متّی 21
21
یِسُوع دا شہر یروشلم اِچ شاہانہ داخلہ
(رَلدا مِلدا حوالہ: مرقس 11:1-11؛ لُوقا 19:28-40؛ یُوحنّا 12:12-19)
1اَتے جݙّاں یِسُوع اَتے اُوندے شاگِرد شہر یروشلم پُڄے تاں زَیتُون دے پہاڑ اُتے وستی بَیتفگے اِچ آئے، تاں یِسُوع اپݨے ݙُو شاگِردئیں کُوں بھیڄیدئیں ہوئیں آکھیا، 2”سامݨے والی وستی اِچ وَنڄو اَتے اُتھاں پُڄدئیں ای ہِک ڳݙا ٻَدھی نظر اَؤسی جَیندا بچّہ وی اُوندے نال ہوسی۔ اُنہیں ݙُوہیں کُوں کھول کرائیں میݙے کولھ گھِن آؤ۔ 3جے کُوئی تُہاݙے کنُوں کُجھ پُچھے تاں اُونکُوں ݙسا ݙیواہے جو خُداوند کُوں اِنہیں دی لوڑ ہے وَل او اُنہیں کُوں ہُوں ویلے بھیڄ ݙیسی۔“ 4ایہ اِیں کیتے تھِیا جو نبی دی راہِیں آکھی ڳئی ڳالھ پوری تِھیوے،
5”شہر صِیُون#21:5 شہر صِیُون شہر یروشلم دا ݙُوجھا ناں جیرھا اُوندی تعظیم اَتے اہمیت کُوں ظاہر کریندے۔ دے لوکیں کُوں جیرھے میݙے ٻالیں وانگوں ہِن آکھ،
’ݙیکھ تُہاݙا بادشاہ تُہاݙے کولھ اَندا پئے،
او نرم طبیعت ہے اَتے ڳݙا اُتے ٻَہہ کرائیں اَندا پئے۔‘“
6او شاگِرد اُوں وستی دو لڳے ڳئے اَتے اُونویں ای کیتا جیویں یِسُوع اُنہیں کُوں آکھیا ہا۔ 7او ڳݙا کُوں اُوندے بچے سمیت یِسُوع کولھ گھِن آئے اَتے اپݨے چولے اُنہیں اُتے سَٹ ݙِتے وَل یِسُوع اُنہیں کپڑیں اُتے چڑھ ٻیٹھا۔ 8اَتے بھِیڑ اِچوں ٻَہُوں لوکیں اپݨے چولے رَستے اِچ وِچھائے اَتے ٻئے لوکیں وَݨیں دیاں لَڑیاں کَپ کرائیں رَستے اِچ وِچھا ݙِتیاں۔ 9اَتے بھِیڑ اُوندے اَڳوں اَتے پِچھُوں ٹُردی اَندی ہَئی او نعرے مَریندی اَتے اَہدی اَندی ہَئی، ”بادشاہ داؤد دے پُتر دی ہوشعنا یعنی حمدوثنا؛ برکتیں آلا ہے جیرھا خُداوند دے ناں کنُوں اَندے؛ اَسمان اِچ خُدا دی ہوشعنا یعنی حمدوثنا تِھیوے۔“ 10اَتے جیرھے ویلے یِسُوع شہر یروشلم اِچ پُڄا تاں سارے شہر اِچ تَھرتھلی مَچ ڳئی اَتے لوک پُچھݨ لڳے، ”ایہ کون ہے؟“ 11بھِیڑ اِچوں لوکیں وَلدا ݙِتا، ”ایہ صوبہ گلِیل دے شہر ناصرت دا نبی یِسُوع ہے۔“
یِسُوع ہَیکل اِچ
(رَلدا مِلدا حوالہ: مرقس 11:15-19؛ لُوقا 19:45-48؛ یُوحنّا 2:13-22)
12اَتے یِسُوع ہَیکل اِچ ڳیا اَتے اُنہیں سارئیں کُوں جیرھے اُتھاں کاروبار کریندے پئے ہَن کڈھ ݙِتا، اُوں ہَیکل اِچ رقم وَٹا ݙیوَݨ آلئیں دیاں میزاں اَتے کبوتر ویچݨ آلئیں دے پھَٹے کَلٹی کر ݙِتے۔ 13اَتے اُنہیں کُوں آکھیا”پاک کلام اِچ لِکھیا لاتھے،
’میݙا گھر، دُعا دا گھر اَکھویسی پَر تُساں اِینُکوں ڈاکُوئیں دا اڈّا بݨا ݙِتے۔‘“
14اُوں ویلے اَندھے اَتے مَنڈے لوک ہَیکل اِچ یِسُوع کولھ آئے اَتے اُوں اُنہیں کُوں شِفا ݙِتی۔ 15پَر وَݙّے مذہبی پیشوائیں اَتے شرع دے عالمیں جݙّاں یِسُوع دے عجیب کَمیں کُوں ݙِٹھا اَتے ٻالیں کُوں ہَیکل اِچ ”بادشاہ داؤد دے پُتر دی ہوشعنا“ یعنی حمدوثنا دے نعرے مَریندئیں سُݨیا تاں ناراض تھئے۔ 16اَتے یِسُوع کنُوں پُچھیا، ”کیا تُوں سُݨدا پَئیں جو ٻال کیا اَہدے پَئیِن؟“ یِسُوع اُنہیں کُوں جواب ݙِتا، ”جِیا سُݨدا پِیاں،“ اَتے اُنہیں کنُوں پچھیا، ”تُساں پاک کلام اِچ کݙاہیں نَئیِں پڑھیا جو تَیں نِکے اَتے کھیر پیندے ٻالیں دے مُونہہ کنُوں اپݨی حمدوثنا کراوئی؟“ 17اَتے یِسُوع اُنہیں کُوں چھوڑ کرائیں شہر کنُوں ٻاہر وستی بَیتعَنِّیاہ اِچ چلیا ڳیا اَتے اُتھاں رات گزاری۔
اِیمان دی طاقت
(رَلدا مِلدا حوالہ: مرقس 11:12-14؛ مرقس 12:20-24)
18ݙُوجھے ݙینہہ سویل نال یِسُوع شہر دو وَلیا اَندا ہا اَتے اُونکُوں بُکھ لڳی۔ 19اَتے اُوندی نِگاہ رَستے اِچ ہِک ہنجیر دے وَݨ تے پئی تاں او اُوندے کولھ ڳیا پَر اُوندے تے پَتریں دے سِوا کُجھ نہ ہا، بَس اُوں وَݨ کُوں آکھیا، ”اَڄ کنُوں بعد تیݙے اُتے کݙاہیں وی پَھل نہ لڳے“ اَتے او وَݨ ہُوں ویلے ای سُک ڳیا۔ 20ایہ ݙیکھ کرائیں شاگِرد حیران تھئے اَتے پُچھیا، ”ہنجیر دا ایہ وَݨ ہِکے لحظے اِچ کیویں سُک ڳئے؟“ 21یِسُوع شاگِردئیں کُوں جواب ݙِتا، ”مَیں تُہاکُوں سچّ اَہداں جو جے تُساں اِیمان رکھو اَتے بےیقینے نہ تِھیوو تاں جیویں مَیں اِیں ہنجیر دے وَݨ نال کیتے تُساں وی اِیویں کر سڳسو بلکہ اِیں کنُوں وی وَدھ کر گھِنسو، جے اِیں پہاڑ کُوں آکھسو جو تُوں پٹیڄ کرائیں سمنُدر اِچ وَنڄ ڈھہہ تاں اِیویں ای تھیسی۔ 22جے تُہاݙا اِیمان ہوسی تاں جو کُجھ وی تُساں دُعا اِچ مَنگسو او تُہاکُوں مِلسی۔“
یِسُوع دے اِختیار اُتے سوال
(رَلدا مِلدا حوالہ: مرقس 11:27-33؛ لُوقا 20:1-8)
23اَتے یِسُوع ہَیکل اِچ آ کرائیں تعلیم ݙِیندا پِیا ہا تے وَݙّے مذہبی پیشوائیں اَتے قوم دے وَݙّیرئیں اُوندے کولھ آ کرائیں پچُِھیا، ”تُوں ایہ سارے کَم کَیندے اِختیار نال کریندیں اَتے کَئیں تَیکُوں ایہ اِختیار ݙِتے؟“ 24یِسُوع جواب ݙِتا، ”مَیں وی تُہاݙے کنُوں ہِک سوال پُچھداں، اِیندا جواب ݙیو تاں وَل تُہاکُوں ݙسیساں جو مَیں ایہ کَیندے اِختیار نال کریندا ہاں۔ 25مَیکُوں ݙساؤ، یُوحنّا دا بپتِسمہ ݙیوَݨ کَیندے وَلّوں ہا، کیا او اَسمان وَلّوں ہا یا اِنسانیں وَلّوں؟“
او آپت اِچ بحث کرَݨ لڳے، ”جے اَساں آکھوں او اَسمان وَلّوں ہا تاں او آکھسی، وَل تُساں اُوندا یقین کیوں نہ کیتا۔ 26اَتے جے اَساں آکھوں جو اِنسانیں وَلّوں ہا، تاں اَساں لوکیں کنُوں ݙَردے ہَیں کیوں جو لوک یُوحنّا کُوں نبی مَنیدِن۔“ 27اِیں کیتے اُنہیں یِسُوع کُوں جواب ݙِتا، ”اَساں نَئیِں ڄاݨدے“ اَتے اُوں وی اُنہیں کُوں آکھیا، ”وَل مَیں وی تُہاکُوں نَئیِں ݙسیندا جو مَیں ایہ سارے کَم کَیندے اِختیار نال کرینداں“
ݙُو پُتریں دی مثال
28وَل یِسُوع اُنہیں کُوں ہِک مثال سُݨائی، ”ہِک بندے دے ݙُو پُتر ہَن او پہلے وَݙّے پُتر کولھ ڳیا اَتے آکھیا، ’پُتر! اَڄ اَنگوریں دے باغ اِچ وَنڄ کرائیں کَم کر۔‘ 29اُوں جواب ݙِتا، ’مَیں کَینا ویساں‘ پَر بعد اِچ اُوں اپݨا خیال بَدل گھِدا اَتے لڳا ڳیا۔ 30وَل پیِوُ نِکے پُتر دو ڳیا اَتے اُونکُوں وی اِیویں آکھیا اَتے اُوں جواب ݙِتا، ’جِیا سَئیِں! مَیں ویساں‘ پَر ڳیا کَینی۔ 31ہُݨ ݙساؤ اِنہیں ݙُوہائیں اِچوں کَیرھے پُتر اپݨے پیِوُ دا آکھݨ مَنیا؟“ اُنہیں جواب ݙِتا، ”وَݙّے پُتر،“ تاں وَل یِسُوع آکھیا، ”مَیں تُہاکُوں سچّ اَہداں جو مصُول گھِنݨ آلے اَتے بازاری رنّاں تُہاݙے کنُوں پہلے خُدا دی بادشاہی اِچ لڳیاں ویسِن۔ 32کیوں جو یُوحنّا تُہاکُوں نیکی دی راہ ݙکھاوَن آیا پَر تُساں اُوندے اُتے اِیمان نہ گھِن آئے پَر مصُول گھِنݨ آلیں اَتے بازاری رنّیں اُوندا یقین کیتا اَتے تُساں اُنہیں کُوں ݙیکھ کرائیں وی نہ پچھتائے جو اُوندا یقین کر گھِندے۔“
باغ دے ٹھیکیداریں دی مثال
(رَلدا مِلدا حوالہ: مرقس 12:1-12؛ لُوقا 20:9-19)
33یِسُوع ہِک ٻئی مثال سݨائی، ”ہِک زمیندار، اَنگوریں دا باغ رَہایا اَتے باغ دے چَودھاروں چُوکاندا ݙیوایا اَتے اَنگوریں دا رَس کڈھݨ کیتے ہِک تَلا وی کَھٹوایا اَتے چوکیداری کیتے مُنارہ بݨوایا، وَل او باغ ٹھیکداریں کُوں مُٹے تے ݙے کرائیں پردیس چلیا ڳیا۔ 34جیویں ای اَنگوریں دے پَھل چاوَݨ دا موسم آیا تاں اُوں اپݨے ٻاہنئیں کُوں باغ دے ٹھیکداریں کولھ ٻھیڄیا جو او اُنہیں کنُوں مالک کیتے پَھل دا حصہ گھِن آوَݨ۔ 35اَتے ٹھیکداریں اُوندے ٻاہنئیں کُوں پکڑ کرائیں ہِک کُوں کُٹیا، ݙُوجھے کُوں قتل کیتا اَتے ٻئے کُوں سنگسار کیتا۔ 36وَل زمیندار ٻئے ٻاہنئیں کُوں ٹھیکداریں کولھ ٻھیڄیا پَر ٹھیکیداریں اُنہیں نال وی اُوہو سلُوک کیتا۔ 37چھیکڑ اُوں اپݨے پُتر کُوں اُنہیں کولھ ٻھیڄیا جو او میݙے پُتر دا تاں لحاظ کریسِن۔ 38پَر پُتر کُوں ݙیکھ کرائیں ٹھیکداریں آپت اِچ صلاح کیتی جو اِیہو باغ دا وارث ہے آؤ اَساں اِینکُوں قتل کر سَٹوں تاں وَل اِیندی جائیداد ساݙی تھی ویسی۔ 39اُنہیں اُونکُوں پکڑ کرائیں اَنگوریں دے باغ کنُوں ٻاہر کڈھ کرائیں قتل کر ݙِتا۔ 40جݙّاں اَنگوریں دے باغ دا مالک اَؤسی تاں اُنہیں ٹھیکداریں نال کیا کریسی؟“ 41اُنہیں جواب ݙِتا، ”او اُنہیں بَدکاریں کُوں فنا کر ݙیسی اَتے اَنگوریں دے باغ کُوں ٻئے ٹھیکداریں دے حوالے کریسی جیرھے موسم تے اُونکُوں پَھل اِچوں اُوندا حصّہ ݙیسِن۔“ 42وَل یِسُوع اُنہیں کُوں آکھیا، ”کیا تُساں پاک کلام اِچ کݙاہیں نَئیِں پڑھیا،
’جیرھے پَتھر کُوں مسترئیں بیکار سمجھ کرائیں بُھکا سَٹیا اُوہو کونے آلا پَتھر بݨ ڳیا اَتے ایہ خُداوند وَلّوں تھِیا۔ اَتے ساݙی نِگاہ اِچ ایہ ٻَہُوں عجیب ہے؟‘
43اِیں کیتے مَیں تُہاکُوں اَہداں جو خُدا دی بادشاہی تُہاݙے کنُوں گھِن کرائیں غیر قوم کُوں ݙے ݙِتی ویسی جیرھی اُونکُوں ویلے تے پَھل ݙیسی۔ 44اَتے جیرھا اِیں پَتھر اُتے ڈھاسی او ٹوٹے ٹوٹے تھی ویسی پَر جَیندے اُتے او پَتھر ڈھاسی، او اُونکُوں پھیہ ݙیسی۔“ 45یِسُوع دیاں ایہ مثالاں سُݨ کرائیں وَݙّے مذہبی پیشوا اَتے فرِیسی سمجھ ڳئے جو او ایہ ڳالھ ساݙے بارے کریندا پئے۔ 46اَتے او یِسُوع کُوں پکڑݨ دی کوشش اِچ ہَن پَر لوکیں کنُوں ݙَردے ہَن، کیوں جو لوک یِسُوع کُوں نبی سمجھدے ہَن۔
Currently Selected:
متّی 21: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
