Mark 5

Jesu nen wo ne jinsə par ər

Mat 8.28-34; Luk 8.26-39

1La a si tɨ ɗaglə ɗəng tapaa tɨ lɔr tɨ Gerasa. 2Jesu jir tɨ kwa̰r ɗəng hul. Tɨ daamu ɓər ne jinsə par ər wag tɨ ngəlɨm sul tung ər kwi. 3Ər ka lɔr tɨ ngəlɨm sul lɛ wo lɛm ər ɓəwlu na yingna suwal lo. 4Kəysul a ɓəw ər na kublang la yingna suwal la yɔd lɛ ər ha̰w yingna suwal la gəgrə la. Wo ne dwari lɛm ər par teni. 5Na ɗa̰y sul, na syɛl la na tili la ər yang tɨ ngəlɨm daan la nan sul la. Ər ka ngɔr la ər naa ər ndula hura na kura la. 6Ər ləg Jesu ɓag, ər yey ər hina tɨ ər ndɔ la ər ha̰w ər ɗa̰y tɨ ər kwi. 7Ər ka ngɔr na dwari ɓə: «Jesu, Ndɨla baw ɗəng ɓa̰, kəyjo əm taam tɨ ən ndɔ a? Ən ka gɨ əm kɔgri na Ndɨla na ndil, ka ən pɛw kar lo!» 8Jesu ja gɨ ər na gṵ sɨgra ɓə: «Lal ɓijim, əm wag tɨ ɓər ne ndɔ.» 9Jesu ɓiri ər: «Əm ndil ɓə kəy a?» Ər duga gɨ ər: «Ən ndil ɓə bi dɨbla, kəysul yini tɨ dɨbla tɨ ər ndɔ.» 10La ər ka gɨ Jesu kɔgri, ər ka a kun ɓag na lɔr nəgri ne sul lo.

11Tɨ un ɗay, ndɔg na nan ɗa̰y, kosong kur lor wo wa̰y tudi. 12Jinsə-a ka gɨ Jesu kɔgri ɓə: «Naa gɨ i gṵ ka i wur tɨ kosong hul i ti tɨ a ndɔ.» 13Jesu naa gɨ a gṵ la jinsə-a wag tɨ ɓər ndɔ a wur tɨ kosong kuur hul. Kosong ndog na dubu sap, a o̰ tɨ nan ɗa̰y a jir na yaal a bɛgɨ tɨ ndu wuu la, a kud tɨ ɗad-ɗad. 14Bi tɨ kosong ɓaw yerɨm a si na jaa ne tɨ lwərgɨ nii la, lwərgɨ ɓḭ la. Bi hina ləg wa̰y ne ka paa. 15A hina tɨ Jesu ndɔ la a ləg ɓər ne jinsə-a ti tɨ ər ndɔ. Ər ti tɨ lɔr. Ər wur ngɔmi la ər sul tɨ tugla la. Ayri ka bi. 16Bi ton ləg wa̰y ne ka paa a jul wa̰y ne wag tɨ ɓər ne sul la kosong-a sul la. 17Gɨna bi ɗolɔ tɨ Jesu ɓiri ka ər nɨm a lɔr nəgri sul. 18Gorne Jesu ɗɔl tɨ kwa̰r ɗəng hul gɨna, ɓər ne Jesu nen ər ɓiri ər ka ər si na ər. 19Lɛ Jesu naa gɨ ər ul mu lo, ər ja gɨ ər: «Əm duga tɨ əm gə̰y, tɨ əm nimni ndɔ la əm jul gɨ a wa̰ay gun ne Baali ka gɨ əm lɔ la, ka waa ta ər ləg əm jindemni la.» 20Ɓər si la ər ɗo jaa ne beel tɨ lwargɨ nii dɔkɔmɛ hul tuna mum gun ne Jesu ka gɨ ər. Ɓɔr bi ne laa jaa ne ji nari.

Jayrus na ɓa̰ ii la ii ne do Jesu na ngwami mu la

Mat 9.18-26; Luk 8.40-56

21Gorne Jesu ɗen na kwa̰r ɗəng tɨ tapaa, bi dɨbla taygɨ tɨ ər ndɔ. Ər ti tɨ larɨm mu. 22Ɓər ndil ɓə Jayrus, ər tɨ wa̰ay tɨ Juyb-a na li tɨ paa tina. Ər ləg Jesu gɨna, ər tɨba tɨ ər kwi, 23la ər ka gɨ ər kɔgri ɓə: «Ən ɓa̰ ii wo ulu, əm hina əm kay əm daa tɨ ər sul ka ər nen la ər ti jili la.» 24Jesu si na ər la bi dɨbla so ul tɨ ər lɔ, ta a dugun ər la.

25Tɨ bi daan ii ɓudu ne hima yey tɨ ər ndɔ an dɔkɔmɛ kar sap wo nin. 26Doktor dɨbla ka cida tɨ ər sul le kuma ne golgo gɨ ər in teni. Ər yuga ər mum tɨ tina gun lɛ wa̰y ne golgo gɨ ər in teni la. Ər ndula pɛw ər na kwi yɔd. 27Ii ne laa Jesu na jaa. Ər hina tɨ Jesu bəgri tɨ bi daan, ər do ər ngɔmi mu. 28Ər ilgɨ tɨ ər hul ɓə: «Jo ən do ər ngɔmi mu gɨna, ən ɓə nina tina.» 29Tɨ daamu, ər hima yerɨm tung la ər una ɓə mo̰y nɨm ər la. 30Tɨ daamu Jesu una ɓə dwari wag tɨ ər ndɔ. Ər duga tɨ bi daan la ər ɓiri: «Ja jo do ən ngɔmi mu a?» 31Ər bi ja gɨ ər: «Ɓəw! Əm ləg bi dɨbla dugun əm la, əm ɓiri ɓə jaa jo do ən cam a?» 32La Jesu taam bi daan tɨ ləg pay ja jo do ər ngɔmi mu a? 33Ayri ka ii ne la ər ndula kɔbgɨ la, kəysul ər una wa̰y ne wag tɨ ər sul. Ər ha̰w ər ɗa̰y tɨ Jesu kwi la ər ja gɨ ər kuri gun. 34Lɛ Jesu ja gɨ ər: «Ən ɓa̰ ii, əm hul kula nen əm, əm si na lapya, ka əm mo̰y nɨm əm!»

35Gorne Jesu wo ja jaa ɗang gɨna, bi o̰ tɨ wa̰ay tɨ Juyb-a na li tɨ paa tina maan a ja gɨ ər ɓə: «Əm ɓa̰ ii uy teni, kəy jaa əm ɓə wo tɨ wa̰y ɓla ji ɓɔr a?» 36Lɛ Jesu kay tulɔ tɨ a jaa lɔ lo, ər ja gɨ Jayrus: «Ka ayri kar lo, əm ko əm hul ngoy.» 37Ər nɨm wo in si na ər lo, lɛ Piyɛr la, Jak la, ər ɓun tɨ Ja̰ la jo a si na ər. 38A hina tɨ Jayrus gə̰y gɨna Jesu ləg bi gun sul tɨ tugla lo. A cḛy la a ka ngɔr dɨbla la. 39Ər wur tɨ li hul la ər ja gɨ a: «Kəyjaa i sul yeri la yḭ cḛy in la a? I ɓa̰ uy lo, lɛ ər ley lom.» 40Lɛ a ka ər siri. Gɨna, Jesu kun bi gun tɨ bayri lɛ ər nɨm ɓa̰ ba la ɓa̰ na̰ la, ta ər bi tɨ tedi gə̰y na ər la. Ər wur tɨ ɓa̰ na li hul. 41Ər so ɓa̰ daa la ər ja gɨ ər: «Talita kum!» Ne ji ɓə: «Ɓa̰ ii o̰ ndal, ən naa əm gṵ.» 42Tɨ daamu, ɓa̰ ii o̰ tɨ ndal la ər si la. Ər na an dɔkɔmɛ kar sap. Bi ne ti na ər ɓɔr a ji nari. 43Jesu peer-a, a ka ja ne ma̰ni kar gɨ wo lo la, ər ja gɨ a ka a naa gɨ ɓa̰ ii wa̰y tudi.

Currently Selected:

Mark 5: nie

Highlight

Copy