Mark 6
6
Bi tɨ Najarɛt ɓini Jesu
Mat 13.53-58; Luk 4.16-30
1Jesu o̰ tɨ un ne ər si tɨ ər lɔr hul. Ər bi tɨ a̰y edɨ kaw si na ər la. 2Na ɗa̰y tɨ saaw bɛ, Jesu ɓla gɨ bi wa̰y tɨ Juyb-a na li tɨ paa tina hul. Ər wa̰y tɨ ɓla ɓɔr bi dɨbla ji nari. A ja ɓə: «Ər ten wa̰y ne gun tɨ ɓay a? Ja jo naa gɨ ər jicina ne a? Jajo naa ər dwari tɨ mum ton ɓɔrji kar a? 3Ər na̰ ndil ɓə Mari lo a? Ər tɨ Jak la, Josɛ la, Jud la Simo̰ la ɓun lo a? Ər ɓungɨ tɨ aa gun wo tɨ daan lo a?» Tɨ a hul dugun jo kway gɨ a ul mu tɨ ər hul kula. 4Lɛ Jesu ja gɨ a: «Toni ca kaw wo ka nebi hormo̰ tɨ ər lɔr hul lo la, tɨ ər lɔr nəgri sul lo la, tɨ ər gə̰y lo la.» 5Jesu lɛm wa̰y ne ɓɔrji kar tɨ lɔr ne hul lo, lɛ ər kay ər daa tɨ mo̰y tapeer jo sul ər nen a. 6A hul sɨgra ɓɔr Jesu ji.
Jesu ton ər bi dɔkɔmɛ kar sap
Mat 9.35; Mat 10.5-15; Luk 9.1-6
La Jesu si na lwərgɨ gun tɨ Najarɛt tɨ gɨ bi wa̰y ɓla.
7Gorne ər soon ər bi tɨ wa̰y edɨ dɔkɔmɛ kar sap gɨna, ər ton a tɨ ndidi ndidi la, ər naa a dwari tɨ lal ɓijim sul, 8Ər peer a ɓə: «Yḭ ka wa̰y in sula tɨ i daa tɨ i ul tɨ ɓoy sul lo, dɨbla nari a, i so ngurum jo ngoy. Yḭ ka tudi sula lo la, bɔg sula lo la, gursu sula tɨ karab hul lo la. 9Yḭ wur kungu, lɛ yḭ ka saal na ngɔmi tɨ ndidi lo.»
10Ər ja gɨ a cam: «Gorne yḭ wur tɨ wo gə̰y, lɛ a par i ɓoy tɨ nin gɨna, yḭ ti tɨ ɗay marway yḭ ɓə na o̰. 11Jo gorne yḭ si tɨ un lɛ a par i ɓoy lo la, a laa i jaa lo la gɨna, yḭ ɗɨb i kungu bur tɨ gɨ a wa̰y ɓijim ne a ka ɓla.» 12A si a ɗo beel gɨ bi gun, ka a nɨm a wa̰y ɓijim tɨ kar. 13A kun lal ɓijim dɨbla la a hab nɨm tɨ bi tɨ mo̰y dɨbla ndɔ a nen na a.
Ja̰ Batis na ulu
Mat 14.1-12; Luk 9.7-9
14Wa̰ay Erod laa Jesu na jaa, kəysul ər ndil cḛy nari. Bi tapeer ja ɓə: «Tɨ Ja̰ Batis jo wag tɨ bi tɨ ulu daan, nejo ər na dwari tɨ mum ne ɓɔrji kar.» 15Bi tapeer ja ɓə: «Tɨ nebi Eli.» La peer jak ja cam ɓə: «Ər tɨ nebi kuna ər peer nebi no̰.» 16Gorne Erod laa jaa ne gɨna, ər ja ɓə: «Tɨ Ja̰ Batis ne ən naa ən gṵ nɨ a tḭ ər sul, tɨ yḭr jo ər wag tɨ ulu bi tɨ ulu daan.» 17Erod ja in kəysul ər so ər gṵ ər par Ja̰ Batis ər ɓəw ər na yingna swal a ɗo ər tɨ dangay Erodyad ne tɨ ər ɓun tɨ Pilip na ii ne ər ko jaa. 18Kəysul Ja̰ ja gɨ Erod: «Yim na ul mu tɨ əm ɓun na ii kula lo.» 19Tɨ nejo Erodyad koor Ja̰ Batis la, ər taam ul mu tɨ ər humna lɛ ər ten lo. 20Kəysul Erod oy gɨ Ja̰, ər una ɓə ər tɨ wo tugla la wo hul bor la. Ər ɓaw ər nari. Gorne ər laa ər jaa gɨna, ər ilgɨ si ɓag lɛ, ne kaw ər taam ər jaa yɔd. 21Lula sul ndinimani ne Erodyad taam toni an. Ɗa̰y ne tɨ ɗa̰y tɨ ndula laar tɨ Erod na twila. Ər hom bi nii tɨ ər waan hul la, əli woom la, bi nii tɨ lɔr hul tɨ Galile la. 22Erodyad na ɓa̰ ii wur tɨ li hul tɨ bi daan la ər ɓowon. Ər ɓowon laar gɨ Erod la ər bi tɨ hom la. Gɨna Erod ja gɨ ɓa̰ ii ɓə: «Ɓiri ən wa̰y ne əm taam la ən ɓə əm naa.» 23Ər maar gɨ ər mu: «Mum gun ne əm ɓiri ən, ən ɓə əm na, jo tɨ ən lɔr taal kaaw ən ɓə gɨ əm naa.» 24Ɓa̰ ii wag si ja gɨ ər na̰: «Kəyjo ən ɓə ər ɓiri a?» Ər na̰ duga gɨ ər: «Ja̰ Batis na sul.» 25Tɨ daamu, ɓa̰ ii duga saan si tɨ wa̰ay ndɔ ja gɨ ər wa̰y ne ər taam. Ər ja gɨ ər ɓə: «Əm naa gɨ ən Ja̰ Batis sul tɨ mbla hul ndogle!» 26Wa̰ay ndula laar ər lo, lɛ ər lɛm na ər gṵ duga lo, kəysul ər maar ər mu tɨ bi tɨ hom kwi. 27Wa̰ay toon ər eli sandaw ka a si a hina na Ja̰ Batis sul. Eli si tḭ Ja̰ sul tɨ dangay hul. 28Ər hina na ər sul tɨ mbla hul. Ər naa gɨ ɓa̰ ii la, ɓa̰ ii ko naa gɨ ər na̰ la. 29Gorne Ja̰ Batis na bi laa jaa ne gɨna, a hina a so ər ulu a si a bili tɨ ngalɨm hul.
Jesu naa gɨ bi dubu mi tudi
Mat 14.13-21; Luk 9.10-17; Ja̰ 6.1-14
30Bi tɨ tomni duga hina tɨ Jesu ndɔ, a jul gɨ ər wa̰y ne a ka lɔ la, wa̰y ne a ɓla gɨ bi la lɔ. 31Ər ja gɨ a ɓə: «Yḭ hina ka i si tɨ tab hul, nɨ i bɛ saaw ɓa̰ndḛni.» Kəysul bi dɨbla si la duga la, nɨ Jesu na bi tɨ wa̰y edɨ ten ul mu tɨ wa̰y tudi lo. 32A ɗɔl tɨ kwa̰r ɗəng hul, a si tɨ tab hul. 33Lɛ bi dɨbla ləg a na saal la a una a la. Gɨna bi yey na ɗa̰y na lorgɨ gun tong a kwi toni tɨ un ne a wo saal tɨ nin. 34Gorne Jesu jir tɨ kwa̰r ɗəng hul, ər ləg bi dɨbla ne jindemni, kəysul a ti kuna həm kuur ne wo tɨ a ɓaw teni, la ər edɨ gɨ a mum dɨbla. 35Gorne lula wo tɨba gɨna, ər bi tɨ wa̰y edɨ hina tɨ ər ndɔ la a ja gɨ ər ɓə: «Un ne tɨ taa hul la lula wo tɨba teni la, 36əm kun bi ka a si tɨ lwərgɨ nii la lwərgɨ ɓḭ tɨ un bəgri ka a si a huna wa̰y tudi.» 37Lɛ Jesu duga gɨ a: «Yḭ may naa gɨ a wa̰y tudi!» A ɓiri ər: «Əm taam ɓə ka yini si i huna wa̰y tudi na sele aru sap i naa gɨ a?» 38Jesu duga gɨ a: «I si i ləg pay i na mapa tɨ waa a?» A si a ɓiri la a duga a hina a ja gɨ ər: «Yini na mapa tɨ luni la kaa tɨ ndidi la.» 39Tɨ in jo, Jesu naa gɨ a gṵ ka a kay bi tɨ nəgri na kuur tɨ ya̰n wori sul. 40Bi ti kuur aru la dugmi. 41Jesu so mapa tɨ luni la, kaa tɨ ndidi la, ər uma ər ji tɨ ndal ər ka gɨ Ndɨla barka. Gɨna ər ha̰w mapa, ər na gɨ ər bi tɨ wa̰y edɨ nɨ a ɓaan gɨ bi. La ər ɓaan kaa tɨ ndidi gɨ bi gun la. 42A ji gun a twi la a kər la. 43Ər bi tɨ wa̰y edɨ to mapa la kaa burmi la sir krang dɔkɔmɛ kar sap. 44Bi ne twi wa̰y lɛm bi ɓərgɨ dubu mi.
Jesu si tɨ ndu sul
Mat 14.22-33; Ja̰ 6.15-21
45Lɔ tɨ plaa tɨ daamu, Jesu lor na ər bi tɨ wa̰y edɨ nɨ a ɗɔl tɨ kwa̰r hul, ka a ɗen tɨ tapaa tɨ ər kwi toni tɨ Betsayda, gorne yḭr mar ɓə bi kun bari. 46Gorne ər kun a gun gɨna ər si tɨ nan sul tɨ Ndɨla soon. 47Gorne lula tɨba gɨna, ər bi si na kwa̰r ɗəng ɓag tɨ larɨm daan lɛ, Jesu gə̰y na sul tɨ larɨm mu. 48Gɨna ər ləg pɛw ne ər bi tɨ wa̰y edɨ ten tɨ kwa̰r ɗəng nira kəysul saaw duga tɨ a sul. Na un lɔ, ər si tɨ ndu sul, ər kay ər ji tɨ a ndɔ la ər taam a ɗira. 49Lɛ gorne a ləg ər si tɨ ndu sul gɨna, a ilgɨ ɓə tɨ wo tibri la a ka ngɔr. 50Kəysul a ləg ər gun la ayri ka a. Tɨ daamu, ər ja gɨ a jaa: «Par i hul ka sɨgra, tɨ yin, yḭ ka ayri kar lo.» 51Ər ɗɔl tɨ a ndɔ tɨ kwa̰r hul, la saaw tung la. Wa̰y ne ɓɔr ər bi tɨ wa̰y edɨ ji nari. 52A una wa̰y ne Jesu ka gorne ər naa gɨ bi mapa ji lo, Kəysul a nirimu sɨgra.
Jesu nen bi tɨ mo̰y tɨ Jenesarɛt
53Gorne a ɗen larɨm gɨna, a an tɨ lɔr nəgri sul tɨ Jenesarɛt la a kay a kwa̰r ɗəng. 54Gorne a jir tɨ kwa̰r ɗəng hul gɨna, bi una Jesu. 55Bi yerɨm na lwərgɨ gun a hina na bi tɨ mo̰y tɨ njal hul tɨ un ne a laa ɓə ər wo nin. 56Un gun ne ər wag tɨ nin, tɨ lwərgɨ nii la lwərgɨ ɓḭ la, a hina a kay a bi tɨ mo̰y tɨ un tɨ peer tina la a ka gɨ ər kɔgri ka ər naa gɨ a ul mu tɨ ər sər mu dula. Bi gun ne do ər sər ten nina.
Currently Selected:
Mark 6: nie
Highlight
Share
Copy
Want to have your highlights saved across all your devices? Sign up or sign in
© 2023, ATALTRAB
