduri tapeer tɨbɨn tɨ umi daan, a o̰ le umi kubgɨ a, a wag sul lo. 8Nduri tapeer tɨbɨn tɨ nəgri hɔl sul. A o̰ la a wag sul la, sul ɓudu wag ji dugmɨta la wag ji dugmika la, paa jak wag ji aru la.» 9La Jesu ja ɓə: «Wo ne na tori tɨ jaa laa ka ər laa!»
Kəyjaa Jesu ja jaa na jaa lar a
Mat 13.10-17; Luk 8.9-10
10Gorne Jesu ti ɓudu, na bi ne si tɨ ər lɔ la ər bi tɨ wa̰y edɨ dɔkɔmɛ kar sap na ər gɨna, a ɓiri ər jaa tuna jaa lar sul. 11Ər duga gɨ a: «Kəysul Ndɨla naa gɨ i ul mu tɨ mum kuru una tuna ər waan sul, lɛ gɨ bi tɨ bayri gɨna, a na ul mu tɨ jaa laa na lar, 12nejo
“A kay mum tali lɛ a ləg wa̰y lo, gorne a laa jaa,
a kay a tulɔ tɨ nin lo la.
Jo tɨ in gɨna, a ɓə duga tɨ Ndɨla ndɔ la Ndɨla hul ɓə ɗina tɨ a ɓijim sul.”»
Jaa lar lɔ jul
Mat 13.18-23; Luk 8.11-15
13La Jesu ja gɨ a: «Yḭ una jaa lar ne lo a? Ka waa yḭ ɓə jaa lar tapeer una a? 14Wo tɨ wa̰y ndulu ndu Ndɨla jaa. 15Bi tapeer ti kuna ul taal neta nduri tɨba tɨ nin. Gorne a laa jaa gɨna, tɨ daamu, Sidan hina jul jaa ne a ndu tɨ a ndɔ. 16Bi tapeer ne ti kuna nduri ne tɨba tɨ kərgɨ sul. Gorne a laa jaa, a ko ər na ndula laar, 17lɛ a nɨm ər wur ndeem tɨ a ndɔ lo, kəysul ka lula sul tɨ a ndɔ lo. Gorne pɛw ten a tuna Ndɨla jaa sul gɨna, a tɨbɨn tɨ daamu. 18Lɛ nduri tapeer ton tɨbɨn tɨ umi daan, a tɨ bi ton laa jaa, 19lɛ ngɨnɨm tɨ dunya̰ la, mum tina na ndula la, mum tɨ ndɨnga lɔ jak jak ne gubgɨ Ndɨla Jaa kway gɨ ər ji tuyla. 20Mu tɨ tong gɨna, nduri tapeer ton tɨbɨn tɨ nəgri hɔlum sul, a tɨ bi ton a laa Ndɨla Jaa la a ko la. Ɓudu toy ji dugmɨta la, paa toy dugmika la, ta paa jak toy aru la.»
Jaa lar tuna lampa sul
Luk 8.16-18
21Jesu ja gɨ a cam: «Pay wo kay lampa a, duga so kwari hul tɨ sul ɓee ər wur tɨ ko̰ygɨ lɔ cam a? 22Kəysul mum gun ne waal ndɔ ɓə ndɔ ɓla tɨ bayri, la jaa kuru gun ɓə wag tɨ un ndeeri la. 23Jo wo ne na tori tɨ jaa laa gɨna, ka ər laa jaa.» 24Jesu ja gɨ a cam: «I kay jicina ɓari tɨ i ndɔ sul na jaa ne i laa. Kəysul lway ne yḭ lɛm na wa̰y i naa gɨ bi jo Ndɨla ɓə gɨ i na lɛmni la ər ɓə gɨ i ɗula tɨ paa sul la. 25Kəysul wo ne na wa̰y tɨ ər daa, a ɓə gɨ ər paa naa tɨ sul lɛ wo ne na lo, a ɓə ne ɓa̰ ndḛ tɨ ər daa kula teni.»
Jaa lar tuna nduri ne wag sul
26Jesu ja cam: «Ndɨla na waan ti kuna ɓər ne ɗɨga nduri tɨ ər waal hul. 27Jo ər ley lom ɓee ər kway ər ji lom na tili la syɛl la kaw, nduri huga la tooni bla ne ər ɓə una. 28Nəgri may ka nɨ təg o̰ toni la, lɔ tɨ pla a, ər sul wag la, mu tɨ tong gɨna tɨ ər ji wag ndinimani tɨ kom hul la. 29Gorne nduri ɓla gɨna, Baali wur jakura tɨ lɔ kəysul pya̰ tɨ nduri ɓina lɛm.»
Jaa lar tuna tɨla ne a soon mutardə ji sul
Mat 13.31-35; Luk 13.18-19
30Jesu ja cam: «Ī ɓə Ndɨla waan ɓla na kəy a? Na kəy jaa lar jo yi ɓə na ər ɓla a? 31Ər ti kuna tɨla ne a soon ɓə mutardə ji. Gorne a ndu ər gɨna, yḭr tɨ nduri ne tɨ ɓḭ ura peer nduri gun tɨ nəgri sul. 32Lɛ gorne wo ndu ər gɨna, ər tuni la ər tɨ ɗəng ura peer ori tɨ ndog gun. Ər wag dəgɨ nii ne ta ɗḭ lɛm ləg kaaw tɨ sul.» 33Jesu edɨ gɨ bi mum dɨbla na jaa lar kuna ne nɨ jakaw dwari lɛm jaa ne ji una. 34Ər ja gɨ a jaa bla lar lo, lɛ gorne ər ti ɓudu na ər bi tɨ wa̰y edɨ gɨna, ər jul gɨ a lɔ gun.
Jesu ura saaw ɗəng
Mat 8.23-27; Luk 8.22-25
35Na ɗa̰y ɗay na jeel, Jesu ja gɨ ər bi tɨ wa̰y edɨ: «Ka i ɗen tɨ tapaa.» 36A nɨm bi dɨbla le a si na Jesu tɨ kwa̰r ɗəng hul. Kwa̰rgɨ nii tapeer si na a la. 37Saaw təw ɗəng tɨba tɨ larɨm ɓɔ hul la ndu diri təgɨm sir kwa̰r ɗəng. 38Jesu ley lom tɨ kwa̰r ɗəng lɔ ər ɗɛg sul na bid. Ər bi a uya̰ ər la a ka ngɔr ɓə: «Wo tɨ wa̰y ɓla, yini wo ulu, Pay usu əm lo a?» 39Jesu jar la ər ja jaa na gṵ sɨgra gɨ saaw la gɨ larɨm la ɓə: «Ka lɛm! Hun əm mu!» Saaw ɗigli la un ɗina ɗruu la. 40La Jesu ja gɨ ər bi tɨ wa̰y edɨ: «Kəyjaa jo ayri ɗəng ka i kuna paa ne a? Yḭ ko ən hul lo ɗang a?» 41Lɛ ayri ɗəng ka a. A ja gɨ peer ɓə: «Ne tɨ maan kəy wo jo saaw la larɨm la oy gɨ ər a?»
Currently Selected:
Mark 4: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
