متّی 12
12
یِسُوع سبت دا مالک
(رَلدا مِلدا حوالہ: مرقس 2:23-28؛ لُوقا 6:1-5)
1کُجھ ݙینہہ دے بعد یِسُوع اَتے اُوندے شاگِرد سبت دے ݙینہہ کݨک دی رَڑھ اِچوں لنگھدے پئے ہَن اَتے اُوندے شاگِردئیں کُوں بُکھ لڳی تاں او کݨک دے سِٹّے بھَن کرائیں کھاوَݨ لڳے۔ 2پَر فرِیسیئیں ایہ ݙیکھ کرائیں یِسُوع کُوں آکھیا، ”ݙیکھ تیݙے شاگِرد ایہ کَم کیوں کریندِن جیرھا شرعی طور تے سبت دے ݙینہہ نَئیِں کرَݨا چاہیدا۔“ 3یِسُوع اُنہیں کُوں جواب ݙِتا، ”کیا تُساں کلام اِچ نَئیِں پڑھیا جو داؤد نبی کیا کیتا ہا جݙّاں اُونکُوں اَتے اُوندے سنگتئیں کُوں بُکھ لڳی، 4او خُدا دے گھر اِچ ڳیا اَتے نذر کیتیاں ڳئیاں روٹیاں اپݨے سنگتئیں دے کٹھے کھادیاں جنہیں کُوں شرعی طور تے صرف مذہبی پیشوا کھا سڳدے ہَن۔ 5تُساں ڄاݨدو جو مذہبی پیشوا سبت دے ݙینہہ ہَیکل اِچ کَم کریندِن۔ کیا او سبت دی بےحُرمتی نَئیِں کریندے؟ پَر تورات تاں اُنہیں کُوں قصُوروار نَئیِں اَہدی۔ 6پَر مَیں تُہاکُوں ݙسینداں جو اِتھاں تاں ہَیکل کنُوں وی ٻَہُوں عظیم کھڑے تھِیا۔ 7پاک کلام اِچ لِکھیا لاتھے،
’مَیں جانوریں دی قُربانی نَئیِں بلکہ رَحم پسند کرینداں۔‘
کیا تُساں اُوندا مطلب نَئیِں ڄاݨدے؟ جے تُساں ایہ ڄاݨدے تاں بےقصُوریں کُوں قصُوروار نہ اَہدے، 8کیوں جو اِبنِآدم یعنی مَیں سبت دا مالک ہاں۔“
یِسُوع ہِک سُکّے ہَتھ آلے بندے کُوں شِفا ݙیندِن
(رَلدا مِلدا حوالہ: مرقس 3:1-6؛ لُوقا 6:6-11)
9اَتے یِسُوع اُتھوں کنُوں وَنڄ کرائیں اُنہیں دی عبادت گاہ اِچ ڳیا۔ 10اَتے اُتھاں ہِک بندہ ہا جَیندا ہَتھ سُکا پِیا ہا۔ اَتے فرِیسیئیں یِسُوع اُتے اِلزام لاوَݨ کیتے اُوں کنُوں پُچھیا، ”کیا ساݙی شرع اِچ سبت دے ݙینہہ شِفا ݙیوَݨ جائز ہے؟“ 11یِسُوع اُنہیں کُوں جواب ݙیندئیں ہوئیں پُچھیا، ”تُہاݙے اِچ اینجھا کیرھا ہے جَیندی ہِکو ہِک بِھیݙ ہووے اَتے او بِھیݙ سبت دے ݙینہہ کَھݙے اِچ ڈھہہ پووے تاں او اُونکُوں پکڑ کرائیں ٻاہر نہ کڈھے؟ 12پَر اِنسان دی قدر تاں بِھیݙ کنُوں ٻَہُوں ڈھیر ہے۔ اِیں کیتے ساݙی شرع سبت دے ݙینہہ نیکی کرَݨ دی اِجازت ݙیندی ہے۔“ 13اِیندے بعد یِسُوع اُوں بندے کُوں جَیندا ہَتھ سُکا پِیا ہا آکھیا، ”اپݨا ہَتھ اَڳوں کر“ اُوں اپݨا ہَتھ اَڳوں کیتا تاں اُوندا ہَتھ ݙُوجھے ہَتھ وانگوں ٹھیک تھی ڳیا۔ 14وَل فرِیسی اُتھوں ٻاہر لڳے ڳئے اَتے اُونکُوں جان کنُوں مارݨ دی صلاح کرَݨ لڳ پئے۔
خُدا دا چُݨیا ہویا خادم
15پَر یِسُوع اپݨے خلاف اُنہیں دے منصوبے کُوں ڄاݨ کرائیں اُتھوں چلیا ڳیا اَتے ٻَہُوں وَݙّی بھِیڑ اُوندے پِچھُوں ٹُر پئی اَتے اُوں اُنہیں دے سارے مریضیں کُوں شِفا ݙِتی 16اَتے یِسُوع اُنہیں کُوں چِتا ݙِتا جو کہیں کُوں وی میݙے بارے اِچ نہ ݙسائے۔ 17اِیویں یسعیاہ نبی دی او پیشینگوئی پوری تھئی،
18”ݙیکھو میݙا خادم جَینکُوں مَیں چُݨ گھِدے، او مَیکُوں پیارا ہے اُوں کنُوں میݙا ہاں ٹھردے، اَتے مَیں اپݨا رُوح اُوندے اُتے نازل کریساں۔ اَتے او غیر قومیں اِچ میݙے اِنصاف دی ڳالھ کریسی۔
19او نہ جھیڑا کریسی اَتے نہ شور اَتے نہ گلیئیں بازاریں اِچ کُوئی اُوندی اَواز سُݨسی۔
20او نِوے ہوئے کانے کُوں کَینا تروڑیسی اَتے نہ ای وِسمدے ݙِیوے کُوں وِسمیسی، جے تَئیِں او اِنصاف کُوں فتح نہ ݙیواوے۔
21اَتے غیر قومیں کُوں اُوندے ناں دی آس ہوسی۔“
یِسُوع دا اُتم اِختیار
(رَلدا مِلدا حوالہ: مرقس 3:20-30؛ لُوقا 11:14-23)
22اِیندے بعد لوک ہِک بندے کُوں یِسُوع کولھ گھِن آئے جیرھا اَندھا اَتے گُنگا ہا کیوں جو اُوندے اِچ بَدرُوح ہَئی، یِسُوع اُونکُوں شِفا ݙِتی تاں او الواوَݨ اَتے ݙیکھݨ لڳ پِیا۔ 23اَتے بھِیڑ ٻَہُوں حیران تھئی اَتے ہِک ٻئے کنُوں پُچھݨ لڳی، ”کیا ایہ او تاں نَئیِں جَیں داؤد دی لَڑی اِچوں آوَݨا ہا؟“
24پَر جݙّاں فرِیسیئیں اِیں مُعجِزے بارے سُݨیا تاں آکھݨ لڳے، ”یِسُوع تاں بَدرُوحیں دے سردار بَعلزبُول#12:24 بَعلزبُول اُوں زمانے اِچ بَعلزبُول کُوں بَدرُوحاں دا سردار سمجھیا ویندا ہَئی۔ متّی 34:9 اِچ اِی فرِیسیئیں یِسُوع تے اِیہو اِلزام لایا ہا۔ دی مدد نال بَدرُوحیں کُوں لوکیں اِچوں کڈھیندے۔“
25اُنہیں دے دِلیں دے خیال ڄاݨ کرائیں یِسُوع اُنہیں کُوں آکھیا، ”جیرھی بادشاہی، شہر یا جُھڳے اِچ پُھٹ پئے وَنڄے او اُڄڑ ویسی اَتے او جُھڳا بَر تھی ویسی۔ 26جے شیطان ای شیطان کُوں کڈھے تاں او آپ ای اپݨا مُخالف تھی ویسی۔ وَل اُوندی بادشاہی کیویں قائم رَہ سڳدی ہے؟ 27اَتے جے مَیں بَدرُوحیں کُوں بَعلزبُول دی مدد نال کڈھینداں تاں تُہاݙے پُتر اُنہیں کُوں کَیندی مدد نال کڈھیندِن؟ اَتے اُوہے آپ تُہاݙے مُنصف ہوسِن۔ 28مَیں خُدا دے رُوح دی مدد نال بَدرُوحیں کُوں کڈھینداں ہاں، اِتھوں ظاہر تھِیندے جو خُدا دی بادشاہی تُہاݙے اِچ آ ڳئی ہے۔
29کُوئی بندہ خُود کنُوں کہیں ݙاہڈھے دے گھر اِچ وَنڄ کرائیں اُوندا مال کیویں لُٹ سڳدے؟ جے تَئیِں پہلے اُوں ݙاہڈھے کُوں ٻَدھ نہ گھِنے اَتے اِیندے بعد ای اُونکُوں لُٹ سڳدے۔ 30جیرھا میݙے نال نَئیِں او میݙے خلاف ہے اَتے جیرھا میݙے نال رَل کرائیں لوکیں کُوں کٹھا نَئیِں کریندا او اُنہیں کُوں خُدا کنُوں بغاں کریندے۔ 31اِیں کیتے مَیں تُہاکُوں ݙسینداں جو بندے دا ہر گُناہ اَتے بُریاں ڳالھیں مُعاف کیتیاں ویسن پَر خُدا دے پاکرُوح بارے ٻولیا ڳیا کُفر مُعاف نہ کیتا ویسی۔ 32اَتے جیرھا اِبنِآدم یعنی میݙے خلاف ڳالھ کریسی او تاں اُونکُوں مُعاف کر ݙِتی ویسی پَر جیرھا خُدا دے پاکرُوح دے خلاف ڳالھ کریسی اُوندی مُعافی نہ اُونکُوں اِیں دُنیاں اِچ مِلسی اَتے نہ آوَݨ والی دُنیاں اِچ۔“
وَݨ اَتے اُوندا پَھل
(رَلدا مِلدا حوالہ: لُوقا 4:43-44)
33یِسُوع آکھیا، ”جے تُساں چَنڳاں پَھل چاہندو تاں وَل تُہاݙے کولھ وَݨ وی چَنڳاں ہووے، جے وَݨ چَنڳاں نہ ہوسی تاں او خراب پَھل ای ݙیسی کیوں جو وَݨ اپݨے پَھل کنُوں ای سُݨڄاتا ویندے۔ 34اَے نانگیں وانگوں اَتے بُرے لوکو! تُساں سارے وَل کیویں چَنڳی ڳالھ آکھ سڳدو؟ تُہاݙے دِل اِچ جیرھیاں ڳالھیں ہِن اُوہو تُہاݙی زبان تے اَندِن۔ 35چَنڳے بندے دا دِل چَنڳے خزانے وانگوں ہے جِتھوں چَنڳیاں شئیں نِکلدِن اَتے بُرے بندے دا دِل بُرے خزانے وانگوں ہے جِتھوں بُریاں شئیں نِکلدِن۔ 36مَیں تُہاکُوں اَہداں جو مَحشر دے ݙینہہ ہر بندے کُوں کیتی ڳئی ہر فضُول ڳالھ دا حساب ݙیوَݨا پوسی۔ 37تُہاݙے مُونہہ کنُوں نِکلیاں ہوئیاں ڳالھیں ای تُہاکُوں قصُوروار یا بےقصُور بݨیسِن۔“
شرع دے عالم اَتے فرِیسی یِسُوع کُوں نشان ݙکھاوَن دا اَہدِن
(رَلدا مِلدا حوالہ: مرقس 8:11-12؛ لُوقا 11:29-32)
38اِیندے بعد کُجھ شرع دے عالمیں اَتے فرِیسیئیں یِسُوع کُوں آکھیا، ”اَے اُستاد! اَساں تیݙے کنُوں کُوئی اَسمانی نِشان ݙیکھݨ چاہندے ہَیں۔“
39یِسُوع اُنہیں کُوں جواب ݙِیندئیں ہوئیں آکھیا، ”اِیں پیڑھی دے بُرے اَتے خُدا دے نافرمان لوک نِشان منگدِن پَر اُنہیں کُوں یُوناہ نبی دے نِشان دے سِوا ٻِیا کُوئی نِشان نہ ݙِکھایا ویسی۔ 40جیویں یُوناہ نبی ترائے ݙینہہ اَتے ترائے راتیں مَچھی دے پیٹ اِچ ریہا اُونویں ای اِبنِآدم یعنی مَیں ترائے ݙینہہ اَتے ترائے راتیں زمین اِچ دفن رَہساں۔ 41مَحشر دے ݙینہہ نِینوہ شہر دے لوک کھڑے تھِیسن اَتے اِیں پیڑھی دے لوکیں کُوں قصُوروار آکھسِن کیوں جو یُوناہ نبی دا پرچار سُݨ کرائیں اُنہیں اپݨے گُناہیں کنُوں توباں کیتی ہَئی پَر اِتھاں او ہے جیرھا یُوناہ نبی کنُوں وی ٻَہُوں عظیم ہے۔ 42مَحشر دے ݙینہہ سبا دی ملکہ وی کھڑی تھیسی اَتے اِیں پیڑھی دے لوکیں کُوں قصُوروار آکھسی کیوں جو او ٻَہُوں پَرے کنُوں سُلیمان بادشاہ دی سِݨپ دیاں ڳالھیں سُنݨ کیتے اَئی ہَئی پَر اِتھاں او ہے جیرھا سُلیمان بادشاہ کنُوں وی ٻَہُوں عظیم ہے۔“
بَدرُوح دا وَلݨ
43”جݙّاں کُوئی بَدرُوح کہیں بندے اِچوں نِکلدی ہے تاں او ویران جاہیں کنُوں لنگھدی ہوئی اَرام دی جاہ ڳولیندی ہے، پَر جے اُونکُوں اِینجھی کُوئی جاہ نہ لَبھے 44تاں او اَہدی ہے، ’مَیں اُوں گھر اِچ وَلا لڳی ویساں جِتھوں مَیں اَئی ہَم۔‘ او وَل آ کرائیں ݙیہدی ہے جو او گھر تاں خالی، صاف سُتھرا اَتے ترتیب نال ہے۔ 45اِیندے بعد او وَنڄ کرائیں سَت ٻئیاں بَدرُوحیں کُوں گھِن اَندی ہے جیرھیاں اُوں کنُوں وی بُریاں ہوندِن اَتے او ساریاں اُوں بندے اِچ وَڑدِن اَتے رَہندِن اَتے اُوں بندے دی حالت پہلے کنُوں وی ٻَہُوں بُری تھی ویندی ہے۔ اِیں پیڑھی دے بُرے لوکیں نال وی اِیویں تھیسی۔“
یِسُوع دی ماء اَتے بھیݨ بِھرا
(رَلدا مِلدا حوالہ: مرقس 3:31-35؛ لُوقا 8:19-21)
46یِسُوع اَڄݨ بھِیڑ نال ڳالھیں کریندا پِیا ہا تاں ݙیکھو اُوندی ماء اَتے بِھرا آئے اَتے او اُونکُوں مِلݨ کیتے پُچھدے پئے ہَن۔ 47کہیں یِسُوع کُوں آکھیا، ”تیݙی ماء اَتے بِھرا آئے کھڑِن اَتے تیݙے نال ڳالھ کرَݨ چاہندِن۔“ 48یِسُوع ایہ اَہدئیں ہوئیں اُوں کنُوں پُچھیا، ”میݙی ماء اَتے میݙے بِھرا کون ہِن؟“ 49اَتے اپݨے شاگِردئیں دو اِشارہ کریندئیں ہوئیں آکھیا، ”ݙیکھو ایہ میݙی ماء اَتے میݙے بِھرا ہِن۔ 50کیوں جو جیرھا وی میݙے اَسمانی باپ دی مرضی پوری کریندے اُوہو میݙا بِھرا اَتے میݙی بھیݨ اَتے میݙی ماء ہے۔“
Currently Selected:
متّی 12: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
