VPOM 17
17
Thanghchvp Vlho
1Abram gauci gau zvn bos lyis Yhensain ka nyah jyank mas thuq xoeuq las, Ngos gas Yomzains Mangso nghuot; ngah xikkhonh mas yobos huon dais ma bos shoq nyeis yap aq. 2Housoeh lyis ngos nvng yah ngah thanghchvp toh das las, nvng lyis nyoshoq jebais los nhang das, ge. 3Abram gas nyah xikkhonh mas gop joq lyis Mangso nyang lyis doms taiq zis gas, 4Yoeuh aq, ngos ngah thanghchvp nvng yah toh, Nvng gas dius nyau nyoshoq dah uwus duot das, ge. 5Nah nyings eq Abram ma nghuot lo. Ngos nvng lyis dius nyau nyoshoq dah phauh thyeih kuot nhang goeus yvmvyah, Abraham#17.5 Abraham ge zis Hebre mas, Dius nyau nyoshoq dah phauh thyeih, ge. oen lui das.#Rom 4.17 6Ngos nvng lyis svsoh jebais los nhang das; nvng masyah dius nyau vja ja bweh nhang das; nah vnyau masyah hwankti jens thuq los nhang das.
7Ngos gas nah Mangso eq, thang pheh nah vnyau vshih dah Mangso eq nghuot das, oen nvng yahge nah vnyau vshih mas dvcaiq thang lhyi dvcaiq ngah thanghchvp lyis vcaiq vto thanghchvp kuot das. 8Nvng gvshih boengh duot nyeis dah haih Khanan mau gonh gas nvng lyis eq, nah vnyau vshih lyis eq, vjangh sain das xiklyis ngos nvng lyis dyei das. Ngos nyamoq dah Mangso duot das.#Lgy 7.5
9Mangso Abraham lyis taiq shih zis gas, Nvng yahge nah vnyau vshih gas ngah thanghchvp lyis vjangh chank chah. 10Nvng yahge nah vnyau vshih chank chah dah ngah thanghchvp gas haih zis nghuot: Namoq mas yukgis lo khanghmuh vthyoh tyomh chah.#Lgy 7.8; Rom 4.11 11Namoq gas namoq gungs shohyeis vthyoh tyomh chah. Houka ngos yahge namoq jo mas toh dah thanghchvp vlho nghuot joq das. 12Namoq dah vnyau mas vcaiq caiq, yukgis lo khanghmuh eq, yhen mha khoeu dah jyeidwis lo, nghuot ya nah vnyau vshih ma nghuot, ngwis yah wis dah jyeidwis lo jens gas khoeu thang lhyi xet nyeih lyis vthyoh tyomh chah. 13Namoq yhen mha khoeu dah jyeidwis jens eq, ngwis yah wis dah jyeidwis jens eq vthyoh tyomh chah. Housoeh ngah thanghchvp gas namoq dah gungs suih mas vcaiq vto thanghchvp duot joq das. 14Vthyoh ma tyomh, nyah gungs shohyeis vthyoh ma tyomh dah yukgis lo gas nyah vnyau masyah thyet tyamp zis xauh chah. Hauh soeu ka ngah thanghchvp thyoq soeu nghuot, ge.
15Tsai, Mangso Abraham lyis taiq zis gas, Nah yhensain nyhiq lyis Sarai oen ma lui lo, Sara#17.15 Sara ge zis Hebre mas, Zau lonyi ge vjyuk bos. oen das. 16Ngos, nyang lyis shvmanh dyei las nyang masyah ngos nvng lyis yukgis lo dvyuk dyei das: nghuot goeus, ngos nyang lyis shvmanh dyei las dius nyau vja ja dah ungwes duot das; nyang masyah eq dius nyau jens dah hwankti tsain thuq los das, ge.
17Hauh uhlyis Abraham gas paiq gop uhjyangh, Dvxo zvn bos goeus soeu ka lo yoh shih das lah? Gauci zvn bos goeus dah Sara eq lo khoeu shih das lah, ge nyah nhaiqlom mas yis zo nyeis. 18Abraham gas Mangso lhyi, Nah xikkhonh mas Ishmael dwis nyeis las shvmanh yoh bas jungh, ge.
19Mangso ka, Ma nghuot, nah yhensain nyhiq Sara nyang nvng lyis yukgis lo khoeu dyei das; nvng hauh soeu lhyi Isak#17.19 Isak ge zis Hebre mas, Nyang Yis, ge dah vjyuk nghuot. oen nyhink chah: nyah vnyau vshih mas ngah thanghchvp lyis vcaiq vto dang thanghchvp duot das xiklyis ngos nyang yah dang thanghchvp toh das. 20Ishmael xiklyis eq ngos nvng dung dang gyo dyei: yoeuh aq, ngos nyang lyis shvmanh dyei zis yah je nhang lha nyoshoq nyo los nhang das; nyang gas zau dvci aiq dah uwus duot das, ngos nyang lyis dius zains nyau eq kuot das. 21Nghuot laus eq sangnhaiq heinyos lyis Sara nah xiklyis khoeu das yukgis lo Isak mas ngah dang thanghchvp goeng toenk nhang das, ge. 22Mangso ka Abraham yah dye jisgoh thang lhyi loh lo.
23Abraham gas Mangso nyang lyis taiq toh zis yah dvyhangteh nyah lo Ishmael, nyah yhen mha khoeu bang dvnganh, nyah ngwis yah wis toh bang ge, nyah yhen yah sen bang yukgis lo jens dvnganh lyis shwih tsainh las hauh nyeihyo, dvnyeih dvm lyis vthyoh tsain tyomh. 24Abraham gas nyang vthyoh tyomh uhlyis gauci gau zvn nghuot. 25Nyah lo Ishmael gas vthyoh tyomh uhlyis dvci somh zvn nghuot. 26Abraham phvtang Ishmael eq hauh nyeihyo dvnyeih dvm lyis vthyoh tsain tyomh. 27Nyah yhen mha khoeu bang yahge gohnyau bang masyah wis yoeus bang ge, nyah yhen yah sen dah yukgis lo jens dvnganh eq nyang yah dvgeh vthyoh tsain tyomh.
Currently Selected:
VPOM 17: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.
