DYUNG 4
4
Mangso Moshe lhyi Yomsoq Dyei
1Hauh thang lhyi Moshe toeuh zis gas, Yhensain ka nvng lyis ma nyvng xoeuq, ge nyamoq ngos lyis ma loms mvbeh, ngah dang eq ma tsain gyo mvbeh, ge.
2 Yhensain nyang lyis taiq zis gas, Hau nah loq mas zis cha nghuot, ge lyis
nyang gas, Lhamloq nghuot, ge.
3 Yhensain ka, Nyeisjvng mas doeuh toh aq, ge. Nyang eq hauh zis doeuh toh las houka lhangnyis bweh joq, Moshe eq hou mhayah phang. 4Yhensain Moshe lhyi taiq zis gas, Nah loq yhonh las nyah lhyank loh zwi aq, ge lyis nyang eq loq yhonh las hauh yvlyis e zwi lyis houka nyah lhamloq doms bweh los. 5Housoeh kuot lyis nyamoq phauh thyeih moq dah Mangso, Abraham dah Mangso, Isak dah Mangso, Yakop dah Mangso ge Yhensain nah jyank mas nyvng xoeuq zis gas, nyamoq jingh das, ge.
6 Yhensain nyang lyis taiq shih zis gas, Nah loq nah dyilhunk mas jauh kat aq, ge. Nyang eq jauh kat las she thuq yoeus lyis yoeuh aq, nyah loq gas gyu teh thyoeu lha mvnggvng gvng joq. 7Mangso ka, Nah loq nah dyilhunk mas doms jauh kat aq, ge zis yah dvyhangteh doms jauh kat las she thuq yoeuh lyis, houka nyah shoh vgus doms nghuot goeus. 8Nyamoq nvng lyis ma jingh, cangxeih dah vlho lhyi ma gyo dyei lyis eq thang lhyi dah vlho mha jingh das mvbeh. 9Hauh vlho aiq koeuq mas eq ma jingh, nah dang eq ma gyo dyei goeus ya jeislvng mas dah jeis gaiq las tungyos mas huot aq, Nile lvng mas dah jeis gas tungyos mas suih bweh das, ge.
10Moshe Yhensain lhyi taiq zis gas, Ngah Yhensain eh, Ngos dang taiq ma lyes, xikpheh yah ma lyes, nvng nah jyeidwis lyis taiq uhlyis yah ma lyes lo, Ngos nhuot phyiq, lhyo phyiq, ge.
11 Yhensain ka nyang lyis, Dius lyis nhuot hank tap dyei? Nhuot hank jet nhang? No hank jet nhang? Nyoq hank nyvng nhang? Nyoq hank jet nhang? Hauh zis ngos Yhensain kuot toh ma nghuot lhyeh? 12Housoeh las nvng gvshih loh aq, ngos nvng dang taiq yvmas pangh das las, nvng taiq das zis ngos jyauh das, ge.
13Moshe ka, Yhensain eh, nvng nhang mes soeu lhyi nhang aq.
14Hauh uhlyis Yhensain ka Moshe lhyi nhaiqyo las taiq zis gas, Lewi dius Aron gas nah vmang nghuot ma nghuot lhyeh? Nyang vlhomuh daq taiq zis ngos seq, nyang eq nvng lyis zes das ge thuq los nyeis. Nyang nvng yah xauhgoh lyis nyah ehnyet mas gaus das, ge. 15Nvng, nyang yah jisgoh las haih dang nyah nhuot mas thot kat dyei das. Housoeh ngos nah aiq yuk gonh lyis pangh las cha taiq das zis jyauh das. 16Nyang gas dius jens xikkhonh mas nah xiklyis taiq dyei das, nah nhuot gungsthaiq duot das, nvng eq nyah xiklyis Mangso teh duot das. 17Housoeh nvng kuot das mauhphoh vlho nyhenshang hauh lhamloq eq nah loq mas chi toh aq, ge kat.
Moshe Egutu pheh Tauh loh
18Hauh thang lhyi Moshe ka nyah yukphoq Yethro jyank mas loh las, Egutu mas tsain nyeis nyah vmang vnoeuh moq vdwis nyeis lo lah loh yoeuh das, ngos lyis nhang kat aq, ge taiq. Yethro eq Moshe lhyi, Nyenstap zis yah loh geh, ge nhang kat.
19Tsai, Yhensain ka Midian mas Moshe lhyi, Egutu mas tauh loh aq, nah kang lhyi xo bang shei goeus, ge. 20Housoeh las Moshe ka nyah yhensain nyhiq yahge lotang lhyi mauhlyihzoe shwih ji las Egutu mas tauh loh. Mangso dah lhamloq eq Moshe nyah loq mas chi toh.
21 Yhensain Moshe lhyi taiq zis gas, Nvng Egutu mas jweh loh lyis ngos nvng lyis dyei toh yomsoq muh dvnganh Pharao xikkhonh mas kuot xoeuq chah zis soh aq: housoeh chixoeuq laus eq ngos nyah ehnyet lhoq than dyei das las, hauh dius jens lyis ma loh nhang das. 22Nvng Pharao lyis eq, Yhensain heisoeh ge nyeis, Israel gas nyah xiklyis loxeih nghuot. 23Ngah lo ngos lyis yoh paiq bas jungh nhang kat aq, Ma nhang kat ge nvng ngoek yvmvyah yoeuh aq, ngos nah yukgis loxeih lyis sat das oen taiq aq, ge.#Dyu 12.29
24Cholvt thoenggus dvkoeuq mas Yhensain ka Moshe yah xauhgoh las, nyang lyis sat das ge xo. 25Nghuot laus eq nyah yhensain nyhiq Zipora gas luk sham yah nyah lo dah vthyoh thyet las hauh zis yah Moshe dah khyei mas tanh dyei las, Nvng gas ngah xiklyis suih dah loloeu saiq nghuot, ge. 26Housoeh Yhensain ka Moshe lhyi kat kat. Nyah yhensain nyhiq eq, vthyoh tyomh cho gvng mas, Nvng gas ngah xiklyis suih dap dah loloeu saiq nghuot, ge zis nghuot.
27 Yhensain Aron lyis taiq zis gas, Mhanhdyvp mas Moshe lhyi loh zes langh aq, ge. Housoeh las nyang loh lyis Mangso dah boms mas Moshe yah xauhgoh las nyang lyis bvlot tanh. 28Moshe ka Aron lyis, Yhensain yah nyang lyis taiq nhang kat dang yahge nyang lyis taiq toh vlho dvnganh yah taiq kyoh. 29Moshe yahge Aron gas, Israel jens dah logis jens dvnganhmoq lyis khi tsainh las, 30Yhensain Moshe lhyi taiq kat dang dvnganh yah Aron lyis taiq kyoh. Moshe ka dius jens xikkhonh mas hauh vlho chixoeuq. 31Dius jens eq lomsjingh. Yhensain ka Israel jens lyis lyih komh las, nyamoq dah shanghsenh lyis nyvng goeus ge yvlyis nyamoq xauhgyo lyis nyamoq gop las paiq.
Currently Selected:
DYUNG 4: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
